［小專題］貧富懸殊惡化，有乜投資機遇？ (Patreon)

開場白（趕時間可skip）—貧富懸殊惡化，有乜投資機遇？

嘩，乜你咁冷血—但我都係睇Financial Times 啫

投資，就唔好咁濫情

十人十義，咩係道德？誰說了算？

搞歐超聯係咪仆街公司？賣納米樓呢？有人話根本企業就係剝削添

點解貧富懸殊只會再惡化？

咁到底，有乜投資機遇？有乜冧把先？

開場白（趕時間可skip）—貧富懸殊惡化，有乜投資機遇？

1. 年尾理論上又一大堆回顧和展望，但講過N次回顧重要過展望，展望1月中甚至2月先做都未遲，唔做亦得，你每日睇我嘅文都知我諗乜。回顧倒係會做下，但亦唔係而家。

2. 今日係掙扎咗好耐寫乜。市況靜，咁但又唔係冇嘢寫喎，好多「小專題」，或者回顧可以寫。但都選擇唔寫住。點解？首先寫專題好花我時間，但第二，月尾啦，冇乜新讀者的，我留返1月頭推出嚟吸新讀者。

3. 亦即係話，1月頭你會見好多篇回顧展望或專題文，分分鐘我連平時嘅形式都唔跟。舊年都係咁（你可以去index睇下）

4. 咁今日寫乜？咪寫啲「迷你專題」（結果都寫得幾長，當然你可以直接跳去睇冧把，但冇益旳，信我）

5. 如果鍾意今日呢個風格嘅，話我知。不過你鍾意我都未必可以成日寫，要時間，同埋咁啱呢排股市靜啫，試下道指跌2000點我仲寫呢啲？如果唔鍾嘅，都話我知，仲好，慳返，照返以前星期二四咁寫，仲慳水慳力。

嘩，乜你咁冷血—但我都係睇Financial Times 啫

6. 我相當鍾意Financial Times 呢篇文，原文呢度，但當然訂戶先睇到。

7. 篇文講乜？兩樣嘢。首先講，貧富懸殊，財富不平均，可見將來都唔會收窄，好可能會惡化。呢點係我同意嘅，稍後會講下作者嘅理據，同埋我嘅理據。

8. 但第二樣更精彩，講「貧富懸殊」，有乜投資機遇！有乜公司同行業可以受惠。嘩，大逆不道。

9. 講落去之前，我cap一段畀你睇。

10. 作者話「拿，我寫呢啲，恐怕有啲讀者話我係冷血，點解要在貧富懸殊中取利。但我只係講，呢啲嘢會發生，我冇話係應該發生，係純技術討論，同道德無關」

投資，就唔好咁濫情

11. 實在非常好。我可以話你知，在香港或華人甚至東亞嘅社會，好多人都係感情行先，上綱上線。以上呢段文字嘅冷酷，令我諗起白先勇《驀然回首寫嘅嘢》（勁唔勁？會考中文課文我都拎出嚟）。好多人就係濫情，大陸都有句說話，話賤人就是矯情。

12. 我唔係叫大家要無情，相反，大家如果睇我嘅文夠耐（特別係FB Page），知道我係個好敏感好感性嘅人，似女仔。但，做分析員多年，同埋投資多年，令我會分開自己嘅情緒同埋工作，亦都唔會帶入去寫Patreon，或者做投資分析—無論係工作上，定係自己。

13. 係冷血定冷靜，隨便你，反正只係narrative．後生讀者真係唔知，2008年汶川地震，都仲係一街大中華膠，包括今日扮當年唔係嗰啲（當然人會變，而我冇打算討論呢個話題）。但當時，我一樣係話畀其他人知（寫文，同埋工作），你估真係對GDP對股市好大影響咩，你估嗰啲友真係個個買晒保險賠死保險公司咩。當然亦有人話我冷血blah blah blah，但我只係講事實，亦唔係幸災樂禍，我亦唔係從人地嘅苦難中得益。

14. 同樣嘅情況，出現在2011年，日本福島地震。一樣道理，我唔認為有乜咁大影響。當時全球股市大跌，我一樣係叫人買。當然亦唔少人批評。喂你唔使幾時都諗住投資下話，但我嘅工作就係做呢啲嘢。我唔可以同個客或老細講，嗚丫日本死好多人我冇心情。

15. 咁大家知，嚟到2020年，全球爆疫情，2020年3月股市大跌，我認為跌得過多。咁但在FB Page都係不停有人話：嘩日日有人死緊呀（so？），聯儲局唔識整疫苗呀（so？），印錢殺唔到病毒呀（so？），今次真係好大鑊呀（so？）．如果我聽咗佢地話？如果你聽咗佢地話？仲得了？

十人十義，咩係道德？誰說了算？

16. 再拉遠少少，我認為走去將投資涉及道德判斷，係十分多餘，麻煩，同埋低智嘅。冇錯，就係近年鹹魚返生嘅ESG

17. 我唔認為人應該唔顧道德，你有所不為，冇問題。例如你覺得Facebook 係邪惡企業嘅，唔好買咯！有幾難明？問題係，我推介，你唔應該嚟批評我，你唔應該認為所有人都要同你一樣嘅道德取向。

18. 投資要講道德，最危險嘅地方係：咩係道德？你以為好易答？我唔知喎。最唔道德嘅嘢，強姦殺人之類，往往唔合法。合法而不太道德嘅嘢呢？都有唔少。婚外情啦，講大話啦，但，同投資有何關係？

19. 好啦，再講白啲。黃賭毒咯。的確，有啲基金唔會買呢啲公司，冇問題。雖然可能有人聽過「罪惡股」（Vice Stock），煙酒賭股，早十年八年有一輪跑贏大市嘅。有隻個Code就叫做VICE，中文仲好笑，菸酒惡習主動型ETF。仲有一隻剛上市，就咁叫…..BAD。

20. 黃，實情好少公司會做，即使外國有啲地方賣淫合法，你都好難搞到上市。賭，反而好多地方都上到市，除咗好聖潔嘅人外，我又好似冇乜聽過買賭股會畀人鬧 — 畢竟，你去投資都同賭博有啲相似，我甚至可以話，我買六合彩都仲會幫到做善事（下星期8000萬，記得買），你買股票嘅人先最冇貢獻係社會敗類，隨你，narrative之嘛。至於毒，賣白粉當然不能上市，但大麻股都炒過一輪啦。況且，煙仔股酒股都係咁玩。而有啲人話，糖比起煙仔同酒更毒，更加上癮，未必完全啱（呢度唔係科學專欄，唔討論係真定假），但，你見好多政府都真係收糖稅。

搞歐超聯係咪仆街公司？賣納米樓呢？有人話根本企業就係剝削添

21. 除此以外嘅，我更加唔知點分咩道德咩唔道德。有人話石油公司破壞環境，fine，「咁核電廠呢」？買唔買得？有人話Facebook係邪惡企業，我明白，「咁蘋果呢？」「Google呢？」。喂，你問啲左翼人士，佢地有啲根本覺得企業就係剝削，咁即係全部都不道德啦？

22. 你見到問題了，一人一義，十人十義。咩係合法咩係非法，一般well defined，上得市嘅業務，照計好難犯法。但，咩係合道德，我就真係唔知了。

23. 我舉一個經典嘅例子，JP Morgan，畀間ESG 評級機構，下調咗評分。原因？金融人貪得無厭？唔係喎。原來係因為JP Morgan出資支持「歐超聯」，機構覺得破壞ESG喎！ 傻的嗎？！

24. 唔知咩係「歐超聯」嘅不重要，你問我，我一樣覺得「歐超聯」呢個東西相當PK，好多鬼佬球迷都反對。但，香港好多球迷係支持的，覺得冇問題的。咁我當然唔同意佢地，但，佢地嘅意見就唔係意見？你個機構憑乜去做道德判官呢？我就唔知了。

25. 同埋，更好笑嘅係，JP Morgan只係出資嗰個。如果你話借錢畀啲有爭議嘅公司都不道德嘅，江湖就從此多事了。地產商起納米樓道唔道德？咁銀行借錢畀佢有冇問題？使唔使黑名單？日日去供樓進貢銀行嘅又有冇問題？

26. 實在係沒完沒了。

點解貧富懸殊只會再惡化？

27. 好，講到有啲離題。但，講冧把之前，都先講「貧富懸殊」

28. 大家有聽過堅尼系數（唔知嘅自己睇）。作者就貼咗英國嘅圖出嚟，重點唔係同定低，而係個走勢。留意下Original嘅，近期只係平穩（亦因為英國稅重）。但有趣嘅係，Gross嘅，就升緊。Gross係乜？就係計入社會福利後。點解升緊？因為社會福利不停縮水。

29. 作者亦都講返樓價升咗好多呀，但人工原地踏步，呢啲嘢大家耳熟能詳。只係有啲人以為只係香港係咁，唔知全世界都係咁。

30. 好啦，將來呢？作者都係悲觀嘅，認為貧富懸殊繼續惡化，佢舉咗三個原因，我平時都有講

31. 首先係根本冇乜政治阻力。你心諗，唔係有民主投票咩？況且，啲人會造反嘛，你見好多社會不穩，都係同貧富懸殊有關，民主社會好啲，但不能免疫。但點解唔會令政府倒台，或者選個好極端嘅共產佬上台？我嘅理論（唔係作者講），好多人都聽過：因為你西方國家所謂最窮嘅人，都唔係以前嗰啲話餓死凍死嗰啲，唔係你睇歷史書啲革命。我做嘅比喻係，啲南歐佬嘈一大輪，咪又係返屋企睇波。因為你有基本嘅生活，所以你嘅不滿嚟自眼紅，而唔係生死存亡，就好難爆大鑊的，你日日鬧，但你總唔敢選件共產佬上台。況且，民主選舉亦都畀啲人消消氣。當然比較陰論論嘅講法（我信的），有錢人根本控制傳媒，撚化大家，實情你選乜黨上台，都係繼續咁玩。

32. 之後，向上流動嘅機會細咗。亦係我以前寫文成日寫嘅嘢。而家窮人上流更加難，大學學費生活費貴咗幾多？我2000年在英國讀書，9000英鎊學費。而家同一個課程，40000英鎊。咁你可以諗下正常人嘅收入有冇升咗4倍。仲有，而家好多地方取消考試添，咁就係我成日講嘅「睇你有冇去緬甸做義工」，窮人「睇你老豆有冇細細個帶你睇美術館」，窮學生邊得嚟呢啲嘢？

33. 第三點，過去幾十年都係，科技進步，必然係令到「人力」唔值錢，特別係低技術嘅員工。當然作者篇文係2021年中，仲未出現西方社會近來勞工短缺嘅情況，但我依然相信呢個只係好暫時嘅現象。況且，我畀你人工加咗，亦都好可能通脹度輸返。只有中產或富豪先有閒錢投資（所以你睇緊我嘅文，你必然係中產或者富豪了，唔使自卑）

咁到底，有乜投資機遇？有乜冧把先？

34. 講咗咁多，有乜投資機會？作者畀咗啲，大家得閒都諗下，我都會再諗下。

35. 首先，奢侈品。不用講啦。你見呢年我都買LVMH同愛馬士，但留意，其實奢侈品最大嘅顧客，係啲中級同上級中產。嗰時中國咩共同富裕，短暫打擊奢侈品公司嘅股價，公司都出嚟澄清返。你諗下又好合理，一個身家10億嘅富婆買得多袋，定係100個身家1000萬嘅夾埋買得多？我當買鞋，你一個人著得幾多對？我當住酒店，你一個人訓得幾多間房？所以唔一定只係睇最top嘅超級富豪，但放心，即使係上級中產，都係同窮人越拉越開。但當然有一個好簡單嘅問題：你估得你先知咩，成堆奢侈品公司嘅股價，相當貴，係只係共同富裕嗰時震咗一震，或者疫情嗰時減過價咯。

36. 講過了，Successful investing is having everyone agree with you………..later＝later先係重點

37. 另外，作者叫你唔好買luxury sports car makers（實情我唔係好肯定即係邊啲？林寶堅尼？）。唯一例外係法拉利（呢隻我都有想買）。作者認為呢啲公司，同佢地嘅車一樣，係富豪玩具，唔係拎嚟畀你投資的。（我加埋原文，費事譯錯）

38. 第二，係資產管理，應該不用講吧。但係咪Private Bank？又唔一定係。作者提到BlackRock，我早早叫你買啦。仲有就係瑞士銀行UBS，但作者唔鍾意一般嘅歐洲銀行，只係睇中UBS嘅資產管理。留意，Private Bank 嘅模式，未必可以玩落去，而佢地往往甚至唔係資產管理公司。好多時只係賣啲（有毒？）產品畀啲富豪賺錢，照計而家冇咁易。

39. 第三，藥廠。不用講吧，有錢人，無法征服嘅就係自然定律，生老病死。佢地嘅生命咁精彩，可以續命嘅，多多錢都肯畀。特別係啲貴嘅標靶藥，cancer 藥（窮人用嘅瘧疾藥就唔啱了，有錢人唔會有呢啲病的，so sad）．作者特別提到AstraZeneca（英國上市的說）

40. 第四，買樓。不用多講吧，但照計大家未必可以真係買多層樓。退而求其次嘅？Savills，第一太平戴維斯，英國上市，地產經紀兼其他附加服務（可能我下個月就買，我指股票，唔係買多層樓）

41. 最後，十蚊店。當然十蚊店唔係十蚊，Dollar Store都加價，英國嘅PoundLand我估都加咗價好耐（冇上市，但母公司有，不過母公司做好多嘢）。窮人就係幫襯呢啲舖，作者提到美國嘅 Dollar General，英國嘅B&M。兩間都上市的。香港呢？有日本城，但香港公司都係古古惑惑多。但，B&M同日本城，都跑贏大市的！Dollar General 就跑輸，但之前幾年好勁。Dollar Tree就相反，今年跑贏，之前麻麻。

42. 自覺呢篇寫得幾好（除咗我發牢騷嗰堆），所以，我索性1月1日先放上Facebook宣傳。吸新客

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。