恒指小回 科指大回。道指小回 納指大回。果然蘋果見3萬億大市即插（講笑），果然新經濟唔掂（真）。 LVMH 創歷史新高添呀！商湯散水！美股舊年回報係由乜推動？美股歷年回報，升多定跌多？100個輕鬆改善生活嘅方法。Creator economy嘅start up 未必係Creator嘅朋友 (Patreon)

快評兩句— 恒指小回 科指大回。道指小回 納指大回。

大師冇點你 — 果然蘋果見3萬億大市即插（講笑），果然新經濟唔掂（講真）

大師冇點你 — LVMH 創歷史新高添呀！

大師冇點你 — 商湯散水！

每日一圖 — 美股舊年回報係由乜推動？美股歷年回報，升多定跌多？

Good Read — 100個輕鬆改善生活嘅方法。Creator economy嘅start up 未必係Creator嘅朋友

FB Post Summary — 蘋果3萬億市值嘅啟示。蘋果3萬億市值之後會點。港片之鬼

1. 首先，出咗篇小專題，好睇的，去睇。打後我寫嘅文都會用到。

2. 另外，今日樓上堆 快評兩句同大師冇點你，我會一段過寫。咁點解標題分開？因為會放上網吸新讀者。將來都唔排除咁做

快評兩句 & 大師冇點你

3. 夠晒邪，Facebook 有寫，之前蘋果去到1萬億同2萬億美金市值，打後都好快有個唔細嘅調整。唔止蘋果自己，成個大市都係（咁蘋果亦係重磅股）。今次到3萬億，又係咁。照計冇乜根據，但你話邪唔邪？

4. 你只係睇港股嘅，好容易理解錯，以為因為咩第五波所以恒指大跌。但你細心啲睇根本唔係咁回事。你見恒指跌幅唔算大，但科指就大插。仲有，唔少舊經濟股都升得唔錯，銀行股啦，地產啦，當然仲有中移動941（回歸A股，可能回購港股）。不過，1137就逆市奇葩，就真係因為第五波而升了。

5. 實情你見到美股情況，都係差不多，甚至嚴重好多。道指所謂400點，濕碎，1%多啲。但你睇納指幾咁大鑊！個別啲股票跌得仲勁。

6. 你睇下，跌得較少嘅，全部係啲舊經濟股。LVMH直頭歷史新高添呀（但相當貴）。

7. 唔知算唔算係一早話咗你知，但的確舊年十一十二月我已經話，今年係睇價值股，非美國嘅股，或者小型股。當然而家只係一兩日嘅走勢，唔代表乜。

8. 不過掉轉頭，我當然都輸錢，我又冇走去沽晒啲新經濟股買晒舊經濟，你都唔好咁做，一般都唔work。你需要嘅係保持組合嘅平衡：但你可以話我有口話人冇口話自己，我都係科技股多的。但至少我好早已經知道呢個問題，想今年戥返勻啲，奈何市場係唔會等你嘅。所以事後睇，根本當初就唔應該咁側埋一邊。

9. 希望以上呢啲，比到少少啟示大家。

10. 咁仲有，有個讀者星期一追咗商湯，見我叫沽星期二就沽走。夠晒高難度。話口未完隻嘢星期三已經大插，有嘅最好沽咗佢先了，冇嘅唔好追。好貴。

11. 好啦，講到尾，做乜全世界都係科技股散晒？你大約估到，梗係又關債息事。雖然債息又唔係升得好多（不過之前兩日已升唔少）。

12. 所以另外一個消息係，聯儲局可能提早加息，或者加快縮表。

13. 點好？實情係冇乜點，做開嘅嘢繼續做，我自己嘅新錢就唔會買啲發夢科技股了。

每日一圖 — 美股舊年回報係由乜推動？美股歷年回報，升多定跌多？

14. 美股舊年回報係由乜推動？—真係環環相扣，小專題咪講咗，股價嘅嘢，不外乎係盈利推動，或者市盈率推動。睇第一個圖，標普500，big cap．見唔見20年同21年好唔同？20年盈利跌，但市盈率擴張，照升。21年市盈率收縮，但盈利大升，又係升。如果知道股票一定炒預期嘅話，咪解釋到點解20年盈利咁差但市盈率可以勁升 —因為就係預支咗21年嘅盈利增長。但另外留意，第二個圖，標普600（small cap，舊文有講，都話環環相扣！），又係另一回事。2021根本盈利都好勁，但你見個市盈率收縮得好勁，而2020年又唔見得擴咗好多喎。你睇得到，個市盈率冇乜點大擴張過，照計跌嘅空間細啲。

15. 美股歷年回報，升多定跌多？—訊息量好大，但呢個圖就真係一年放一個格，唔同年代唔同色。你應該留意到嘅係，個圖唔係normal distribution，側埋一邊。正回報嘅年份比較多。而且，負回報集中在中間左邊兩格，好少會跌好多。當然最底計埋畀你，基本上75%嘅年份升，而仲要係升嘅年份平均升幅，大過跌嘅年份平均跌幅的。咁樣一拉之下，美股當然升咗幾百倍。

Good Read — 100個輕鬆改善生活嘅方法。Creator economy嘅start up 未必係Creator嘅朋友

16. 100個輕鬆改善生活嘅方法— 有啲類似之前我貼過兩篇文，講2021 365個開心大發現咁。呢度有100個簡單嘅方法，改善你生活。最重要係，完全唔使花咩氣力，又唔使好大意志，唔同你話想睇多啲書想減肥之類。當中有啲好多人講過，有啲我唔同意（例如第8），但有唔少我都幾同意又覺得幾有趣。例如2（想買嘢時，等多72小時），3（超市你應該排前面成車係嘢嗰條友後面），19（衣帽間畀個牌你時要影低佢，因為之後你會唔見），34（唔帶電話出去散步），35（牛油當然要有鹽），38（電話唔好放睡房），47（行路唔好戴耳機）。66（唔好將啲嘢留到最好場合先用，例如靚酒靚衫），92（食飯唔好玩電話）

17. Creator economy嘅start up 未必係Creator嘅朋友— Creator Economy呢個課題我成日講，因為我係content creator．入面主要話畀你知，如果你係creator 或者想做，就小心啲，小心你嘅平台，因為佢同你嘅利益未必一致。好簡單，如果你係一站式嘅，你執笠點算？你賣盤點算？例如你想像下如果Patreon賣咗畀騰訊？可能你地好多人即時唔用。有啲公司就會預留一筆錢，公司唔用得，真係執笠呢啲錢就用嚟幫你轉場。又或者用open source．但都係唔夠。點保障自己？都係老生常談，唔好集中晒所有嘢在一個平台，否則你就畀佢勒住。而Patreon已經算係相當好嘅，因為係讀者直接付費，佢加價或者執笠都好，大家轉場唔難，而總有人會搞一檔出嚟。亦可以話，Patreon唔使太靠Network Effect，基本你直接訂我，唔會理佢仲有乜其他人。你可以比較下Facebook，之前個個話轉場，而家又點？同場加映一份講Creator Economy生態嘅深入報告，唔難明，唔長（我以前都貼過）

FB Post Summary — 蘋果3萬億市值嘅啟示。蘋果3萬億市值之後會點。港片之鬼

18. 蘋果3萬億市值嘅啟示 — 長期讀者會覺得有啲嘢熟口熟面，咁事實係咁的，但我每次寫都會有少少唔同，你總會有新角度。Steve Jobs死時，蘋果已經無人不識，但一樣可以再升十幾廿倍，呢個教訓我成日講。但有冇留意好多人話蘋果冇創意？我就話你知創意係overrated，至少商業上嘅創意同你普通人諗嘅唔同。另一角度講，你公司嘅創意賺唔到錢，等於冇。昨日篇小專題都有講，驅動股價嘅，始終係盈利，唔係創意或乜。

19. 蘋果3萬億市值之後會點 — 亦係不幸言中，幾次蘋果去到啲萬億嘅milestone 位，就會急回，連大市都係。但好消息係，之前幾次都係之後再破頂。另外，你而家睇買蘋果梗係簡單，但2018年，冇咩特別嘢（話中美貿易戰喎），蘋果一樣一季跌33%。我使唔使又止蝕？

20. 港片之鬼—就講舊年十大票房嘅港產片，我全部都有入場睇。估唔到引嚟唔少討論。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。