美股又創新高，道指36000，標普500就快變5000．羅氏Roche 同 SCI 都創新高．長實 1113 賣飛機租賃公司套現330億．一成美股今年跌咗35%。長買美股5大公司賺到笑。美股股息率低過債息！點解Hold Music令你咁抓狂。一個RobinHood Trade輸晒40萬美金。跑贏85%基金經理嘅投資方法 (Patreon)

快評兩句— 美股又創新高，道指36000，標普500就快變5000

大師冇點你 — 羅氏Roche 同  SCI 都創新高

In KS We Trust—長實 1113 賣飛機租賃公司套現330億

每日一圖 —  一成美股今年跌咗35%。長買美股5大公司賺到笑。美股股息率低過債息！

Good Read —　點解Hold Music令你咁抓狂。一個RobinHood Trade輸晒40萬美金。跑贏85%基金經理嘅投資方法

FB Post Summary —  有冇食過日本麥當勞？銀座聖誕大餐。譚詠麟當年真係好紅

1. 多嘢講，唔賣廣告，聽日會賣。

快評兩句— 美股又創新高，道指36000，標普500就快變5000

2. 不用多講，標普指數今年升30%，點都夠冚你輸港股嘅錢。但前題係你啲嘢唔好偏離指數太多，同埋一路坐住。你美股高追啲發夢股，港股又全部中資科技股嘅，問題就大了。

3. 另外，stay invested．早排見有啲買發夢股嘅，上個月畀人震走咗，話清倉。咁幾時先買返？我由頭坐到尾執30%，不知幾簡單，仲要可以好大手咁買落去。

4. 最後留意下，中概股早段都還好，但去到收市又係冇乜運行。而家再講港股已死都多餘（但近期又唔算極差），如果成手港股嘅，你應該早早問自己，點解最初又咁集中港股？我由寫呢個Patreon第一日已經叫大家唔好太集中，我自己買嘅嘢都都話埋你知

大師冇點你 — 羅氏Roche 同  SCI 都創新高

5. 冇乜特別，費事重覆講嗰啲句式。但，留意兩樣嘢。隻SCI之前寫過，我贏300%，當然因為買咗好耐。

6. 然後呢，貼啲以前買嘅，又總係不停有啲讀者問，有冇新嘅？你諗下我已經買到好多隻股票，都某程度上同我搞呢個Patreon有關。咁但，新嘢丫嘛，Roche咯，個幾星期前先買。歷史新高，都升5%。一個星期多啲咋喎，滿意冇？

In KS We Trust—長實 1113 賣飛機租賃公司套現330億

7. 星期五只係寫咗長建1038回購，話咗寫埋長實1113賣飛機，今日就寫。實情單嘢平安夜朝早開市前出嘅，股價反映咗了，但之後一路都放假嘛。通告呢度，明報寫得幾好（唔知要唔要訂戶），或者睇經濟日報。

8. 呢單係長實賣中環中心（時機完美！）後最大嘅單一交易，套現330億，但只係賺13億。亦唔會派特別息。但，留意，賣嘅係飛機租賃業務，居然咁嘅情況下賣嘢都仲有得賺，算係咁。當然對家亦係想壯大規模。留意長實嘅飛機租賃業務，一路都賺錢，今年上半年都仲係，但可能公司覺得個世界已經唔同咗，離場唔使輸咪算。

9. 最後，長和系嘅嘢，今年算係咁，幾隻我都有少量月供。長實1113今年做得最好，升19%。長建1038上次寫過，升15%。香港電訊6823 都有得升少少。長和1號仔反而失望，跌11%，但都叫做跑贏恒指。8號仔就最差，跌14%，同恒指差不多（咁有些少息收下嘅），你估真係Viu台賺好多錢咩。

每日一圖 —  一成美股今年跌咗35%。長買美股5大公司賺到笑。美股股息率低過債息！

10. 一成美股今年跌咗35% — 留意係12月1嘅圖，另外係羅素3000指數，但唔係重點。留意1980年以嚟，大市有今年咁嘅升幅，有12次。但，今年居然有10%嘅美股跌35%，呢個比率，在嗰12次之中，就只有2次更高。可見今年買錯股真係幾易中伏。

11. 長買美股5大公司賺到笑— 唔係好肯定個玩法係點，但有寫每個月rebalance，咁我估就係我舊錢，五等份買晒最大嘅五隻美股。下個月沽晒佢，再五等份買返最大嘅五隻（留恴可能唔係上個月嘅五隻）。當然事後先知咁勁，但呢個策略勝在都幾簡單，亦不難執行，完全客觀跟晒規則。見到不停咁玩，回報好驚人，1990至而家係升咗25倍咁滯！但又留意，條線係去到近五年先起飛的，可見近年美股啲巨無霸幾咁勁。

12. 美股股息率低過債息！—如題，冇呃你。但係咪代表股票就好貴？不一定。可能貴，但同債息相比又唔係超貴。呢個亦好可能係美股一路都可以咁貴嘅原因，因為債息太平。想講乜？我想講係，呢個圖係反面教材，你唔應該將指數嘅股息率同埋債息去比。因為理論上，你派唔派息，應該唔會點影響股價（學術嘢）。實際上，因為稅務，好多美國公司根本唔想派息，咁你個股息率梗係低。合理啲嘅方法，咪earnings yield gap，用 1/市盈率 同 債息相比，舊年寫過（都話啲文環環相扣）

Good Read —　點解Hold Music令你咁抓狂。一個RobinHood Trade輸晒40萬美金。跑贏85%基金經理嘅投資方法

13. 點解Hold Music令你咁抓狂 – Hold Music就係你打去客戶服務時，要等你嗰陣播嘅音樂，篇文有幾詳細咁解。嘻，個答案有啲吹脹，答案就係因為要等就令人好煩躁，播乜音樂都冇用。不過，實情啲公司已經盡力去搵啲好啲嘅音樂去令你覺得等嘅時間冇咁耐，亦正係因為咁先要有音樂，好過你對住一片死寂。又，點解啲音樂咁罐頭？好多時因為版權問題。

14. 一個RobinHood Trade輸晒40萬美金 — 只睇結局嘅，因為佢買咗阿里巴巴期權。咁有啲人會覺得，扯，無人叫你咁笨走去買阿里巴巴。但講真，唔好高估自己，好可能有一日到你，你啲友買發夢股咪又係咁。睇晒成個故事佢，好睇睇的。主人翁，26歲，咁已經有40萬美金輸，幾好啦，人工唔低，但唔係富豪，中上級嘅中產，仲要係相當慳家的。個故事就係輸錢皆因贏錢起，最初買AMC 5000變15000，炒埋銀變50000，好叻仔啦。但，之後咪又係一舖死晒。呢個亦係點解我苦口婆心叫你地唔好太爛賭嘅原因。係架，你嗰期買AMC之類，捉得到又好彩嘅，贏幾倍唔難丫—但除非你買好多，然後贏夠退休。否則會點？最後都係害咗你，因為你以為自己係股神，之後會賭更大，最後多數都係同主人翁一樣下場。又，個故事，同我買波音期權好似呀！都係差不多輸晒。但個分別係，我只係買咗10000港紙。

15. 跑贏85%基金經理嘅投資方法 -  照計聰明嘅你都估到，作者就係叫你買指數ETF。佢仲寫咗唔少其他文，寫得幾好。的確，佢話你知，10年打落，85%嘅北美基金經理，都係跑輸大市嘅，亦即係一兩年跑贏嘅好可能只係好彩。另外仲有話你知，點解跑贏大市咁難。首先，過去20年，只得25%嘅標普指數成份股跑贏大市。另外，過去100年，4% 嘅美股，就貢獻全部財富增長，其他96%都係夾埋得個桔嘅。不過我都提過，只係買指數，真係極悶，做唔到的。所以退而求其次，你將啲錢分好，可能一半嘅買指數，剩返一半咪玩其他

FB Post Summary —  有冇食過日本麥當勞？銀座聖誕大餐。譚詠麟當年真係好紅

16. 銀座聖誕大餐。 — 就梗係天水圍銀座，同咗埃汾太去食聖誕麥當勞。高中同大學年代我係住嗰頭的。唔止，英國返嚟後都住過一排，仲要在嗰間麥當勞打過下工。

17. 有冇食過日本麥當勞？ — 呢個就係上篇文嘅延續，講返，日本麥當勞而家冇中薯條大薯條，只得細嘅。順手講下，我在日本都係食過麥當勞的

18. 譚詠麟當年真係好紅— 冇乜特別，純粹我在個人Facebook而家一日貼一首。亦都有寫啲自己嘢，既然係咁不如整個 blog留個紀錄。有興趣嘅呢度。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。