通脹7% 40年新高？美股冇驚過。不過港股仲勁。 果然價值股跑出美國制裁股跑贏大市？股市長遠都係跟盈利嘅。重溫科網泡爆嘅教訓。韓流征服全球之謎。 (Patreon)

快評兩句 —通脹7% 40年新高？美股冇驚過。不過港股仲勁。你舊年沽晒未？

大師冇點你 — 果然價值股跑出

每日一圖 — 美國制裁股跑贏大市？股市長遠都係跟盈利嘅

Good Read — 重溫科網泡爆嘅教訓。韓流征服全球之謎。

FB Post Summary — 阿加斯智破碧加的投資智慧

快評兩句 —通脹7%？美股冇驚過。不過港股仲勁。

1. 先講美股，12月嘅CPI，按年升7%，1982年以嚟最高，我估好多讀者都未出世（不幸地我出咗）。但，最緊要，都係預期。咁，同預期差不多嘅，加上鮑威爾之前一晚都放咗風話冇驚過，大把工具對付咁話，

2. 所以你見股市反應唔算大。三大指數都有得升，雖然高位回咗嘅。

3. 至於睇升嘅公司？都睇唔到有乜特別嘅pattern，新舊經濟都有啲。費事貼咁多圖，但我個美股倉係跑贏三大指數的。

4. 但，風水輪流轉，識玩梗係玩港股。抖咗一日，又再玩由頭掃到尾。

5. 仲要星期三晚ADR同夜期都幾勁的，可能星期四港股仲有得升。

6. 不過因為主要升啲科企（你睇科指升5%），而我只得騰訊700，所以當然係跑輸大市。

7. 但重點係：今年暫時，我好似每一個交易日都贏錢。美股跌嗰幾日有港股頂住。正如我不停強調，唔好高估自己預測能力，邊個估到今年年頭港股跑贏咁多？其實我都估唔到，但我唔會因為「覺得」美股會跑贏就全部買晒美股（一個字：如果我錯呢？），更加唔會因為舊年跑贏就覺得以後都係咁。

大師冇點你 — 果然價值股跑出

8. 就只睇兩個圖，美股今年嘅情況。睇行業，乜嘢跑出？能源啦，同埋銀行，必需消費品股都唔錯。邊啲死晒？當然係科技股，特別係細嘅。再講一次，舊年滿手科技股嘅，學到教訓未？

9. 第二圖，又係睇唔同嘅factor．有啲唔知係乜嘅可以自己查，例如見到equal weight嘅跌得少過大市指數，即係見到啲巨頭跑輸的（指數係用市值做weight）。但特別留意，價值遠遠跑贏增長。中到應一應呀

每日一圖 — 美國制裁股跑贏大市？股市長遠都係跟盈利嘅

10. 美國制裁股跑贏大市？—又係好嘅圖，但其實你諗下都知。舊年咩中海外688中移動941之類咁勇猛。記住，現實同好多人嘅想像唔同。記唔記得好多人話制裁股價會唔掂？我話如果唔做美國生意嘅，對盈利有乜影響？咁佢地會話，只係美資基金唔渣得要狂沽就夠死。但事實，你見到係咪美資狂沽股價就唔掂？短期可能係，但拉長少少，就自然會有其他人買平貨啦，你被迫沽，我梗係多謝你。但嗰時講當然冇人信，仲要鬧返你轉頭。所以真係唔使同啲人嘈的，事實勝過雄辯。

11. 股市長遠都係跟盈利嘅—非常好嘅圖，打橫係標普指數每股盈利，打直係標普指數。另外，留意係log scale，因為指數同盈利都係指數式增長嘅，以前道指幾百點，而家一日波幅都幾百點。呢樣都唔知嘅人就遠離佢。留意正係上次專題講嘅，德國股神科斯托蘭尼主人同狗嘅理論。科氏話股市係狗，主人係實體經濟，但我話應該用盈利好啲。咁你見到了，股市真係絶大多數時間跟住盈利行的。當然去到金融海嘯之類嘅位就好大波動。仲有，例如爆肺炎嗰時，啲人都以為對盈利好大影響　啦，但結果唔係。

Good Read — 重溫科網泡爆嘅教訓。韓流征服全球之謎。

12. 重溫科網泡爆嘅教訓　—　非常精彩嘅文，可以寫多篇專題都得，佢入面引嘅twitter仲多嘢睇。首先記住，歷史唔係簡單咁重覆。仲有最重要嘅：都不過係narrative，後世睇返當年嘅嘢，往往只能過份簡化，而且要易入口。例如2000年嗰次股災，大家就叫「科網泡沫」，然後會講啲咩dot com之類。但，篇文話你知，根本當時絶大多數巨企都係泡沫，可樂，Johnson，Walmart全部都40-50倍市盈率，否則個市點會跌得咁勁？另外，當時根本絶大多數人都覺得係泡沫，所以唔存在「人人都話泡沫即係唔係泡決」。仲有，你睇返，而家8%嘅股票price to sales高過20倍，當時都係差不多。但當然，而家多數集中在細公司，另外而家息口低啲，仲有而家好多公司都係有盈利嘅。

13. 韓流征服全球之謎　—有點長嘅文，但唔會深，睇完你都可以做專家。韓流呢個現象當然已經好多人寫過。好多人會話啲嘢真係得，但雞同蛋啫，有錢咪可以做得好啲，況且好多得嘅嘢都未必跑出。亦有人覺得啲嘢完全唔掂，只係過度吹捧，但人地咁多人睇咁收得非洲人中東人都去學韓文，就冇得呃。政治青會同你講韓國民主化，但，第度就冇民主？亦有人講政府扶持，但點解其他政府唔扶持？呢篇文最開頭講咗一個重點：講到尾，係整個國力嘅提升，亦即係錢，網友話唔代表乜嘅GDP。你諗下，日本二戰前已經係大國（一個打咁多個仲唔大？），戰後亦係經濟大國。但韓國呢？1965年時，人均GDP低過加納，你諗下有幾窮，但之後成為世界10大經濟體系。有錢咗先有其他嘢講。當然仲有一樣嘢，篇文冇講，我提出嘅，係韓國人嘅民族性。有機會細講，但簡單嚟講，就係民族主義，覺得自己啲嘢最好，個個圍爐飛機。

FB Post Summary — 阿加斯智破碧加的投資智慧

雖然只係寫咗一篇文，但真係我好滿意嘅作品。有talking point，有哲理，唔太悶，但又唔嘩眾取寵。你當花邊新聞睇又得，拎到哲理又得

14. 阿加斯智破碧加的投資智慧—　實情係早兩年嘅料。網球名將阿加斯爆返點解可以食住死敵碧加，因為佢留意到碧加開波時嘅小動作：伸脷。睇佢點伸就知佢開波去邊。但入面仲有好多哲理，例如阿加斯不能每球都望住人條脷。必殺技要關鍵時先出。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。