恒指升800點！都話：一放就亂，一亂就收，一收就死，一死就放．但我想講心法嘢—Only the Paranoid Survive．唔好高估你自己嘅自制力．大！師！冇！點！你！—理文化工746盈喜，上個月話咗你知．美股就升轉跌，極難睇。明明網友話轉戰美股．Peleton兩次熔斷，跌25%，高位跌85%。又有乜教訓？ (Patreon)

恒指升800點！都話：一放就亂，一亂就收，一收就死，一死就放

但我想講心法嘢—Only the Paranoid Survive

唔好高估你自己嘅自制力

大！師！冇！點！你！—理文化工746盈喜，上個月話咗你知

美股就升轉跌，極難睇。明明網友話轉戰美股

Peleton兩次熔斷，跌25%，高位跌85%。又有乜教訓？

1. 真係見底反彈，唔係港股，我講我。你見Facebook活躍返出文，今日呢篇Patreon都真係寫得滿意，記得剪存。

2. 又，原本話寫ASML，應該要週末，另外NetFlix剛出業績，又大插，「不過都唔係第一次」，睇下星期五或星期六講先。

恒指升800點！都話：一放就亂，一亂就收，一收就死，一死就放

3. 港股嘅，升820點，成交又大，應該不用多講啦，升市個個都股神。雖然留意下，咁升法都只係得59%公司升。又未必一定話冇力，但，你見真係升大公司多。

4. 中概股都仲有得升。但又係應該思考下其他嘢。

5. 都只係一個月前，有次食飯同後生朋友講起，佢好驚訝我仲有渣住唔少港股。當然佢係有禮貌嘅，但佢嘅表情好似我屋企個熨斗用炭咁。

6. 舊年美股升升升，港股跌跌時，我都有解釋過，點解我冇沽走港股，甚至仲每個月加大（但當然美股力度多啲）。原因好簡單，唔好高估自己嘅智慧。你地覺得我好叻，很好，心領，我都相信我叻過普通人（否則邊好意思搞Patreon收錢？）。但，既然我都唔敢高估自己，你都唔好高估我，或高估你自己

但我想講心法嘢—Only the Paranoid Survive

7. 仲有，我寫過，大陸嘅嘢：一死就放，一放就亂，一亂就收，一收就死。大陸過去幾十年，好多嘢天翻地覆（向好或好壞），但呢樣真係幾十年都冇變過！

8. 但，我成兩個月前前寫喎。咁我會唔會估到係而家減LPR？梗係估唔到啦！

9. 但我又係想講啲心法嘢：你搞清楚，個世界唔係咁運作的。個個都想未卜先知，但做唔到的。唔係見到有好消息你先飛落去，有時仲話要「確認」。升晒啦，幾時到你？你睇之前港股升返幾多？我唔係話咩大戶一早知道儲貨，而係唔好乜都諗「消息面」。

10. 你真係問我，嚴格嚟講，當然係contrarian最好，都話Only the Paranoid Survive（都話個專訪好睇，睇咗未？）。應該壞消息時買入去，但係會人都癲的，同埋你會變得好反社會，因為你啲朋友當你低能的。

11. 以上講嘅，極難做到，我都肯定做唔到。但退而求其次，畀啲行得通嘅方法你：就係冇消息嗰時買股票。唔好只係有消息時仆入去，唔好只係人人講時你先玩埋一份。呢個都係有少少難度，但做到的。

唔好高估你自己嘅自制力

12. 實務上？所以咪教你有錢就買股票，氣氛再差時都照買。正如氣氛再好時，都唔好借錢買股票。100% invested，no more，no less（OK，80或120%都得，但真係唔好搞到20%，或者300%）（更加唔好問我130又得唔得，140又得唔得）

13. 真係做唔到？咁再簡單啲，咪月供。個個月扣你錢。買樓/強積金好多人批評，但一個真係啱嘅好處係：迫你儲錢。真係唔好高估自己嘅自制力。

14. 再講遠少少，我成日引蔡東豪（我估佢都係抄人）嗰句：投資係你性格延續。好啱，但我在我本書（好嘢嚟的，買咗未？）有補充：性格難改，但投資嘅嘢可以後天改。況且投資折射嘅性格，同你平時其他嘢未必一樣。有耐力跑馬拉松嘅人，一樣可係日日短炒冇耐性，唔同嘅嘢嚟的。現實識我嘅人，應該知道我嘅自制能力係相當低的，對各種誘惑都係。但，投資係另一回事，可以克服的。

大！師！冇！點！你！—理文化工746盈喜，上個月話咗你知

15. 想睇我自吹自擂嘅，Facebook 一大篇。但，呢度當然講啲上面冇講嘅嘢。

16. 介紹返，一個月前，東岳189出盈喜，我已經話你知理文都會出（實情計到數一定夠資格出，但公司有時選擇唔出），大字寫明係1月底。今日幾多號呀請問？

17. 冇錯，公司就出咗盈喜。純利升150%，化工品價量齊升，利錢亦高咗（呢間公司差不多一定係產品價格升時毛利會高）。

18. 咁但，唔好咁膚淺嘛。盈喜，咁即係點？好事定壞事？冇人話盈喜一定好事。況且，亦冇人話好消息實升（估值嘛）

19. 幫你計埋數，公司上半年賺5.8億（人仔），迫出嚟嘅數，即係下半年6.6億，又唔係增長好多咋喎。當然150%係起碼，可以更多。但，唔見得係極大利好。預咗啦，根本公司只要下半年做返上半年咁純利，都已經夠出盈喜。

20. 股價點？難估，港況市況好轉不少，所以消息唔好都可能仲有得升，你見安踏2020個盈喜都冇乜料到，但股價照升，因為夠殘。咁但，當然理文化工就唔算殘嘅。

21. 介紹返，舊年3月左右，第一次寫隻嘢。當時3.8，而家差不多8蚊，仲要收過息（都幾毫子）。一個開喎。同期港股跌16%，美股都只係升10%多啲。大幅跑贏大市，更唔好講見過14蚊咁滯。

22. 正路地你絶大多數位買都贏錢，在咁嘅市況之下，好難得。當然你14蚊摸頂幫你唔到。但又話說回頭，如果你買啲真係長期有增長嘅公司，就真係遲早回家。不過理文化工未必係，一路都講，始終工業周期嘢。

23. 策略點？未買嘅，就唔好買了。買咗嘅？可以沽一半先。

24. 當然，其實好似再早少少我已經叫你沽，聽我話可能會沽早咗。但又講返，如果係我自己，我就真係一定坐到尾的。

美股就升轉跌，極難睇。明明網友話轉戰美股

25. 真係風水轉流轉，估唔到呢。美股呢邊走勢，核突到呢。升幾百點都嘔返晒出嚟，似足之前港股咁。

26. 唔知個narrative 係乜，可能係Antitrust Bill？但你見舊經濟股一樣照跌。升嘅亦都各樣嘢都有

27. 容許我真係苦口婆心，講到你煩都要講。分散！分散！同埋分散。同埋，trade log又好反思又好，你諗下，之前你一路買科技股（大又好，細又好），你諗緊乜？真係覺得政府唔會管？真係覺得幾貴都冇所謂？然後再對比下而家嘅情況。唔係叫你從此遠離股票，而係下次決定時精明少少。

28. 你睇，舊經濟股，價值股，始終係相對地企得較硬啲。況且，美股日日跌，港股就日日升。你又估唔估到？我都估唔到。

Peloton兩次熔斷，跌25%，高位跌85%。又有乜教訓？

29. 好少講呢隻股票，應該唔算幸災樂禍，但如果你買咗嘅，節哀順變。一隻股票高位跌到85%，應該同香咗冇乜分別

30. 但，萬一你真係有嘅，記住，唔好沽，話唔定真係之後翻生呢。你見我啲咩YALA 同WISH都冇沽。「可能真係翻生呢」。都跌咗七八成，斷估你都唔等啲錢洗，頂多係對住眼冤（在我嚟講仲有一個現實問題：霸咗我報價啲位。唔係要錢，而係貼圖時霸咗位，但當然我仲放在個list，免得讀者覺得我輸咗就扮冇嘢洗走佢）。

31. 之前講過個故事，隻DDD（3D打印，真係10年前嘅meme股，你睇個世界其實冇乜點變），我十年前買落，好似高位輸咗九成。但冇沽的。點知早兩年炒發夢股，忽然低位升咗幾倍，反而我就走咗，都算走得靚，因為之後又跌返落嚟。一路都知垃圾，只係早兩年炒發夢股，Cathie Wood又有吹又有買。咁結果我由輸九成，變成輸六成定七成，喂，都好返唔少。

32. 順手講埋，點解我話一早知DDD垃圾？咁又未早到十年前買嗰時都知（否則未必會買），而係想講一樣最簡單嘅嘢：盈利呀。

33. 我諗近十年，其中一個最大嘅市場轉變，就係大家唔再介意啲公司蝕錢，甚至有時越燒得狠越好，唔燒當你唔盡取。亦因為有Amazon，Tesla同Netflix嘅成功例子，燒錢燒成正果。但，又有幾多間燒死咗？呢種又係人嘅思考弱點，survivorship bias

34. 更甚者，你市場獎勵呢啲公司，自然引嚟好多人渾水摸魚。個個都扮新經濟，個個都講顛覆，可能當中有啲係真心嘅，但有幾多係不學無術扮高科技？

35. Peloton係咪？唔知，亦唔重要。反正股價已半死，我任你講乜都好，現實就係現實。

36. 你睇公司，絶大多數時間都係蝕錢嘅。我亦見唔到有乜咁高科技（當然你鍾意佢就乜都話高科技），亦唔係可以做到NetFlix Amazon咁大。即係，好老土嘅問題，護城河在邊？（雖然有時唔係咁clear cut）

37. 公司最新花臣，暫停生產單車同跑步機啦，慳成本啦喎

38. 之前又話供不應求，疫情下好搶手。咁而家都仲未有賺錢，而家話啲需求冇咗啦喎，將來又點有錢賺？

39. 拿，呢啲就畀你見到，咩叫冇護城河。

40. 唔係玩嘢，你可以比較下一個類似嘅例子：Zoom．都係好相似啦，但至少疫情下仲有人用，係個增長慢咗好多，殺估值。但至少間公司係有錢賺嘅，喂，咁跌少好多，高位跌65%咯。65%同85%都爭好遠啦下話。100蚊輸剩33蚊，同埋輸剩15蚊嘅分別。

41. 記住，估值好重要，盈利都重要，只係過去N年嘅寬鬆環境呃咗你。當然你乜都嫌貴嘅，又係死，過去幾年你乜都買唔到。咁可以點？都係老方法：行業上分散，地域上分散，時間上都係。

42. 仲有，買發夢股，就控制你嘅注碼。有位讀者耐唔耐串我隻WISH，係丫，都輸好多。但，我買得少嘛。唔止添，隻波音option 我total loss添 ，但我買嗰刻經知我有機會錯，事實就錯咗。

43. 記住，唔好以為自己有幾咁醒。更加唔好以為你啲網友，或者啲書又讀唔成工又打唔好嘅專家有幾醒。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。