美股年內第70次新高，不過你有冇贏錢？ 香港地產股仲有力，阿里巴巴賣微博．美股公司相關性越嚟越低。新興市場（唔計中國）流入越嚟越低．中國入世貿如何促成美國「覺醒一代」。中國Shein如何砌低Amazon (Patreon)

快評兩句— 美股年內第70次新高，不過你有冇贏錢？

大師冇點你 — 香港地產股仲有力，阿里巴巴賣微博

每日一圖 —  美股公司相關性越嚟越低。新興市場（唔計中國）流入越嚟越低

Good Read —　中國入世貿如何促成美國「覺醒一代」。中國Shein如何砌低Amazon

FB Post Summary —  香港人真係好富貴。錢買唔到快樂。科技大贏家係廢老歌手

1. 好似唔少人覺得我Patreon啲內容太多，試下寫短啲。但週末專題嗰啲就冇得短。

快評兩句— 美股新高，不過你有冇贏錢？

2. 美股嘛，標普指數創年內第70次新高，道指7連升。不過又問下，你個倉呢幾日表現如何？我答你，我就麻麻地，個倉昨晚居然仲要輸錢（費事貼），雖然只係跌少少，但都係跌多過納指）。相信大家呢排都有呢類情況。

3. 原因？好簡單，因為近期真係見到係升返啲舊經濟，或價值股，呢啲股票，目測大家都少渣。我已經算比普通人好，但都係太側埋啲科技股，咁所以即使Costco創新高（費事貼了），都唔夠力救全家。

4. 我估今年其中一個最大嘅教訓係：跑贏大市真係好難。去到年尾指數不停新高，但唔少人居然冇錢賺甚至輸錢。當然跑輸指數冇乜咁大不了，多數基金經理都跑輸，但你唔好同個指數爭太遠太遠。都係嗰句，如果你同指數爭太遠嘅，可以檢討下係咩原因，但一般解決方法都係：買返多啲指數，個股過下癮就好。

大師冇點你 — 香港地產股仲有力

5. 港股呢，又係嗰句，只要避開地雷，跑贏大市真係唔難，我都算避得幾好，當然唔會避得晒。友邦1299騰訊700平保2318都有，小伏中伏大伏。但，就只係呢三隻，其他普遍都跑贏恒指。

6. 想講嘅係，早兩日都講過香港地產股，繼續都係強，又見到啲大股東係咁增持。而我相信只要通得成關，應該仲有得升。當然等了又等，但似乎都係會成事嘅。

7. 另外，中概股方面，好多人留意阿里巴巴9988可能又會創新低。但你睇返，佢反而係中概股之中跌得最少嘅。阿里個故事，就話要減持微博（有上市的）。好啦，反而兩隻嘅股價都係跌得少。而實情你諗下，呢類嘢陸續有來，就係將啲業務拆骨咯，騰訊之前點解要賣京東，而家好明顯啦？

每日一圖 —  美股公司相關性越嚟越低。新興市場（唔計中國）流入越嚟越低

8. 美股公司相關性越嚟越低—正如呢排都成日講，雖然指數一路新高，但美股嘅表現好分化。你見到2020爆疫嗰時，相關性好高，全部一齊跌。之後又好快全部一齊彈。但打後，個相關性就越嚟越低。留意個圖係標普指數最大嗰50間公司，都尚且如此，更細嘅公司更分化。最正係，呢篇文原文係講啲基金，話咁嘅市況好難跑贏。都幾好笑，即係話你知，啲基金經理真係雞犬皆升嗰時先有用，又有幾巴閉？

9. 新興市場（唔計中國）流入越嚟越低—呢個圖嘅資金流入係唔計當地人，仲有，係新興市場走中國。咁見到了，爆疫最初時，驚恐過後，係有唔少資金流入新興市場的，因為當時似乎見到歐美嘅防疫亂嚟，越南台灣甚麼嗰啲做得好啲。但，見唔見幾時開始冇乜流入？就係2020年尾。發生乜事？有疫苗，咁開始估成熟市場嘅經濟會反彈。近期就甚至係估美國縮表加息等等，新興市場冇乜運行。畀你見到嘅係，真係唔止中國拖低新興市場，唔計中國都係唔多掂的。

Good Read —　中國入世貿如何促成美國「覺醒一代」。中國Shein如何砌低Amazon征服美國

10. 中國入世貿如何促成美國「覺醒一代」 — 少貼政治，但呢篇由經濟出發，而且寫得算好，但唔係好有條理，「好似人地評我嘅文咁」，但至少我有TLDR畀你。篇文由20年前中國入世貿開始，咁講美國夠晒天真就唔係新鮮事。然後講全球化贏家，當然係中國，而整體全球化都係好，甚至對美國都係好。問題係，在美國，得益嘅唔係所有人，有啲得益有啲冇，就造成社會嘅高度分化。最好笑就係促成咗一班「覺醒一代」（Woke），唔知係乜？香港網友多數叫呢啲友做：白左（左for 左膠），日日講同性平權呀，Black Lives Matter呀嗰班。作者當然批判呢班友虛偽，只係關心美國啲冇咁重要嘅嘢，而嗰啲所謂Woke嘅公司，照樣因為賺錢而對中國跪低。作者嘅結論係比較悲觀嘅，當然唔知佢真係覺得美國玩完，定係小罵大幫忙啦。

11. 中國Shein如何砌低Amazon —一不離二，又係中國美國嘅嘢，但呢間唔止美國。唔知大家有冇聽過Shein呢間公司（就讀She-in），香港唔太多人講，但鬼媒就講咗好耐。夠晒神奇，大陸做Fast Fashion嘅公司，但啲衫全部係賣鬼佬市場嘅。跳過晒啲零售商，自己直接賣畀客，用英文嘅social media，開Amazon網店，實在太平，打低晒啲外國公司。有幾堅？間公司舊年做100億美金生意，按年升25%（咁但當然利錢應該好低）。另外，呢間公司佔咗美國28%嘅fast fashion 銷量，即係幾多？即係H&M 同 Zara加埋。仲有，佢地網站係全球第二最多人去嘅 fashion 網，勁過Nike H&M 同 Zara（第一係……Macy’s）．呢篇文好詳細咁介紹呢間公司。

FB Post Summary —  香港人真係好富貴。錢買唔到快樂。科技大贏家係廢老歌手

12. 寫咗幾篇文，都還滿意，嚟緊仲有幾篇影評

13. 香港人真係好富貴 — 呢類文會多人睇，講香港人聖誕餐人均消費1700蚊。陰功，我同埃汾太兩個人，食足四日，夾埋都未使1700。咁當然餐廳會報大數，但呢排啲貴價餐廳極爆又係事實。其中一個好重要嘅原因，因為啲人冇得外遊，咁而唔外遊實情又慳返唔少錢。但當然，都要香港人富貴先得

14. 錢買唔到快樂 — 光頭佬Jeff Bezos嘅八卦新聞，但我亦講返佢嘅歷史，人地讀中學已經係資優生，大學係名校Princeton GPA4.2，畢業做投資銀行，30歲就SVP。絶對唔係窮酸毒L創業。正如Cathie Wood一樣係名校畢業，投行分析員出身。唔好信咩大學冇用。

15. 科技大贏家係廢老歌手— 呢篇我幾鍾意，講聖誕啲流行榜，全部係啲老嘢甚至死咗嘅歌手。咁你話聖誕節聽舊歌唔奇，但點解係近幾年先會咁？因為而家計埋串流嘅數字。而串流就幫咗呢啲老歌歷久常新，亦令佢地啲版權更加值錢。咁你估到另一個問題，就係新人更加難做

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。