免佣，咁券商賺乜？ (Patreon)

差不多一年前，我就寫過RobinHood之類。呢排又有人再問。肯定嘅係，呢個成功嘅模式，引嚟不同嘅公司抄，但內裏搵錢嘅方法都係差不多。

可以肯定嘅係，RobinHood上市公司喎，當然要賺錢。但既然唔收佣，咁點賺錢？你要明白，總係有啲方法賺你錢。

明明個個睇《願者上網》（The Social Dilemma）時又識講If you are not paying for the product, you are the product。咁事實亦往往係咁，冇免費午餐。免費電視免費報紙嘅，靠廣告商畀錢。社交網絡嘅，好大程度亦係靠廣告商。咁但券商呢？收廣告費冇可能夠維皮，所以唔收佣，靠乜方法搵錢？

答案，四個字。Payment for order flow，PFOF

實情，你在某啲券商上面嘅Trade，佢根本唔係幫你放出去交易所，而係幫你射畀一啲「大戶」，多數係做高頻交易（High frequency trading，HFT）嘅。如果係RobinHood嘅case，就包括舊年好多爭議嘅Citadel。

RobinHood有乜著數？就係「大戶」每單會回返水畀佢。我手頭上未有最新嘅數，但2020年，公司都已經收咗7億美金嘅PFOF，相信2021年點都過10億？你諗下，如果傳統方法收佣有冇可能收到咁多？

咁但，「大戶」點解要畀錢買？當然又係有著數。「大戶」做嘅，係高頻交易，可以打你尖，食你價。舉個例子，可能你放個買盤係3.9，然後明明有機會3.8買到，但「大戶」搶先一步攝咗你位，3.8蚊買咗再3.85賣畀你。你就變相畀貴咗。

Citadel就係畀錢買PFOF最多嘅「大戶」，2020年畀咗超過400億美金！咁，你都識講對沖基金唯利是圖（當然，唔通開善堂），咁點會死錯人？畀得400億美金，就即係可以賺返遠超過400億美金。絕大係極大嘅一門生意。

你可以睇到，只係Citadel一間，就佔咗RobinHood PFOF嘅一半以上，咁大嘅客仔，點會大家唔係千絲萬縷？

睇到呢度，你應該心諗：咁都得？犯唔犯法？

答案好簡單，講就合法，但係Robinhood舊年已經俾人罰款罰左6500萬，不少國家包括英國、加拿大和澳洲等國家，已相繼禁止訂單流回佣模式，歐盟亦準備跟隨英國的做法。幾時變全面禁止就真係不得而知

PFOF的確係一件非常踩界嘅事，你可以話好多爭議，灰色地帶。因為，涉及到個客係咪Best Execution嘅問題。絕大多數人都同意，金融機構要為個戶拎到Best Execution，出面賣緊10蚊我冇理由幫你14蚊買。但，講就易，實際上點定義，就有排拗了。

咁如果射咗啲單去第度，仲係咪Best Execution？就真係上法庭先知。當然你可以諗下我上面舉嘅例子，似乎個客係得唔到最靚嘅價。

PFOF有人話太多利益衝突，透明度低，而個客得不償失。亦基於類似嘅理由，英國同埋加拿大，都係禁止PFOF嘅。見到啦？你問「合唔合法」，都好睇在邊度，但係趨勢係點，要選擇邊間就自己唸啦但最關鍵係，如果券商以訂單流的差價作為收入主要來源，一旦收緊到時券商主要收入受到影響就一定會影響運營，到時所衍生嘅問題就真係唔止小小差價咁簡單啦。