納指一度跌入調整區，高位跌10%，但尾市倒升．港股就繼續跑贏，問你服未．快講王維基1137 HKTV12月嘅數，同埋2022目標．Zynga賣盤，勁升四成！舊文寫明有機會畀人買！四成納指成份股高位插一半。非標普指數美股似乎相當平。一年冇大插多數下年就有大插．2021 開心大發現（三）。價格管制對抗通脹有冇用？美國唔同教育程度嘅白人選民投票取向相當兩極。 (Patreon)

快評兩句 — 納指一度跌入調整區，高位跌10%，但尾市倒升。

快評兩句 — 港股就繼續跑贏，問你服未

快評兩句 —快講王維基1137 HKTV12月嘅數，同埋2022目標

大師冇點你 — Zynga賣盤，勁升四成！舊文寫明有機會畀人買！

每日一圖 — 四成納指成份股高位插一半。非標普指數美股似乎相當平。一年冇大插多數下年就有大插

Good Read — 2021 開心大發現（三）。價格管制對抗通脹有冇用？美國唔同教育程度嘅白人選民投票取向相當兩極。

FB Post Summary — 史上最好食嘅杯麵

快評兩句 — 納指一度跌入調整區，高位跌10%，但尾市倒升。港股就繼續跑贏，問你服未

1. 市況快講，港股嘅，繼續靚仔，又係由頭掃到尾格局，但會唔會開始要抖抖？

2. 支持大市係匯控5，華潤置地1109，長和1，中銀香港2388，恒生11之類，估唔到呢。科指都強，但唯獨係唔升阿里巴巴。有啲擔心

3. 見星期一晚夜期同ADR都麻麻地，中概股就有啲有反彈，但阿里巴巴要跌的。

4. 不過更有趣嘅係美股，原本係重演呢幾日嘅情況，債息升，納指插。納指一度進入調整區（即係高位跌咗10%），但之後絶地反彈，最後彈到倒升收市。你見單日由低位彈返2.7%。

5. 道指情況差不多，一度跌600點，但尾市跌幅收窄到160點左右。（留意張圖寫納指跌係錯嘅）

6. 係咪跌完？都答你唔到住。你見有個別股票係大成交咁跌，亦都唔只係科技股。

7. 同樣地，叫做逆市有得升嘅，亦都唔同類型嘅股票都有。不過我睇法不變，今年依然會係買多啲 舊經濟，外國股，同埋small cap ETF。

快評兩句 —快講王維基1137 HKTV12月嘅數，同埋2022目標

8. 話說隻1137 11月尾出咗盈警，當時都有寫。股價當然大跌，近排好啲，但都同盈警前仲有大約15%。

9. 剛剛公司出埋12月嘅數，亦即係2021年嘅數。詳情我已入咗在Excel（attachment 有）。見到12月嘅每日平均單數反而唔及11月，但單價大啲，日均GMV只係升少少。

10. 埋單2021全年GMV（呢個圖Excel都有）65.7億，梗係麻麻，因為公司年頭自己目標係66-70億，下限都達唔到，按年只升得10.4%。不過公司2022目標GMV 75-80億，增長14-22%，就唔算太低啩，至少高過2021年嘅增速。

11. 另外，公司仲出咗個廣告收入嘅目標，1.2億元，之後先細睇，但肯定廣告收入會佔得越嚟越多，而且利錢高。記唔記得Amazon都係咁？網購蝕錢咁滯，但廣告賺唔少。

12. 至於公司有個計入乜乜又經調整嘅咩EBITDA，我相信係冇乜意義的。

大師冇點你 — Zynga賣盤，勁升四成！舊文寫明有機會畀人買！

13. 遊戲公司嘛，畀人收購，當然勁升。但有講過咩？真係有！雖然好少，一次咁大把，我冇買，我估都冇乜人買。但真係當時有講埋會畀人買！

14. 實情偶然留意呢啲有機會被收購嘅公司都幾好，之前有寫過軟件股（呢度，呢度，呢度），或者媒體股（呢度，呢度）。正路市況唔好反而更加睇呢啲，但難玩的，往往係你捱足幾年先出頭。

每日一圖 — 四成納指成份股高位插一半。非標普指數美股似乎相當平。一年冇大插多數下年就有大插

15. 四成納指成份股高位插一半—上星期嘅圖，好似都未計星期五。唔怪得真係有人問我熊市幾時完。我心諗標指高位先跌5%，納指亦不過10%。但你見啲發夢股就真係好大鑊，原來納指入面有四成成份股，高位跌咗一半。除咗好老土咁叫你分散，要睇估值，控制注碼。仲有留意下：邊個以為買細股好過大股？

16. 非標普指數美股似乎相當平—留意係相對嘅市盈率，指數外同指數入面嘅市盈率比例，應該係百份率。見到呢個比例十幾年新低了，亦因為咁你見我都買細價股ETF。

17. 一年冇大插多數下年就有大插—相當好嘅統計，我估有原因。咪話舊年美股好易玩，最大drawdown都不過係5%。但見到歷嚟呢啲年份之後嘅下一年，就會有相當大嘅drawdown。我覺得唔係巧合，因為股市冇大drawdown，就會太易玩，好多人飛入去，亦多數係升嘅年份。然後估值就會貴，下年就冇咁易玩。但好消息係：大drawdown又唔等於一定會跌嘅。

Good Read — 2021 開心大發現（三）。價格管制對抗通脹有冇用？美國唔同教育程度嘅白人選民投票取向相當兩極。

18. 2021 開心大發現（三）— 又係有人貼咗52個有趣嘅知識，好多同金融無關，但幾有趣的。之前我都貼過兩篇，你可以去睇返（呢度，同呢度）。我覺得有趣嘅包括5（額菲爾士峰個山名同個人名唔同讀音），28（阿加斯靠睇伸脷智破碧加發球），37（迪士尼會在城堡頂用啲細啲嘅磚，令到睇落高啲大哦），44（油站唔係靠入油賺錢，至少外國唔係）

19. 價格管制對抗通脹有冇用？— 長嘅文，但唔算難明。我覺得係要寫咁長的，香港好多人都鍾意啲嘢兩句講完，話唔應該寫咁長，去掩飾自己懶同無知。講返，呢個東西其實係衞報一篇文提出，原文在呢度。原本作者當然認為有用，認為當今情勢政府應該行價格管制，但後來都畀人插得幾勁，結果篇文嘅題都改埋（原本話有用，後來改咗做問句：係咪有用）。咁呢度篇文嘅作者寫咗篇長文回應：答案當然係，都有點複雜，亦都好睇你指邊個時刻。但針對目前情況，作者認為唔應該用價格管制。實情佢根本都係覺得通脹只係暫時，唔覺得係咩大件事。

20. 美國唔同教育程度嘅白人選民投票取向相當兩極—原文嘅題係The White Vote and Educational Polarization，我諗唔到點樣用中文好簡潔咁寫。無論如何，篇文提返近三十年兩個投票大勢：有學位嘅Sub urban以往投共和黨，但近幾十年轉晒軚。冇學位嘅就投共和黨。情況在白人（佔74%票）之間分化更加大，留意2020白人整體都係投侵侵，但有學位嘅白人（31%票）就支持拜登居多，冇學位嘅（43%票）就當然侵侵，而呢個分化係咁多年最大嘅。慎防有人問，白人佔74%票，整體投侵侵，咁點解都輸？因為黑人Hispanic亞裔係好少投侵侵的。

FB Post Summary — 史上最好食嘅杯麵

21. 史上最好食嘅杯麵—完全同投資無關，雖然我都扯到去護城河。就真係只係推介杯麵，不過真係唔係廣告。好食的，禁晚市堂食十分有用。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。