［復出］上個月倉內美股表現檢閱 (Patreon)

檢閱返上個月倉內美股表現

過去一個月標普指數跌1%咋喎，好多咩？

最差嘅四隻：Paypal，Facebook，Shopify，Palantir

但上個月愛馬士SPGI一樣大跌

四大金剛：IWD，IDEV，EMXC，VB

表現最好嘅，反而係兩隻科技股

VISA 迪士尼翻生

舊經齊 Costco，Altria，Verizon 頂住

結論

呢篇叫做復出後第一篇，暫時短期肯定未可以返返以前咁形式，亦都未必可以日日出，但頂住先。都講過，我唔會夾硬嚟，在做到嘅範圍下盡做。但亦唔想一路播雪花又收大家錢。

咁所以，呢排啲文，你會發現可能冇乜圖，冇乜link，靠你自己去搵了。冇法，因為對我嚟講打字還可以，但貼埋圖或link之類會有點吃力。仲有，會多錯字，朋友（幫我錄音嗰個）可能會改，但佢唔得閒或改漏嘅，大家請諒。

檢閱返上個月倉內美股表現

開場白講完，搵返紀錄，原來我對上一篇Patreon係1月28日，都真係戰到最後一刻，因為我係1月29日做手術的。

咁就大約係當一個月，順手又睇下，成個市場發生咗咩事，我啲股票又點，同埋或者分享些小想法。但，由個股開始，因為比較慳時間。今篇先講美股，希望過兩日講埋港股。

Attachment你會搵到個Excel，就係我持股嘅美股。都差不多包晒，除咗垃圾倉堆嘢（唔知係乜嘅睇舊文，搵目錄）。或者冇包到隻聯合利華（Unilever，已買，我都唔記得出咗文講未）

仲有，有堆咩YALA WISH之類，早早高位已經死晒咁滯嘅，就冇再貼。最主要因為跌得太多，可能得返幾千蚊，升跌都唔影響任何嘢，亦唔想扭曲咗啲數。

個表有過去一個月，同埋年初至今。主要我就講過去一個月。我文中講「一個月」「上個月」等等，全部係指1月21日至2月21日，明冇？

過去一個月標普指數跌1%咋喎，好多咩？

首先睇指數，最底有。可能同你估計唔同，標普指數只係跌1%多啲,，納指亦都跌唔夠2%。我手術呢一個月，股市表現完全唔算差（跌一兩個%好閒啦）。反而係之前（1月頭三個星期）跌得勁。

但，我估好多讀者，過去一個月，個倉都唔止蒸發1或2%．所以都係嗰個教訓：跑贏指數，真係相當難的。個股當然過瘾，特別係升嗰時，但絶大多數人（包括我自己），都係該加大指數ETF嘅比重

至於我嘅倉位？唔係好肯定，但照計應該跑輸大市些少。留意我有計平均數有計中位數，正路應該係中位數準啲。但就當你計我全部equal weight，一個月即係跌1-3%，年初至今跌13-15%，還好，同指數唔會爭好遠。況且我仲一路有啲每個月買入，另外仲有港股嘛（雖然港股呢個月差過美股）

呀當然，我依然係一股都冇沽過嘅，港股美股乜股都冇。

然後睇睇啲個股。實情，同我之前講嘅嘢都差不多。

最差嘅四隻：Paypal，Facebook，Shopify，Palantir

首先，由最差嘅睇起。最差四隻（Paypal，Facebook，Shopify，Palantir），十分明顯。但留意，四間都係業績後大瀉的。你話業績差又好似唔係，可能係指引差。仲有特別留意，除咗Palantir外，其他三間都係相當大嘅公司，仲要係有錢賺嘅，估值亦唔係去到痴線級（特別係Facebook）。可以有幾個解讀。首先，根本我就唔會買得太多太過發夢，完全蝕錢嘅公司。唔係冇，但少，呢個表都冇乜。另外，亦真係因為啲最雞嘅公司，舊年年尾已經大跌，或者係今年年頭。你可以話之後蔓延到啲基本面再強啲嘅公司。你甚至可以樂觀地諗，跌到呢啲嘢都開始大瀉，照計市場最差情況已過。而畀你見到，上個月嘅大市表現真係唔差.

但上個月愛馬士SPGI一樣大跌

好啦，由最差嘅，掃上去，你會見到SalesForce Tesla之類，不意外。高估值科技股嘛。但你仲會見到愛馬士SPGI，就肯定唔係科技股，而業績亦都唔差。咁但，呢啲公司亦都一路貴，所以殺估值嘅浪潮，唔止係科技股。但當然你睇返年初至今表現，都係跌近兩成，唔係倒水式咁跌。

打上你見到BlackRock，做殯儀嘅SCI，以及羅氏藥廠，都係咁情況。舊經濟，但高估值。

好啦，講完比較差嘅嘢，我想講啲好啲嘅。

四大金剛：IWD，IDEV，EMXC，VB

不過在此之前，我地先講咗堆指數ETF。VOO同QQQM就跟返標普指數同納指,冇乜好討論，舊年下半年我已經個個月買，都話想加大返呢部份，但當然而家都未係好多。如果呢啲東西夠多，你個倉咪唔會同個大市爭好遠

但更值得講係，四大金剛，IWD，IDEV，EMXC，VB。唔知係乜嘅舊舊文，呢四隻亦係舊年下半年開始個個月買嘅。你見我真係sense到美股市況唔多對路的，但當然點解冇全部轉晒過去，「點解冇高位反手造淡」，就另一個課題了

但講返呢幾隻嘢，亦都叫做幫到下手。IWD都係美股，但價值股ETF，上個月冇跌過咁滯，年初至今跑贏指數一大截。EMXC係新興市場走中國，上個月直頭有得升！年初至今亦近乎唔使跌，幫補返啲。IDEV就係成熟市場走美國，咪歐洲日本，上個月冇EMXC或IWD咁好，但一樣幫到下。

比較有趣係隻VB，買細價股的，你見之前一路跑輸，但呢個月就跑出了。

呢四大金剛，過去幾個月我成日寫，真係畀你見到，唔好獨沽一味買美股，買美股都唔好只係買晒科技股增長股。見到啦？

表現最好嘅，反而係兩隻科技股

好啦，睇返表現最好嘅。最好兩隻，你估唔到，SNAP同埋Airbnb，有趣的，因為兩隻都係科技股，而且冇乜錢賺。SNAP就固然因為業績意外地好，Airbnb就唔多唔少同疫情正常化有關。但亦唔多唔少因為兩隻之前都插唔少，你見真係交到貨嘅，市場都仲係有人買的，唔使太絶望。掉轉講，你之前走去低位沽咗止蝕嘅，又錯失咗啦喎。Airbnb年初至今有得升添呀，奇葩。不過坦白講，兩隻我都只係買得少少，影響不大的。

VISA 迪士尼翻生

拉落去你仲會見到迪士尼，同埋VISA，兩間都值得講，迪士尼股價舊年極頹，但就真係夠殘，價值股，今年翻生。VISA仲勁，今年仲要有得升。但記唔記得之前業績又係跌到七彩？亦係因為估值貴，但只要你個生意依然健在，增長仲有，啲估值又唔係去到極之離地，慢慢地啲股價又會追返上嚟的。所以點解你間公司嘅生意真係十分重要，因為決定咗你有冇得守。

你見類似，但冇咁強嘅，係Twitter同NetFlix，都係高估值，業績後大跌，但都唔係去到完全冇錢賺，或者痴晒線嘅估值，所以你見都似乎跌定咗。

舊經齊 Costco，Altria，Verizon 頂住

表現比較好嘅，仲有Costco，煙仔股Altria，Verizon之類嘅舊經濟嘢。但後兩者都頹咗好耐，亦係真係去到某個位就吸引，所以唔好因為啲股票跌又覺得唔會反彈，正如唔好因為升又覺得以後都升。講到尾，都係路遙知馬力。

最後，你見Big Tech，普遍都係OK的，因為幾間業績都勁。就一路支持到個估值。最例外當然係Facebook，我係覺得唔應該跌咁多的，所以亦都繼續持有。

結論

講咗成堆，即係點？實情同我以前講嘅差不多。過去半年你都好明顯見到係殺走啲高估值嘅發夢股，價值股開始抬頭。但會維持幾耐？實在好難估。

你可以做嘅，都係三樣嘢。第一，保持一個夠分散嘅組合，真係唔夠錢嘅，咁你不如買幾隻指數ETF算，個股真係畀你過下癮咋。而基於呢點，我亦唔會走去沽晒啲科技股，新錢咪可能買多啲價值嘢舊經濟嘢，但冇必要捉個趨勢，好難的。

當然最重要係，有錢繼續放落股市。

呢排我在出面嘅文，唔止一次寫過，投資就係一個相當精神分裂嘅遊戲。即係點？即係，你覺得好應該買股票，唔買走寶，合埋眼都羸錢時，就係最唔應該買。你覺得股市玩完，買嘅正傻仔，輸到懷疑人生時，就係最應該買。

但，實行起上嚟，係極之難嘅。所以退而求其次，我係唔會走去理個市況好定壞的。反正大家唔係下年退休，市況差嘅，你咪有機會用平啲嘅銀碼入到市咯。

已經盡力了，希望之後盡快可以寫返詳細啲，全面啲，同寫得密啲。但，暫時仲係未得，甚至未知幾時有下一篇。盡量吧。

＝＝＝＝＝＝＝＝＝＝＝＝＝＝＝＝＝＝＝＝＝

Facebook Page：「君子馬蘭頭」ivanlirsesearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

我本大作：呢篇文亦有介紹係乜。7萬字，128蚊，最簡單去HomeBlogger訂，可以去佢地尖沙咀辦公室拎，或者加20蚊會順豐畀你，建議Whatsapp佢地客服以免摸門釘。暫時大家訂都幾順利。遲下書局都會有。另外20蚊或40蚊會員年費會員送書一本（記住年費先有），遲下安排，但最簡單係你買咗我回水畀你。