港股：三連升斷纜，但似乎仲有力．美股：卒之終止四連跌．6隻ETF 5隻贏緊錢．恒指會唔會連跌三年？Case study：中信銀行998：3倍PE 8厘息 (Patreon)

港股：三連升斷纜，但似乎仲有力

美股：卒之終止四連跌

6隻ETF 5隻贏緊錢

恒指會唔會連跌三年？

Case study：中信銀行998：3倍PE 8厘息

1. 今日轉少少口味，寫啲唔貼市嘅嘢，而且寫返多啲港股

2. 實情有時唔想日日講市況，但又怕你地覺得我太離地，「個市係咁跌你仲同我講長線」，況且雖然人人上網都睇到，但未必得閒，又或者我撮要得好啲。所以都係講，但快講。

港股：三連升斷纜，但似乎仲有力

3. 港股雖然叫做三連升斷纜，跌7點，但國企指數就有得四連升，升3點都係升。整體叫做平穩咗，你見全日個走勢都唔係太差。但表現就真係幾分化，

4. 中海外688，騰訊700繼續強。長實1113，匯控5直頭幾個月高位了。其他香港地產股都強。但友邦1299，港交所388，阿里巴巴9988呢啲都要跌（圖入面冇）。點解？都冇乜點解。

5. 尤幸見到中概股同ADR（可以睇經濟日報，幾好的）都仲有力。

美股：卒之終止四連跌

6. 美股呢，標普指數四連跌後卒之反彈，星期二晚個低位大反彈係靚仔的。原因？冇乜喎，物極必反咁。鮑威爾在聽證會，明明幾強硬，講到加息絶不手軟。但市場又話預料咗呀，總好過佢做駝鳥有得通脹升呀咁。你見到了，根本只係睇市場反應先fit a story，如果美股係大瀉又會話佢強硬。所以搞清楚，好多嘢只係narrative。反而股價，指數等等，就真係客觀嘅嘢，當然點演繹就主觀。

7. 真係叫正面嘅，你見債息回返少少，呢個可能係納指勁過標指道指嘅原因。咁你見我個倉，升都係升啲垃圾股發夢股最多

8. 跌嘅，就只有呢3隻，證明個升勢都幾全面。

9. 好啦，下一個問題當然係：咁到底科技股係咪翻生？港股跑贏美股係咪已經完？答案：當然係唔知。當然暫時我嘅睇法都仲係嗰啲：留意多啲價值股，非美股，small cap，甚至dividend play（我特登用英文，費事你對號入座以為就係「高息股」，遲下解）。

6隻ETF 5隻贏緊錢

10. 以上呢6隻，就係我每個月定期買嘅指數ETF，舊文寫過好多，自己睇。我想講嘅係，除咗VB（small cap）全部都贏錢。（隻IDEV初段升的，畀我計埋入去吧）．

11. 留意，我亦唔係咩30年前買落，新讀者未必知，但舊讀者有睇。照計我都係開始咗半年唔夠（VOO QQQM早少少，其他遲啲）。

12. 咁你見到，真係今年買多啲ETF吧。唔係唔玩個股，都玩，但唔好「只係個股」。仲有，真係唔好話冇咁多錢，你真係每隻500港紙都好。我知有個別幾隻入場費千幾兩千港紙，但你真係可以自己調整。例如真係儲得3000蚊嘅，咁你咪買隻IWD同VB，下個月可以轉其他，實做到的。

13. 當然，隻隻都在水面，有兩個原因。第一係股市都普遍接近高位，但第二你亦見到，因為我唔係高位買。啲平均成本法都幫到下。最重要係幫到我安心，呢排呢啲嘢都仲有得升，幫補下有啲個股輸錢，昨日咪寫過，近四成嘅納指成份股，高位跌咗一半，咁你只渣嗰啲嘢，輸錢事少，仲分分鐘慌到其他嘢都掉走埋，又或者從此又唔玩股票—「直到下一次喪炒時先按捺不住飛入去摸頂」，唔好笑，真唔少咁嘅人的，例如舊年下半年先話「轉戰美股」嗰啲。過去十年做緊乜的？

恒指會唔會連跌三年？

14. 話埋你知，呢段舊年打落的，唔係今年見到恒指升先寫。短答案：唔知。長答案：應該唔會啩。

15. 無啦啦講起呢樣，因為睇到篇文，寫嘅係植耀輝，我同佢唔相熟但相識，啲嘢OK的，加上佢都算有幫過下我，所以我絶非抽佢水攻擊佢。佢講到話，照計港股唔會連跌兩年，冇特別講理由。佢只係寫：但按道理港股料不會連續兩年如此不濟，所以明年港股有相當大機會出現反彈──這可能是較「阿Q」的看法吧！

16. 植兄寫文忙，應該冇留意，港股早早就連跌兩年啦！2020年都係跌嘅！我都幾乎唔記得咗。（Macro Trends是好東西）。咁但，恒指如果2022年再跌，就連跌3年啦喎，之前有冇試過？

17. 答案，都係有的，但只係一次咁大把。又，當然個數據只係去到1987年，唔算太耐。但畀你估下，係幾時連跌三年？

18. 有冇人估「沙士」？咁你就錯得很了。沙士嗰年，港股係升的。唔止，嗰年樓價都係升的！唔止！嗰年香港經濟都冇衰退。冇呃你，睇我舊文＼

19. 唯一一次三連跌，就係2000，2001，2002。科網爆破嘛，實情美股都連跌三年。

20. 咁的確，三連跌係好少見嘅。當然呢個不足以支持2022就真係會升，但我估……應該會。雖然，會升不等於你要訓身買，升0.1%都係升，況且唔少人係指數升佢都要輸錢

21. 仲有一樣嘢，我唔知有冇啲數學L出嚟講，喂埃汾，你係咪犯咗低級錯誤？賭徒謬誤喎。之前開咗十舖公，唔會令下一舖開字嘅機會大咗架喎。因為每次掟銀仔係獨立事件。咁恒指連跌兩年，唔代表下年升嘅機會大咗嘛！

22. 錯，兩樣嘢完全唔同。掟銀仔就真係每一次獨立，但恒指每年嘅升跌，點會係獨立事件？同估值有關嘛，你跌得兩年，估值就係真係平咗的。亦因為咁，只要個經濟唔係連續收縮幾年（實情亦好少見），你好少見啲股市可以跌足五年十年的：例子？你見所謂泡沬爆破嘅日本股，當年都冇試過連跌四年！最多都只係三年。

Case study：中信銀行998：3倍PE 8厘息

23. 純技術討論，冇叫你買，我亦唔打算買。我而家冇持有任何內銀，當然你亦可以話我買盈富基金2800，或者國指ETF 2828（兩隻都個個月仲買緊），都係間接買咗唔少內銀。

24. 想講係，中信銀行998出業績快報。照計大家冇乜買港股，有買嘅都應該冇乜買內銀，買內銀都未必揀呢隻。不過都警告多次，唔係叫你買。

25. 因為內銀之中，中信都真係比較廢嘅一隻。甚至應該話，無論任何範圍，「中信」都係比較雞嘅一個社團，唔係講笑，你見「華潤」係好啲的。

26. 但你又咪理，股價點呢？陳年嘅唔講，但，過去一年，都升到5%。喂，好好架啦，你恒指要跌16%！跑贏指數21%。仲要好似收咗幾厘息

27. 想講嘅係，今次預告，純利按年升15%喎，不良貸款率下降。真係講一句，「問我國家哪像染病」？固然唔係咩咁巴閉，但同啲人講內銀破產，似乎有好大距離？

28. 認真睇下，過去幾年嘅數。你見到，盈利差不多係冇增長的。留意佢呢度嘅數同業績快報公佈嘅唔同，呢度個數細啲，涉及「優先股」嘅問題，以呢個圖嘅數為準。咁所以，未必呢個數真係會升15%，但照計有得升。但你見，真係幾年原地踏步的。

29. 不過睇你點睇，你話倒退咩？又冇。蝕錢呢？更冇。估值呢？殘到不堪，8厘息咁滯，好似3倍市盈率（！）。

30. 當然，增長係真冇的，背後涉及好多問題。但一個字講就係「讓利」，其他好多國企民企就死，銀行就賺咁多錢，仲要有啲內銀行國企，說不過去。所以盈利唔會有增長的，近乎零。但，你見又真係冇倒退，更加唔會搞到蝕錢。

31. 但，一隻冇增長嘅股票，值幾錢？你估到了，咪好似公用股咁。但話說回頭，你又睇下股息，叫做差不多年年keep到。

32. 結果？就係隻嘢差不多8厘息。撇除人民幣匯率呢啲咁深嘅問題，你又真係收到嗰8厘息喎。當然，股票永遠係炒將來，但內銀呢啲現象出現咗好多年，你當我呢段話時光機返去5年前講都得。

33. 另外，總有人話大陸公司嘅數假。呢個就真係好哲學嘅問題，之但係，派息，就冇得假下話？真金白銀畀你架喎，你可以提出嚟訂Patreon嘛，邊有得假？

34. 結論？都真係殘到一個位，就真係有人買。你見過去一年股價跑贏晒大市係咪？計埋收息你分分鐘雙位數回報。不過就真係跌到落8厘息先見底咁。你4厘息時追入去，一樣輸你一半（但有幾年息收返）。

35. 可能寫得有啲唔清楚，但呢個係一個好有趣嘅課題。另一隻好相似嘅，就係中移動941。不過，舊年股價一樣唔失禮。

36. 結論？我都唔知，但你真係見到，只係睇個股息去買股票，可以好危險。但又掉返轉講，有個股息頂下，都好過股息都冇，甚至盈利都冇。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。