風水輪流轉，港股跑贏美股。埃汾美股策略跑出，巴郡跑贏ARKK 20%！75%美股基金經理跑輸大市。美股跑贏世界唔止因為科技股。2021年最差嘅科技。市場大輪換。 (Patreon)

快評兩句 —風水輪流轉，港股跑贏美股

大師冇點你 — 埃汾美股策略跑出，巴郡跑贏ARKK 20%！

每日一圖 — 75%美股基金經理跑輸大市。美股跑贏世界唔止因為科技股

Good Read — 2021年最差嘅科技。市場大輪換。

FB Post Summary — 六合彩延期的隨想。停晚市堂食的隨想。

1. 壞消息係呢期相當之忙，今日先出到星期五晚嘅文，仲有應該週末專題會取消一次。好消息係過咗最忙嘅時間，嚟緊好啲，仲有好多回顧展望小專題想寫。

2. 但，當然你不能只係等我寫展望，好多嘢每日都在變，你可以睇到的。而每日睇文就係好好嘅幫手，或者至少隔幾日睇下，或者快睇都可以。

快評兩句 —風水輪流轉，港股跑贏美股

3. 而家講返星期五市況，但我依然覺得值得。先睇港股，夠晒靚仔，由頭掃到尾，冇再虎頭蛇尾。另外，成交有1500億，唔算太多，但還好。升嘅股票只得55%，唔算太全面，見到都係大公司升得多。

4. 你見到有唔少板塊都跑出，包括科技股，但主要係舊年慘烈嘅阿里巴巴9988（又，畢菲特同芒格真係勁，可能真係撈正個底），星期五晚中概股亦都普遍強。星期四都同你提過，官媒都出聲話阿里巴巴走出谷底了。

5. 龍頭嘅金融股勁，大嘅消費股都強（蒙牛2319百威1876之類，但我冇買），香港地產都OK。仲有內房股，疑似放鬆三道紅線，之前都講過大陸嘅嘢，收到咁上下又要放。你見又係中海外688同華潤置地1109勁升，中海外一個星期升20%，邊個話內房冇前途？我亦只係買呢兩隻。當然如果最後成個行業復蘇，就梗係啲就執笠嘅會升得最勁，但個過程足以嚇到你死。內房當然帶動埋建材股強，水泥鋼鐵之類，但我冇買。

6. 美股呢？風水輪流轉，另一個世界，標普指數連跌四日。你見到好明顯，都主要係舊經濟股支持，但科技股跌得勁。記唔記得舊年成班點樣以為科技股點貴都冇所謂？一個星期納指已跌4.5%，發夢股大把跌雙位數以上，但標指只係跌1.9%，道指更加係0.3%。講咗N次叫你分散呀，同埋留意注碼，你見我個垃圾倉只係買3萬港紙，升嗰時過癮下，但total loss都唔會世界末日。

7. 留意即使Big Tech，微軟同Google 都創咗疫情後最大嘅一星期跌幅，不過都仲有啲其他公司頂住下，所以真係唔好太過集中。你見我渣嘅嘢，都係有升有跌，亦唔係舊經濟嘅實升。

8. 而最好笑嘅係，今年開局，港股跑贏美股！當然唔知之後會點，但舊年走去沽晒港股買美股嘅，果然係如我預測，摸底沽摸頂買，左一巴右一巴。

大師冇點你 — 埃汾美股策略跑出，巴郡跑贏ARKK 20%！

9. 之前都提過，覺得今年幾個大勢會轉，叫大家買多啲舊經濟同價值股。當然只係一個星期，但真係見到幾明顯。你睇，巴郡升6%，契媽Cathie Wood隻ARKK再跌13%，巴郡跑贏20%，一個星期咋喎！

10. 背後，當然係價值股跑贏發夢股，再煩我都要講，唔該讀者反省下，之前你地買科技股幾咁如痴如醉？有啲仲覺得我潑你冷水。

11. 事實就係，你見隻IWD（而家個個月買緊），呢個星期有得升（最頂嗰隻）。指數要跌，而增長股ETF（IWF）更加跌6%。一個星期咋喎，仲唔嚇死你？唔怪得星期六有人問我「熊市幾時完？」。我心諗，標普指數離高位3%咋喎。

12. 當然一個星期唔代表乜，但重要嘅你見到即時出面啲友叫晒救命，我依然瞓得安心。亦畀你見到，升市個個股神，而家大市都未開始恐慌（都話標普指數只係跌咗3%），成班新手已經嚇到瀨尿。

每日一圖 — 75%美股基金經理跑輸大市。美股跑贏世界唔止因為科技股

13. 75%美股基金經理跑輸大市—訊息量夠晒大，如果你有FT戶口可以睇原文。正如咁多年嘅研究都證明，過半基金經理係跑輸的。所以首先你唔應該買基金（有冇人仲有買？），二來，你亦不見得醒過基金經理好多，所以真係應該加重ETF，唔好當自己股神。但另外留意，見唔見價值股嘅基金經理，就跑贏指數？當然呢度蘋果對蘋果，佢地係跑贏價值股指數，相信亦因為價值股表現冇增長股咁好，正如你見跑贏港股唔係太難。最後話埋你知，點解啲基金經理跑輸？因為好多都渣唔夠蘋果，微軟同Tesla，偏偏呢三隻舊年升到癲。

14. 美股跑贏世界唔止因為科技股—好多人講美股估值貴得有道理，因為啲科技股好強，而最大嘅又真係好賺錢。以上講法冇錯，但只係故事嘅一半。你睇呢個圖見到，即使係價值股，都係美股跑贏全世界。換句話講，你亦可以話美國嘅價值股都唔平。然後有冇人質疑，咁你仲買？答案係：始終冇增長股咁貴。況且，我亦有叫你買歐洲日本同其他新興市場。

Good Read — 2021年最差嘅科技。市場大輪換。

15. 2021年最差嘅科技 — 麻省理工選嘅2021年最差科技。包括有Biogen嘅老人痴呆藥（又貴又好似冇效副作用又勁，完全唔知點解政府會批），勒索軟件（搞石油管公司，卒之畀FBI封咗），太空旅遊（富豪玩意，但好快會變到人有我有，好似去羅浮宮搵蒙羅麗莎打卡咁），仲有Beauty filter（本人最憎，唔知有乜好玩，但文中話會影響啲小朋友，令佢地認為用真面目見人有問題）。但我特別想你睇Zillow嘅「大數據炒樓」如何炒燶，吾友高天佑都寫過。留意唔少點樣巴閉嘅咩高科技AI，最後係呃神騙鬼，特別係唔講得畀你知嗰啲。

16. 市場大輪換—篇文作者新年寫的，美股都未開市。作者睇法同我有啲似，但更加大膽，佢以為2022年係大輪換。佢之前已經寫過好多發夢股係龐氏騙局，今次再大膽啲，直頭覺得即使大型科技股都會大插。原因當然亦係我之前講過嘅估值，但當然作者認為息口會大幅上升，倒也未必。另外，作者極之睇好舊經濟股，認為會大升。都話大致同我睇法差不多，不過我睇法冇咁誇張，你可以讀下篇文。

FB Post Summary — 六合彩延期的隨想。停晚市堂食的隨想。

17. 呢兩篇都係無無聊聊，寫到離晒題，只係我個人嘅人生睇法，但偏偏好受歡迎。證明真係好難捉觀眾口味，只能夠隨心。

18. 六合彩延期的隨想 — 由買六合彩開始講，六合彩當然係negative expected value 嘅東西（否則馬會邊得嚟咁多錢做善事），股票一般係創造財富。但，可以兩樣都買。股票大家明丫，但點解六合彩都不妨買？擺明係搵笨喎。因為個回報太不對稱：極大機會你係輸，但少少錢。極細機會你會贏，但極大嘅錢，你分分鐘可以退休。呢啲遊戲值得玩—然後帶到去你要控制注碼，六合彩咪一百幾十咁買，股票當然大大棍買，如果掉轉就死。當然實際上唔會有人一百幾十萬買六合彩，但我講個原因。然後再講，中間有好多東西，就最搵笨，例如大手賭錢，或者買垃圾股—死嘅機會唔低，但即使中咗亦唔夠你改變命運。推而廣之，好多嘢你去問「買唔買得」「應唔應該試」，全部冇留意重點：你買幾多？你係日日做定偶然做？注碼同劑量，決定結果。然後再講好多人搞到一鑊泡，因為佢地不停做錯決定。最後，結婚係一個好大嘅決定，仲係小數你可以話到事嘅決定。請大家真係好小心咁揀對象，當然唔結都係選擇。

19. 停晚市堂食的隨想 — 更加無聊，講narrative．絶大多數人（包括你同我），都太鍾意聽narrative，但忽略咗事件嘅本質。最危險就係，同一件事，我用唔同嘅包裝手法，用唔同嘅詞語，即時可以令你感覺完全唔同。同時你亦留意，有啲人係刻意咁樣去煽動你嘅情緒，例如好多寫文嘅人，或者政客。甚至股票都係，你可以睇下，嗰啲發夢股，點樣隻隻都吹到改變世界。咁巴閉，點解冇錢賺？你要小心，應該感性時就感性，應該理性時就理性。寫文我充滿感情，但打工投資我不帶感情。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。