美股又升300點，標指就快又破頂，點捉？Tesla升返8%．在香港要幾錢先可以做1%？日本韓國台灣呢？美國人真係好有錢。 Amazon「廣告」仲值錢過AWS？52 個開心大發現（之二） (Patreon)

快評兩句：美股又升300點，標指就快又破頂，點捉？

快評兩句：Tesla升返8%

每日一圖— 在香港要幾錢先可以做1%？日本韓國台灣呢？美國人真係好有錢。

Good Read —  Amazon「廣告」仲值錢過AWS？52 個開心大發現（之二）

FB Post Summary —  Drive my car．Nike業績。陳冠希何罪之有？

快評兩句：美股又升300點，標指就快又破頂，點捉？

1. 實情並唔係太多嘢講，道指升300點就1%都冇，我啲股票就叫做都跟得到大市（視乎你用邊個指數）。但真係想講嘅嘢，就唔係好多。

2. 點解升？冇乜點解喎．唔使日日搵理由。咁你可以話因為美國唔封城，或者因為10年債息冇點升（而家居然都仲只係1.5%樓下）。呢個低嘅債息，相信都係美股一路跌唔落嘅原因。

3. 但我另外想講嘅係，你見到近期啲走勢真係好難捉，我日日都睇得好足，都覺得好飄忽，你啲網友話捉到嘅，有幾多係吹水？大家都見到嘅，就係之前見升勢越嚟越集中在個別大股（主要係FAAMG），仲有見到殺估值，好多科技股死晒，仲有係驚加息驚收水甚麼，況且美股一路都唔平。但，到呢兩日，你見啲科技股又忽然有力喎，納指又跑返出。

4. 正如美股早排講到點回調，話咁快又好似冇事發生—提提你，其實上星期四晚標普指數先新高，之後只係跌咗兩日，星期五同星期一，到星期二三都收復不少失地。而家離高位1%唔夠，分分鐘呢兩日又破頂。點估到？

5. 想講嘅，都係老土嘢。點捉？況且，我都仲話日日望住，你地如果在香港時區，又有正職嘅，冇可能睇得咁貼 — 但亦都根本冇咁嘅需要。我經常都建議大家，打好你份工，或者撈好你嘅副業。你冇本金講乜投資都假。我可能可以幫你由以前成日輸錢，變到每年可以15-20%回報（好多架啦！），但始終靠耐力，你要有足夠嘅錢先可以一路買。買完股票你忽然幾個月後要用錢又要沽嘅，就好難搞

6. 你見我買嘅股票，真係夠分散，總有啲嘢有得升，亦令我可以坐得好安穩。但如果人工唔高，或者個本唔夠大，又係咪做唔到？唔係！你真係求其個個月買SPY（標普指數嘅ETF），然後加啲其他地區嘅嘢，已經好夠，真係錢多咪加埋small cap（詳細名單睇呢篇舊文）。

7. 容許我再強調，雖然我都玩個股，但我唔係「只玩」個股。當然玩個股過癮，又學到嘢，所以都係必要嘅，但咪留意返輕重。十個有九個讀者求救，明明美股今年咁勁自己都冇乜賺甚至輸，好多都係因為太集中（有啲買咗十隻八隻，但全部都係發夢股，咁唔係叫分散呀老細）。你有啲指數嘢做膽，其他嘢就會玩得安心啲。

快評兩句：Tesla升返8%

8. 噢，重點當然亦係Tesla。就真係只講兩句，呢隻我都有，但年頭沽咗一半，而家剩返唔多，一路坐住。點解升？好簡單，老闆話沽晒貨啦喎。我之前當然寫過，老闆沽貨，同公司嘅價值有何關係？應該冇乜。固然你可以話代表佢都覺得公司偏貴，但你見馬化騰劉熾平之前沽騰訊，都係沽早咗的。我之前都寫過，佢沽嘅貨又唔係極多，冇理由會跌咁多。問題係，仲要市況唔好，由佢老哥開始搞個投票後，股價跌咗26%，你邊敢衝入去買？好難的。好似我咁可以坐得定已經幾難得。

9. 話說回頭，即使昨晚反彈後，隻嘢今年都不過係升38%。固然跑贏大市，但你話神級亦唔係，咪同蘋果差不多，而仲要股價咁波動喎，我不如買隻SPGI好過啦。所以今年實在唔係咩好神級嘅股票。當然亦因為市值已經太大了，好多外行人都唔留意呢樣嘢。

每日一圖— 在香港要幾錢先可以做1%？日本韓國台灣呢？美國人真係好有錢。

10. 在香港要幾錢先可以做1%？日本韓國台灣呢？—我可能遲下會在Facebook 貼，但留意，Net Worth 就當然係身家，唔理你幾多收入。仲有，當然計埋自住樓，但計你層樓現值減走爭銀行嘅錢。好多人連呢樣嘢都唔理解。Anyway，在香港你有2200萬，就係top 1%，門檻都幾高，香港人真係好有錢。有趣係日本同台灣都差不多，都係1200萬左右，係咪同你估計好唔同？而韓國仲要更低。

11. 美國人真係好有錢— 留意呢個係美國嘅存款增長。兩年升咗35%，有紀錄以嚟（咁都係1975年啫）都冇見過咁快。做乜咁多錢？當然唔多唔少同聯儲局嘅「印錢」有關，另外亦因為加人工，亦都可能啲人借錢借得多咗（息低嘛，樓價又升）。留意呢啲就真係現金，係未放入股市的，所以好多人認為個股市好難大跌。

Good Read —  Amazon「廣告」仲值錢過AWS？52 個開心大發現（之二）

12. Amazon「廣告」仲值錢過AWS？ — 一路有睇我文嘅應該知，首先，Amazon成間公司，並唔係十分賺錢嘅，純利係FAAMG之中最少。更重要係，嗰啲利潤，仲主要係嚟自AWS —網購唔多賺錢，甚至最新係蝕錢。不過作者都叫你留意返，公司上市之後，從來都冇集過資，明顯係自給自足唔使燒錢的。而正如我啲文提過，公司嘅「其他」業務都相當大。「其他」係乜？主要就係廣告，你想自己啲貨排得前，或者人地一search就搵到，咪落廣告。作者有幫你嘗試拆返開啲數，話畀你知，「廣告」呢瓣嘢，好可能仲值錢過AWS．我以前都提過，公司廣告收入，係同成間YouTube差不多，你諗下幾誇張？不過，係咪可分拆出嚟？至少在Amazon嘅case唔係，你堆廣告係因為痴咗落去網購業務先咁搵到錢，所以好難完全拆開晒去睇。

13. 52 個開心大發現（之二） — 上次貼過類似形式嘅嘢，今次係另一個作者。就係52樣學到嘅嘢，唔係心靈雞湯或者投資秘訣，就係不同範疇嘅不同事。我我最鍾意嘅係：5, 18, 20 31, 51。南非學生會賣學校嘅Wifi密碼，因為流動上網貴，啲友會行個幾鐘去學校門口偷Wifi用。勒索軟件好多都係整到不能在俄文或烏克蘭文嘅keyboard上裝，原因你懂的。如果男上司生女，女下屬就會加人工，但生仔就冇呢個效應。個咪收音好啲，背景冇咁嘈，啲人就覺得你講嘅嘢比較有道理。因為有人投訴，所以柯達1970年開始調整菲林配方，令到顯示啡黑色好啲 —但係因為乜人投訴？唔係黑人。而係整朱古力嘅公司。留意有埋過去幾年的，你可以慢慢睇。不如我都整一個？

FB Post Summary —  Drive my car．Nike業績。陳冠希何罪之有？

14. Drive my car—表面想講奧斯卡，實情係講思考，同埋投資。我根本唔使睇過套戲，都可以知道佢會係外語片大熱。點解？因為我見到其他人點講。你可以諗下，投資都有類似嘅事情，你走去咩研究人地本年報，或者研究人地啲嘢好唔好食—有冇必要？但留意，股票短期就似選美或奧斯卡，都係人云亦云，跟紅頂白。但長期，就相當唔冋。況且股票仲有一個最難搞嘅問題：估值

15. Nike業績— 冇錯就係講Nike業績，但Facebook Page版主要講心法，引新讀者嘛，如果你想睇真係深度分析公司盤數，就睇返昨日篇Patreon吧。

16. 陳冠希何罪之有？— 近排相當紅嘅文。當然都有人鬧有人同意，已經比我想像中好。又，信不信由你，呢篇文其中一個用途，真係去測試下到底係Facebook 壓低咗我嘅reach，定係我寫啲嘢冇人睇。咁而家答案好明顯了。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。