［聖誕禮物］ 2022展望：下年睇美股Small Cap ，但點買法？ (Patreon)

「展望」冇「回顧」咁重要

2020展望：「轉」

點解 small cap應該買ETF（甚至只能買ETF）

Small cap 跑輸有原因？

但老老實實，乜嘢係small cap？

3款不同嘅small cap index

不同ETF：IJR，IWM，VB

「展望」冇「回顧」重要

1. 大家聖誕節快樂，上星期因事暫停咗一期專題，今日復活，當係拆禮物。下星期都會有。

2. 首先我再強調，我並不太鍾意「2022展望」之類嘅嘢，亦唔太鍾意預測。固然返工出糧有用，或者語不驚人誓不休去「起朵有用」，但實際用途係冇乜（又，嚟緊1月頭信報月刊我會講呢樣嘢，記得買）

3. 同好多人諗唔同，我並唔認為要「預知將來」先可以投資。真係預知到當然好，問題係未來就係不可知。所以「回顧」反而先重要，你知道昨日同今日發生乜事，到時將來發生唔同嘅事，你自然識應對。你學嘅係心法，世界觀，同埋個世界點運作，唔係好似機械人咁 我叫你買乜就買乜。因為，如果我錯呢？

4. 另一個問題係：點解係年頭年尾先做？我明白好多係因利成便嘅原因，但，市場嘅變化，唔會睇住個日曆發生，好多嘢根本改變緊。例如我呢篇文講嘅嘢。

2022展望：「轉」

5. 你叫我講2022展望，我並冇真係好新嘅嘢講，近排都係講呢啲嘢，亦似乎發生緊，我唔使忽然1月先醒覺。

6. 2022年展望，一字記之曰：轉

7. 轉乜？好多大趨勢，我估差不多去到臨界點，準備轉向。

8. 最簡單嘅，美股今年超強，令到好多人以為合埋眼都贏錢（有段幾長嘅時間的確係），下年仲係咪可以咁？再講一次（因為我發現好多人真係亂嚟），冇叫你清倉，更冇話美股會跌，但，可以睇多啲其他嘢。呢幾個月都係同你講呢啲啦，係咪？

9. 反而你講咩經濟呀，事件呀，催化劑呀，好多我認為全部係廢話。最後都係同估值有關。固然不代表平嘅一定升，但，物極必反啦。美股真係相當相當貴。

10. 咁有乜其他選擇？有辦你睇，以前都寫過。例如話成熟市場嘅，歐洲日本英國我成日講啦，亦都講過下啲ETF（呢篇都有）。新興市場走中國嘅，亦都寫過。留意我並冇特別睇淡中國，依然都仲有月供港股，但要買嘅你自己都識，平時唔係講美股就講港股（即係中國），唔使開篇文講。

11. 至於美股入面？仲有啲係冇咁貴嘅嘢。例如價值股，早兩星期講過。

12. 今個星期，就係同你講small cap

13. 留意返，2000-2010年，美股一樣迷失十年。你頂位買嘅，納指固然高位坐十年仲要輸一半，但你估唔到連標普指數坐十年都一樣輸15%。（Charlie Bilello呢篇文實在極之好）

14. 教訓？除咗叫你分段入市，仲有留意，啲錢總係會去咗某啲地方。嗰段時間，價值股，其他成熟市場，新興市場，都有幾好嘅升幅。當然仲有今日要講嘅，small cap。

15. 美股會唔會好快又迷失十年？唔知，但我相信再買美股值博率係比較低嘅。有新錢應該分散下。

點解 small cap應該買ETF（甚至只能買ETF）

16. 我認為，small cap，最適合買ETF。甚至係唯一嘅方法。

17. 上面其他我提過嘅嘢，你要扑中個股，唔係太難。你睇好歐洲嘅，自己識買ASML 愛馬士，唔出奇丫。睇好新興市場走中國嘅，你扑中台積電唔奇。睇好價值股嘅，唔少人自己都識買P&G（PG）或者輝瑞（Pfizer，PFE）

18. 但，small cap呢？啲公司你鬼識咩。最多咪人講你又講，或者你見到嗰排升得多。就算你見到佢啲產品好受歡迎，都不等於最後隻股票可以修成正果。唔同啲大公司，個個都知Facebook 麥當勞 點賺錢啦

19. 仲有，small cap嘅死亡率偏高。指嘅死唔只係高位跌三四成，而係成日爆咗煲。呢樣嘢好多人計數時冇留意，survivorship bias，好多small cap根本已經消失咗。

20. 當然畀你博中嘅，就好可能係示範到我講嗰種：一隻升十幾廿倍，夠你輸好多隻。但你自己點買幾十隻small cap？所以都係ETF比較適合

21. 唔好忘記，今年已經見到，玩個股都幾難玩，絶大多數股票都跑輸指數。呢個圖，標普500指數今年升23%，但排中位數嘅只係升16.7%。留意標普500已經係大股，細股更加明顯。你睇買咗發夢股網紅股 ARKK嗰啲友咪知

22. 當然，唔係話唔買得個股，好難忍嘅。況且買個股學到嘅嘢，係你買ETF學唔到。但幾時都係拎個平衡，分返莊閒，主力應該多啲ETF

Small cap 跑輸有原因？

23. 話說回頭，small cap 跑輸係有原因嘅。首先，以前都寫過，低息環境，似乎係令大企業更著數（都話啲嘢環環相扣！）。另外，Big Tech興起，而呢啲公司全部有好大嘅network effet，贏家全取，大嘅更大。三來，近幾十年，美國在反壟斷方面，鬆手咗好多（有數字有圖但未搵到，信我啦，冇老點你）。第四，主動基金唔爭氣，人人買ETF，而ETF本質就買指數，指數本質就係買啲升咗上嚟嘅公司。最後，疫情下，當然細公司嘅死亡率會高好多。

24. 問題係，除咗最後一個原因外，其他以上講嘅嘢，過去N年都存在。但你睇下大公司同細公司嘅估值，係近排先越拉越遠的。

25. 當然small cap嘅估值折讓，會係結構性定周期性？我當然估係周期性，即係之後會收窄返。但，冇可能有肯嘅答案。

但老老實實，乜嘢係small cap？

26. 講咗半篇，都未正名，到底乜嘢係small cap？都有啲難定義。

27. 不過，在今日呢篇文嘅context下，好簡單，我地只係睇唔同嘅幾個small cap index，佢地用乜標準。

28. 留意不同指數，真係有唔同嘅標準。大公司就好容易，你講巨企一定係嗰幾間，你講美股大盤指數，一定係標普500（納指始終有少少唔同，側重於科技股）。但邊啲先叫small cap？去到幾大先唔係？就唔同指數有唔同定義了。

29. 當然，我亦相信有咁多指數，係因為啲指數公司，同埋ETF公司，唔想直接價格競爭。正如上次寫新興市場都有講，有啲指數包韓國，有啲唔包。咁咪好，各取所需，指數又兩款，ETF又兩堆，投資者對號入座，指數同ETF公司就可以話你知係唔同嘅嘢，唔使只鬥價格。

3款不同嘅small cap index

30. 好啦，首先介紹下，不同嘅small cap 指數。實在好多，但主流嘅得三隻（甚至只係兩隻）。下面嘅link有埋基本介紹。

31. 首先係標普旗下嘅標普600（留意平時美股講標指係標普500），標普有上市，SPGI。另外就係羅素（Russell）旗下嘅羅素2000，（平時大盤股就係羅素3000，唔好搞亂），羅素就係倫交所（LSE）旗下嘅公司。第三隻，較少人講，就係CRSP嘅US small cap Index（以下簡稱CRSP）。CRSP是甚麼？芝加哥大學商學院嘅嘢，自己做研究，亦都向外收錢，但當然唔係SPGI或LSE咁牟利上市公司咁。

32. 留意三個指數都幾唔同，至於佢地嘅指數，點定義small cap？有乜條件？就實在太長，你可以睇返啲指數嘅Factsheet或methodology（我會畀埋link你，但我估冇乜人會有心機睇methodology），以下只能快講

33. 標普600嘅，Factsheet呢度，同Methodology呢度。講得簡單啲，最大嗰500隻就係平時聽嘅標普500，之後嗰400間就係標普400，係mid cap 指數。再打後600間就係標普600，咁上下，唔會重叠。

34. 留意係排大細，同埋固定600隻，所以個堆嘢嘅市值會變，但唔會忽然爭好多，最新講緊入面係市值要8.5億至36億（你見維基嘅資料就7億至32億，未得update）。升得太多會點？咪升班上標普400。

35. 另外留意要入指數，公司最近一季要賺錢，同埋最近四季夾埋都要賺錢。入面堆嘢平均市值19億，中位數15億。總共大約只係佔美股市值3%，夠晒niche。

36. 羅素2000嘅，Factsheet呢度，Methodology呢度。羅素2000就係羅素3000入面最細嗰2000隻，咁你見到了，成份股數目多過標普600的。羅素2000佔咗美股市值大約10%，多過標普600（好合理，數目都多好多啦）。

37. 入面堆嘢平均市值36億，中位數12億。見唔見平均數大過標普600，但中位數細過？照計唔難估，數學現象啫，羅素2000嘅分佈濶好多。平均數大過標普600，因為會有啲大公司拉高。但中位數反而低咗，亦好合理，為數不少嘅蚊型公司拉低中位數。

38. 好啦，先講呢兩隻，傳統上羅素2000出名過標普600，ETF亦多數跟佢。但近年標普600已經追貼好多，講追蹤嘅ETF資金，真係大家差不多（陣間會詳細講）

39. 其中一個原因係：最近N年，多數都係標普600跑贏，投資者就好現實的。

40. 最後一隻，CRSP，factsheet呢度，methodology呢度。差不多1500隻股票，平均市值36億，中位數市值27億，似乎係大過另外嗰兩個指數。

不同ETF：IJR，IWM，VB

41. 好啦，講到尾，邊個指數比較好？答案係，好難有簡單嘅答案。不過反正你唔係買指數，係買ETF，咁不如直接睇ETF

42. 首先睇追蹤標普600嘅ETF，你見得IJR一隻獨大。所以集中討論呢隻。

43. 至於追蹤羅素2000嘅ETF，亦係只得IWM一隻獨大。所以集中討論呢隻。留意呢隻同IJR都係iShares嘅嘢，即係BlackRock，你見其他人鬥唔嚟。

44. 追蹤CRSP嘅？唔清楚，但肯定有一隻，正係我每月買緊嘅VB，Vanguard 嘅東西。之前Walmart家族篇文都講過。

45. 比較呢三隻嘢？首先比收費，實情三隻都好低，但跟標普600嘅IJR仲低過跟羅素2000嘅IWM。不過最低係VB，我估好可能因為背後CSRP收得平有關，始終大學嘢，唔同上市牟利公司。

46. 至於持股方面，貼晒畀你，順次序。最上係IJR，之後IWM，最後係VB。基本上都冇乜重叠。留意我用Money DJ，因為唔知點解etf.com 臨時死咗。

47. 最後，你最關心嘅，表現，雖然過去表現不代表將來，但收費唔爭太多，持股又大家都唔係好識分嘅情況下，都可以參考下表現。留意呢啲表現反映埋收費了。

48. 咁你見到了，睇一年，就係IJR（標普600）最好，VB（CRSP）第二，IWM（羅素2000）最差。

49. 不過拉長少少睇五年，情況又唔同，變咗VB（CRSP）最好，另外兩隻差不多。

50. 點揀？都真係有啲難。但既然VB今年叫做排中間，5年又跑贏，又平，我每個月買開，始乎可以繼續。至於你唔鍾意嘅，如果IJR（標普600）同IWM（羅素2000）二選一，似乎都係揀IJR好啲，反正平啲，而個指數亦都一般係標普600跑贏羅素2000

51. 結論？VB＞IJR>IWM，咁咯。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。