環球股市ETF大比併（上集，唔知有冇下集） (Patreon)

2021最大教訓：跑贏指數好難。2022最要做嘅嘢：買多啲指數ETF

但買邊隻？啲ETF好唔好？

國家ETF大比拼

呢個表有乜啟示

附錄：每隻ETF渣乜，個指數又係乜。台灣，加拿大，荷蘭，法國，瑞士，英國，澳洲，新加坡，德國，日本，香港，韓國，中國

1. 新舊讀者好，慎防新讀者唔知，逢週末我多數會有篇專題文，好長，多數只講一個課題。有時係101文，有時係宏觀嘢（但我幾乎唔會講經濟，唔係我唔識，而係對你冇用），有時心法嘢咁。每次都用我好多時間，但呢個環節好受歡迎，聽聞唔少人係因為呢個環節先訂，所以盡量做。鍾意可以去目錄搵，遲下得閒我整理下。

2. 今次呢篇，易明到極。咁做乜仲要寫？因為煩。即係你自己玩都得，但我幫你統整晒啲資料呀咁。另外，有朋友話過我係一個相當出色嘅Information processer，你諗下都係，由我做分析員，到Facebook 寫文，到呢度，做嘅嘢都係將啲海量資訊消化晒，整理晒，話畀你知邊啲有用邊啲廢，仲用淺嘅方法解你知，加埋我自己嘅經驗。留意Information processer呢種技能，相當值錢，好多行業都係，你自己創作都係。

2021最大教訓：跑贏指數好難。2022最要做嘅嘢：買多啲指數ETF

3. 某程度上，呢位讀者（好長期兼好忠實的）嘅Post啟發咗我寫呢篇文。佢嘅投資回報，相當出色，好過我先。當然我估佢冇乜買港股啦，「如果買港股都仲有咁回報仲勁」

4. 2021我諗最大嘅教訓，就係跑贏指數真係極之難。所以2021你原本應該做嘅嘢，就係應該買多啲指數ETF。在我本書（實在寫得幾好，未買記住買）都有講，膽拖腳，core satellite（講英文即時型啲）。ETF 為主力，個股畀你過下癮。

5. 呢個亦同時係你2022年應該做嘅嘢，我諗90%以上嘅讀者，都係應該加重指數ETF嘅比重，包括我自己都係。

6. 當然，2021跑贏指數咁難，亦因為市升。相對地，個市跌，就似乎比較容易跑贏指數的。例如話2021年恒指咁，要跑贏不難，我都跑贏好多。極端啲嘅，你乜都唔買已經跑贏

但買邊隻？啲ETF好唔好？

7. 問題係，買邊啲ETF？你見我近期都有唔少文係寫ETF。2022年，我嘅諗法都係估各種嘢開始轉勢，所以應該留意非美國嘅股市。可以成熟市場（歐洲日本英國）（呢度，同呢度有寫）。又可係新興市場（呢度有寫）（留意篇文係新興市場走中國，並非我而家好睇淡中國，而係中港你自己識買啦）。仲有，應該留意價值股（呢篇），同埋留意細價股（正係聖誕嘅專題）。你睇，真係成個資料庫咁，全部環環相扣。

8. 咁但，你話你唔鍾意成個成熟市場咁買，或者唔鍾意成個新興市場咁買。我剩係想買荷蘭，剩係想買菲律賓。得唔得？梗得，金融市場嘅嘢，有供有求，實有人滿足你要求。我呢篇文就係寫呢啲嘢

9. 睇圖，你諗得出嘅國家，都大多數可以用ETF玩（呢度真係冇而我覺得有趣嘅，就係……孟加拉）。

10. 呢度太多隻，我應該只分兩次講，亦唔會講得晒。今次首先係成熟市場。留恴我嘅成熟市場同市面嘅定義未必一樣（市面定義，舊文寫過）

11. 今篇會寫嘅，自己睇表吧，Attachment 有個Excel的。陣間我會再貼呢個表，十分重要。

國家ETF大比拼

12. 首先我會講Big Picture嘅嘢，最後先每個國家講（實情呢部份冇乜好講，純補充資料）。

13. 好啦，第一樣嘢，呢堆ETF全部都係美國上市，亦全部美金計價（好重要），仲有都係同一個家族的，你睇名都估到，全部EW乜。唯獨中國嗰隻唔係EW乜，但都係同一個家族。呢堆嘢，全部係iShares嘅產物，亦即係BlackRock出嘅ETF（記得買BlackRock股票）。仲有，留意追蹤啲指數全部都係用MSCI，原因唔知，可能BlackRock同佢合作，又或者只係平，好多原因。（記得買埋MSCI股票，我可能呢兩個月就買）

14. 由左至右，同你睇睇各樣觀察。

15. 首先，你見到呢堆ETF嘅AUM（Asset under management），唔算太高。下面有追蹤標普500指數隻SPY嘅AUM，4000億美金。而上面嗰堆，得一隻過100億，好多係幾十，甚至幾億都有。當然用SPY嚟比太屈機，但即使係以前提過嘅VEA（追蹤各大成熟市場），都1000億AUM啦。原因亦好簡單，你散叫，每個國家咁玩，當然需求冇咁大，分薄咗。

16. 之後，呢堆ETF嘅收費，唔算平，多數係0.51%（有三隻0.59%）。而SPY係收0.09%。當然用SPY比太屈機，但你諗下，隻「新興市場走中國」嘅EMXC，都只係0.25%。你問有冇平啲嘅ETF？我相信有的，但原圖用呢堆我咪用呢堆，我冇收到BlackRock錢（雖然我係股東），相信張圖嘅作者都冇，有空先寫多篇文睇下有冇再平嘅。點解唔平？同上面一段同一道理，你散叫梗係貴。

17. 然後再睇，見唔見有兩個column係指數？好簡單，你隻ETF Track嘅指數，同你該地普遍啲人講嘅指數，往往唔係同一隻（今次嘅情況係全部都唔同）。留意呢堆嘢track嘅全部係MSCI嘅指數。我快手解解，你有時見到咩25/50，詳情呢度。主要係限制咗冇一隻嘢可以佔超過25%，同埋更特別嘅係：5%或以上嘅嗰堆公司，加埋不能過50%。至於IMI，係investable market indexes，詳情呢度。

18. 點解ETF唔用返平時你見開嘅指數？原因好多，首先要睇當地指數邊個編，收費幾多。另外，亦可能係當地隻指數太過唔科學（例如日經）。當然，亦係因為整個新指數先可以justify 收你貴啲。好簡單，盈富基金先收你0.1%，咁我隻ETF如果追蹤恒指，點收你0.51%？咁但呢度隻EWH追蹤MSCI香港25/50指數，就可以收你0.51%。當然，佢一定要話到畀你聽，隻指數係「好過」當地大路指數（呢個情況係恒指），咁投資者最關心都係回報，咁係咪MSCI啲指數回報好啲？呢樣嘢陣間細解。

19. 當地指數方面，我幫你搵晒所有呢啲地方，最具代表性嘅指數。當然有時有啲地方可能唔止一隻，就冇計，我幫你決定（例如中國用咗滬深300，唔係上證或深證）。陣間我逐個國家講時，會有埋指數嘅link。另外，想睇晒全世界嘅，我用呢個網，呢度亦用返個網嘅指數。個網委內瑞拉突尼西亞烏克蘭都有。

20. 當地指數升跌，不用解啦，我地會睇一年，同五年。但留意，作為香港本位嘅人，當然要睇埋貨幣升跌。呢樣嘢上一篇Patreon有解。計完後，右邊個美元計價嘅先係重點。

21. 點解？因為之前講過，堆ETF全部係美金計價嘛。所以堆ETF嘅回報就已經係你嘅回報，唔使調整匯率。而你當地指數嘅，就要調整咗匯率，先去同呢堆ETF嘅表現比，先公平。

22. 最後一欄，就係堆ETF回報，同當地指數（已調整匯率）嘅比較。留意差不多全部ETF都唔係追蹤當地最大路嘅指數，所以當然有分別。咁你大約可以睇下，係ETF好，定個指數好。雖然過去表現不代表將來。

呢個表有乜啟示

23. 好啦，呢個表嘅觀察好多，我只能拎部份嚟講

24. 首先最重要嘅，睇最右邊，你見到堆ETF，實情平均係跑輸當地指數的，你可以自己計平均。固然好大部份嚟自MCHI跑輸滬深300。點解會咁？因為MSCI中國有阿里巴巴之類，但滬深300冇嘛（但，況且，你MSCI香港冇阿里巴巴而恒指有，嗰度你又贏返啫），但你即使唔計中國，平均啲ETF都係跑輸當地嘅指數。

25. 當然我講過，兩者嘅指數唔同，唔係完全可比。但，咁你聲稱你MSCI個指數勁啲嘛，但實情似乎唔一定。ETF嘅收費都可能關事，但照計只係0.5%，即使5年嘅影響都唔會極大。

26. 另外見到，堆ETF跑輸市場指數嘅現象，表現最好嗰幾個市場就冇咁明顯嘅，原因不明。換個角度講，無論係當地指數定係ETF，最勁嗰堆國家都係差不多。

27. 例如你見到跑出嘅，就係台灣，荷蘭同埋瑞士。原因係當地嘅明星股，台灣同荷蘭都係因為半導體，台積電同ASML。瑞士就因為藥廠，仲有雀巢。某程度上法國舊年都係咁嘅情況（奢侈品），至於加拿大就真係估唔到，當然係因為Shopify，同埋啲銀行舊年升得多。

28. 但係咪凡半導體就掂？你見韓國就唔掂的（不過五年就還好）。

29. 另外仲想講，你見新加坡，講到金融中心左右逢源，但一樣係唔掂的。原因？因為根本冇乜明星股，仲係銀行（星展，UOB，OCBC）同地產，蛇都死。但留意，隻SEA在美國上市，唔在海峽時報指數，但隻ETF入面有的，不過反而隻ETF都係跑輸

30. 最後，香港同中國，最奇怪嘅兩個地方。頭先都略講過點解。EWH就真係純香港股票，友邦港交所，冇中資科技股，所以當然跑贏晒恒指。但MCHI就全部都係啲中資科技股，而滬深300係冇嘅（在香港上市嘛，A股冇的），所以大幅跑輸指數。

附錄：每隻ETF渣乜，個指數又係乜。台灣，加拿大，荷蘭，法國，瑞士，英國，澳洲，新加坡，德國，日本，香港，韓國，中國

32. 呢度最後，列返晒咁多個國家嘅指數，同埋隻ETF嘅10大持股，你可以比較下。指數入面10大成份股我就冇列了，自己搵吧，費事整到篇文咁長。

33. 台灣

34. 個指數係TAIEX，台灣加權指數。EWT嘅十大持股，當然係啲半導相關股，台積電一隻佔咗22%，打後仲有MediaTek聯發科，鴻海，同埋聯華電子，以及富邦金控。留意舊年台積電反而升得少過聯發科同聯華。留意香港好難買到台灣股，當然幾間都有ADR，但又有折讓溢價之類，好煩的

35. 加拿大

36. 指數係TSX60，多倫多。EWC渣嘅係Shopify，之後三間銀行，三間股價舊年都好好，正如美國嘅銀行都係。第五係鐵路公司

37. 荷蘭

38. 指數係AEX，阿姆斯特丹。留意隻EWN當然渣重ASML，一隻佔22%。Prosus就係同騰訊個南非股東Naspers互控。ING係金融股。Adyen係近年相當紅嘅Fin Tech，Buy now pay later．第五嗰間DSM，化工。個K乜乜係皇家咁解。見到打後另外兩間公司都有。荷蘭文我都識，勁唔勁？因為德文都係呢隻字。

39. 法國

40. 大家好熟吧，CAC40。EWQ最大持股當然係LVMH，Total係石油，L’Oreal歐萊雅賣化妝品同個人護理，Sanofi藥廠，Schneider就電機

41. 瑞士

42. 個指數叫SMI。EWL最大持股當然係雀巢，21%。打後係兩間藥廠。第四嗰間係Richmond，奢侈品，Montblanc同卡地亞母公司。第五蘇黎世保險

43. 英國

44. 富時100嘛。EWU堆公司多數都提過下，第一間係阿斯利康藥廠，第二間聯合利華，消費品，Lux同Lipton（好似剛賣咗）。第三間賣酒的， Johnnie Walker．第四間不用講，第五間葛蘭素藥廠

45. 澳洲

46. 指數ASX200。EWA最大嗰間CBA，第四嘅NAB，同埋第五嘅ANZ都係銀行（實情六七都係銀行！）。第二間查先知係Healthcare，BHP開礦嘅，

47. 新加坡

48. STI海峽時報指數，十分奇怪地Google Finance冇報價。EWS最大星展，差不多20%．留意第二係SEA冬海，電商，美國上市的，唔在STI入面。三四都係銀行。第五就REIT嚟的

49. 德國

50. DAX嘛，以前三十隻，而家四十。EWG就渣最多SAP，德國少數嘅科技股。西門子就工業，安聯保險，Daimler做車，BASF化學

51. 日本

52. 大家識啦，日經指數。EWJ呢？Toyota，Sony．Keyence係近年日本股奇葩，做自動化嘅sensor之類嘅東西，Tokyo Electron做半導體。至於Recruit以前寫過，求職網，另外仲渣咗好多外國網站。

53. 香港

54. 仲使講？唔貼恒指了。留意EWH係全無大陸股的，想本土嘅可以留意下。不過，AIA港交所一樣都幾靠大陸。創科就美國。領展就真係主要香港，但都開始有海外。第五間居然係…..煤氣，亦都有啲大陸。純本土真係好難做得大咯。

55. 韓國

56. 指數係KOSPI。留意同台灣一樣，香港好難買韓國股，大嘅會有ADR，但我冇研究啲折讓溢價問題。EWY睇牌面好似幾勁，三星電子不用多講，SK海力士做半導體，NAVER咪韓國Google，三星SDI就做電池，Kakao去過韓國嘅識啦。留意下，韓國係相當保護本土科技公司嘅，Google都好多限制。個人覺得呢隻ETF有得諗，因為你好難買到韓國個股。當然你亦可以只買三星ADR

57. 中國

58. 最後，中國，滬深三百，上證，深證，是但啦。留意隻MCHI就全部係啲科技股，死得好慘。A股就冇呢啲嘢

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。