ivanliresearch

中國GDP嘅嘢，有幾worrying？我想知套戲幾長，邊個演，你話我知得了，唔使話我知幾多粒星。3月加息機會大過100%！係咪債息升就股票跌？細公司嚟緊盈利增長同大公司相比如何？悶得滯自然想SM。幫人網上洗白嘅生意。JP Morgan 2022 投資指南撮要 (Patreon)

Published:

2022-01-18 06:25:02

Imported:

2022-09

Content

快評兩句—中國GDP嘅嘢，有幾worrying？

快評兩句—我想知套戲幾長，邊個演，你話我知得了，唔使話我知幾多粒星。

每日一圖 — 3月加息機會大過100%！係咪債息升就股票跌？細公司嚟緊盈利增長同大公司相比如何？

Good Read — 悶得滯自然想SM。幫人網上洗白嘅生意。JP Morgan 2022 投資指南撮要

FB Post Summary — 自古美人如明將

1. 又有啲事情，所以今日先出。不過反正星期一晚美股冇市，港股亦都比較靜。應該關係不大。

2. 另外，週末都仲出咗篇專題文，講啲歐洲各國嘅指數ETF。冇乜特別，但勝在幫你整理晒啲嘢。

3. 由於係星期一嘅港股市，所以都費事講太多。不過又真係見到港股好似冇之前咁有力了，除咗澳門股外冇乜特別，見到今日（星期二）都係升轉跌。

快評兩句—中國GDP嘅嘢，有幾worrying？

4. 反而昨日比較多人關心嘅，係中國嘅GDP數據。固然一路都有啲水份，但再講一次，總有個譜，否則你話每年都作大嘅，點解唔再作大啲？況且年年作大，作得太大都係唔掂的。所以不代表完全不可信，更不代表你完全不用理（雖然對你投資嘅直接影響又真係唔大）。正如你總會識啲人，會話你知上市公司啲數全部做出嚟。咁固然啲盈利幾時都有水份，但係咪可以全部作出嚟？你唔作到大家樂搵錢多過Facebook？總有個譜的。

5. 但我甚至唔係想講個數字，而係講其他嘢。請睇下以下三個報導：

6. 留意，三個都係真嘅，三佪都算係幾有權威嘅新聞機構，係咪？但，睇到唔同嘅narrative啦。CNBC就只係報個數字，信報有話埋你知勝預期，New York Times就集中講放慢，加埋自己嘅評論「令人擔心」。

7. 再講一次，三個都係真嘅。至於傳媒應唔應該有立場呀，「中立」係咪都係一種立場呀之類，留返你地慢慢拗。但你問我，如果你嘅purpose係投資，咁你當然希望你收到嘅嘢係原汁原味最好。

8. 唔好誤會，投資絶對係一個主觀嘅過程（好多人以為客觀，錯得很），否則唔會有人買有人賣。但，個主觀嘅決定，係你去做。唔係人地話你知個數字好定差，對不？你講到去「低過預期」「高過預期」，已經好足夠。反正個「預期」係事實，係一個客觀而重要嘅嘢。但你去到咩係咪worrying sign，就真係我唔使你話我知。唔好睇小，好多人就係咁潛移默化咗，人地話係佢咪話係。

9. 你可以睇下呢個圖，睇下有幾worrying．但留意：GDP好又唔等於股市會好，根本就兩樣嘢。

快評兩句—我想知套戲幾長，邊個演，你話我知得了，唔使話我知幾多粒星。

10. 仲有，我唔係話主觀嘅評論唔重要。相反，係相當之咁重要！正如你睇我嘅Patroen，差不多100%都係我主觀嘅嘢。問題係，我想要主觀評論時，你咪畀主觀我。但我想只係要客觀嘢時，你咪畀客觀我咯。

11. 舉例：我睇新聞，只會想知NetFlix上咗幾多客，賺蝕幾多，街預期幾多，你唔使話我知個增長係咪worrying，我自己識睇。你更加唔使話我知公司前景如何，我會判斷。增長係咪worrying公司前景點呢啲，係我去寫畀你地嘅，見唔見到個分別？

12. 正如，我有時只想知套戲邊個做，幾長，咁我就搵相關嘅嘢，你係唔使話我知套戲幾多粒星的，你邊位？關我乜事？唔係主觀嘅評論唔重要，而係到我需要時，我會自己去睇。

13. 但你發唔發現，而家啲人係會將呢啲嘢放埋一齊的？冇法，因為大家都懶。最好我搵套戲邊度上時你話埋我知幾多粒星。同樣地，最好我睇股票報價時，你話埋我知有冇買入訊號。

14. 同樣地，唔係New York Times嘅嘢唔好睇，而係，你如果只係想知數字嘅，好易就會畀佢不經不覺咁洗咗你腦。所以在投資嘅層面，我係會睇其他真係「中立」啲嘅媒體。

每日一圖 — 3月加息機會大過100%！係咪債息升就股票跌？細公司嚟緊盈利增長同大公司相比如何？

15. 3月加息機會大過100%！—　呢類東西長期讀者唔會陌生，乜都有得賭，而聯儲局加息嘅機會，係由啲期貨價度imply返出嚟。講得簡單啲，而家係1月中，如果我肯定聯儲局2月會加息，咁我借3個月錢畀你，我就自然會收高啲息。但如果我嘅意見唔係主流，咁自然冇人肯借，會壓低個成交價。好啦，話3月加息已成定局，唔奇。但點解個機會可以大過100%？答案：因為有人會估加超過四份一厘，例如Bill Ackman。但我係唔信的。唔係話動機論，但一啲咁出名嘅人，自己又有份在市場落注，佢唔多唔少都想出口術令到大家同意佢，咁佢咪搵到錢。又係嗰句：Successful investing is having everyone agree with you……….. later.

16. 係咪債息升就股票跌？—　加息係定局，債息升都升咗。但，到底係咪債息升嗰時，股票會跌？呢個真係100億嘅問題。咁又係唔使噴口水，反正你鍾意點講都通的。我可以話債息升咗機會成本高咗，一定影響股市估值，冇錯丫。但我又可以話債息升因為經濟好，所以股票都會好，又冇錯。咁所以，都係睇實證。呢個圖非常好，首先睇最左邊，就係我同你講嘅嘢：無論債息升定跌，股票都係升架啦！但，邊個情況升多啲？就反而係債息升嗰時升得仲多（紅色），估唔到呢？一個最大關鍵始終係炒預期。但另外留意下右邊，無論盈利預測調高定調低，紅色都係好過藍色，即係任何情況都係債息升表現好啲。唔止，留意埋，只要盈利調高，話知你債息升跌，股市都升。但只要盈利調低，無論債息升跌，股市都冇乜運行。咁你見到邊個因素重要啲未？

17. 細公司嚟緊盈利增長同大公司相比如何？—　以前寫過了，標普600係small cap指數，同標普500冇重覆的。好啦，咁到底嚟緊，係small cap增長強啲定big cap強調？一樣，你純理論嘅，兩樣都講得通。你可以話通脹環境梗係有利大公司加價，你可以話銀根緊咗細公司更難生存。但我又可以話大公司已經咁大增長冇咁快。拗天光都係浪費時間。所以，睇數字啦。咁你見到了。話時話，係有track 標指600嘅ETF的，IJR

Good Read — 悶得滯自然想SM。幫人網上洗白嘅生意。JP Morgan 2022 投資指南撮要

18. 悶得滯自然想SM—實情有少少標題黨，原本係講Sadism，S，傷害別人得到快感。傳統上會當係黑格人格，學者研究到底有乜觸發呢啲行為。而最新研究發現，其中一個相當關鍵但一直冇人留意嘅因素，就係悶。沉悶係會激發人嘅呢種傾向，嗯。之前已經有研究，啲友悶得滯會自殘，咁除咗自殘，原來仲會殘人地的。即使本身好似呢種傾向唔大嘅人，都會表現到呢種行為。亦可能因為咁，你見香港其實唔多盛行呢味，因為呢個城市唔悶。

19. 幫人網上洗白嘅生意—　無論係有人嚟工作面試，定係識新朋友，定係想拍拖，而家好多人做嘅第一件事就係：Google．好合理。咁但如果打你個名，搵到嘅都係衰嘢呢？無論你有做過定冇做過（有時都唔係咁清晰），點樣可以令到人地搵你個名，得到係乾淨嘅嘢？就有公司收錢幫你做呢啲嘢的。當然，唔止係個人，公司都一樣，公司先係大市場，最怕啲負評，無論係真客，定係有人搵打手。呢篇文就幫你拆解背後嘅呢盤生意。入面有好多嘅手法，包你睇完就唔會再對網上嘅嘢咁認真。當然，其中一個最有趣嘅副作用，就係如同「小三勸退師」或者殺手咁，「食兩家茶禮」，甚至自編自導自演，我整個website出嚟唱衰你，然後再話你知畀錢就解決到問題。以前都貼過，有人係靠舉報人地嘅Instagram 搞到人畀人停帳號然後勒索，亦有人在書評網寫負評然後勒索。有著數嘅嘢就有人做。

20. JP Morgan 2022 投資指南撮要—必睇。一般比較貼呢啲大行報告，一來太長，二來太深，三來冇乜用，反正我以前都寫過不少。但呢篇幾好，因為幫你sum up咗，而且啲嘢係有用嘅，唔難明。入面寫嘅嘢有啲我都寫過，但佢有埋圖，同埋解得幾好。例如講美股好貴，即使大升市都成日有一定嘅調整，講指數靠大公司帶動，價值股抵買。仲有更重要嘅：長線投資，你見渣得一定時間，根本上必贏。仲有：一般投資者何止跑輸股市？甚至連債市都跑唔贏。平均回係3%一年，未扣通脹。個個把口就勁，實情你可以跟到股市指數，已經叻過好多人。