邊個話要成日睇住個市？聯儲局暗示3月加息，so？Tesla 業績。 舊年得一半基金經理跑輸大市，近年最少，然後點？點解個市坐晒過出車，VIX都只係得30?2021的10大投資教訓。你在網上爆紅咗，咁但將名氣轉為收入？ (Patreon)

港美市況　—　邊個話要成日睇住個市？

宏觀攻略—　聯儲局暗示3月加息，so？

個股直擊—Tesla 業績

每日一圖 — 舊年得一半基金經理跑輸大市，近年最少，然後點？點解個市坐晒過出車，VIX都只係得30?

Good Read — 2021的10大投資教訓。你在網上爆紅咗，咁但將名氣轉為收入？

FB Post Summary —從缺

港美市況　—　邊個話要成日睇住個市？

1. 港股方面，繼續係相當強勢，你見外圍風聲鶴淚，但恒指冇乜點跌過。都係啲舊經濟嘢頂住，中移動941直頭6個新高，始終有個股息頂住，匯控5亦強。

2. 雖然昨晚啲中概股又大插，你睇ADR嗰啲都弱。但近排港股好堅挺，又睇下頂唔頂得住。

3. 不過當然好多人嘅焦點，係睇美股

4. 講之前，真係又畀你睇下，我啲倉嘅抗逆力都幾強。香港主倉HK4就固然跑贏大市，你見美股主倉US4，直頭有得升的。呢排啲港股真係幫忙唔少。

5. 睇返美股，呢排真係少睇少錯。真係都幾過山車。你如果睇呢三日嘅收市變動，冇乜嘢丫，三日波幅都好細，標指同上星期五比，只係跌咗1%

6. 但如果你睇單日波幅就好勁，星期一二已經係「小奇蹟日」。星期三晚，個VIX原本跌到30樓下，之後又上返30之上（舊文寫過，呢個可以係一個訊號）

7. 結果星期三晚，道指一度升500點，變到跌200，都真係有返咁上下波幅。

8. 有趣嘅係，我估如果香港讀者，好少會由頭睇到尾（唔使瞓咩，你又唔係我），反而係好事。我唔同意股票係要成日睇住的，你諗下都知，我又買港股又買美股，咁唔通唔使瞓？

9. 睇得多，咪驚得多，分分鐘又錯手走去亂咁沽添呀

宏觀攻略—　聯儲局暗示3月加息，so？

10. 另外，快手講一講，昨晚聯儲局議息嘛。唔多唔少因為咁而美股由升轉跌。但你話有乜好大訊息？我覺得近乎冇的。留意下個時間，最初聯儲局出份聲明時，美股仲係大升，但到主席鮑威爾開始講嘢，就嚇親市場。

11. 議息聲明同之前有乜改變，你可以睇呢度，但我認為都唔使特登睇。

12. 至於鮑威爾講嘅嘢，可以睇呢兩篇（呢度，呢度），經濟日報嘅報導有時都不錯的。首先基本上係暗示3月一定加息。但全世界都知啦，冇乜新意。然後講不排除每次開會都加息，話有好大加息空間，照計都唔係好意外嘅嘢。至於咩縮表，更加完全冇講任何嘢，只係話加完息會討論。亦即係3月前都唔會討論

13. 咁即係點？即係真係冇乜嘢講過。固然道指個走勢差，但你見去到期貨時段又升返。

個股—Tesla 業績

14. 實情雖然我有，但我唔係好關心，不過好似好多讀者關心，就寫兩句。又，個Excel update咗，但又唔係全部數update晒

15. 簡單嚟講，亦係相當勁嘅業績，股價盤後先跌後升（但話時話，盤後啲嘢受好多影響，有時未必好準，你見之前微軟都係先插後升）。

16. 不過，Tesla 業績，好多時真係non event，因為公司早早會公佈啲出車量付運量咁，呢啲比起盈利往往更重要。咁早幾次業績，都仲好多人關心啲Bitcoin．咁但而家因為公司啲「本業」一路大，啲Bitcoin上落就冇咁影響條數了

17. 睇CNBC嘅，呢度，夠詳細，甚至我都冇睇公司網頁。我只係想你留意一樣嘢：公司增長相當強勁，同埋而家都幾賺錢，同NetFlix幾相似，

18. 上季收入177億，高過預期嘅166億好多，按年升65%。以一間成10000億市值嘅公司嚟講，真係好勁。每股盈利2.52，亦係高過預期嘅2.36。如果你睇實數呢，上一季純利23億，按年已經8倍。仲有留意，賣車嘅收入高過預期，按年升70%，而啲carbond credits 甚麼嘅收入就低過預期，仲要按年跌，咁當然前者先係主業。

19. 好啦，又係計計數時間。將最近一季嘅數年度化（我知公司高增長緊，咁樣會低估咗，但保守啲，最多我人手再調高少少）。一年公司收入700億，照計可以做到800億。盈利一年92億，照計100億冇乜問題。公司市值9500億，即係14倍銷率，95倍市盈率。當然都仲係好貴，但又唔係想像中咁離地，特別係公司仲係交到高增長喎。

20. 結論？你真係生意同盈利一路高增長嘅，就真係仲頂得住個估值。Tesla今年跌22%，差過指數，但肯定都好過好多發夢股，因為公司個增長慢慢地拉返個估值落嚟。

21. 不過最大問題始終係，已經差不多10000億市值，仲有幾多空間？

22. 仲有嗰個永恒嘅問題，蝕錢係咪冇所謂？Yes and No．你睇Tesla同NetFlix，冇錯係蝕錢嗰時升得最多，因為好多人唔信。反而到賺錢時股價就冇乜料到，因為股票係炒預期。但至少，例如Tesla呢啲，因為最後真係賺到錢做到生意，所以你見個股價有個譜的，唔係嗰啲高位跌八九成咁。咁你可以諗返，最初嗰堆meme 股，有幾多隻真係可以修成正果？你做到Tesla同NetFlix就得，但有幾多間？

每日一圖 — 舊年得一半基金經理跑輸大市，近年最少，然後點？點解個市坐晒過出車，VIX都只係得30?

23. 舊年得一半基金經理跑輸大市，近年最少，然後點？—留意個圖係「跑輸」嘅比例。舊年得50%，係近年最低，即係基金經理表現好，或係「冇咁差」。不過最好笑係，你留意下，2012 2014 2016 年都係咁—然後下一年就會好多人跑輸。證明真係好多只係一年貨仔，靠運氣。你睇最右邊亦見到，時間拉得越長，係越多人跑輸嘅。成篇文可以睇呢度。

24. 點解個市坐晒過出車，VIX都只係得30？—　同上面講嘅現象差不多，呢度你見到兩條線，藍色係每個交易日升跌嘅波幅，只計收市水平。咁橙色計埋intra day．咁根據定義橙色一定係大過藍色啦，一路都係。但你見近期係拉開咗好多的。

Good Read — 2021的10大投資教訓。你在網上爆紅咗，咁但將名氣轉為收入？

25. 2021的10大投資教訓- 非常之好嘅文，有機會我應該獨立寫篇專題，但你亦可以自己睇，不過最好睇晒成篇。只睇呢度10個點，你係學唔到嘢嘅。你發現口號同rule係係冇用嘅，你係要知道人地背後套思想先得，否則人人睇畢菲特金句都發達。甚至作者一開頭已經講呢啲10大教訓嘅問題：市場規則一直轉，而你睇一年嘅嘢，真係可以做「教訓」？無論如何，我唔係全部同意，但將佢10個教訓列舉如下：黃金不能抗通脹。估值唔重要。強勁嘅盈利可以支持天價估值（特別係零息時期）。牛市持久力超乎你想像。泡沫爆唔等於市會跌。經驗冇你想像中咁有用（尤其牛市）。懷疑論者聽落好醒但樂觀者搵到錢。刷鞋童指標已死。唔好清楚唔好all in．大家都好想收高息。

26. 你在網上爆紅咗，咁但將名氣轉為收入？　—　相當有趣嘅課題，好多網紅嘅主要收入，都係嚟自品牌贊助（我都有，但唔係主要收入，主要收入係你地）。咁明星可能有經理人幫佢傾，但普通素人，開乜價好呢？係好深嘅問題。我最初都遇過。你開得平，又好似蝕咗（特別係如果你知人地開咩價），開得貴呢？又驚冇咗個機會。咁講到尾，其實係一個好好嘅經濟學問題，就係睇「機會成本」。例如你嘅時間值唔值錢，你本身有幾多收入。即係如果我係學生哥，咁出個Facebook post 500蚊，我都覺得OK啦，可能花我半個鐘一個鐘，好過去補習。咁但例如我而家，就唔會啦。因為如果幫朋友一次半次嘅還好，但我真係拎嚟收入嘅，咁可能真係用咗我三四個鐘，先得兩三千蚊，又未必好值喎，咁所以，就有好多中介人啦。可以好似傳統經理人咁分你一份，又或者係佢接返嚟收個客5000，然後畀你3000。但呢啲玩法都唔長久，然後有人搞啲類似GlassDoor嘅嘢，即係公開晒啲品牌畀幾錢，一個database咁，但我成日覺得會有人出古惑，又或者驚稅局查，又或者會有「鬼」，啲品牌自己買通啲人報大報細數。

FB Post Summary —從缺

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。