ivanliresearch

Ivan 專訪已上線。納指急跌，港股照計都開始冇力。大師冇點你：老早同你講價值股跑出，今年仲有得贏錢。你呢？恒指今年跑贏納指11%，有乜教訓？咁但點解你又唔早早去買價值股　早早沽晒美股佢？輸錢時分散令你輸少啲，但贏嗰時又會贏少咗喎，咁點揀？LuluLemon高位跌三成，有乜教訓？ (Patreon)

Published:

2022-01-13 23:28:56

Edited:

2022-01-14 11:24:48

Imported:

2022-09

Content

Ivan 專訪已上線

版務兼廣告一抽，跌市拎著數幫補下自己吧

納指急跌，港股照計都開始冇力

大師冇點你：老早同你講價值股跑出，今年仲有得贏錢。你呢？

恒指今年跑贏納指11%，有乜教訓？

咁但點解你又唔早早去買價值股　早早沽晒美股佢？

輸錢時分散令你輸少啲，但贏嗰時又會贏少咗喎，咁點揀？

LuluLemon高位跌三成，有乜教訓？

Ivan 專訪已上線

1. 首先講返，Simon Lee（利世民/李兆富）早兩日同我做咗個視像專訪，但唔係講今年前景呀，市況呀，買乜好呀之類。而係講返我嘅投資哲學，我點解買一隻股票，我覺得股市係咩回事，平時我睇啲乜之類。大約一小時，你作為Patreon會員當然免費畀你睇。想睇片嘅呢度（但只係影住我地兩個，冇圖冇字幕），只聽聲音嘅呢度。

2. 信我，好睇的，亦都唔使急，得閒開會或塞車先聽／睇。如果反應好嘅，可能做多啲呢啲對談。但千萬唔好預我會有時間同你整字幕呀，整圖呀咁。

廣告一抽，跌市拎著數幫補下自己吧

3. 另外，市況靜啲，冇乜嘢講。又賣下廣告（好似今個月第二次啫），因為可能有新讀者唔知。我覺得個rationale好簡單：有著數就去拎，一般都有過千銀，你開齊幾個執幾千唔係問題，幫補下啲股票損失。至於詳情，送乜，要幾耐之類，就自己開戶時慢慢睇吧，你唔會想我呢篇文打幾千字講啩

4. 首先係華盛，可能都多人未開，送蘋果。記住用返我個專屬link去開。詳細條款呢度。

5. 之後係富途，而家我用得最多．亦係送兩股蘋果，留意唔係用開戶link，係填碼：9M85BY4D

6. 另一間我用嘅係IB，買啲古靈精怪股，用我條Referral link開戶你會有回贈的。

7. 仲有早排好多人開咗嘅Webull，今個月送兩股Cisco，亦係用我嘅開戶link．

8. 最後係USMART，都送蘋果，月供美股好用的。我嘅開戶link呢度。

9. 呢期都有唔少讀者嚟問我，關於啲免佣券商嘅問題。因為出面都有人寫。實情呢，唔好怪我自大講句：刁，我成年前已經同你講，一年前已經寫過啦。真的，嗰時寫嘅係RobinHood．但打後成堆公司都係抄佢

10. 我諗核心嘅問題只係一個：唔收佣，點賺你錢？答案就係Payment for Order Flow．文入面有講係咩回事。但講得簡單啲：佢將你嘅盤賣畀其他人，然後收到錢。咁對你有乜影響？有機會你啲價就冇咁靚咯。但，食得鹹魚抵得渴啦，咁你又要免佣，就梗係其他嘢會付出，邊有免費午餐？

11. 我？我就其實完全唔care的，因為我唔會成日trade，況且我坐得長，根本咩幾格嘅差別，我完全唔會理。

納指急跌，港股照計都開始冇力

12. 市況快講，美股相當難睇，納指反彈三日（但有一日只係升幾點）後就斷纜，跌得相當急，道指亦都係升轉跌。輸錢當然正常，納指高位跌咗近10%，但如果你啲嘢傷亡遠超過指數嘅，好煩都要講句，檢討下，係一定出咗啲問題的。

13. 咁你見我個倉度，有得升嘅就只有呢幾隻。留意全部都係舊經濟股價值股（除咗隻怪雞嘅MYNA，但買得好少），有冇點你？我下一段會再詳細講多啲。

14. 港股嘅，風景就好啲，但都開始有啲腳軟。當然同舊年日日高開低收比好得多，今年暫時亦都好過美股好多。

15. 你見到港股一樣係舊經濟發威，恒指有少少升，國指跌少少，科指大跌。全球現象嚟的，殺估值嘛，特別係啲發夢科技股，大夢咪大殺，細夢咪細殺。再講一次，記唔記得唔夠一年前，　個個都係科技股專家，話唔使睇估值？

16. 壞消息係，星期四晚中概股都插得好急下，港股星期五應該冇得升啦啩？

大師冇點你：老早同你講價值股跑出，今年仲有得贏錢。你呢？

17. 好啦，又係睇下呢兩個圖嘅時間。納指高位回落10%，我諗可以當呢個係趨勢啦啩？你睇，年初至今，我力推兼且自己買咗幾個月嘅　價值股ETF IWD，有得升，升少少都係升！相反，同系嘅　增長股ETF IWF，跌夠7%。仲未見到大輪換？但輪到幾時？當然答你唔到。

18. 你睇埋指數，更加明顯，IWD就跑贏標指，然後標指又跑贏納指，教材一樣。

恒指今年跑贏納指11%，有乜教訓？

19. 睇埋香港，更加好笑。恒指年初今年升咗5%，納指就跌6%，一來一回已經跑贏11%

20. 有兩個重點，首先，估值估值同埋估值。好難答到你咩位先係合理，實際應用亦都極難，但，至少你唔可以有個錯嘅想法，以為估值唔重要。實情估值好重要。平時你聽嘅只係narrative。

21. 好簡單，你用嚟解釋舊年點解美股巴之閉港股好廢嘅理由，今年有冇邊樣變咗？冇喎。有人講話大陸打壓公司呀，大陸爆煲呀，甚至扯到咩民主法治呀。唔通今年大陸忽然間民主法治好咗？唔覺喎。以上嘅嘢，你可以用嚟解釋點解中港市場估值低過美股　—但你不能拎嚟判斷下個月或者下年嘅走勢。即係你用冇法治之類去解釋點解美股30倍PE 香港10倍（非實數，舉例），fine．但下一年呢？我當美股40倍港股8倍？咁再下年呢？你總去到一個位係會逆轉的。我當美股跌到20倍，香港升到15倍，咁你個narrative 依然成立架喎，美股有自由法治溢價喎，一樣存在丫，問題係，幾大先合理？

22. 不過，長線嚟講，我依然都係睇好美股多過港股，亦同樣地所以我唔會沽晒啲美股（我真係好唔明點解啲人鍾意將啲嘢沽晒去換嚟換去，覺得自己好醒？）。原因？實情Simon個訪問我有講，但，除咗估值，另外就係個盈利嘛，美股嘅公司始終盈利強，你而家買貴咗，有足夠長嘅時間，應該就追得返上嚟。呢個亦係點解盈利咁重要嘅原因。不過提提你，好多人一個月輸錢已經叫救命。長線有幾長？咪話美股迷失十年，2000年摸頂，你坐十年，都仲要輸15%。我講標普指數喎！你買納指摸頂？坐十年仲輸一半。

咁但點解你又唔早早去買價值股　早早沽晒美股佢？

23. 仲有，第二部份，我想講下，我真係舊年已經開始講IWD啦，亦開始買。真係捉個位捉得靚喎，係咪？

24. 咁但既然我只係新錢買，咁你想像到，咩IWD（甚至加埋其他咩IDEV EMXC咩都好），唔會佔到我好多。

25. 於是可能你又會有個問題：點解我嗰時唔走去沽晒啲科技股鎖定利潤，然後全部買晒IWD？

26. 答案都好簡單：話咁易咩。你而家事後睇就易。即係好似有個人話你知股市勢危，叫你唔好加倉，咁然後真係股災，咁佢幫到你啦。然後你問佢：咁點解唔叫我一早沽晒佢，或者沽空？

27. 因為，「如果佢錯呢」？

28. 我係有信心估今年價值股會跑贏增長股，但，呢個「有信心」，係幾大嘅信心？如果我99.9%信心嘅，我就真係沽走晒啲科技股啦。但我唔係嘛！

29. 你亦都諗下，我而家都仲係增長股遠多過價值股。點解？好簡單，因為我未開始諗咩IWD前，就係太過集中增長股咯。冇錯，呢個錯誤嚟的，但嗰時如痴如醉唔諗呢啲啦，同埋我知道呢個係錯誤。我係諗過增長股可能大跌，但心存僥倖，「冇咁快啩」，「未必係跌我嗰啲大科企啫」（事實我嗰啲FAAMG亦係跌得相對少）

30. 況且，而家不過係半個月啫，你又點知唔會只係假象，可能之後又係增長股大幅跑贏呢？You never know，我都唔知。

31. 冇錯，又係教你嗰樣嘢：分散。未必你要去到好硬性。有啲讀者問我，我會唔會特登去計，當然係唔會啦。我亦唔會去做rebalancing，即係例如啲增長股升得太多喎，我沽走佢，我唔會的。但天地良心，對自己誠實啦，你個個自己滿手發夢股嘅，唔好扮innocent喎，你擺明知自己係唔平衡架啦，不過你覺得平衡冇用，或者拖低你回報嘛。