恒指繼續跑贏美股，我就跑贏恒指。Omicron嘅嘢。大師冇點你：Activation Blizzard 賣盤！你以為我今個月唔買個股？答你：「我正在買貨」 (Patreon)

恒指繼續跑贏美股，我就跑贏恒指

Omicron嘅嘢

大師冇點你：Activation Blizzard 賣盤！

你以為我今個月唔買個股？答你：「我正在買貨」

1. 多謝大家嘅關心，各樣嘢都唔係太好，但叫做好轉中。大家支持我嘅方法好簡單，就係繼續訂，最好上20/40嘅VIP，又或者轉年費，同埋叫埋朋友。

恒指繼續跑贏美股，我就跑贏恒指

2. 似乎短期都繼續係港股跑贏美股？呢樣嘢好值得你思考的。舊年個個夠話港股垃圾啦，成班年尾話走去轉戰美股添。果然係燈到應一應的。所以，真係唔使理啲人講乜，因為股市雖然創富，positive sum game，但你計人數，似乎都係少數人贏錢的。包括呢度嘅讀者。

3. 港股嘅，走勢當然冇之前兩個星期咁靚仔。但星期二跌嗰100點，真係唔係嘢．長實1113幾強，體育用品股都好。商湯20仲頂得住，但我絶對唔會買。

4. 拿天地良心，你睇我啲嘢真係跑贏指數的（睇HK4啦）

5. 阿里巴巴呢？又頂得住。原本話畀美國查（預咗啦下話），但股價仲企得住。然後你睇下啲中概股，普遍都有得升（阿里巴巴要跌些少，但絶對唔係大跌）。

6. 你睇美股嘅情況，就絶對唔同啦。元兇當然又係債息升，雖然以前都貼過無數次，不見得加息嘅日子，股市就唔升。但債息升就似乎點都對股市唔太好，估值嘛。

7. 所以一如以往，納指跌得多，我都係靠啲舊經濟股頂住下。

8. 當然都會輸錢（睇US3），但又真係叫做唔會差過指數（視乎你同邊個指數比）。

9. 你要做嘅，當然係保持你嘅戰鬥力。我應該呢兩日會再講，跌市時唔買，唔通升晒先買？但當然心理上係有啲難搞的，個個都想買完即升，但邊有咁理想？

10. 呢度仲帶到另一個問題：如果你個個月有糧出嘅咪還好，如果你唔知咩原因走去咩全職炒股嘅，我當你有1000萬好未？你都發現好難玩的。所以，都真係打好你份工，或者搞好你嘅副業。一直有新錢就易玩，一舊錢咁去炒上炒落，難玩的。因為你根本冇錢去低位買貨。

Omicron嘅嘢

11. 你見我一般好少在呢度寫疫情，首先呢個唔係醫學專欄，我同你都唔係專家。況且，連專家都係估估下（其實好正常，全新嘅嘢喎）。

12. 不過，爆疫兩年後，我地可以諗下：你見啲咩球員明星呀，真係個個中，但又冇乜大事。固然對健康有影響，對表現更加有影響，但你好少見有邊個後生嘅染疫忽然死咗，係咪？

13. 但同樣地，即使你不滿香港或大陸嘅政策都好，你見其他地方依然都係守得緊。至少啲國際旅遊都受阻。

14. 原因？因為傳染性太高。雖然有人話，最後可能都係人人中招，可能都係。但，就係想flatten the curve，你一次過成班友中晒招，邊有咁多病床？

15. 然後近來見到omicron變種，傳染性好高。但真係好似致命率低好多吧。

16. 係咪開始流感化？即係開始變到傳柒性高，但致命率低？唔知。況且亦都可能下一隻變種未必係咁。但暫時似乎係向呢個方向行的。

17. 你亦都明顯見到，啲政府，越嚟越多開始走向「與病毒共存」嘅方向。你睇，泰國又放返鬆，瑞典亦都係。之前好嚴嘅越南都係。

18. 咁即係，都話唔係醫學專欄。但似乎又可以留意返啲reopening stocks？但難玩的，之前都炒過幾次，次次都係之後又開唔成關。大家不妨再諗下。

大師冇點你：Activation Blizzard 賣盤！

19. 今次真係值得攞威，因為，之前寫過遊戲股，寫到明Zynga同Activation Blizzard（動視暴雪）好有機會畀人買。

20. 結果？上星期就係Zynga賣盤，Patreon都有寫。今個星期？就到動視暴雪賣畀微軟。

21. 詳情，在我Facebook Page 都有講，不過我想你留意多幾樣嘢。

22. 首先，微軟出到95蚊一股，但你見動視暴雪股價只係升到82蚊，仲有成16%嘅距離。固然有所謂嘅機會成本同交易費，但照計市況唔係特別旺，呢舊嘢唔會太大（即係話：如果雞犬皆升嘅市況，你要我等一年半年執16%？個個連登仔話一晚都唔止。但而家唔係咁青情況）

23. 咁當然就係，大家都有啲擔心，會唔會過唔到監管機構。

24. 監管機構呢樣嘢，睇你點睇，如果你同幾廿年前比，近十年八年係黃金時代，相對地好少Deal畀人反對。但如果你呢一刻，同早幾年比，就梗係而家好似緊啲。

25. 不過，我傾向都覺得係過到嘅。首先，唔涉及外國勢力，易搞好多。另外，打機嘅嘢，民生唔敏感。仲有，似乎都好難話點壟斷吧？當然仲有一樣嘢，完全係我主觀，但我認為微軟玩呢啲嘢比較叻，同政府關係好似好啲（你見近年都冇乜畀人搞過，甚至買抖音都係搵佢），又或者啲律師好啲（請好多人的說）

26. 咁但，到底值唔值得為16%去搏……就見仁見智，真係好睇一個個人。我就應該唔會，但如果你錢多又想考眼光，可以試下。

27. 好啦，問題係，事實我冇買到Zynga，亦冇買動視暴雪（但有讀者買咗的，絶無吹水！）。咁所以你地好多都會問，「下一隻係邊隻」？

28. 實情舊文都已經講咗，但而家我未必係睇遊戲股。亦係舊文寫過，媒體股同軟件股都會有整合潮。

29. 不過你問我，呢刻我寧願揀媒體股。原因？好簡單，唔少媒體股都係價值股，估值唔會太離譜。相反啲軟件股之前炒到飛天，殺估值都有排殺。

30. 即係邊啲？咁梗係唔係NetFlix迪士尼，呢啲去買人嘅。被買嘅？就貼多次呢個圖，NetFlix樓下嗰堆（留意個圖大半年前，啲數字唔update的）。

31. 當中ViacomCBS我有，買咁耐就潛水咁耐，但近期好返啲。Discovery亦都應該會賣畀華納。所以，睇剩返嗰幾間。

32. Fox我覺得有啲兩頭唔到岸，「正派」媒體又嫌佢名聲唔好，但你真係「另外」嗰班，又覺得主流傳媒已死。至於WWE，摔角嘢，太偏門。所以我都係搏Lionsgate冋埋AMCX（唔係AMC）。

33. 不過都要講，玩呢啲就好考耐性嘅，真係往往為自己過癮居多。跌市你扑中都還好，但升市時，分分鐘個市不停升，你隻嘢唔升。況且，若果你買得太早，好可能個收購價仲低過你買入時個價。

34. 所以可以點玩？唯有真係個市大跌時買。

35. 最後，自吹自擂幾句。我基本上唔多打機，但點解我會知呢啲嘢？會扑中呢兩間公司賣盤？咪話你知，因為我睇唔同嘅嘢咯。

你以為我今個月唔買個股？答你：「我正在買貨」

36. 都話呢句嘢，出自N年前某一期嘅iMoney封面，條友就係陸東，就係「我正在買貨」。當其時應該兵荒馬亂，但你諗真啲都幾無聊。股災跌10%都好，咁幾時都係有人買貨架啦，如果唔係點止跌10%？根本成交都冇。有成交就有人買貨啦。

37. 但今次係講我自己。覺唔覺我今個月冇買個股票？即係除咗月供嘅港股，同每個月自己買嘅嗰堆美股ETF（VOO QQQM EMXC VB IDEC IWD）外，我冇買個股，係咪？我有買實會話你知嘛。

38. 咁你估我係咪對股市心淡？梗係唔係！係咪我冇錢？亦托賴唔係。

39. 咁我今個月會唔會再買個股？肯定會！買乜？到時話你知。但好可能都係之前講過嘅嘢，價值股？英國股？或者啲貧富懸殊股？（其實有啲係幾樣都中）。

40. 咁點解到19號都未買？兩個理由，首先呢排見啲股票跌，咪有得佢跌下，可能諗住平啲先買。「喂又係你話唔好Time the market？如果忽然升返點算？」。好簡單，咁我都係會今個月內買返的。

41. 最重要係，你見我一定係stay invested。講白啲，你見我今個月買ETF，係第一日飛晒入去嘛，因為我費事心掛掛。但你話見市跌，等多幾日得唔得？得。正如我啲個股都等到而家都未買。搞笑啲講，咁我第一日買，都冇話一定要開市第一分鐘啦，等到臨收先都得啩，「睇下會唔會跌多啲買到平貨」，咁樣唔係time the market 啦，唔好煩。

42. 但唔好無了期，畀個hard limit自己—我今個月內一定會買的。否則你就真係變咗time the market，明冇？你可以等幾日，等兩星期，但不能等成個月的，否則最後就儲埋成手現水。

43. 當然仲有一個好無聊但關事嘅原因：因為，我呢排好多嘢想寫。關乜事？我咪話有時我諗唔到嘢寫，就會買隻股票，順手寫篇文。咁呢排大把嘢想寫，唔好浪費呢啲機會。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。