［聲音版］ ［號外！］利世民 aka 李兆富　夜訪　李聲揚先生 (Patreon)

［一小時專訪］Quite simply，就係Simon利世民 aka 李兆富　訪問我。講思想框架。Patreon讀者免費睇到

呢個係齋聲音版，慳Data．上面有得play 同 停

如果想睇片，就另一個Post，但冇乜特別。只係影住我同佢。

以下係導讀

TLDR：到底呢條友乜構造？李聲揚的思考藝術。當然中間都有講啲真係投資嘅嘢，「護城河」呀，Costco呀，愛馬士呀，星巴克，點解你應該買美股標普指數ETF呀，點解港股中資股呢幾年唔掂呀等等。但係拎嚟做例子。你可以諗下，點解大奢侈品公司全部係歐洲公司，你話大陸佬韓仔冇文化，OK，咁美國呢？日本呢？你又可以諗下，點解其他公司抄唔到Costco．點解我燒味舖唔可以學星巴克咁玩一句「埃汾 Your 叉雞飯多薑蔥 is ready」咁創造品牌（呢個係星巴克嘅殺著之一，卡內基話齋，自己個名係世界上最好聽嘅嘢）

1. 越洋訪問，一對一，冇靚女主持，冇任何graphics，冇字幕（有冇義工有興趣整？）．「有嘅係兩顆熱熾嘅心」（其實好凍），一粒鐘

2. 內容？就係「埃汾的投資哲學」，或者係「思考藝術」（＊）

3. 實情呢個訪問係Simon 發起嘅，我一口就答應。唔止因為friend，亦因為佢問得好，個題目吸引。

4. 換著第個我真係未必佢，唔係我巴閉，而係，what for？我又唔使見報呃蝦條（都聽聞有啲用），又唔使見報令到轉工易啲（都有用的）。最重要係，你訪問我我又唔會多啲錢。咁當然唔係乜都講錢，但唔講錢，就要講過癮啦，揀擇啲

5. 記住啦諸位，我唔止一次講過，好多時你得到啲唔好嘅答案，因為你問錯問題咯

6. 即係我地唔會講咩 台海會唔會開戰呀（我答你會咁點？你聽日瞓身家沽空？）（＊＊）。2022 年展望呀（同上，我答你會跌咁你點？），買乜股好呀。我地討論啲更加高層次嘅嘢。

7. Simon想知嘅，係「你點樣去做一個投資決定」「背後會考慮乜」「係乜嘢令你買一隻股票」，簡單嚟講，就係背後嘅思考過程。呢個亦都反映我嘅人生觀世界觀。

8. 所以有啲人奇怪，我本書點解先講自己成長讀書，再講打工，然後先講投資。好多人以為係三樣嘢，我話係同一樣嘢。未必只係「性格改變命運」，但投資肯定係你性格嘅延續，係你嘅世界觀。

9. 仲有，我平時寫咁多文，出咁多Post．Simon 想知嘅，係到底我平時睇啲乜，有乜習慣，睇啲咩傳媒，點樣去寫一篇文。甚至係我嘅Daily Routine

10. 換言之，「到底呢條友咩構造」

11. 你要學嘅，係呢啲嘢。唔係個球員點樣起腳傳波畀個隊友，而係，點解佢嗰刻會有個咁嘅決定。

12. 可以好肯定話你知，我嘅投資決策，同好多人估嘅都唔同。Mostly就係「睇心情」，係好隨性嘅一個過程。但因為我日日都係Daily Natural High，以前都寫過我工作時相當冷靜／冷血，所以唔係in a sense話　嘩股災啦我嚇到沽走嗰種「睇心情」。而係好似派路（冇錯踢波嗰個）話齋，之前嗰晚打機，第二日決賽，捧盃，就係咁簡單。平時嘅訓練自然令你知道落到場點踢啦，變到本能咁。

13. 我嘅投資唔係乜？唔係咩我會整一堆test 出嚟，市值點點點唔買，市盈率高過幾多唔買，毛利率要有幾多，然後咩開個Excel睇埋footnote之類。你搞錯晒了，呢啲係我工作搵錢嘅技能，我靠呢啲技能去有錢投資

14. 即係，我唔會整個圖，拿我地點樣top down bottom up，點樣catalyst driver fundamentals valuations 左圈右圈　pillar pyramid ，然後整個2 X 2 Matrix。然後仲要整個investment committee咁，有權力制衡唔係我一言堂。

15. 以上呢啲垃圾，我全部都識。但呢啲只係棚，係大機構大基金去justify 收你咁多錢嘅馬騮戲。大佬，拎你幾百億AUM，唔通話你知，「冇架，睇我心情」咁咩。

16. 多年嘅金融生涯，令我學曉對人講人話，對鬼講鬼話。客係要呢啲嘢我咪畀呢啲嘢佢，拿，trading band呀，risk premium呀。但又係嗰句：但我厭倦，倦也悶，在某天，已拒絶再玩。

17. 我嘅投資風格，其實似舊派人。唔會似某一兩個人，但你見我寫文成日講畢菲特同Peter Lynch，影響我甚深。特別係畢菲特，我投資唔似佢（佢唔會叫你分散），但唔少作風係幾似的。

18. 我好肯定，畢菲特買間公司，都係咁上下嘅過程，「睇心情」，睇下信唔信間公司，信唔信條友。係咁架咋。唔通整個　Excel DCF Valuation ？馬騮戲嚟啫

19. 當然仲有畢菲特嘅不文。你見佢同芒格，應該唔係油膩大叔，但都耐唔耐講啲黃色笑話，發唔發現香港好少人會咁？金融才俊就係唔做愛的。你可以話我啲例子露骨粗鄙好多，但，年代唔同喎。

（＊）唔係話自己好巴閉，咁但，垃圾哲學都係哲學，唔巴閉嘅藝術都係藝術啫。正如港女文學都係文學，MK 餓媽卡些一樣係餓媽卡些。之前我話畢菲特都係財演，有人唔同意，話畢菲特好有料，唔似電視啲財演（我估佢想講我但唔好意思咁直接）咁冇料。但我係反對的，因為個理由佔不住腳。你不能話C朗好波就係球員，某某人屎波就唔係球員。

（＊＊）呢個唔係講笑。正如如果你一早知道2020年會爆疫封城經濟重挫。咁你會點做？「仲唔係瞓身沽空美股」？見到問題冇？亦都所以，你不停咁去諗咩　經濟會點　會唔會加息　普京會唔會死　之類，係冇乜幫助嘅。