ivanliresearch

每個月嘅堆定額投資指數ETF已做．月頭買嘅7隻ETF，6隻潛水。「點解唔等多幾日先買？」．但，有邊隻嘢冇潛水？就睇到大趨勢了．美股納指連跌3日，但唔似好大件事。香港騰訊阿里巴巴有力，跌夠未？ (Patreon)

Published:

2022-01-06 23:12:05

Edited:

2022-01-08 23:11:08

Imported:

2022-09

Content

快手賣個廣告：華盛，我估好多人未開

每個月嘅堆定額投資指數ETF已做

月頭買嘅7隻ETF，6隻潛水。「點解唔等多幾日先買？」

但，有邊隻嘢冇潛水？就睇到大趨勢了

快講大市：美股納指連跌3日，但唔似好大件事。

快講大市：香港騰訊阿里巴巴有力，跌夠未？

1. 舊年年尾股票跌，做激光，讀者人數冇增長，仲要一街都係人，心情相當惡劣。去到今個月係好返啲嘅。不過都係極之忙，大把嘢想做未做，所以好多回顧展望文都未寫。雖然最後點都會有。大家千萬唔好以為我唔使返工好得閒—當然而家同返寫字樓年代比，我最大改變係：瞓多咗好多。差不多日日至少8小時

快手賣個廣告：華盛，我估好多人未開

2. 快手賣個廣告，今次有新嘢，我估冇乜人開咗，就係華盛。

3. 留意佢地唔係送股票，係送交易現金券。所以你理論上而家唔使做任何交易—但，因為佢係交易現金券，你冇得就咁拎錢走，所以你最後都係要買股票，先會用得到。不過你就真係大可以買隻1200蚊嘅股票，然後即時沽咗佢，再拎錢。

4. 存入資金要求都低，只係1萬蚊，放60日唔好郁，記住真係可以唔使交易，但到拎咗交易現金券後就要交易先用到，同埋到時有時限要用（好似30日，我都會幫埃汾太開個，到時話畀大家知）（而我就早早自己開咗華盛的）

5. 另外，佢地港股係無限免佣。而美股就免佣180日（上限1800美金）

6. 記住用返我個專屬link去開。詳細條款呢度。

每個月嘅堆定額投資指數ETF已做

7. 首先循例交代返，每個月堆定期投資，3187，VOO，QQQM，IDEV，EMXC，IWD，VB。已經買晒，點解買就舊文有講過晒的，今日懶搵舊文貼了，雖然你一Google都知啲嘢係乜。今次就唔係講點解買，亦唔係介紹幾隻嘢，而係講下小小……心路歷程，同埋執行上你可能有嘅小問題。

8. 想問「點解唔買SPY買VOO，點解唔買QQQ買QQQM，點解唔買EFA買IDEV」之類，舊文有講，但多數都係因為管理費，同埋過去嘅表現（雖然不保證將來）。容許我再講多次，唔好太鑽牛角尖，隨心啦，分別應該冇乜。當然亦因為我開頭買咗VOO，咪唔會之後買SPY，可能係我嘅強迫症發作（我有些小，唔嚴重，但我實在不能接受用唔同顏色嘅筷子食飯）。

9. 題外話，我都幾怕人問我，點解買呢隻唔買第隻，正如我好怕我食上莊又有人問做乜唔食下莊，食叉肉飯又問你做乜唔食叉雞，可能我脾氣唔好，但真係有點煩（可以睇下呢個故事。唔關投資事，但好睇）。我明白讀者絶大多數情況係真心請教，或者有好嘢介紹我。我建議你下次唔好問我：點解買VEA唔買IDEV。你可以直接話我知：睇下隻IDEV，平過VEA喎。類似咁。正如見到我食叉肉飯，唔好問我做乜唔使叉雞，直接話我知雞都好好食，可以試下。

10. 留意我呢堆嘢係自行月頭買，唔係經銀行券高，咁當然要個人有一定嘅紀律性，你見到我就真係一收到Patreon訂閱費（多謝大家先），就即時去買。全部都係星期一，今年第一個交易日買嘅。另外留意，因為係我自己去買，所以冇定死一個金額，但有個大約銀碼。用例仔講你就明：如果你去銀行或證券行嘅月供，當我2000蚊，月供隻嘢，950蚊，買到兩股。但一個月後，佢升到1010蚊，我就變咗買得一股，成件事就有啲奇怪（當然亦可能只係強迫症）。咁現實我嘅情況，就會照買兩股，用多少少錢。如果佢之後一路跌呢？可能變咗買三股四股，銀碼一樣。但如果一路升呢？好可能我繼續買兩股，銀碼咪多咗，咁希望一路個收入都會跟住升（靠大家推薦朋友，或者自己升tier了，多謝）

11. 另外，除咗隻3187外，我仲有堆月供港股，就真係在銀行的，舊文有寫，呢幾個月都冇變過（好似舊年年中加咗咩中移動941 長實1113 長和1 電盈 8 同太古 19）

7隻買嘅ETF，6隻潛水。「點解唔等多幾日先買？」

12. 好啦，你唔使去查股價，我幫你睇埋，上面7隻嘢，6隻潛水。十分合理啫，過去幾日嘅市況你知啦。咁總有個問題係：喂，既然係唔係銀行或券商扣數，鍾意幾時買都得，做乜咁急第一日飛入去？可以等下調整先啫。

13. 簡單嘅答案係：而家跌咗你咪咁講，覺得可以遲下先買。但，如果呢兩日大升呢？你又後悔做乜唔第一飛入去買。而更重要嘅係：你估邊種情況多？就梗係後者嘅情況多啦，股票升嘅日子同幅度多過跌嘛。所以早買早著數。

14. 當然，你真係等多幾日，搏有大跌先買入去，都冇話唔得。但三個問題，第一個上面講咗，如果大升你點算？第二，你等多幾日都仲可以，但始終要一個月內完成咗佢，否則你咪失晒定期買嘅意義。

15. 但仲有第三：我就係唔想日日睇住邊隻升邊隻跌，唔想time the market 嘛。另外仲有會影響我寫文或睇其他嘢，股票唔使成日睇嘅。買個股我都有時會睇最近係升定跌，但呢堆指數ETF，我就係不問題買嘛。你留意我全部都差不多市價即買的，唔會咩放低十格咁—OK，有時會，但我一定會嗰一日完成晒，無論佢升定跌幾多，一定收市前搞掂佢，費事煩。

但，有邊隻嘢冇潛水？就睇到大趨勢了

16. 但講返，咪話7隻嘢，有6隻潛水？你唔好集中諗嗰6隻嘛，跌市，潛水好合理。你應該頭先已經問，咁邊隻升？

17. 答案就係隻IWD。

18. 點解我要特別講？唔係因為佢升得多，又唔係我買得好多，而係背後代表乜？點解呢隻嘢會逆市跑出咗。

19. 一個月前我寫過IWD，呢隻係價值股嘅ETF。我買嘅原因好簡單，一來為平衡，你留意IWD入面嘅嘢，我多數都冇，我估你都冇。第二，我好早已經估，今年會轉勢，跑輸N年嘅價值股會跑出

20. 當然，幾日嘅走勢未必係乜，但到你完全可以「確認」嗰時，又係已經升咗N咁多，所以都係一路留意住。但你真係見到，呢幾日，完全係啲價值股跑出，高估值股死晒。似乎我嘅估計都啱。

21. 以上兩個圖，都係星期三晚，納指大跌3.3%時。第一圖好靚，由左至右，係每股盈利增長最低至最高，咁你見到增長最高嘅，就跌得最多。第二個圖呢？睇唔同equity factor（有啲深，遲下解，但其實growth 同 value咪兩種最常見嘅factor），亦見到growth 死晒，value跑出。留意呢度啲分類會有重疊，例如你間公司可以又係value又係dividend aristocrat（嚟緊會有文解dividend aristocrat係乜）