ivanliresearch

［股市101］股市點解升？因為市值＝盈利Ｘ市盈率。但邊樣重要啲？兩者正相關定負相關？ (Patreon)

Published:

2022-01-04 19:31:24

Edited:

2022-01-04 22:21:11

Imported:

2022-09

Content

市值＝盈利X 市盈率

而盈利一般係長期向上嘅，指數更加明顯

標普指數嘅盈利更加係長期向上

但就算你知晒間公司未來十年盈利，都未必判斷到股價

因為你唔知市場會畀幾多倍市盈率，幾多倍先合理？

但大約睇到市盈率受乜影響，大約都係mean reversion．大約啦

時間夠長，盈利可以升幾十倍，幾千倍。但市盈率唔會升幾千倍

盈利大約穩步升，市盈率發上發落，乘出嚟會點？就係股市。

點解標普指數長升？聽下科斯托蘭尼嘅主人與狗理論

幾個局限：mean reversion？盈利點止睇一年？講短期又點？恒指，日本，英國呢？

最後例子：建行939。盈利升咗4倍，股價仲要跌

1. 雖然科技股跌得幾急，但股市算靜，等我又嚟個小專題。留意呢篇stand alone 冇乜好特別，夠晒淺，老手可能覺得悶，但除非你自問好叻，叻過我，否則都係建議你睇。

2. 你可以唔完全同意，特別如果你睇短線，又係另一種操作。但至少你睇咗先，知道啲基本嘢，你再去質疑冇問題。呢套未必一定啱，以前啱唔等於將來都實啱，但至少你學咗先。

3. 仲有，嚟緊我寫嘅幾個小專題，都會同呢篇講嘅嘢有啲關係，所以睇咗先。

4. 老派學院嘢，就係講股市點運作。唔係講咩點交易，又唔係咩大戶動向，又唔係咩睇圖。就只係話你知，股市點解會升，或者點解會跌。答咩「供求定律」嗰啲友，你最好遠離佢。唔係因為佢唔識，唔識唔緊要，而係因為佢自己以為自己好醒，但個答案根本冇都冇答

5. 冇錯，咁梗係多人買就會升。咁但，點解會多人買先得架？背後係有啲原因吸引到人買某啲股票，點解大戶將蘋果炒到上3萬億，而唔係你間垃圾公司？點解個需求唔係在垃圾公司，係在蘋果？

市值＝盈利X 市盈率

6. 首先係一個好簡單嘅model，暫時唔計發新股回購之類。咁一間公司嘅市值，就係盈利X 市盈率，對不？當然你間公司冇盈利嘅，你大可以睇收入X 市銷率之類。但原則不變，就係公司嘅生意X 一個估值比率。姑且用住盈利X市盈先。

而盈利一般係長期向上嘅

7. 咁一般正路，特別係比較大嘅公司，新舊經濟都好，啲生意就穩步上揚啦。新經濟咪上得快啲，舊經濟可能上得慢啲。以上圖嘅例子係蘋果，你亦可以自己plot 圖。固然有經濟周期，有啲公司就唔係好受影響，有啲影響大啲。亦都有啲係經濟好時生意都冇增長甚至越做越縮（柯達諾基亞），亦有啲根本經濟差生意都照升。但，一般嚟講，稱得上係好公司，長遠都係咁樣向上。（當然你可話有啲套套邏輯，盈利升嘅，咪就係好公司，直到盈利唔升）

8. 點解好公司嘅盈利長期向上？好簡單，首先嚟自通脹，二來嚟自經濟增長，三來嚟自食走其他公司嘅嘢，四來係因為創造咗價值（有點虛幻），五來係，企業一定係享受咗大部份科技帶嚟嘅好處。收入上佢會加價，但成本上佢一定唔使加咁多，反正電腦唔會要求加人工。

標普指數嘅盈利更加係長期向上

9. 話時話，你見標普指數嘅每股盈利，都係咁嘅一回事。標普指數你咪當係一間好大嘅公司，或者係一間渣住500最強企業嘅超級公司，所以更加係長期向上，因為汰弱留強，唔掂嘅公司咪畀人踢走，掂嘅咪加入。但當然，衰退時盈利都係會倒退，但長期向上，每次盈利復蘇都會升破之前嘅頂。留意個圖冇用log scale，同埋留意係佢呢個每個月有個數，所以上落大啲

10. 如果用咗log scale，就係呢兩個圖。兩個圖一樣的，雖然個淺色線嗰個個scale做得差啲。同埋再強調，淺色嗰圖每個月一粒數，深色嘅應該一年一個

但就算你知晒間公司未來十年盈利，都未必判斷到股價

11. 頭先嗰部份應該大家唔會太難理解。當然盈利會上落，亦因為股票炒將來，所以將來嘅盈利先重要。但大約你可以理解到，點解啲人睇好間公司嚟緊財源滾滾來，股價有時就會升。而分析員估公司嘅盈利，大約都OK，況且可以不停咁改

12. 之但係，呢度只係故事一部份。市值係盈利X市盈率，咁仲有另一半呢？個市盈率呢？呢個先難搞嘛。你諗下，標普指數，分析員估嘅2022 甚至2023 EPS，你要搵不難，Bloomberg有，你上網搵都大約搵到。但就當出嚟嘅數同分析員估嘅差不多，又係咪代表你知道2022年2023年標指會幾多點？梗係唔係

13. 因為你唔知，到時個「市場」會畀幾錢市盈率嘛。呢個先係股票最難玩嘅地方。我當你知晒一間公司未來10年賺幾錢，你都未必判斷到個股價。

因為你唔知市場會畀幾多倍市盈率，幾多倍先合理？

14. 好啦，幾多倍市盈率先「合理」？十分抱歉，呢個真係值1萬億嘅問題，冇人答到你，就知發達。答案亦因時而變。但，大約都可以有個譜嘅，我未必話到你知幾多倍合理，正如我話20倍合理你又會問點解唔係22倍，冇得答到實。貴嘅可以更貴，平嘅可以更平。咁但，例如去到六七十倍，你仲買入去，就損手機會高。去到十倍八倍，你買入去，似乎贏錢機會大。當然你唔好拎唔同市場比，我地只講同一市場，in this case係美股

15. 咁你心諗，咁我咪在平嗰時買，貴嗰時賣咪得咯。講就易，實際冇咁易。首先盈利預測會變，正係市場動蕩時郁得最勁，正係你最需要佢時佢轉得最快。況且，正如我講，貴可以一路貴好耐，近十幾廿年美股都冇平過，你拎再之前嗰啲市盈率比，過去十幾年你都唔會買美股，「懶醒嘅仲偠去沽空」

但大約睇到市盈率受乜影響，大約都係mean reversion．大約啦

16. 但，我可以大約話你知，個市場「肯畀」乜市盈率，會受乜影響。

17. 首先當然係情緒，咁肯定係開心時你貴一貴都追，擔心時平一平你都唔敢買。講得再簡單啲，就係self reinforcement，貴嗰時會推高股價，一路有人追，變成更貴。平嗰時一路有人賣，變成更平 — 但總唔會無止境，總有轉角位，「捉到就發達」。金句：再好嘅公司去到某個位都係搵笨，再廢嘅公司去到某個位都係抵買。

18. 另外，當然係經濟周期影響，亦都同啲企業盈利有關。你間公司年年賺錢，仲要盈利年年升一倍，貴一貴市盈率啲人都飛入去。掉轉頭，盈利係咁跌，平一平啲人都唔敢買。

19. 當然，仲有係機會成本，即係「唔買股票你可以做乜」。例如你睇美債債息。舊文寫過好多次（例如呢篇）。用最簡單嘅講法，如果我買美債都有7厘息，我先唔會買4厘嘅領展。當然唔係所有股都睇股息，但原理一樣，如果我買債都7厘息，買股票我唔會肯畀咁貴市盈率。掉轉，如果根本買其他嘢都係跑輸通脹，咁股票我貴一貴都買。呢個亦似乎係過去十幾年你見到嘅嘢，亦解釋咗點解呢十幾年個市盈率長期居高不下。

時間夠長，盈利可以升幾十倍，幾千倍。但市盈率唔會升幾千倍

20. Sum up啦喎。你間公司如果係傑出嘅話，個盈利咪穩步上揚，固然會有周期起落，但都係慢慢追返上嚟。

21. 市盈率呢？隨住利息水平，風險胃納，氣氛，經濟等等，升升跌跌。但重點嚟啦，市盈率呢味嘢，應該係mean reversion嘅！未必完全係，但應該大約都係。呢個係佢同盈利好唔同嘅地方！

22. 換言之，市值= 盈利 X 市盈率。前者拉長會係一路穩住上。後者呢？往往係升升跌跌，平嗰時10倍8倍，貴嗰時幾十倍。但一般都係周期。

23. 即係，你可以想像到，好公司嘅盈利，幾十年可以升幾倍，幾十倍，幾百倍。但個市盈率，唔會由十倍升到幾百倍的。

24. 呢個係歷史上，標普指數嘅市盈率。撇除因為金融海嘯時搞到扭曲晒（好多公司蝕錢），你見，都真係大約係一個range，十幾至幾十至間。近年明顯高左，但重要嘅講多次：呢個數字，係唔會不停咁升的！唔同盈利，可以升幾百倍幾千倍。

盈利大約穩步升，市盈率發上發落，乘出嚟會點？就係股市。

25. 結論嚟啦喎，市值= 盈利 X 市盈率。前者有起落但穩步上升，後者發嚟發去。乘出嚟會係乜？

26. 好簡單，就係股市咯！所以點解股市嘅波幅咁大？因為，除咗盈利會起落，個估值都會起落。而往往係同步嘅，升時兩個一齊升，跌時又一齊跌 — 即係乜？即係你間公司盈利升幾倍，1億升到10億，市盈率往往又跟住升，由5倍變20倍，所以市值10億變到市值200億，20倍嘅股價升幅。但相反，跌嗰時呢？盈利10億變到5億，但市盈率可能20倍變到8倍，市值200億變40億。跌六成。呢個就係股市嘅波幅！

27. 亦因為咁，你見到股市嘅波幅好大，大過盈利升跌，因為有個市盈率作怪，仲要係兩者往往同一方向行。賺得多錢時你係天才，multiple expansion，re-rating．倒退時你間公司玩完，multiple contraction，de-rating

28. 不過，因為市盈率都係上上落落，但公司做得好嘅，盈利可以長升，所以股價都係上上落落，但長線係升。

29. 如果你講標普指數，更明顯，因為汰弱留強，所以盈利真係長升。亦因為咁，雖然有波幅，但你拉長嚟睇，點解股市長升，就係咁原因。

點解標普指數長升？聽下科斯托蘭尼嘅主人與狗理論

30. 所以好簡單，你見標普指數，長遠，就大約係同個盈利同步咁上的。有上有落，但長遠似乎跟得幾貼。

31. 換句一個講法講，德國股神科斯托蘭尼嘅名句（簡體字，因為呢度原本蠞錄，台灣網好多自己演繹，我鍾意食原汁原味）：經濟與股市的關系就像主人與狗一樣。有一個男子帶著狗在街上散步，這狗先跑到前面，再回到主人身邊。接著，又跑到前面，看到自己跑得太遠，又折回來。整個過程，狗就這樣反反復復。最後，他倆同時抵達終點，男子悠閑地走了一公里，而狗走了四公里。男子就是經濟，狗則是證券市場。”

32. 不過，我會將「經濟」改做「企業盈利」。唔係科斯托蘭尼錯，只係時代唔同（但當然，識得判斷乜嘢會隨時代而變，乜嘢唔會，又係最深嘅學問）。

33. 以上種種，係一個簡化版。我自覺講得幾好，當然你數學底強嘅，拎兩組數一plot個圖就明

33.5. 講得再簡單啲：長遠嚟講，都係盈利必勝。因為你盈利增長可以無上限，但multiple expansion 點都有上限，亦一般有下限。

幾個局限：mean reversion？盈利點止睇一年？講短期又點？恒指，日本，英國呢？

34. 另外，仲有唔少嘅問題你都諗到。

35. 首先，邊啲嘢係mean reversion，邊啲唔係，已經好多人唔識分。咁肯定嘅係，盈利唔會mean reversion，但市盈率呢？似乎傾向係，但唔同年代，佢嘅mean 可以唔同嘛！（所以應該真係睇earnings yield更好，即係減走債息，但都唔係萬能）。

36. 另外，實際上唔係市值= 盈利X市盈率咁簡單，因為你間公司唔止賺一年錢，唔通我下年盈利係0，市值變0？唔會嘛。簡單嘅，睇discounted cash flow．深少少嘅，DDM，FCFF。用人話講，你係將未來N咁多年嘅盈利或派息或現金流，全部炒埋一碟嘛。唔係就咁一年盈利，乘個市盈率。但原則差不多。

37. 仲有第三，呢啲嘢，只係長期先有用，往往係睇幾年，咁如果你炒兩日嗰啲，就真係唔使理，亦冇得用呢啲解。但正如我講，只要你個盈利一路有得升，就算你買貴，都可以返到家鄉

38. 亦因為咁，雖然美股貴，我都仲有照買。而既然多數讀者都唔認為中國可以取代美國，咁將來嘅盈利，點都係在美國度吧？但當然，唔好忘記2000-2010嘅教訓：2000-2010美國一樣係超級大國，中國先剛剛堀起。但，2000摸頂買納指，坐到2010你仲要輸一半。2000摸頂買標普，坐到2010你仲要輸15%—不過好消息係，再坐多十年就天堂。同埋，所以叫你分散。同埋，估值好重要

39. 而第四，你用以上嘅種種，去解釋香港股市，或者to a lesser extent，英國甚至日本之前迷失N年，就有點複雜。但都可以好約略解下

40. 日本嘅，好簡單，頂位時啲估值真係太誇張，之後只係回復正常。亦再一次示範，唔該唔好一注過入市。你係分段買嘅，傷亡細好多。再加上，之後日本企業嘅盈利，又真係冇乜增長（但唔係完全冇）。有機會睇實數。

41. 英國嘅，同日本當年類似，但幸好冇乜點喪炒過，所以你見只係唔多升，冇大跌。原因亦係因為啲企業盈利冇乜升。

42. 香港，就有點複雜了。但至少你見咩科指嗰啲，根本成大堆嘢都冇乜盈利，升時好地地，一跌嗰時你點支撐？所以你見恒指會好少少，然後如果齋香港股又好少少。中資股股嘅，唔少嘅盈利都真係大跌的。美團之類長期唔多賺錢，海底撈嗰啲又係大倒退。好啦，你見反而啲有些少增長嘅內銀，或者中移動中海外華潤置地嗰啲，咪都係跑贏咗大市咯。

43. 歸根究底，亦係因為恒指納入咗ATMX。騰訊還好少少，但都係盈利增長放慢好多。阿里巴巴直頭會倒退，美團小米根本唔係好賺錢。咁呢四隻重磅股，咪典型嘅de rate．早幾日睇，你估下科指而家幾多倍市盈率？都成20倍，絶對唔係叫平。但有趣係，其實再早幾年，又係個個喊打喊殺，話做乜唔納呢啲股。