［有Excel］　NetFlix 業績大插 拆局＋蘋果微軟業績 preview (Patreon)

NetFlix 業績 – 因乜插22%？點算好？

微軟蘋果業績前瞻　—　科技股玩完冇？

1. 今期你有福了，因為我嘅周末專題起個孖！首先因為有啲長，但之前我都唔會特別理，但今次特別啲，因為真係幾個唔同嘅題目，咁索性一拆二。當然我保留返嚟緊可能寫少一次嘅可能，忙呀（但正路下星期六我都會寫，所以可能係星期二或四跳走一次）

2. 呢篇講Netflix業績，同埋嚟緊嘅微軟蘋果業績。另一篇講ASML

NetFlix 業績 – 因乜插22%？點算好？

3. 除咗FAAMG，另外五間科企NTSTP（個名我作的，冇任何意思），我都多數會季度寫一篇。上次呢度，11月尾，唔使睇返，純畀你參考係乜。個Excel在Attachment有

4. 首先睇嘅當然係股價。堆NTSTP隻隻都相當貴，呢輪當然好大件事。上次（11月尾）到而家，平均跌32%，年頭到而家就跌24%。NetFlix正係跌得最多嗰隻，但係因為最新業績後一日跌22%，先後來追上。

5. 比較下嘅，上次同而家，標指跌6%，納指跌14%。年頭到而家情況亦差不多，呢堆NTSTP，全部跑輸大市。當然係因為估值。不幸地除咗Pinterest外，隻隻我都有，雖然唔係太多。

6. 另外可以比較下（同一個Excel），同期FAAMG嘅跌幅，就細好多，甚至跑贏納指（但好大程度因為蘋果）。

7. 所以真係基本嘢，估值重要，有盈利重要。係早兩年成班小朋友以為唔重要啫。

8. 講返Netflix，好懶嘅，話你知，業績唔差，但指引差，同埋真係太貴了。而家跌咗落嚟，都未算平。但始終公司已經搶佔咗市場，有加價能力，照計可以一路頂住，睇下啲盈利增長幾時幫到消化個估值。

9. 報導可以睇CNBC，或者睇公司網站。我亦都順手upload埋啲嘢上嚟。

10. 簡單嚟講，收入77億，季度新高，同預期差不多，按年升16%，增速同上季一樣。每股盈利1.33，直頭遠高過預期。

11. 至於上客？第四季上咗828萬，亦高過預期嘅819萬。不過比公司自己嘅指數850要低。亦有人話，第三四季推咗咁多嘢，但都仲係未見個增長令人嘩一聲，咁到底仲有乜未訂嘅人會訂？

12. 咁做乜插得咁勁？因為個未來指引差。

13. 公司預今年第一季，只會上到250萬客，上年第一季講緊398萬（而上年第一季已經畀人覺得好少），仲有，似乎街係預緊693萬，就真係爭好遠。但，根據公司嘅數，咁即係到第一季尾，訂戶總數按年升8%，實情同呢幾季唔係爭太遠。

14. 個人覺得，除非中共倒台，否則NefFlix點都係好快要面對增長見頂嘅問題，邊度搵咁多新客？公司一路都希望大家焦點放在其他地方，例如係公司有加價能力，早早在韓國試過，最新在北美加，個人估就唔會流失好多客。同埋再下一兩次嘅業績，大家焦點就會去咗嗰度。

15. 另外，記憶中幾次NetFlix業績後，股價都大波動嘅。好似係跌嘅居多。

16. 呢個圖係公司自己嘅，公司出嘅指引，同最後嘅上客數字。見到多數公司都係比較保守，多數都最後好過自己指引嘅。

17. 然後可以睇埋，公司預期今年第一季收入79億，即係按年只升10%。咁真係幾大問題喎，之前幾季係過20%，最近兩季都仲有近16%。

18. 亮點少少嘅？公司預今年第一季嘅operating margin去到22%，剛剛嗰季只係8%。仲有，純利可以去到13億（係，公司係有錢賺的！），剛剛一季係6億。

19. 不過留意，公司對一一季，都仲係negative free cash flow。雖然已經唔再係之前幾乎要爆煲咁嘅情況，而公司係預今年會正現金流嘅。

20. 好啦，照計大家都同意，公司有相當嘅護城河。正如我一路講，下個月加價10%，你唔會cut咗佢。不過如果公司真係由高增長，變到開始收成多錢賺嘅階段，難免估值會受壓。

21. 留意個Excel嘅估值，我仲未計埋剛剛嘅一季，因為其他公司未出，廢事太亂。（但股價update咗）。咁自己計一次，我用埋公司估嘅今年第一季數字，咁，12個月嘅收入，係304億（舊年二三四季加今年第一季），12個月嘅純利，47億。

22. 大插落嚟後，市值1760億。6倍市銷率，37倍市盈率。平定貴？當然好難答，佰但該好難叫平，特別係你見到公司最新一季純利，只係升12%（不過你計舊年全年，就高過2020年86%嘅）

23. 仲有乜？睇下啲上客。見唔見，歐非中東嘅總客，已經差不多超過北美？上季亦係增長大戶。不過幾意外上季北美都有增長，仲要個每戶平均收入（ARPU）係升嘅。嚟緊加價後，應該點都會流失啲。

24. 拉美方面，上客冇其他地方咁多，但加到價。仲有，亞太依然上得多，但個ARPU仲要跌，似乎上咗啲窮客。

25. 留意將來嘅業績，訂戶數字必定下降，大家嘅焦點一定係在ARPU，應該係公司樂見嘅（亦冇其他選擇）。所以睇下嚟緊加價走幾多人，就決定之後股價了。留意嘅係，呢類公司加價，成本係零，唯一問題就只係走幾多人，唔走嗰啲，加幾多就全部變晒公司嘅純利（OK，要交稅）。

26. 當然，我依然相信公司有機會賣廣告。可能唔係咁快，但如果加價發現多人走，就會諗呢樣。

27. 結論？我反正買咗，又潛埋水（我大約500蚊買，即係出業績前都仲在水面，一下就打咗落水底），就繼續持有。未買嘅？我又覺得唔使急。

28. 得閒可以留意埋迪士尼嘅情況，因為NetFlix嚟緊燒錢應該會小心啲，但迪士尼雖然話財政好多，不過可能都未必好得幾多？始終都受累於疫情。

29. 話時話，記唔記得有一期Netflix市值仲大過迪士尼？而家Netflix 1760億，迪士尼…..2500億。唔好忘記，迪士尼舊年表現已經係相當差。

微軟蘋果業績前瞻　—　科技股玩完冇？

30. 又到業績期，星期二微軟，星期四蘋果，兩間都收市後，Tesla就星期三，今日唔寫住，之後都未必。再講一次，Zachs呢個表好有用，記住用。

31. 一般每季都會寫個FAAMG嘅業績前瞻，亦會有業績後回顧。咁雖然呢期唔當炒，但都快手寫少少。上次嗰篇在呢度，唔使睇返，純畀你參考係乜

32. 照舊，有個Excel，Attachment有。同上面NTSTP同一個。

33. 先講微軟，預收入508億，按年升18%。每個盈利預2.32，升14%。收入會首次突破500億，但無論收入增長同盈利增長，都係放慢嘅。

34. 實情冇乜特別好講，焦點都係Azure．當然亦實會有人問收購Activision Blizzard 嘅事，但首先都未完成，另外大家都知唔會咁短期有咩收成。可能係會想聽下CEO講下遠大計劃，或者講下點處理Activision Blizzard啲醜聞或官司。

35. 至於全球最大市值嘅蘋果，星期四收市後出。之前寫過，蘋果1萬億同2萬億市值後，都係急回，連埋股市都係。今次去到3萬億亦不例外，夠晒邪。

36. 預收入去到季度新高，1183億。但留意第四季係旺季（過節嘛），所以再之前一年都係高基數，所以1183億，講緊只係按年升6%。每股盈利預1.8，按年升12.5%，亦係大幅放慢。

37. 看點？咪又係嗰啲。iPhone銷售，回購力度，仲有眾多官司等等。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。