ASML：就係收入年年升20%，純利年年升30%嘅一間公司 (Patreon)

我使唔使做半導體廠先可以買ASML？？（反正你啲網友都唔係）

公司嘅競爭優勢好簡單，就係超高嘅技術門檻

但，阿豬阿狗都話自己高科技啦，點驗證？

其實唔難，就係收入年年升20%，純利年年升30%嘅一間公司

1. 今期你有福了，因為我嘅周末專題起個孖！首先因為有啲長，但之前我都唔會特別理，但今次特別啲，因為真係幾個唔同嘅題目，咁索性一拆二。當然我保留返嚟緊可能寫少一次嘅可能，忙呀（但正路下星期六我都會寫，所以可能係星期二或四跳走一次）

2. 呢篇講ASML，業績後講一講，但主要係講間公司，只係一次業績反而冇乜好講。另外，早前出咗篇講NetFlix業績後大插，同埋嚟緊嘅微軟同蘋果業績preview．

我使唔使做半導體廠先可以買ASML？？（反正你啲網友都唔係）

3. 好，呢間ASML，在Facebook成日講，因為夠偏，極少人好似我咁早講咁早買，留意之前好長時間公司都冇乜新聞，你唔會聽人講起。呢度反而少講，雖然都唔少讀者買咗。

4. 今次呢段，旨在大約講下公司嘅生意同財務。至於技術嘢？一來我唔識，二來我估你都應該唔識，三來，我從來唔認為你或我要「識」呢啲嘢，先可以投資。掉轉頭，當然有人比我識得多，但點先叫「識」？我寫咗咁多年文，做咗咁多年金融，都唔敢話自己「識」？借問聲你嗰啲以為自己「識」嘅朋友，又有幾「識」？好殘忍嘅一句：咁叻，點解唔係早過我買？

公司嘅競爭優勢好簡單，就係超高嘅技術門檻

5. Anyway，想睇公司簡介嘅，呢段Youtube我覺得不錯。想知咩係光刻技術，咩係光刻機，維基百科有教你。但我唔認為你睇咗對你有乜好大幫助，咁但當然，有興趣又得閒嘅，識多啲嘢總係好。只係唔好以為自己做四十年茶餐廳就識買餐飲股咁解。

6. 作為一個投資者，我根本唔使知呢啲嘢，正如我唔使知愛馬士點設計，我知你地鍾意，貴一貴都買，就夠啦。當然我知埋你地點解鍾意更好，咁我會知道，唔會大陸求其搞間公司可以鬥平。

7. 同樣道理，我買ASML時，我只係需要知道一樣好簡單嘅嘢：光刻機好貴，技術好高，而你整晶片必定要用，冇就整唔到。食水深，而公司壟斷咗頂尖技術，你唔幫襯佢根本冇第間，高端model八九成嘅市佔率。根本冇人可以鬥平，你亦冇能力自己整。咁，仲使睇其他嘢？仲要同啲科技L上網泥漿摔角討論？（其實仲要睇一樣嘢：估值。公司咁惡，但都只能係盈利有保證，股價就冇人可以保證的）

但，阿豬阿狗都話自己高科技啦，點驗證？

8. 但留意，間間公司都話自己高科技架啦，正如個個都話自己有技術門檻，每一間餐廳都點用心。咁唔好意思，實際上點睇？

9. 其實係睇數字睇到。好簡單，你餐廳咁巴閉嘅，點解冇人幫襯？點解減價先有人嚟？同樣道理，如果你公司真係巴閉嘅，當然應該賺到好多錢，唔係同人地鬥平鬥爛

10. 同樣地，個個都話自己個職位好重要架啦，個個話自己underpaid，好難替代，冇咗自己間公司會冧。但事實，你睇下份人工咪知。你覺得你不能替代嘅，聽朝同老細講，叫佢係咁意加20%人工。咁咪你知你係咪好重要。

11. 所以我地就係驗證下。

12. 今次我地由公司最新嘅業績，望望呢間公司。報導唔多，呢篇還好。或者你上公司網頁睇，都尚算易明（啲數字，唔係啲技術）。個Excel Attachment 有，有啲官方文件我都放咗上嚟。

13. 開始之前，講幾樣最基本嘅嘢。首先，荷蘭公司，歐洲同美國上市，但財務報表係歐元。話埋你知，而家一歐元對1.13美金。以下數字，歐元為準，除咗股價，我用美股

14. 仲有，公司係上游，做equipment，客仔就係台積電三星Intel之類。大陸公司都幫襯，但因為美國阻止，所以最高端嘅機唔畀出口去大陸（假使有一日撒銷，記住飛入去買ASML！）。而亦因為啲機太貴，又數量少，你不能偷偷地走去的。億幾兩億美金一部呀。

15. 然後望下股價，今年跌咗13%，跑輸台積電（但之前幾年都跑贏，況且根本唔同業務，唔知有乜好比）。如果計高位嘅，900蚊（留意美金），而家700，跌22%。以一隻估值冇平過嘅公司嚟講，實在濕碎，亦因為公司真係相當賺錢，同個護城河高（但唔係無敵，太貴嘅，話知你乜公司都可以大插，只係只要你一路有盈利，股價可以慢慢由個盈利拉返上嚟咁解）

其實唔難，就係收入年年升20%，純利年年升30%嘅一間公司

16. 首先睇全年，了解下間公司。見到啲數唔難明，亦算穩定。收入5年超過一個開，對上5年時都係咁上下。個CAGR大約20%，留意，係四次growth，每年升20%，四次就一個開。（又，macrotrends有之前嘅數，但美金，好煩的，所以等我遲下得閒先拎返公司嘅數字再入）。

17. 之後睇毛利率同純利率，毛利率去到45-50%，純利率25%左右。高定低？蘋果都係咁上下咋（當然微軟Google Facebook做軟件或平台會再高啲）。以前寫過，LV都係15%純利咁上下（你以為好好賺？要Marketing嘛）

18. 再睇，毛利嘅增長，就高過純利，咁即係啲機嘅成本冇升得咁快。毛利率自然升。

19. 除咗產品成本外，仲有乜成本？估都估到，當然係研發。但叫做同收入同步咁升。其他就係啲普通SG and A，而呢部份開支少過研發好多（話時話，啲工程師人工計落研發定SGA？我都唔肯定，但應該後者，我估）

20. 毛利減完呢堆嘢，咪operating income，再減埋稅之類，咪純利。

21. 咁你見，因為毛利一年升25%，成本就一年升唔夠20%，拉開咗，個純利就一年30%架啦。「幾咁簡單」

22. 都真係好簡單的，我當個估值不變，純利一年升30%，股價就一年30%，四年已經一蚊變三蚊，再複利上去好驚人（但當然唔會無止境咁）。

23. 仲有，未講完。你見到公司嘅每股盈利，升得仲快。Basic咪計股數，Diluted計埋啲潛在嘅攤薄（呢度情況應該係啲公司高層嘅option）。咁睇Diluted啦，你見純利CAGR 30%，每股盈利就32%。唔好以為爭少少。拉得長，又係好大分別。只係睇5年（4次增長），就係純利升185%，每股盈利升200%

24. See？重覆一次，成盤生意，就係收入一年升20%，毛利升25%，成本升唔夠20%，純利升30%，每股盈利升到32%嘅故事。

25. 但，點解每股盈利升得多過純利？聰明嘅讀者知，當然因為回購。詳情睇公司網頁，又，公司嚟緊會用90億歐元做回購。市值2600億，即係大約回購3.5%股本，都唔細。

26. By the way，公司係有派息的（歐洲傳統？），派得唔少添。點計？你見個派息比率（100蚊純利派幾多），都近三成，剛剛去到38%，絶對唔低。但股息率就算吧啦，1厘都冇。點解？因為估值貴咯。

27. 幫你睇埋個估值，我進取小小，用下年嘅估值，因為公司有指引話估今年收入升到20%，咁我亦估純利升20%（正路唔止，但保守啲）。

28. 即係，今年收入223億歐元，純利71億。而家市值2600億，即係12倍市銷率，37倍市盈率。市銷率就不能同其他公司直接比，亦因為高純利率拉高。但睇市盈率，37倍當然唔平，但既然個純利似乎可以30%增長，咁又唔係離譜地貴。所以你見都真係冇勁插。

29. 留意公司有寫埋賣咗幾多套光刻系統，舊年係309套，而收入186億，即係一套買6000萬歐元，咁高端嘅（EUV）當然係億億聲了。

30. 最後，留意下啲net booking value，就係啲到咗手嘅訂單，但未入帳做收入。大約可以由呢度睇到將來嘅收入。

31. 大家睇完後，就會比較了解一間好嘅公司，應該係點。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。