ivanliresearch

匯控6連升！兩個星期升咗16%！美股連跌兩星期，銀行股大跌，但納指有支持。NetFlix加價！BlackRock AUM 突破 10萬億！美股十年升340%，但由乜帶動？美國同中國報嘅出口數字，近期有乜奇怪？根本冇人在意咩「去中心化」，個個只係想搵快錢。點解美股今年應該冇得升？ (Patreon)

Published:

2022-01-15 08:33:29

Imported:

2022-09

Downloads

Download BlackRock.xlsx

Content

快評兩句 —匯控6連升！兩個星期升咗16%！

快評兩句—美股連跌兩星期，銀行股大跌，但納指有支持。

大師冇點你 — NetFlix加價！BlackRock AUM 突破 10萬億！

每日一圖 — 美股十年升340%，但由乜帶動？美國同中國報嘅出口數字，近期有乜奇怪？

Good Read — 根本冇人在意咩「去中心化」，個個只係想搵快錢。點解美股今年應該冇得升？

FB Post Summary — 一小時專訪已上線

快評兩句 —匯控6連升！兩個星期升咗16%！

1. 先講港股，堅係靚仔，雖然星期五要跌（唔好忘記星期四晚美股急跌），但見到由低位掃返上嚟。

2. 另外見到，星期五晚堆中概股繼續強勁，似乎港股仲有得彈，不經不覺連升4個星期。

3. 亮點當然係匯豐，6連升了，今年兩個星期升16%。

4. 明報嘅圖話你知，仲係落後於歐美同業好多。咁但，匯豐又唔係真係咁多在歐洲（含英國）嘛，美國更少。

5. 留意嘅係，星期五港股跌我一樣有錢贏，都有啲關隻匯豐事，所以真係物極必反，一切都是估值（如果啲生意未係差到要執）。唔止，星期五美股跌，我都係有錢贏。贏一蚊都係贏呀。今年真係保持絶大多數日子都贏錢，雖然唔算太多。

快評兩句—美股連跌兩星期，銀行股大跌，但納指有支持。

6. 美股連跌兩星期，但留意星期五晚低位已經反彈唔少，道指低位反彈返200點，標指由跌轉升收市。

7. 納指仲強，扭轉返呢排跑輸道指標指嘅頹勢。開始有支持未？唔知。

8. 都唔記得提大家，美股不經不覺又開始業績期（即係之後我寫文仲忙）。記住可以睇返Zachs個表，幾好用。

9. 星期五出咗嘅，係三間美國銀行，仲有BlackRock．呢度有總覽，亦可以個別睇CNBC（JP Morgan，Wells Fargo，花旗，BlackRock我下面會分開寫）

10. 咁你見到了，三間銀行，根本都係盈利勝預期，收入亦都勝預期。但股價呢？只得Wells Fargo一間升，花旗要跌，JP Morgan 更加大插6%。

11. 勉強搵理由嘅，你可以話Wells Fargo個盈利按年升，其他兩間按年跌。但照計呢啲已經在預期內啦。唔好忘記，JP Morgan 2021年嘅純利，仲高過疫情之前，係歷史新高。

12. 當然你亦可以講JP Morgan個展望比較保守，特別提到人工壓力。但，難道Wells Fargo啲友就唔使加人工？

13. 我估個教訓都係：無常。而家每星期五我在Tasty money夜晚有個節目，好彩唔係星期四做，否則星期四我應該會叫大家買銀行股。舊經濟嘛，受惠加息嘛，偏偏出完業績就死。

大師冇點你 — NetFlix加價！BlackRock AUM 突破 10萬億！

14. 最後提一提，Netflix在美國同加拿大加價。股價一度升3%，收市又冇乜力。應該會在Facebook 寫下。但明顯公司係有能力加價嘅，我亦早早話咗你知佢地會加價。

15. 講多少少BlackRock，除咗因為我有買，亦因為曾經好詳細寫過（呢度，同呢度），仲要有埋個Excel，已update，今篇文attachment有。

16. 業績你可以睇返公司網站。簡單嚟講，純利好過預期，收入略為低過預期咁。但個AUM（Asset under management）首次突破10萬億（10 Trillion）．

17. 畀呢個圖你快睇，10萬億嘅AUM，按年升15%，按季都有得升（Excel有）。如果計全年平均AUM，更加係按年升24%。相當不錯。

18. 但你見，收入「只係」升15%，唔多唔少因為有減價戰，但當然公司財雄勢大，冇驚過，睇下幾時有啲細公司離場。仲有，見到成本升得勁，主要係人工，所以你見純利「只係」升20%。

19. 咁，計下數，公司一年59億純利，市值就1300億。22倍市盈率，咁同公司嘅純利增長（20%，如果經調整就17%）相比，都尚算唔係好離譜，所以你見股價近年又唔係話好好，但亦唔係好差。

每日一圖 — 美股十年升340%，但由乜帶動？美國同中國報嘅出口數字，近期有乜奇怪？

20. 美股十年升340%，但由乜帶動？—　呢個就夠偉大了，唔同股市，過去十年嘅回報，拆返開由乜帶動。留意佢呢個係每年嘅複合回報（CAGR）之前篇文寫過（好睇的），市值咪盈利X市盈率，所以回報一係你盈利升咗，一係市盈率升咗，兩樣一齊都可以。留意佢用美金計，所以其他市場會有埋匯率影響（綠色）。淺藍色嗰個就係市盈率擴張/收縮。剩返嗰三個，其實都可以夾埋當係「盈利增長」，因為盈利可以再拆做收入增長，利錢厚咗（margin expansion），同派息。咁首先你可以見到，美股嘅multiple expansion最勁，其他市場相對地冇乜，日本直頭contract．如果你只睇盈利增長，實情美股唔係勁其他好多好多。但，留意，在每一個股市，始終佔得最多都係盈利增長。正如我舊文講，盈利可以不停咁上，但你個市盈率不可能無上限咁上。

21. 美國同中國報嘅出口數字，近期有乜奇怪？—一向話中國嘅數據有水份，但其中一個相對地幾可信，就係出口數字。因為好簡單，對家都會出，你好難假得太過份。睇上半圖，藍色線係美國嗰邊講由中國入口嘅數字，紅色線係中國報嘅出口美國數字，見唔見一路紅色都細啲？咁當然原因好多，除咗做假（但，報細數？明明話鍾意作大？），亦因為仲有香港，黃色線就係加埋香港上去，咁你見到就近啲美國出嘅數。但，一般都仲係低過美國出嘅數字。以上種種都唔係最得意。最得意係，你睇下成個趨勢而家掉轉，變咗中國出嘅數字多過美國。咁到底係中國作大？定係美國唔認自己有咁多嘢由中國入口？就唔知了。好可能兩樣都有啲。但特別留意，個轉折位正係美國加關稅，好可能亦有啲中國出口嘅嘢，用其他古怪方法流入美國避開稅也說不定。

Good Read — 根本冇人在意咩「去中心化」，個個只係想搵快錢。點解美股今年應該冇得升？

22. 根本冇人在意咩「去中心化」　—　都幾長嘅文，但唔算太難明。你真係好趕時間就由This is why…..嗰段睇起。你見近年好多嘢，都係講去中心化。由加密貨幣到NFT都係。作者問一個好簡單嘅問題：關我乜事？點解要去中心化？對普通人嚟講有乜好處？安全？唔係。快啲？又唔係。隱藏身份？又唔得。作者認為，實情只係班友想搵快錢，但咁樣講實在太low，所以要有一套嘅論述（narrative！）．「你贏到錢因為你企在歷史正確嘅一邊」，等啲友感覺良好

23. 點解美股今年應該冇得升？　—　一般未必會貼呢啲文，但作者夠晒猛料（或者應該話，佢拍檔Andrew Lo猛料）。留意佢有兩個圖，第一，美股好少可以連升4年。第二，三年嘅rolling average return 平均係12.4%，最近三年係22.0%。知唔知你應該諗起乜？我早前寫過嘅嘢！討論恒指好少連跌三年。留意股市唔係掟銀仔，唔係每一年independent！因為有估值！即係話，你掟銀仔，連出十次公，唔會令下一次字嘅機會大啲。但股市連升十年，似乎下一年跌嘅機會，就大過連跌幾年之後。