港股開局不利，但主要阿里巴巴9988拖累。商湯20就奇葩．道指新高，Tesla升14%，ViacomCBS都升7%．蘋果歷史新高！3萬億市值。標普指數12個行業齊齊雙位數升幅，史上第一次。標普指數升完25%下年會點？台灣美國只係排四五，仲有乜股市舊年最勁？2021年實情好易玩。唔好睇咁多四仔。美國負債30萬億。 (Patreon)

快評兩句—港股開局不利，但主要阿里巴巴9988拖累。商湯20就奇葩

快評兩句：道指新高，Tesla升14%，ViacomCBS都升7%

大師冇點你 — 蘋果歷史新高！3萬億市值。

每日一圖 — 標普指數12個行業齊齊雙位數升幅，史上第一次。標普指數升完25%下年會點？台灣美國只係排四五，仲有乜股市舊年最勁？

Good Read —　2021年實情好易玩。唔好睇咁多四仔。美國負債30萬億。

FB Post Summary — 商湯升一個開。HR板斧兩道

1. 首先，出咗篇週末專題。我覺得個舖排唔係太好，但啲資料你一定有用，特別係個 Excel，相當好玩。如無意外會有下集，甚至第三集，到我諗唔到專題寫乜時就會寫。

快評兩句：港股開局不利，但主要阿里巴巴9988拖累。商湯20就奇葩

2. 港股嘅，當然就唔多好。冇北水成交細唔係問題（搞到我開始想減持啲港交所，或者每個月供少啲），但走勢真係難睇，又係高開低收。仲要第一日就咁，當然係咪代表全年都差呢啲，就唔使太認真。

3. 正面少少睇嘅，主要只係隻阿里巴巴拖累，唔係阿里巴巴嘅，跌幅少一半。然後又見到，星期一晚阿里巴巴在美股，就OK的，升返，但中概股就唔係隻隻得。

4. 仲有，見都有48%嘅股票升，就唔係太差的，當然包括之前都過嘅香港地產股。

5. 而仲有，見到隻商湯20真係奇葩，上市幾日升一個開。我在Facebook 有詳細寫，你夠膽抽嘅，抵你賺錢，快手沽咗佢，至少都沽一半斬邊留邊。唔中嘅，當然唔好呢啲位買，貴到無倫。

6. 我諗要強調一樣嘢：你冇買嘅股票，係唔會令你輸錢的。當然你要長期stay invested，否則跑輸通脹。但，唔使見到人地買其他嘢升咗你又唔舒服，否則好快會痴線，日日都總有啲股票升一截（不過話說回頭，如果表現差過大市好多嘅，要檢討下有乜出錯）

快評兩句：道指新高，Tesla升14%，ViacomCBS都升7%

7. 美股嘅，你見10年債息忽然抽咗上去，升得相當急。

8. 但道指照樣創新高，納指升得仲多，唔少啲科技股都有返啲反彈。仲有，沉咗好耐嘅Viacom CBS有返啲起色，原因不明

9. 當然指數強亦某程度因為Tesla嘅2021付運數量高過預期好多，單日就升14%，留意個數而家出咗，到出全年業績時就唔會有影響了。

大師冇點你 — 蘋果歷史新高！3萬億市值。

10. 不用多講了吧，使唔使我重覆又重覆？邊個話升得多嘅嘢唔會再升？邊個話大公司升得慢？2011年Steve Jobs釘蓋時，佢本人同蘋果已經係無人不識。但你睇下之後蘋果再升咗幾多倍？

每日一圖 — 標普指數12個行業齊齊雙位數升幅，史上第一次。標普指數升完25%下年會點？台灣美國只係排四五，仲有乜股市舊年最勁？

11. 標普指數12個行業齊齊雙位數升幅，史上第一次— 留意，12個行業都升10%以上，係史上第一次。呢個圖可以去反駁返有人話美股升勢唔全面 — 根本買乜行業都贏10%，但你去到自己亂咁買啲發夢股就你個人問題啦。好似垃圾食物咁，唔係唔食得，但唔好食咁多嘛。

12. 標普指數升完25%下年會點？—舊年正係升咗25%以上，咁下年會點？當然呢啲歷史未必會重覆，但可以參考。首先你應該估到，因為美股近80年都係長升咁滯，所以升完25%嘅年份中，打後嗰啲年份，平均當然都係升。但你見到嘅係，升完25%嘅年份中，下年只係平均升14%。所以正路地今年冇上年咁易玩。

13. 台灣美國只係排四五，仲有乜股市舊年最勁？— 呢個可以話係呼應返週末篇專題。台灣美國勁升，大家知，亦知點解。咁但，佢地只係排第四第五。冠亞軍係阿聯酋同埋沙地阿拉伯。你或者都覺得，係喎，油價勁升。但睇真啲又好似唔止咁簡單，你可以睇下隻UAE同KSA入面係乜？唔係好多石油公司。當然你可以話其他行業都間接受惠嘅。但更神奇係第三嘅奧地利，唔好忘記舊年歐元仲要對美金大跌近10%，居然呢隻EWO都可以勁過美股！（冷知識：奧地利在德文就係O字頭，應該話係Ö，有兩點）。入面係乜？實情主要係間銀行，吹脹。

Good Read —　2021年實情好易玩。唔好睇咁多四仔。美國負債30萬億。

14. 2021年實情好易玩 — 留意成個 website嘅文都幾好睇。作者講返，2021嘅美股年相當易玩。雖然講升幅，2021年未入到頭15%最好嘅年份。但重點係坐得好穩，最大嘅回調（drawdown）只係5.2%，呢個就係史上頭10%最好嘅年份。而最差嘅一日只係跌2.6%。仲有，標普指數創咗70次新高，差不多每三日就一次。對上一次咁易坐嘅，係1995年。亦係嗰句，舊年係相當易玩，如果你都仲要輸錢或者贏得好少嘅，真係要留意下係咪做錯咗啲嘢。

15. 唔好睇咁多四仔— 你冇睇錯，原文就真係講porn will destroy you，男女都係。咁我當然唔同意作者，但你可以睇下。作者有小小稻草人戰術，話有啲人認為你睇嘅嘢唔會影響返你思想，大錯特錯。而我相信冇乜人咁諗，至少我唔係咁諗。好啦，咁但睇完之後又點呢？作者講兒童色情同戀童，或者講性犯罪。咁我唔知有幾多人睇完走去做啦，但mostly都唔會，係咪？然後佢就拉到去普通男女嘅consensual sex，拿，啲男人睇得四仔多呢，就叫啲女人照住做呀。我心諗，有何問題？大家都OK嘅，玩乜關其他人乜事？

16. 美國負債30萬億 — 美國嘅呢個負債問題，應該絶大多數人都聽過。咁但，由Charlie Bilello同你睇 一次，又會唔同。實情點收科？我都唔知。唔好妄下定律。幾肯定嘅係，美國係不停新債冚舊債嘅。但你又見到美金冇弱到，原因當然好多，其中包括其他地方都係咁玩。咁但，作者話係咪冇後果？唔知呢，我傾向覺得唔會冇後果。但，你唔係應該去擔心呢啲嘢。我認為一個比較可能嘅副作用就係：美國點可能大幅加息？美國雖然債務大咗，但而家嘅利息開支同N年前仲係差唔多，就係拜低息所賜。咁斷估唔會玩到息都還唔到啩。雖然冇話唔得，但，真係冇後果？

FB Post Summary — 商湯升一個開。HR板斧兩道

17. 商湯升一個開 — 留意原本係我好期待嘅一間公司，但呢個原本原到2019年螞蟻上市之前。後來見到中資科技股死晒，甚至舊年年尾連美國啲冇錢賺嘅科技股都大跌。正係呢個時間商湯上市，咁當然都係唔推，你見我寫都冇寫過。然後仲要臨上市畀美國列黑名單搞到要重新上，咁你第二次都仲敢抽真係勇士，抵你發。而即使第一次招股時，我有快望下，但見啲估值高到都係推唔落手。而家亦唔好買。

18. HR板斧兩道 — 呢篇就好多人睇，就係我講下我對HR嘅厭惡，以及歷黎嘅各種混帳經歷。我的確覺得做HR嘅人，實在係比較惡搞的。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。