美股VIX上到30，之後點？你話呢？聯！合！利！華！逆市升9%！邊個話估值唔重要？邊個話加息周期美股跌？邊個話跌20%就熊市？認人專家。投資民主化嘅嘢。法國將最大嘅半導體廠收歸國有 (Patreon)

快評兩句　—　美股VIX上到30，之後點？你話呢？

大師冇點你—　聯！合！利！華！逆市升9%！

每日一圖 — 邊個話估值唔重要？邊個話加息周期美股跌？邊個話跌20%就熊市？

Good Read — 認人專家。投資民主化嘅嘢。法國將最大嘅半導體廠收歸國有

FB Post Summary —聽聽師弟怎樣說，Wordle 攻略，道指跌1000點

1. 週末寫咗兩篇專題，一篇講ASML，一篇講Netflix業績後續，同埋微軟同蘋果業績preview

2. 我諗我應該去到極限了，聽日可能冇文，因為仲有過年要提早交雜誌嘅稿，仲有星期五又要睇醫生。

3. 不過，可能最後又有文呢，話唔埋嘅。只係如果星期二晚冇嘅，唔使嚟問我咩事，星期三晚實會如常。

快評兩句　—　美股VIX上到30

4. 其他部份寫得長，加上市況波動，所以快講。咩道指7連跌，一度跌1000點（實情好濕碎，仲要即市反彈），或者港股（實情仲好強，美股死晒，烏克蘭又好似打仗，都只係跌300點）就唔詳細講

5. 但一句：鍾意短炒或有啲閒錢嘅，而家美股似乎短期見底（短期咋下）。唔鍾意短炒嘅，或者冇乜閒錢嘅，亦唔好放棄。記住stay invested，唔撈都算（實情唔好特別撈），千萬唔好走去沽。

6. 冇呃你，我一股都冇走。而港股倉HK3跑贏大市，美股倉US4都有得升。如果走去咩「止蝕」，又唔知點算了

7. 道理應該好簡單，但到你身處其中又唔係咁易，正因為咁你先要有我嘛。

8. 幾樣好快嘅嘢。首先，正如標題講，VIX上到30，Facebook我都有寫。

9. 但，以下呢堆嘢，我當然唔會即時貼上Facebook（可能過幾日先）。

10. 冇錯，別人恐懼時我貪婪，好多人都同意，但實際上難做的。因為幾時先知咩位係最恐懼？好難捉。有時彈一日又跌返幾日。

11. 所以，如果有數字輔助，咪好咯。

12. 呢兩個圖我唔記得有冇貼過，但都貼多次

13. 首先，VIX去到30後入市，贏錢嘅機會幾大。有幾大？寫到明，86%嘅機會，100日後贏錢。不過冇話畀你知贏時贏幾多，輸嗰時又輸幾多，我唔肯定個9.8%係乜，可能係平均回報？咁你話，100日太耐啦，等唔到。咁點？幫你唔到，擺明時間係你朋友，個圖好明顯，咁你鍾意自廢雙臂讓人車馬炮嘅，我幫你唔到

14. 第二圖，上星期VIX一個星期抽咗50%，史上第17高（但留意1990年後先有數字）。咁一樣，你睇圖見到，呢啲位買落去，打後嘅勝算好大。你渣得半年以上嘅，冇得點輸。但你堅持話你等唔到嘅，咁睇多次上面一段。

15. 祝大家平安。記住，跌嗰時唔買，唔通升到癲晒先買？

16. 仲有一個指標：唔止一個我嘅好朋友，都入市買。留意佢地唔係做金融嘅（呼，我在金融界冇乜好朋友，哈哈），但都係我覺得叻嘅人。直接啲講：兩個都富貴過我。咁，既然佢地唔係富二代，搵到錢嘅人，應該都係叻。加上我識佢地咁耐，又知道佢地唔係中六合彩得返嚟。固然佢地嘅投資回報，我唔知道。但即使佢地係靠其他領域搵到錢，我都覺得係叻人，值得參考。都話投資係你個人社格嘅延續。我唔認為唔同領域嘅能力完全唔相關，正如我成日講，C朗打籃球一樣打羸你。好多醫生轉行做第啲嘢，一樣掂，因為佢地本身就係叻人。（但當然，如果你係踢波好叻或唱歌好叻，就應該同投資冇乜必然關係）

大師冇點你—　聯！合！利！華！逆市升9%！

17. 原因好簡單，有「拆骨專家」似乎會狙擊公司。呢類玩法，多數係啲公司明明值錢，但營運得唔好，就會有人搞局，踢走現有嘅管理層，或者迫佢地做某啲嘢咁，可能係賣某啲業務，或者分拆啲嘢上市。香港嘅例子，近年最出名係東亞銀行，但之前仲有領展，甚至經典嘅中巴。

18. 呢隻既係大師冇點你，但又係走寶。因為我自己冇買。但之前都寫過唔止一次呢間公司，最新係上星期，佢地買GSK單嘢拉倒後，實情我再之前都講過，上星期講明今個月買（即係，剩返呢幾日）。但結果等下等下，咪升晒咯。唉。

19. 不過唔緊要，我冇買啫，但有其他讀者有買！有紀錄為證。咁我冇贏錢，讀者有，都替佢高興嘅。唔通我想讀者輸錢咩。

20. 又，我都同你分享埋我個心路歷程。咁我仲買唔買隻嘢？理論上，我既然話買股票睇幾倍回報，咁當然唔會介意7%。但又實際上，個市咁跌法，佢都升7%喎！咁驚唔驚之後補跌？定係咁嘅市況都有得升證明夠強橫？

21. 無論如何，等多幾日先。但話咗月尾買股，當然係會買，不可能無了期等等等。爭在買乜

每日一圖 — 邊個話估值唔重要？邊個話加息周期美股跌？邊個話跌20%就熊市？

22. 邊個話估值唔重要？—只係上星期嘅圖，呢兩日可能仲慘烈。但畀你見到殺估值有幾勁，邊個覺得唔重要？以為人炒你又炒就得？當然，實際上好難計到幾時先貴幾時先平，啲嘢10倍市銷率一路升上30倍，你笑泡沫只會畀人當你傻仔。咁可以點做？首先，分段入市，冇人叫你呢兩年先飛去買美股，之前十年做緊乜？另外，如果你公司嘅增長夠勁，咁之後你個股價都係會返嚟嘅。估值由30倍市盈率變10倍，但你盈利升到4倍咪得，但當然可能要啲時間，但總好過永世都返唔到上嚟。月頭寫股市101，或者半個月前寫中信銀行，都提過類似嘅嘢。

23. 邊個話加息周期美股跌？—　類似嘅嘢呢排成日講。又係睇數字，由每　次加周期開始時計（即係第一下加息），睇返前一年同打後兩年嘅表現。你見到，加息前，加息後，都係照升的。不過有趣嘅係，1990年後，有少少唔同，似乎第一次加息要跌一排先，但後勁強。1990年前呢？就係開始加息時升，但之後冇乜力。原因？唔知。可能同1990年後都冇乜見過高通脹有關？

24. 邊個話跌20%就熊市？　—十分簡單嘅圖，如果你計星期一晚嘅低位，納指差不多（應該剛好爭少少！），就高位跌咗20%。好啦，你知，會有人話「熊市」。但我想知，咁又點？熊市又點？即係之後會繼續跌？定反彈？冇喎，連呢樣嘢都話唔到你知。咁，理嚟做乜？事實上，納指過去十幾年嘅大牛市，升十幾倍，當中試過10次調整（高位跌10%），2次熊市（高位跌20%）。咁我落咗車，又點算？當然冇人保證之後都會升。但至少，高位跌咗20%，唔係你唔應該買股票嘅理由。

Good Read — 認人專家。投資民主化嘅嘢。法國將最大嘅半導體廠收歸國有

25. 認人專家—　Guardian 嘅文，成個系列仲有寫其他有「異能」嘅人。例如呢篇，講呢個女仔過目不忘，可以認到一個陌生人，之前在邊度見過。不過，我諗嘅係，如果幾百年前可能仲有用，可能皇帝重重有賞，幾百年後可能就冇乜用。你各種技能有冇用，都要睇個世界點變。想知多啲，佢Youtube仲有條片講。

26. 投資民主化嘅嘢—　又係講RobinHood，投資民主化，其中一樣嘢話，以前抽美股IPO係大戶嘅專利，而家RobinHood將呢樣嘢推到令普遍散客都有得玩，原本呢，就真係好難批評，因為又冇人迫你買，畀多個選擇你啫。不過作者講返，至少在美國呢，宣傳IPO係有十分嚴格嘅規管。咁而又咁啱得咁橋，RobinHood send親畀佢叫佢抽嗰啲新股，都係爆晒煲嘅。咁係咪巧合？就唔知了。但我就真係傾向覺得啲小朋友抵死，真係冇人搵支槍指住你叫你買股票的。

27. 法國將最大嘅半導體廠收歸國有—故事有些少長篇，但唔太難明。簡單嚟講，就係法國最大嘅半導體廠，中資有股份，原本似乎會成間控制。咁所以法國政府就益人不如益自己，將間私人公司，變咗做國企。當然呢啲就擺明干預「自由市場」，但，而家嘅環境又同三十年前唔同了，況且涉及中資。

FB Post Summary —聽聽師弟怎樣說，Wordle 攻略，道指跌1000點

28. 聽聽師弟怎樣說　—冇乜特別，間嘢冇錯係我中學師弟開，但大家各不相識。我都幫襯咗好多次，佢先出嚟相認。又，佢在銅鑼灣都有間舖，好食的，但當然我唔係幫佢賣廣告。仲有亦可以聽下佢嘅奮鬥史，佢應該細我六七年起碼，但一樣都係教你「後生仔唔好咁計較」「要捱得」「儲多啲錢」。冇錯，佢係賣咗層樓搞餐廳。但，佢唔係最初有買樓，又何來有樓賣？而其實佢係沙士買樓嘅，但嗰時佢先6000蚊人工，仲要過海返工（不過返工包兩餐，佢話除咗坐車根本唔會有錢）

29. Wordle攻略 —就真係近排好多人玩嘅word game，學霸本色，話你知好多遊戲，都係可以提高勝算嘅。鍾意你可以睇返medium全文，有多啲圖。

30. 道指跌成千點　—　新鮮滾熱辣，香港時間兩點寫嘅文。1000點嘅跌幅，之前911或者金融海嘯都冇見過。但當然你稍為心水清都知，當時嘅1000點係10%，而家嘅1000點只係3%。又，你仲見到，股市真係增長的。以前1000點好多，而家濕碎。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。