呢隻係我回報第三高嘅美股，剛剛創新高，升咗300%．騰訊派息Q&A —碎股點算？唔夠21股點算？點解唔派現金？「我想穩穩陣陣收5厘息」嘅虛妄．三星亞太房託 3187 嘅跟進 —「不如買佢背後啲嘢算啦」 (Patreon)

呢隻係我回報第三高嘅美股，剛剛創新高，升咗300%

騰訊派息Q&A —碎股點算？唔夠21股點算？點解唔派現金？

「我想穩穩陣陣收5厘息」嘅虛妄

三星亞太房託 3187 嘅跟進 —「不如買佢背後啲嘢算啦」

呢隻係我回報第三高嘅美股，剛剛創新高，升咗300%

1. 容許快講兩句（詳細可能Facebook講，因為今日好多嘢寫），呢隻就係我回報第三高嘅美股。最高係蘋果，超過300%（即係1蚊變4蚊）。第二係微軟，都差不多300%。呢啲在9月個持倉公開有晒買入價，冇得呃你（12月嗰篇都有，但冇咁詳細）

2. 上面兩隻你唔難理解，亦都實聽過。但，第三呢隻呢？乜東東？回報一樣差不多有300%，但好多人聽都未聽過間公司。睇名亦唔知做乜，Service Corporation International

3. 答案：係做殯儀的。9月篇文都有講。係咪受惠死得人多？yes and no，冇咁簡單。以前Facebook Post講過下。

4. 教訓？悶股票一樣可以係好股票，甚至比起成日有人講嘅更好。亦冇話要點好高科技先有得升，Domino’s Pizza同Google一齊上市，股價一路都跑贏Google．仲有，當然係要坐得耐，呢隻嘢我買咗8年。但，佢升咗4倍，就係靠呢啲嘢，買得股票當然唔好諗住升少少就沽，中途仲要一路派息。由我買到而家，應該派咗5蚊息，而我買入價只係18蚊。

騰訊派息Q&A —碎股點算？唔夠21股點算？點解唔派現金？

5. 首先講咗萬人關心嘅騰訊700派息先，我係有持有嘅。月中嗰時寫過，都唔知搞邊科無啦啦年尾派息，當時都冇乜人理。

6. 咁而家你知道了，夠晒意外，居然係派啲京東（9618）畀你。21股騰訊派1股京東。股價已經話畀你知市場反應。京東嘅，咁樣畀人派出去，而去到你地手上九成都會沽出街嘅，當然股價即時受壓。（話時話，換著以前我會叫你試下撈京東，但而家成個行業咁情況就唔好了）

7. 騰訊呢？點解升？派息就升？未必。更重要係，縮窄咗個折讓。基本上上市公司有其他投資，就一定係有折讓的。講乜？即係我係A公司，我本業係零，但我持有B公司10%，C公司20%，而B公司市值1億，C公司市值2億。咁我堆持價就值5000萬，對不？但A公司嘅市值一定低過5000萬的。原因有機會再講，但正如你買套餐都平過散叫咁。咁到減持咗啲京東，當然對騰訊股價好啦

8. 之但係，另一個問題，點解佢唔沽走啲京東，然後派現水畀你？答案係，我估因為佢唔想啲京東去晒「外人」度。馬化騰之類都係騰訊股東，咁佢一樣會收住啲京東股權，佢唔係我地咁等飯開，佢可以一路渣住。但如果佢先沽出街，啲貨唔知去晒邊了，見唔見分別？

9. 順手答埋幾個你好想問嘅問題：

10. 我見係京東A類普通股，即係乜東東？—好簡單，就係香港嘅9618，可以沽得出街的，放心。唔係畀美股你

11. 點解要21股派1股咁狗？—一向係咁，匯控供股都係咁。

12. 咁我咪好多碎股咯？—係，但又如何？沽平少少啫，況且佢地會安排有碎股對盤，但當然都係會同你成手有折讓。怪就怪香港仲要一手手咁買。

13. 咁我一手騰訊100股，100 =21 *4 + 16。咁嗰16股點算？ — 答案，當然唔會有16/21股嘅京東，法律上最細只可以去到1股（你平時碎股係同交易有關，另一回事，即係你1股都可以去股東會的）。咁點算？其實係會畀返錢你，還算公道。但細過100蚊就冇了。

14. 我見佢講「合資格股東」，邊啲先係「合資格」？— 簡單嚟講，正路你都係合資格。涉及嘅係法律問題，例如你提咗實物股但在美國嘅，就不合資格。但大家放在券商，係nominee，就唔會不合資格。

15. 咁我好奇，如果唔合資格嘅又點算？—答案係，都有錢收嘅，但唔會收到京東。算幾公道啦？

16. 咁如果我係大陸人，經港股通買呢？—我相信呢度冇大陸讀者，頂多係在大陸嘅香港人。但，如果你真係經港股通買騰訊，就有個問題：因為隻京東唔在港股通名單的！咁點算？都還好，你收到一樣可以沽京東—但就唔可以買。

17. 除權日會點？— 1月20日除權，因為京東本身在香港上市，照計問題不大，咪扣返京東個價。你諗下，以前有啲公司係派未上市嘅公司，都係咁玩啦。

18. 其實點解騰訊要派息？— 相信派息係副產品，重點係監管方面唔想佢咁大勢力，基本上好似外國反壟斷咁，迫佢沽走京東。所以派息係副產品，減持先係重點。

19. 咁騰訊下一隻會沾乜？— 答案係美團。我估。但我估佢唔會沽SEA

20. 實情我原本想今日日頭寫，但太忙。呢啲嘢可能我都會貼上Facebook，吸下新讀者，但當然冇咁詳細。同埋一定係呢邊出咗先，將來都可能會係咁，希望大家體諒。理論上堅嘢當然留返呢度，但有時有啲可以呃到收視嘅，我可能會放上Facebook，但大家睇咗咁耐都知齋睇我Facebook就學唔到堅嘢嘅

「我想穩穩陣陣收5厘息」嘅虛妄

21. 都講過，香港人對於「穩穩陣陣收N厘息」嘅執迷，實在係奇觀。但你問我呢啲學院派就話你知，當你個N大過1.5%（而家10年美債嘅息口），就根本不存在有咁嘅嘢。

22. 高息債會爆煲。你去做孖展買唔高息嘅債，有利息成本亦都有風險，冇事就冇事有事可以好大件事。呢啲叫堆土機前執銀仔，吾友盧志威有寫過（唔係佢發明）。好多人走去沽期權，或者short VIX，亦係咁嘅東西，一舖可以清袋。買樓可能租霸，樓價可能跌，可能你租唔到出去。

23. 總之，再講一次，唔該唔好自己呃自己，收得N厘息（N大過1.5%）嘅嘢，當然係有風險，爭在你知唔知在邊，否則買美債嗰啲公司全部傻仔？任你玩咩花樣，都係冇可能戰勝宇宙定律。

24. 但講返，高息股當然係一個選擇。但，it work until it doesn’t．匯控5人人中過招啦，咁而家當然好多人都知因為生意唔好。事實亦係咁，生意唔好點年年派息？掉轉，生意好好又使乜派息？N咁多科企都唔派息

25. 咁當然，你可以揀啲公用股呀，中電呀甚麼，當然都唔係全無風險，但個可預見性高，一般都係唔會減價，又一般唔會有乜競爭。股價跌係一回事（所以估值十分重要！）。但一般啲息都派到。

26. 咁但，貪心嘅你又會話，扯，中電得嗰4厘息！我想要高息啲！—咁，證明你根本係冇睇清楚上面寫乜。

27. 另一方面，REIT當然都係選擇，真正收租，但你一樣可以賺息蝕價。領展4厘幾息，啲租都真係有加冇減（疫情時減過少少，但三年約嘛，成間公司收嘅租金冇少過的）。咁但，今年股價跌咗7%。我長期持有當然冇所謂，但你知好多人架啦，跌幾個巴仙又問點算。咁，4厘，大過1.5，當然有風險啦，有幾難明？

三星亞太房託 3187 嘅跟進 —「不如買佢背後啲嘢算啦」

28. 上次講過隻3187三星亞太房託，下面講嘅嘢有部份上次講過，但今次更深入。仲有涉及一啲好現實嘅操作問題，建議你冇興趣都睇下。

29. 最初買時因為想分散風險。領展之類，只係香港（雖然而家都有海外，幾好的）。咁3187，有澳洲有日本有新加坡有香港（最新已冇），冇死錯人啦。咁上次寫過，你見都真係差不多5厘息。

30. 問題係，收費甘。我可以容忍佢收我0.65%管理費（唔滿意自己買咯）。但，總費用比率去到1.5%（呢個係計埋0.65%管理費），就好和味。我短炒（槓杆或反向ETF）冇所謂，玩幾日。我如果長線升得多嘅亦冇所謂（例如當Bitcoin ETF）。但如果我擺明只係想收息，你嗰1.5%就幾係嘢

31. 之不過，好多新ETF嘅總費用比率都偏高，正常，因為開頭個規模細。管理人（呢個情況係三星）就一定係跟規模咁收你管理貴，但啲其他雜費一般唔會點變嘛，咁你隻ETF規模越大，個費用比率咪會細咗。

32. 上次我話問返三星，佢地亦都覆咗我，係會低咗的。「但冇講低幾多」。下次出報表時公佈，即係？半年後啩。而至於我問嗰個establishment cost嘅問題，佢地都未答到我。但至少有理我，算係咁。咁當然因為我本身識佢地話事人。

33. 但返返最初，記唔記得我講：我可以容忍佢收我0.65%管理費（唔滿意自己買咯）

34. 諗真啲，係喎，反正佢啲嘢都係上市嘅REIT，係咪可以自己買？佢十大持股，我去照單執藥咪得！（留意而家變咗的，你好得閒嘅可以睇佢地半年報告，有寫）。咁當然，佢隻嘢渣好多唔同嘅REIT，唔止10隻，但頭10隻已經佔60%，好夠架啦。

35. 最重要嘅係，我有IB戶口嘛（未開嘅用我呢個referral link吧），咁咪買到日本澳洲新加坡股票咯！

36. 不過，除咗佣金外（相對地都唔係最大問題），仲有一個問題：就係入場費。澳洲股可以一股一股買，很好。新加坡要一手100股，但嗰幾隻都只係千幾銀港紙一手，簡單。最煩係日本，但幸好啲REIT係唔使100股，可以1股咁買，不過最勁嗰隻都要成皮嘢。香港嗰隻亦都要8000銀入場。

37. 況且，寫垃圾倉時都講過，最貴入場費嗰隻係limiting factor嘛，咁香港嗰隻買得8000銀，其他都要差不多。嘩，咁十隻咪8皮嘢？我原本係每個月買隻3187，一個月4000幾咋喎！

38. 其實你好有恒心嘅，都可以做到嘅。個玩法就係，你可以每個月拎8000出嚟，然後咪第一個月買第一隻，第二個月買第二隻咁咯。但就真係要好有恒心。當然你亦可以每年年頭拎8萬蚊買

39. 當然，更加簡單嘅，你咪澳洲新加坡日本香港，每度只買一隻算咯，就四隻而唔係十隻，「但小心行業太集中」。實情好多玩法，雖然去到尾，又開始覺得係咪應該畀1.5%人地賺好過（但認真，我真係傾向上每個月8000咁買，10個月一個循環）

Life is good

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。