［週末專題］環球股市ETF大比併（中，唔知有冇下集） (Patreon)

環球股市ETF大比併（中，唔知有冇下集）

上集簡單提要

環球ETF幾個啟示附錄：每隻ETF渣乜，個指數又係乜

奧地利，俄羅斯，以色列，瑞典，挪威，丹麥，意大利，波蘭，愛爾蘭，

比利時，希臘，葡萄牙，西班牙，紐西蘭，土耳其

環球股市ETF大比併（中，唔知有冇下集）

1. 實情仲係非常忙（今個星期應該好啲啦！），加上都幾多大大小小嘅煩惱，所以真係勉強地維持Patreon日日出文外，都已經冇乜時間做其他嘢，你見我Facebook 文都冇出。上星期嘅週末專題都停咗一次。

2. 咁但，就係唔想連續停兩個星期咯。反正上次個週末專題都只係寫咗上集，唔爭在幫佢埋尾，呢篇係中篇，希望有埋下篇。

上集簡單提要

3. 正如上集都講，呢個系列絶對易明，我甚至怕你悶添。入面啲嘢你自己搵都不難，但只係比較煩，咁我幫你搵晒佢放埋一齊咯。都唔好睇少，你自己整會遇到好多你意想不到嘅麻煩嘢的

4. 上回其實係講，環球國家嘅股票ETF。雖然話應該分散，但大多數讀者都後生（未夠60都好後生），大把時間，好多仲有收入。咁基本上你100%股票都冇乜走雞，唯一問題係買乜。

5. 一路都講，股票指數ETF為主，個股就比你玩下。相信絶大多數人（包括我自己），都係應該加大指數ETF嘅配置。

6. 咁上次都話，新興市場走中國你可以買EMXC。成熟市場走美國可以買IDEV。咁但當然如果你想「半自助餐」，即係只係買一個國家，但又唔買個股，當然都得。你諗到嘅都有人畀你。下面嘅ETF全部美國上市，美金交易，當然會有匯率風險，幾時都有。

7. 一切就由呢個圖開始，留意同上次篇文嘅差不多，但有少少唔同，主要係日期唔同。今次呢個就係2021年嘅回報，留意已經係美金計價。

環球ETF幾個啟示

8. 好快幾個啟示，首先，我費事搵數字，但明顯地股市回報同經濟增長好強關係，唔該記住呢樣嘢，咁你已經叻過好多人。

9. 第二，2021年都仲係好易玩，合埋眼都贏錢。好簡單，超過三份之二嘅格數，係贏錢嘅。況且仲要升嗰啲幅度大過跌嘅，我當你買中最頭最尾，或者頭三名同尾三名，拉勻都贏。咁當然仲有，見到個中位數（埃及同澳洲中間），10%左右。呢個可以係你Benchmark，舊年冇呢個數，都有啲失敗。

10. 至於如果你買全餐，每隻買一股？咁你計個平均數咯，我懶計了。相信係超過10%（結果我都係計咗一次，原來係8.2%）

11. 結果呢度48個國家地區，上次篇文講咗14個（自己睇圖，費事打字呃字數）。上次嗰14係乜？咪比較大，或者成熟嘅市場，或者話我會識嘅市場，隨意定義，唔好太認真。

12. 呀，呢個Excel係有送埋畀你的，Attachment 有

13. 今次呢？整多15國畀你。共通點？主要都係歐洲，順便搭埋紐西蘭。咁仲有剩返19國，就下次玩，非洲中東南亞南美乜都有。你見到我個Excel都留咗位。

14. 至於堆Column點睇，舊文有寫，唔再重覆。特別留意兩樣嘢，首先ETF全部美金報價，即係包埋個匯率影響，所以你拎嚟同當地指數比時，就要將當地指數變返美金。第二樣嘢，你當地常用嘅指數，同ETF追蹤嘅指數可以唔同（例如意大利用FTSE-MIB，但EWI係追 MSCI 意大利 IMI 25/50）（至於咩IMI 咩係25/50，舊文有）

15. 好啦，睇少少Big Picture 嘢。首先你睇AUM，最大都只係幾億美金貨仔，有啲幾千萬都有。比較下，上篇文嗰啲幾十億美金，台灣日本甚至去到近100億，而追蹤標普指數嘅SPY，4490億美金AUM。AUM同乜有關？如果呢個表嘅，就大約都同個經濟或股市規模有關，你見西班牙意大利俄羅斯嗰啲大，而滿城風雨嘅土耳其都仲有成3億美金AUM。

16. 然後睇收費，0.5%咁上下，同上次嗰堆差不多。咁計下數啦喎，呢堆嘢平均都係幾億AUM，當3億。即係一年收你150萬美金fee左右咋，未計任何開支。咁但當然，fee每隻咁計，啲成本就　share嘅，你搞N隻都都唔會爭好多。

17. 仲有，留意絶大多數都係BlackRock發行，E字頭嗰啲都係。當然會有其他，但點解作者用E字呢堆？我都估都規模比較大。同埋留意，全部指數都係MSCI嘅。近年BlackRock同MSCI股價都幾好，有原因嘅

18. 睇Column N，隻ETF嘅一年表現。Column A我堆ETF嘅次序，就係跟返作者個圖，即係跟返一年表現。但見唔見去到我個Excel唔同咗？主要因為日子唔同，而呢兩個星期股市都比較波動。亦因為咁，你不能將呢個圖同上篇文嗰堆嘢嘅回報比，大家度嘅時間唔同。

19. 邊個國家點解最勁，呢度就不細講，亦都冇乜路捉。不過留意下，俄羅斯股市同埋丹麥股市今年跌得好急下，冇仔細研究，但前者可能同開戰風險有關，丹麥就似乎因為好多生物科技股，貴到無倫的。

20. 最後，Column P同Q，你會發現，堆ETF，似乎係跑輸當地嘅指數。未必因為跟唔足指數，亦未必因為收費，可能係MSCI堆指數跑唔贏當地指數。留意上次堆大市場都有呢個現象，所以你可以搵下有冇直接買當地指數嘅ETF（但未必咁易）。而呢個現象，似乎在今次呢堆市場更嚴重，當然背後涉及好多問題。

附錄：每隻ETF渣乜，個指數又係乜

21. 接下嚟，最悶嘅時間，貼返每個國家嘅指數，同埋隻ETF嘅十大持股，加上速評幾句。都叫做可以認識下世界嘅。

22. 奧地利

23. 包你估唔到，舊年隻EWO在個表中全球第三，勁過美股同台灣。升乜？我都唔知。最大持股？係隻冇乜特別嘅銀行。第二係間石油公司，咁都明嘅。指數係ATX，奧地利當然用歐元，舊年都跌唔少。

24. 俄羅斯

25. 能源大國嘛。指數係MOEX，M for 莫斯科，最大持股顯示唔到名嗰間係Gazprom，出名的。間SBERBANK都有名氣（即係，我聽過）。俄羅斯當然用盧布，匯率一向係個問題，五年對美金跌咗兩成。

26. 以色列

27. 指數係TA-35，TA for 特拉維夫Tel Aviv。以色列隻貨幣叫Shekel，ILS（少數我講唔出口嘅，因為未去過），極少數對美金大升嘅貨幣，所以理論上賺價又賺匯，但唔知點解隻ETF同當地指數爭好遠下。第一大持股係間軟件公司，之後兩間銀行，之後仲有其他軟件公司同醫藥，強得有理。

28. 瑞典

29. 北歐三寶之一（留意唔知點解個表冇芬蘭，但當然都有ETF，仲係Nokia），指數係OMXS30，S for 斯德哥爾摩。瑞典克朗舊年對美金都跌唔少。第一大持股嗰間工業公司，真係唔識。第二嗰間就真係叫Investor，實情係控股公司，拎住一抽公司，自己只係得幾十個員工．Nordea大銀行，舊年升到笑。Volvo識啦。第五正係愛立信

30. 挪威

31. 指數叫做OBX。呢個非常之咁麻煩，因為在Google Finance係冇的，要我自己搞一輪。最大持股係能源公司（北海油田嘛），DNB大銀行，Telenor做好多收購的，馬來西亞孟加拉泰國巴基斯坦都有，以前仲有緬甸。

32. 另外，你見原本個表入面，係NORW，呢隻應該係Global X品牌，即係韓仔未來資產（Mirae）．但我見話隻NORW收左檔，但又仲有報價，好似同另一隻嘢合埋咗，唔知想點。所以用返iShares嘅ENOR算

33. 丹麥

34. 指數係OMXC25，C for 哥本哈根，留意丹麥克郎對美金早幾年升值不少。持股最大嗰間，頭先講咗，醫藥公司，之前炒到飛天，今年就殺估值了。DSV做運輸，第三嗰間做風電設備，第四嗰間生物科技公司。留意大家最熟嗰啲公司，馬士基嘉士伯Pandora等等都不在五大。

35. 意大利

36. 指數FTSEMIB，M for 米蘭，最大嗰間Enel係國家電力公司，夠晒有意大利特色。第二嗰間Intesa Bank 世界上最老嘅銀行之一。第三間我就有眼不識泰山了，Stellantis，乜水？原來係Fiat Chrysler同法國 PSA車廠合併嘅東西

37. 波蘭

38. 指數WIG20，W for 華沙。啲公司就真係唔識了，舊經濟嘢多。不過留意第十位嗰間我識！呢間CD Projekt之前出game搞到一鑊泡。

39. 愛爾蘭

40. 指數ISEQ20，又係Google Finance冇的，都咪話唔煩。間Flutter係賭波公司，Paddy Power 同 Betfair母公司，亦都在倫敦上市。第六大持股RyanAir絶對係埃汾少年回憶，惡劣到極點嘅服務，但又真係平到笑，嗰時真係有啲幾鎊嘅機票，一鎊都買過。而家好似話脫英，唔在英國上市添呀。個CEO亦係傳奇人物，粗口橫飛的。

41. 比利時

42. 指數BEL20，最大嗰間AB InBev，好似係全世界最大嘅啤酒公司。Budweiser，Corona，Stella，Hoegaarden。之前見過研究，絶大多數人blind taste 根本分唔到唔同牌子嘅味道，所以啤酒好大程度只係marketing and sales嘅遊戲。KBC正係十幾廿年前在香港出窩輪好活躍嘅比聯。Ageas咪富通保險，以前Fortis啲歷史遺物

43. 希臘

44. 指數ASE，A for 雅典。呢個指數亦係Google Finance冇嘅，同埋呢隻ETF係Global X．成堆公司都係當地啲舊經濟嘢。留意指數表現倒係唔錯的。因為用歐元，歐元是個好水泡，陣間你就明

45. 葡萄牙

46. 指數PSI 20，只能講句，同上。不過萄葡牙股市就冇希臘咁好。另外，呢隻亦係Global X的。

47. 西班牙

48. 嚟到歐元區第四大經濟體，亦差不多係歐元區最差嘅股市。指數係IBEX 35，I for Iberia．最大持股間Iberdrola發風電的，十分有型，之後幾間令人唔多開胃嘅銀行。留意間Amadeus做旅遊軟件的，booking system喎。另外，Zara母公司Inditex係指數重磅股，但隻ETF冇的，唔知點解

49. 紐西蘭

50. 然後同大家飛一飛去南半球，睇下紐西蘭除咗有羊仲有乜。指數係NZX 50 ，就真係…..唔識的。

51. 土耳其

52. 最後，萬眾期待嘅土耳其，指數係BIST100 （有時又叫XU100），IST咪伊斯坦堡。固然你知啲土耳其里拉跌到七彩（近期好返啲），但，以里拉計價嘅本地股市又升到七彩。一來一回？隻ETF當然都要輸兩三成，但又冇你想像中咁災難，大把友買美股都輸一半啦。

53. 另外，如果土耳其用歐元，就唔會搞到咁混亂。但當然土耳其入唔到歐盟有很多很多原因。

54. 好，我十分擔心下一次講嗰19個古怪國家點收科。但，之後先算。多謝大家。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。