ivanliresearch

美股：兩日低位升上嚟，兩日高位回，我就唔知你可以點炒了。股己買（一）：聯合利華Unilever。業績速評：VISA相當勁，盤後升5%，今年跑贏大市。蘋果仲勁，盈利1000億，盤後升5% (Patreon)

Published:

2022-01-28 04:34:49

Imported:

2022-09

Downloads

Download FAAMG NTS.xlsx

Content

美股：兩日低位升上嚟，兩日高位回，我就唔知你可以點炒了

股己買（一）：聯合利華Unilever

業績速評：VISA相當勁，盤後升5%，今年跑贏大市。

業績速評：蘋果仲勁，盈利1000億，盤後升5%

1. 因為等埋蘋果業績，同埋各種原因，就日頭先出呢篇文。所以港股就不多講了。

美股：兩日低位升上嚟，兩日高位回，我就唔知你可以點炒了

2. 但首先講講美股市況，你話好核突又得，唔係好差又得。都係嗰句，你睇住反而驚，道指即市蒸發咗600點跌幅。記唔記得星期一同星期二就係大插然後升返上嚟？星期三就係大升然後跌。拉勻，呢四日其實指數冇乜變到。但你嗰啲走去即時捉嘅，我就唔知點捉了。人都癲。

3. 當然，指數就冇乜大變動，但個別股份可以跌好多，而我啲HK4 US3都係企得幾硬。所以亦係不厭其煩咁提醒大家，真係唔好太過集中。不幸地我見好多讀者都係成手科技股，仲要係FAMMG以外嘅嘢，偏偏就係呢期殺得最勁嘅嘢。

4. 實情你買嗰時，都知啲公司業務麻麻地，有啲根本冇錢賺。咁講真你都係貪心啫。貪心本無錯，但你又係咪承受到個風險？仲有，時機上，你在升晒之後先飛落去，就難免危險啲。

5. 之但係，你見我又教你100% invested，而我而家都仲係的。但你見我呢兩個月都係買啲舊經濟股，例如之前嘅Costco，羅氏藥廠Roche．雖然呢兩隻都好難話叫做好平。

6. 仲有今日買咗嘅：聯合利華Unilever。

股己買（一）：聯合利華Unilever

7. 留意英國/荷蘭上市，但我買美股，冇乜特別原因，主要係手頭有美金（你地嘅訂閱費嘛，多謝先），同埋好似我買嗰時歐洲已收市。

8. 唔止一次講呢間公司，卒之買咗，雖然時機未必係最好，但邊有最好丫。係喎，之前抽咗上嚟，但唔通我又等等等咩。話咗月尾前散晒啲現金，就照做。實情仲未散晒，可能下星期一再買多隻股票。到時話你知。

9. 關於公司嘅基本嘢，自己睇維基吧。FMCG（Fast moving consumer goods），品牌一大堆，最出名應該係Dove同埋Lipton（剛賣咗部份）。

10. 近年公司就似乎係經營不善嘅，原因就不詳細講，但睇股價當然見到跑輸。固然睇你由邊度計起，但似乎都係唔多好，差過對手嘅雀巢同埋P&G。

11. 咁但，尤幸呢啲公司，冇同股不同權，所以管理得太差，就會有人入局，甚至踢走現有管理層。唔好以為係必然，近年嗰啲科企，玩同股不同權，就點都踢唔到個CEO（往往亦係創辦人）走的。例如？例如Peloton個 CEO，股東想踢走，但都幾難。

12. 公司近排新聞唔少，先係原本買GSK嘅業務，但對手開天殺價，公司就拉倒，似乎投資者幾歡迎。然後就係有啲「拆骨基金」入局，要求公司出售業務呀，分拆上市呀咁。

13. 留意，原來公司2月10日出業績。如果我冇睇錯，因為唔係美國公司，所以佢地半年先出一次業績，第一第三季只會出啲Trading statement，冇盈利的。所以都有啲難計數。

14. 不過，點都幾肯定，公司絶對唔係貴嘅，升都冇乜點升過。你可以十分十分簡略地（上Financial Times可以睇到街估嘅數，但當然都係大約，同埋只限訂戶），當公司應該係20倍市盈率樓下，然後差不多有4厘股息率。

15. 應該…..唔會可以衰得去邊啩。

業績速評：VISA相當勁，盤後升5%，今年跑贏大市。

16. 幾間公司出咗業績，盤前有MasterCard 同埋Altria，前者冇，後者我有。盤後就有VISA同蘋果，兩隻我都有

17. 見到盤後VISA同蘋果都升得勁。但其實之前兩日美國運通（AMEX）業績勁，都應該估到Master card 同VISA都唔會點差，但唔敢貿貿然叫你地買啦。

18. 至於VISA嘛，高位都差不多插咗20%，估值向來貴，加上早前Amazon在英國唔收VISA，嗰時股價都跌咗一浸。但後來又轉軚。你見今年VISA反而幾硬淨，跑贏大市的。留意仲未計盤後反彈。

19. 教訓？都好簡單，你不能走去因為「壞消息」就沽咗隻嘢。仲有，之前講到啲咩Buy now pay later嘅後起之秀，而家股價又點？Affirm 之類，一個月已經插咗一半。但鬼叫你鍾意趕潮流？

20. 你見VISA盈利同收入都仲升到25%，叫做頂住下個估值。

業績速評：蘋果仲勁，盈利1000億，盤後升5%

21. 好啦，唔好查，就咁憑記憶諗下：蘋果上次股價新高，達到3萬億美金市值，講緊係幾時嘅事？

22. 原來只係今個月頭。

23. 講返今次業績，一個字，好勁。希望可以支持下美股。你見盤後都升得勁。

24. 睇CNBC嘅，呢度。官網都有，份嘢亦都易明。我個Excel都update咗，Attachment有，但唔係全部數都整晒，自己小心。

25. 好啦，業績係勁到一個點的。單季收入係史上新高，但預咗啦，因為第四季一定係旺季。另外令人鼓舞嘅係，公司對呢一兩季嘅展望好正面，相信供應鏈嘅問題會改善。

26. 睇數，單季收入1239億，按年升11%，當然高過街估嘅1187億。各樣產品就你自己睇了，但除左iPad以外（收入升14%），全部產品收入都係好過預期。

27. 純利去到346億，按年升20%，喂，講緊全世界最大嘅公司，話冇增長喎，都仲有20%（當然你不能將呢346億年度化，因為第四季一定係最勁）。更過癮，你睇每個盈利，2.1，高過街估嘅1.89，而按年25%．

28. 係喎，純利升20%，但每股盈利升25%。因乜？回購咯。

29. 再睇落去，服務收入強，高過預期好多，升 24%，而產品只係升9%。留意服務收入銀碼仲唔係十分大，佔總收入16%（但其實已經多過晒任何一款產品嘅收入，除咗iPhone），但一來增長快，二來毛利高好多。

30. 我在Excel有大約計，服務講緊73%毛利，而產品只係38%。加上增長快（只賣產品嘅始終會見頂），所以真係蘋果嘅命根。亦因為服務收入高過預期，所以拉到個毛利率43.8%，近期最強。

31. 值得一提嘅係，產品中Mac機收入都強，按年升25%，但始終佔公司總收入唔多（9%）

32. 另外，睇地區。邊度增長最勁？正係大中華，按年升 21%，留意上年同期已經係高基數。咁順手你可以諗下，啲友話大陸人窮到冇錢買，係咪事實？當然你可以話大中華全部都係台灣同香港買嘅。留意嘅係大中華銷售收入，而家已經係歐洲嘅九成，相信就快會過頭。又，相當奇怪嘅係，日本收入按年係跌的，原因不明。