Netflix跌22%，我有，但我星期五成個倉只係輸1.4%，靠乜？港股連升五星期，1800點。納指就2008年以嚟最差開局。加息股市升得多過減息。標普600跑贏羅素2000。Nike神枱之路。 唔好畀市場牽住你走。 (Patreon)

大師冇點你—　Netflix跌22%，我有，但我星期五成個倉只係輸1.4%，靠乜？

快評兩句　—　港股連升五星期，1800點。納指就2008年以嚟最差開局

每日一圖 — 加息股市升得多過減息。標普600跑贏羅素2000

Good Read — Nike神枱之路。 唔好畀市場牽住你走

FB Post Summary — 遊戲股。入珠人。六合彩頭獎七注中。理文化工盈喜

1. 應該週末專題先寫NetFlix同ASML，短短地。貴就兩隻都貴的，跌完落嚟都仲相當貴，所以我呢排都係諗啲其他股票。

大師冇點你—　Netflix跌22%，我有，但我星期五成個倉只係輸1.4%，靠乜？

2. 好啦，聰明嘅讀者當然估到答案，分散嘛。悶？悶得過你唔聽？

3. 但又睇真啲。我個美股倉，星期五都跌3%（睇US3）喎！跌得多過指數。咁好合理啫，都話隻NetFlix 跌22%

4. 咁點解我成個倉只係跌1.4%？因為我有港股嘛！

5. 唔止，仲有其他嘢的。

6. 篇幅關係我唔多講，但你睇呢個表應該明。恒指表現最好不用講，但記唔記得EMXC都係我呢幾個月力買嘅嘢？仲有IDEV同IWD，呢啲嘅傷亡程度低好多。

7. 相反，你留意返，舊年邊個仲不停咁話要清倉港股，all in納指，仲要納指都嫌唔夠快，玩到TQQQ嗰啲嘅，你可以睇下有乜後果。

8. 又或者，我當你只買一隻NetFlix。好公司啦，係咪？有盈利丫。有護城河，有加價能力。但，你個倉一晚蒸發22%，你點算？九成都係急急止蝕，然後對股票絶望—直到下一次泡沫臨爆前無耐先仆入市。

9. 唔係黑心亦唔係講笑，真係見好多人，係呢兩年先買美股的。之前咁多年做緊乜？我好似講嚟講去都係嗰啲嘢，但，有幾多人真係有聽？

10. 記住啦，而家跌市，唔買股票，咁唔通升到頂時先買？而家咪你儲貨嘅機會。但唔好問我幾時會見底。雖然我估短期應差不多會有反彈，「但冇話唔會再跌」

11. 你諗下，你成個倉都係NetFlix，包你瞓唔著。同我有港股有EMXC有IWD，照舊食得安心瞓得好，分別係咪好大？

12. 最後補充，你見IWG同IEMG仲勁過EMXC，好合理，今年中資股翻生嘛，但舊年咪又個個打死都唔敢買，但我不但冇沽，仲有每個月加啲。有冇老點你？

快評兩句　—　港股連升五星期，1800點。納指就2008年以嚟最差開局

13. 港股嘅，真係強到你唔信，十足十早幾年美股咁（雖然我都仲好懷疑全年有冇得升）。你睇星期五，跌200 點都抽返上。

14. 當然星期五晚堆中概股就大瀉了，都強咗好多日。但你見夜期又只係趺200點多啲，仲係強過美股好多。ADR就差啲（留意夜期早過ADR好多收工），但都唔係美股嗰種跌法

15. 恒指不經不覺連升5星期，彈1800點，8%。呢，就差不多係你啲網友話「清倉港股」之後。

16. 美股就惡劣咯，唔止係NetFlix差，你見納指一星期跌8%，爆疫之後最差嘅一個星期。

17. 如果你計年頭到而家，納指跌13%，係金融海嘯以嚟最差嘅一年。

18. 留意跌勢極之全面，七成納指股份高位跌20%，有一半跌咗40%，誇唔誇張？真係因為大嗰啲頂住咋，細嘅仲恐怖。

19. 幸好我都仲有啲舊經濟股頂下，但只係減低傷亡，美股倉星期五都係跑輸指數（有NetFlix嘛）

20. 我仲想你留意一樣嘢：記唔記得舊年港股一年跌15%，好多專家即時好多理由解釋？由政治到防疫到移民潮到政策，乜都有得講，又話金融中心不再。Maybe，但，納指一個月已經跌咗13%，又點解釋？又係咪金融中心不再？

21. 哦，你話因為縮表加息。咁但，點解港股又唔跌？

22. 我冇乜答案，你問我當然係答你估值。但我想你留意：好多嘢，真係只係narrative，人就係鍾意聽呢啲故事。但你發現根本只係有咗現象先作個故事出嚟。

23. 點算？冇乜點算。當然keep住買。我有冇話你知我會唔買？月頭買晒啲指數ETF啦，仲有少少閒錢，月尾買埋啲個股。下個月一樣繼續。跌時唔買，升到痴線先買？當然唔好諗住你買完就即時止跌升，「多數掉轉多啲」。但唔可恥，發現timing 差—咪唔好捉timing咯

每日一圖 — 加息股市升得多過減息。標普600跑贏羅素2000

24. 加息股市升得多過減息—類似嘅嘢都貼過，事實證明一切。你睇美股加息後嘅一年表現，反而好過減息後。一來多數大件事先要減息，二來亦係炒預期。所以點會驚加息而唔敢買股票？你話唔係喎，今次仲有縮表喎。咁首先，冇兩次係完全一樣啦。另外，之前都縮過表丫，結果美股咁多年，係得2018要跌（多得侵侵開打貿易戰）

25. 標普600跑贏羅素2000—留意兩隻都係美國小型股指數，呢度指嘅係嗰兩隻ETF。舊文寫過。標普600係IJR，羅素2000係IWM。舊文都有講，絶大多數年份，IJR都跑贏IWM，唔知點解。

26. 我睇到呢個圖時，即時望埋隻VB。結果見到了，今年表現都係IJR最好，VB第二，IWM包尾，但IJR同VB唔算爭好遠，暫時我都係繼續每個月買VB.

Good Read — Nike神枱之路。 唔好畀市場牽住你走

27. Nike神枱之路—其實係書摘，講brand building，呢篇用Nike做例子。好多人誤解，以為品牌只係個logo，或者個設計。當然唔係。作者話頭，品牌係一個short cut，等用家唔使用腦。作者講返1997年時Nike嘅大醜聞，啲廠用童工，環境惡劣，被踼爆後股價一晚跌50%。然後點樣「洗白」？就係真係要求啲廠全部提高透明度。作者話傳統嗰種公關呀，廣告呀已經過時，好簡單，企業做啲乜，就係你間嘢嘅品牌云云。我個人係唔多同意的，好多嘢，narrative啫，睇你點演繹之嘛。

28. 唔好畀市場牽住你走—好啱大家睇（包括我），特別係舊年嗰種心理，相信大家都有同感。買完嘢即升，梗係自己係叻仔，時機捉得好，於是又會想買大啲，買多啲，升市就係咁。然後發現自己啲嘢升得唔夠快喎，只係普通咋喎，人地啲新奇嘢升得仲勁喎。於是自己驚死執輸，FOMO。爭住去買發夢股去買crypto，慌死人地發達冇自己份。留意，我都有做呢啲嘢，但我控制住我嘅注碼，唔會沽晒啲其他嘢去all in．我發嘅係小夢，有啲人係春秋大夢，所以夢醒時有啲人痛啲。最後作者話你知，之前嫌貴嘅，而家又敢唔敢買？係架，可能買完再跌，但呢啲咪係買貨嘅好機會。

FB Post Summary — 遊戲股。入珠人。六合彩頭獎七注中。理文化工盈喜

29. 死未，早排先話唔得閒寫，忽然又寫幾篇。如果話寫作係我生命，會唔會太肉麻？但的確，投資文就Patreon寫，無聊文就Facebook 寫

30. 預告定，下個月我應該會Facebook 啲文都整個Patreon，純粹支持我。

31. 遊戲股—講我扑中Zynga同Activision Blizzard賣盤。又，我都唔打機多年，肯定大多數人都熟過我，但再講一次，你日日打，就真係「識」？啲毒L發達未？你見我成日重覆呢樣嘢，因為真係好多人嘅盲點。同場加映，有錢嘅富豪，全部都係渣男，你認為係咪偶然？仲有講，我為咗寫Patreon，會幫大家睇好多嘢，幫你慳時間，呢個就係價值。

32. 入珠人—絶對粗鄙低俗，但一如所料，就相當受歡迎。不過無聊嘢認真寫，你見我真在入面都講咗唔少經濟學。仲有講埋中國古典文學。

33. 六合彩頭獎七注中—呢篇就高質啦，又係講六合彩嘅攻略（唔好買8，唔好買5，10），獎金最大時買未必最好，同埋各種謬誤（唔會今次中咗頭獎就用完”quota”）

34. 理文化工盈喜—廣告文，但真係夠勁，唔止講明會出盈喜，仲話埋你知幾時出。不過，你見出盈喜都好，股價係冇升嘅。唔係咁簡單

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。