長江基建1038大手回購。真係好大手．美股今年升勢都算全面。新興市場唔掂係咪因為中國？第五次SAAS大調整。係咪加息就減低貧富不均？ (Patreon)

In KS We Trust—長江基建1038大手回購。真係好大手

每日一圖 — 美股今年升勢都算全面。新興市場唔掂係咪因為中國？

Good Read —　第五次SAAS大調整。係咪加息就減低貧富不均？

FB Post Summary —  黃國英訪問。Drive my car。港股策略王。平安夜大餐。聖誕酬賓周。春宵一刻值三千。

In KS We Trust—長江基建1038大手回購。真係好大手。

1. 公司回購唔出奇，但長江基建今次嘅回購好誇張，一買就90億港紙！隻嘢都只係1280億市值。一下回購4.9%股本！邊度嚟？當然冇可能係市場買，而係同某個股東買，一條友就4.9%。但咩股東？真係唔知。

2. 搵返陳年歷史文獻（2016年公告原文），（其實信報最詳細，但要訂戶先睇到），你會見到當時長建就發咗新股畀一間公司，正係今次嘅股數，所以肯定係同一人。應該而家贖返佢咁解。亦都留意下，回購個價相當高，去到68.9蚊（同當年發新股嘅價差不多），而長建最新股價48.4。

3. 但到底嗰間開曼公司背後乜水？就真係唔知。另外，幾明顯係特登低過5%，所以你睇年報都見唔到的。

4. 另外想講講嘅係，隻長建係我月供港股之一，今年升15%，跑贏恒指成條街，甚至好多人美股倉都冇15%升幅，仲要未計收息。

5. 你可以留意埋，隻嘢而家差不多5厘息。派唔派到？外國唔敢講，但香港應該冇邊間公司往績比長建更好（正因為咁我先買）。公司1996年上市，24年嚟年年加派息（有時係只加1仙，但真係從來冇減過），仲要寫埋在年報，記憶中冇乜見過有公司咁做。而家嘅股息，係當年15倍，日子有功，複利的威力。齋講股價都升咗4倍，12蚊上市，而家48蚊，當中仲派咗N咁多息。（而家一年派2.5，當年股價先12蚊，你諗下幾多厘？）

6. 記住，而家買都仲有5厘息。但又如何？以前都寫過呢隻嘢，唔多人買的。因為悶。5厘息嘛，但邊有穩穩定定5厘息呢回事？

7. 我畀個5年圖你睇，即時反胃，鬧我老點你。坐足5年仲要輸兩成，跑輸埋恒指（雖然其實中途你計埋收息應該唔使點輸）。高位追嘅？一度跌一半，而家都仲輸緊三成。

8. 但所以，我就係每個月咁買。而仲有，都話而家一年2.5蚊股息，我當你最高位73蚊買，都仲有3.5厘息的。

9. 教訓？你話呢？邊有無風險收5厘息？而你time the market係好難的。仲有，估值真係極重要。

10. 另外，留意有單長實1113 賣飛機租賃賺13億，篇幅關係，留返星期一講，反正星期一港股冇市。

每日一圖 — 美股今年升勢都算全面。新興市場唔掂係咪因為中國？

11. 美股今年升勢都算全面—早兩日貼過類似嘅圖，講美股升勢全面過舊年。今次呢張Morning Star做，當然係大市值股跑贏了（我好奇怪點解咁多人覺得大公司就升得慢，邊個話的？）。但，Small cap都有12%升幅，跑輸大市一截，但真係睇你點睇，有12%回報都唔算差，總好過你唔買，或者輸錢。

12. 新興市場唔掂係咪因為中國？—類似嘅嘢講過，呢個圖由2020年頭開始。睇上半截，你見到2020年新興市場唔太差的，但去到2021年就大跑輸。點解？固然因為中國，中國股市（特別係香港！）就唔得，而在新興市場佔比又重。但，睇下半截，即使係「新興市場走中國」，去到今年都係大跑輸的。匯率亦係一個問題。但我相信下年情況會唔同啲。又，係可以買「新興市場走中國」的，舊文有寫。

Good Read —　第五次SAAS大調整。係咪加息就減低貧富不均？

13. 第五次SAAS大調整— SAAS嘛，Software as a service，咪即係軟件股，懶係畀個名咁。留意呢個第五次調整，係由2016年計起！留意作者用嘅估值係EV/收入（唔知又想知咩係EV嘅，呢度），唔係我平時用開嘅Price to sales，雖然都大約OK。好啦，作者話喎，成日都有呢啲調整架啦，「唔會一沉不起」，「唔使好耐就彈返」，「四至六季啦」。埃汾心諗，啲讀者買完隻嘢兩日跌10%已經叫救命啦，四至六季仲唔係好耐？又，佢仲有講，啲估值呢，就會一浪高過一浪嘅。即係第四第五次調整嘅估值低位，都仲係高過第一二次嘅估值高位好多的，有波動，但長期都係估值升喎。咁呀作者當係暗示今次都係。但，見唔見到問題在邊？我唔明點解佢會認為個估值可以不停咁升。況且，過去五年美股長升長有，估值亦一路升，但真係可以無止境咁再升？

14. 係咪加息就減低貧富不均？— 低息造就貧富不均呢個講法，你成日都聽，我都好似成日講（留意係好似，陣間解）。好簡單啫，低息令股市長升長有，樓價又不停升，應該唔會太多人反對係咪？咁而資產價格上升，受惠嘅當然係中上階層嘅人，窮人餐搵餐食餐餐清，點會有閒錢買樓買股？之但係，作者就反對呢個講法。佢其中部份理據，就係話你知，加息嘅年份股市都係升，樓市都係照升啦。又好似係喎，埃汾都講過類似嘅嘢。關鍵係乜？關鍵係，首先睇你講嘅息係乜息，係短息（例如聯邦基金利率，LIBOR之類）定長息（10年美債）。仲有，幾肯定過去N年，都係資產價格向上嘅。冇錯有加息有減息，但始終近幾十年都係好似個波跌落地反彈咁，息口都係一路向下（睇圖）。仲有，錢都係越印越多嘅（尼克遜嘛）。所以，未必真係低息令到社會不均，好可能係因為印錢。

FB Post Summary —  黃國英訪問。Drive my car。港股策略王。平安夜大餐。聖誕酬賓周。春宵一刻值三千。

15. 黃國英訪問— 呢個訪問幾好，有機會我再講。但留意幾樣嘢，真係英雄所見略同。首先，你見佢都仲持有30%港股，換著你啲網友實問「點解唔清倉」。另外，佢都係睇好歐洲同日本股。仲有，一樣都係叫你唔好一注獨贏。

16. Drive my car— 一如所料，套戲當然入到奧斯卡外語片15強名單。另外留意，其他所有我提過嘅，都全部入到最後15強。但個重點係：成堆戲我根本一套都冇睇過。咁點解我會估到？呢啲咪教你思考的方法。就係因為我睇嘅嘢多，我知啲人嘅口味大約係點，知道邊啲媒體嘅料準，邊啲廢。

17. 港股策略王 — 冇乜特別，但幾多人like，下年會去策略王客串節目。另外，可能會叫佢地開個節目我講美股。

18. 平安夜大餐 — 就只係講我嘅平安夜午餐，同埋其他雜憶錄。平安夜同聖誕餐，我好似兩餐夾埋食咗五六百蚊咋，兩個人喎！我唔係慳嘅人，但我完全唔明平安夜聖誕節去破費嘅意義何在。

19. 聖誕酬賓周 — 同場加映港產片《聖誕快樂》

20. 春宵一刻值三千— 男女大不同，男嘅想Staycation，女嘅話想同親人一齊過。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。