ivanliresearch

港股繼續跑贏美股，納指就高位跌10%。你啲網友有幾醒？安踏2020盈喜。ASML業績。P&G。聯合利華買GSK業務拉倒。美國高息股呢排跑出。歐洲股市同債息係正相關嘅。大學淪為政治洗腦工場。邊個話加息股市就唔掂？ (Patreon)

Published:

2022-01-19 23:37:57

Imported:

2022-09

Content

快評兩句—　港股繼續跑贏美股，納指就高位跌10%。你啲網友有幾醒？

快評兩句—　安踏2020盈喜。ASML業績。P&G。聯合利華買GSK業務拉倒。

每日一圖 — 美國高息股呢排跑出。歐洲股市同債息係正相關嘅。

Good Read — 大學淪為政治洗腦工場。邊個話加息股市就唔掂？

FB Post Summary — 從缺

1. 今日夠晒多嘢，但比較散。

快評兩句—　港股繼續跑贏美股，納指就高位跌10%。你啲網友有幾醒？

2. 市況嘅，繼續挑戰你舊年以為理所當然嘅想法。我知有啲悶，但都係要重覆講。你可以諗下，好多人舊年不停講港股點廢，美股點勁，點合理眼都贏錢。見到真係燈得幾咁緊要？今個月港股跑贏美股唔少。你可以諗下有乜教訓。提示當然都係估值，而的確好難捉摸，好難計到咩位開始轉勢，但至少你要知道，到底股市係點運作的。再好嘅嘢都有個價，再垃圾嘅嘢都有個價。

3. 港股方面，見真係跌唔落去。

4. 中概股有力，ADR同夜期表現亦都唔錯，不過主要真係升恒指，國指科指就連跌4日的。

5. 然後你見到我嘅香港倉（HK4）都仲有得升，因為我真係多香港股，少中資科技股。

6. 華潤置地1109 6個月新高，中海外688 直頭52周新高，邊個話內房唔掂？你唔識買啫

7. 美股呢？又另一個世界了，納指直頭進入調整區（高位跌10%）。1月都未完，應該唔少人叫救命。

8. 但真係托賴我啲嘢夠平衡，發夢嘢又比較少。仲有啲歐洲公司頂住下。係咪一早叫咗你分散啲？但真係冇乜邊個聽我講，見親你地PM我嗰啲，都係成倉發夢股。又或者，如果有做好分散嘅，就瞓得安心，唔使PM問我。

9. 真的，我唔止美股大倉（US3）跑贏大市，最開心係全部（香港美國）夾埋，星期三居然係有錢賺的，算係咁啦。

快評兩句—　安踏2020盈喜。ASML業績。P&G。聯合利華買GSK業務拉倒。

10. 好啦，睇下個股。首先係安踏2020，出咗盈喜，留意新聞有時報得唔清楚，最好都係睇原文。因為有時佢入面提嘅「純利」數字，你都唔知即係講邊個數，例如今次情況，佢有個冇包合營公司嘅數，有一個包埋，咁公告會畀埋舊年個數你，等你對得返。

11. 然後我幫你計出嚟，就係咁。點睇？留意2021年下半年比上半年差咗喎。係咪行業季節性？但2020年明明下半年好啲。我冇分析員估嘅數在手，但望落就麻麻地啦。留意，雖然高位跌唔少，但仲有成3000億港紙市值，純利一年先80億人仔，都成30倍市盈率，絶對唔平（而我係有的）

12. 另外，美資銀行，由於我只有JP Morgan，就不一一細講。但見表現都好唔同，之前Wells Fargo出完就升，JP Morgan花旗同高盛就大跌。到星期三晚呢？美銀同摩根士丹利出完有得升，但US BankCorp就大跌，都好難捉。一個關鍵當然同啲人工成本有關，但我就唔信只會一間要加人工第二間唔使，你唔加嘅，啲人會走喎。

13. 好啦，ASML都出咗業績，算係幾好的，雖然股價照跌。平就肯定唔平，又快手同你計下，2900億美金市值，純利59億歐元，44倍市盈率，邊有平過？但當然因為冇乜其他對手，加上增長又勁（全年純利升六成幾呀），所以你見都係正常地跌（高位趺兩成咯），唔係倒水咁瀉。星期四應該會詳細講。

14. 但我仲想講多兩隻（其實係三隻），有些少關係。首先係P&G，之前有講想買，但冇買，所以只會快睇。業績就強，仲要上調埋2022年展望，股價就升。好早已經講呢啲係今年留意嘅股票。人地話埋你知加價夠冚成本上升，唔通下星期你支Head & Shoulders 貴十蚊，你轉去用霸王咩。問題當然係P&G都不能算平（當然只係相對，美股邊有嘢平？），留意隻價值股ETF IWD第五大持股就係佢，30倍市盈率都價值股，死未。

15. 但，帶到去另外一隻（其實係兩隻）股票。一路我都想買嘅，聯合利華Unilever，英國/荷蘭公司，原則上同P&G差不多，可能多啲飲食，但股價大落後的，畀人話管理不善。以為只係因為P&G業績強而升？唔止，仲有單嘢。

16. 話說原本聯合利華想去買GSK（葛蘭素史克，又係英國股！）嘅嘢，結果GSK要加價，聯合利華唔制，拉倒。股價升喎，明顯覺得原本買就畀貴，做水魚。

17. 留意，最上面有埋P&G個圖，係英國嘅聯合利華。但同時美國都有ADR（下面個圖）。點解美國升多咁多？因為拉倒呢單新聞係英國收市後先爆出嚟的。

18. 呢三間公司，都係我有機會今個月買嘅（但，邊有咁多錢？）。當然，一日未買就係未買，保留臨時改變主意嘅權利。上次專訪都有講（好睇的），有時我好隨心的，可能嗰日洗頭（冬天冇日日洗！）咪買P&G，嗰日食Panadol 咪買GSK

每日一圖 — 美國高息股呢排跑出。歐洲股市同債息係正相關嘅。

19. 美國高息股呢排跑出—挑戰你嘅傳統智慧。照計如果加息環境，高息股應該冇咁吸引啦係咪？原本美債1厘息，你高息股有3厘息，我好開心啦。但如果美債上到2厘息，你啲高息股得3厘，唔夠吸引啦，我會要求4厘，即係你股價要跌。不過呢啲只係好片面嘅想法，實際上？你見呢排高息股ETF跑贏嘅。其中一個原因？因為啲友追價值股，同埋風險胃納收縮，呢個力量大過你上面計嗰啲數，至少暫時係。當然，亦都好睇你咩叫做「高息股」，呢度應該係用咗SPYD。將來嘅專題會細講

20. 歐洲股市同債息係正相關嘅—　又挑戰你嘅傳統智慧。好啦，呢個圖話你知，歐洲股市，同埋債息（呢度用咗咗德國長債），過去20年都係同步咁行嘅。債息升時股市升。放心，下面會再深入講。固然好睇你點演繹，但至少話你債息升一定不利股市？似乎唔係

Good Read — 大學淪為政治洗腦工場。邊個話加息股市就唔掂？第一次加息後一年，美股100%升。

21. 大學淪為政治洗腦工場　—　如果係講香港就唔特別啦，講嘅係英國。留意我之前講過，Unherd嘅嘢似乎係偏左，但官方講法係左右都有（換著香港就畀人話黑白之間冇中間了）。之前我貼過佢地嘅文，都好似係左傾嘅多，但今次呢篇就的確係批評左翼（香港叫左膠）文化。講嘅係英國嘅大學，越嚟越多都係政治掛帥。最明顯就係有一大堆嘅diversity workshop，「接受自己有原罪，係克服偏見嘅第一步，你同唔同意？」十足返教會咁，當然答案只能夠係「同意」，否則畢唔到業。作者話，當然聰明嘅小朋友只會維維諾諾，好呀你話白人有原罪咪有原罪。當然作者順手批評埋啲大學虛偽，個個拎反歧視嘅光環，但冇人間夠膽出嚟得罪中國。聽講好多港媽送啲仔去讀，唔知會唔會激到彈起？

22. 邊個話加息股市就唔掂？第一次加息後一年，美股100%升。—都係近期嘅熱話。其實呢，有冇諗過根本「加息股市升定跌」呢個問題本身係相當含混嘅？正如以前我都講過，咩叫「股市同實體經濟脫節」？咩叫「實體經濟」？點先叫脫節？GDP跌3%股市跌2%係咪脫節？咁如果股市跌10%呢？又係咪脫咗節？你諗真啲，乜嘢叫做「加息股市就跌」，係加之前？加嗰日？加之後一年？定點？成個加息周期，往往幾年，咁計邊個位？偏偏人人都愛即食，總之你話我知加息會升定跌。我嘅短答案就話畀你知，當然係冇乜影響。文入面就有多啲數據去畀你睇，當然唔代表一切，亦可能下次唔係咁重覆，但至少好過憑空吹水，拗一大輪都唔知講乜。呢度個圖就話你知，第一次加息開始，打後12個月，史上美股次次都升。