2021 A股有得升，MSCI 香港都只係跌6%，咁到底跌乜？舊年日本股升5%，但你在香港買就倒輸5%．美股一路跑贏新興市場，直到轉勢。蝕錢賺嘅公司一樣可以喪炒，直到轉勢公司創新主要唔係嚟自R&D。蘋果重金幫你個App在Google落廣告咁好死？ (Patreon)

快評兩句— 2021 A股有得升，MSCI 香港都只係跌6%，咁到底跌乜？

快評兩句— 舊年日本股升5%，但你在香港買就倒輸5%

每日一圖 —  美股一路跑贏新興市場，直到轉勢。蝕錢賺嘅公司一樣可以喪炒，直到轉勢

Good Read —　公司創新主要唔係嚟自R&D。蘋果重金幫你個App在Google落廣告咁好死？

FB Post Summary —  2021 十大爛片。上帝之手。Blank Page．Trap of Perfectionism．史賓莎

1. 嚟到新一個月，亦都係新一年，歡迎新讀者，多謝所有舊讀者。實在唔知點樣去表達有幾感激，我諗最簡單都係寫多啲好文。

2. 矛盾嘅係，呢幾日嘅Patreon我都唔係好知寫乜。一來年尾靜，二來我在星期四嗰篇小專題（聽聞好受歡迎）有提到：回顧展望，一年開頭，我有好多好多嘢想寫，反而唔想就咁求其寫兩句算（雖然平時我求其寫都有人話長），唔想嘥咗啲題材，希望將啲好嘅材料整篇長文

3. 所以你可以預計，呢排會有好多不定期嘅大小專題文，特別係回顧展望，仲有我自己嘅回顧展望（上年都有放Patreon）．

快評兩句— 2021 A股有得升，MSCI 香港都只係跌6%，咁到底跌乜？

4. 我在呢度極速地重溫下，過去一年嘅環球股市表現。就係以上嘅圖。我諗美股勁，港股好差，應該大家都知。正如我一直講，你一半港股一半美股，照計都仲有高單位數嘅回報。當然你話分三份，美國，歐洲，中港，就更好。「分夠四份 美國 歐洲 日本 中港 仲好添」。

5. 仲有你可以留意下，實情A股都係升的！上證深證都升。我知滬深300要跌，但你計埋人民幣升，真係都打個和。

6. 最好笑係，你睇MSCI 香港指數，都只係跌7%（你可以睇隻EWH嘅表現，MSCI香港指數ETF！）

7. 咁到底跌乜？你見MSCI香港只係跌7%，就知都係跌中資股。但搞笑在，嗰堆中資科技股，又冇在A股上市，所以你見A股都居然有得升咯。固然A股居然冇ATMXJ呢堆嘢都幾奇怪，但亦有其歷史原因，但最重要係畀你睇到：真係分散有用，哪怕你只係買A股

快評兩句— 舊年日本股升5%，但你在香港買就倒輸5%

8. 叫大家分散啲，老生常談，以後都會講。但我另外想你留意一樣嘢：上面呢堆回報，係未計及匯率嘅（貼多次個圖）。有時不太重要，但2021年就都幾重要，因為美金相當強。而因為聯繫匯率，港紙基本上亦都即係美金，上下區間先得嗰1%，所以貨幣對美金嘅表現，亦即係對香港嘅表現

9. 我舉一個好簡單嘅例子：日本股。日經指數升5%，還好。但，日圓對美金跌咗10%！即係你在香港買日經指數ETF，你就要輸5%。但有趣地好多ETF都未必會跟日經，雖然原理一樣。

10. 其他股市嘅情況亦差不多，韓圜跌幅同日圓差不多，雖然我估極少讀者買韓國股，但你在香港買韓國指數，亦即係賺價蝕匯要倒輸。歐元對美金跌咗5%，你在香港買歐洲股大打折扣了。澳洲紙情況差不多，英鎊就好啲，奇葩係台幣，對美金仲要有得升。

11. 我係指出呢樣嘢，話畀你知計算上留意返。咁當然有讀者在日本，搵日本人工，消費又係當地，咁可以話直頭日圓跌對佢係好事添，如果日本買美股，賺價賺匯添，但原理都係一樣。

12. 好啦，應該會有人想問，咁來年啲貨幣走勢會點？我可以好快咁答到你：鬼知咩。你亦都唔好去擔心，亦都冇得擔心。有人話買咩「本地貨幣計價」「currency hedged」嗰啲，根本咪又係一樣，冇解決任何問題。我舉例，當我在香港，買日本股嘅，咁我又同時擔心日圓會跌，唔想賺價但蝕匯水，咁我當然可以選擇去做個保護，唔理你用乜方法啦，總之你搵啲工具令到日圓跌你賺錢。得唔得？梗係得。到時你咪唔會出現賺價但蝕匯水嘅悲劇。但拆穿咗，扯，其實你即係自己炒日圓之嘛 — 咁你估到個問題在邊啦？如果你睇錯呢？如果日圓升，咁人地買日本股賺價賺匯，你咪變返賺價蝕匯水咯！唔該，唔好將啲問題簡單複雜化。

13. 同樣地，你見如果我買 愛馬士，LVMH，或者羅氏Roche啲嗰ADR，係美金買賣美金報價呀，但你估真係冇匯水風險？一樣之嘛，咪在入面反映咗咯。所以你見你直接買巴嚟嘅LVMH，回報當然高過LVMH隻ADR— 但你轉做港紙時咪又一條數。

14. 放心，我嘅回顧及展望唔會咁簡單，呢個只係今日極速咁畀你。甚至唔係前菜，係等於坐低一粒花生咋。

每日一圖 —  美股一路跑贏新興市場，直到轉勢。蝕錢賺嘅公司一樣可以喪炒，直到轉勢

15. 美股一路跑贏新興市場，直到轉勢— 呢個圖好靚啦，應該就係兩個指數MSCI美國同MSCI 新興市場嘅比例。正如我講，近十年當然係美股跑贏全球，但好多人當咗呢個係永恒不變嘅嘢。不如又諗下，之前十年係完全掉轉。又，點解個分水嶺在2010年左右？唔太肯定。有可能係因為科技股嘅興起，亦可能係因為美國印好多銀紙。

16. 蝕錢嘅公司一樣可以喪炒，直到轉勢—同樣地，有一段好長嘅時間，好多人認為公司冇錢賺係冇所謂的。咁的確好多都一路照升，事實亦都有個別真係修成正果，燒錢搶市場份額好有用。但，唔係間間都係NetFlix Tesla嘛（又，留意兩間而家都賺錢的）。錢太多時大家當然乜都信，但你見2021年第二季開始就轉勢了

Good Read —　公司創新主要唔係嚟自R&D。蘋果重金幫你個App在Google落廣告咁好死？

17. 公司創新主要唔係嚟自R&D。— 幾有趣嘅文，你見好多人都會睇間公司，甚至國家嘅 研發開支R&D Expense，亦都好多研究做過，呢樣嘢同公司或國家嘅增長有關。但，首先，會唔會根本係掉轉？係賺到錢嘅公司先投放更多落R&D。另外，作者話畀你知，其實大多數公司嘅創新，係嚟自外部，供應商同埋客戶，而唔係自己內部。

18. 蘋果重金幫你個App落廣告咁好死？ —是真的，蘋果係會出錢幫啲人地嘅App落廣告，在Google落。你心諗咁好死？但，邊有咁著數嘅嘢？蘋果仲要係偷偷地幫你落，好多時啲App都唔知，當然有陰謀。點解要咁？好簡單，就係搶你嘅Traffic．我當係HBO咁，如果個客在website加入，蘋果就冇得分。但如果蘋果引個客去App Store，就可以分你30%。正唔正？咁你話，蘋果幫你拉多個客唔好咩？雖然要食30%—問題係，個客原本可能係會直接在website加入嘛。又，類似嘅玩法仲有好多，原因係因為街外人都可以幫另一啲唔關事嘅東西落廣告，唔知點解我諗起買保險咁，你就不能無啦啦幫個街外人買保險，但你可以幫你啲客落廣告食埋佢嗰份。又，呢個小小故事畀你見到，點解 Big Tech咁好搵，你以為真係只係賣手機同Youtube廣告？

FB Post Summary —  2021 十大爛片。上帝之手。Blank Page．Trap of Perfectionism．史賓莎

19. 都寫咗唔少文，但同投資冇乜關係，因為留返呢度寫

20. 2021 十大爛片— 實情上半篇係講投資，或者係所有嘅嘢，唔好以為自己好聰明。而你話我恃老賣老都好，人嘅問題係你只會將自己成長中，或者係最近十年嘅嘢，就當係必然（上面每日一圖都有講）。所以經驗都係緊要嘅。但去到太老呢？又會開始接受唔到新事物，覺得以往嘅嘢一路重演落去。「所以可能正係我呢啲年紀最好」，未後生到咩都未見過，又未老到接受唔到新事物。又，固然你可以話後生嘅冇包袱敢於破格，咁呢個係肯定的，但我地係講投資，投資就唔係有創意就有獎的。你應該拎你嘅創意去搵錢，然後悶悶地咁投資

21. 上帝之手 — 影評，還不錯，不過我估未必係太多人杯茶，況且Netflix先有。徬徨少年成長記，冇朋友冇女伴，忽然雙親死晒，阿哥又唔得閒你，被迫長大。導演嘅自述。

22. Blank Page— 都唔知寫乜嘅文，但，你細心睇，就會睇到我內心嘅不安。正如我在文中問，你今晚忽然死咗點算？係乜嘢令你朝早起身返工？又係乜嘢令你半夜瞓唔著？

23. Trap of Perfectionism — 呢篇會對大家有幫助。實情我係share余家強嘅文（好東西，記住Facebook Follow佢）。但佢講到自己點解會識潘源良，因為當年有線請體育記者，明明佢完全冇做過，但都硬著頭皮報名。大家就要學呢種心態，正如我提到，見工嘅廣告，往往要求多多。但同啲人搵男女朋友一樣，條件就一堆，但end up中選嘅，可能係一樣都唔符合嘅人。道理好簡單，人揀你你揀人，你只需要係報名嗰堆人之中比較好嗰個就得 —況且好多人根本連報名都懶

24. 史賓莎 — 亦係影評，戲院有上，聖誕新年檔之中，呢套最好（或者話只有呢套我覺得好）。戴安娜皇妃嘅故事，大家都知。不過你可以睇下人地點樣拍佢嘅故事，由小見大，只拍一個聖誕假期三日兩夜嘅故事。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。