Nike業績後勁升（有埋Excel）。三星亞太房託3187：5%股息率，但開支1.5%...... (Patreon)

Nike業績後勁升（有埋Excel）

三星亞太房託3187：5%股息率，但開支1.5%......

1. 美股又強力反彈了，問你點捉？特別留意好多相當垃圾嘅股票都大反彈，例如我個倉嘅YALA WISH MYNA之類（三大中伏股）。

2. 垃圾倉亦都係強，單日升5%

3. 當然你睇大tech，反彈都唔錯嘅

4. 但今日重點完全唔係市，而係兩隻個股。

Nike業績後勁升（有埋Excel）

5. 快講一講隻Nike，業績後大升，在Facebook都有貼，去吸下新讀者。但最重要嘅當然留返呢度講。

6. 留意，公司係5月尾年結的，今次出嘅係9-11月，公司嘅財年第二季。

7. 業績你可以睇呢度，或者睇CNBC嘅報導都好夠。睇大數嘅，街估每股盈利0.63，結果係0.83。街估收入係112.5億，結果收入係113.6億，略為好過預期。但已經夠了，因為之前都受壓咗一輪。

8. 最重要嘅係，公司嘅展望相當正面。雖然供應鏈受阻，拖低咗業績，但市場一早預咗。公司亦都有講越南嘅廠已經全部開返，產能已經有之前嘅80%。

9. 仲有，公司認為而家嘅競爭力，比起疫情前更強。順手調高埋展望，下一季預低估位數增長，街原本估2.5%。全年收入就估有中單位數增長。

10. 如果睇地區，見到美國收入按年升12%，係所有地區中最勁。EMEA（歐洲，中東，非洲）就升6%．大中華收入要跌20%，係咪因為新疆棉杯葛，或者大陸人窮到買唔起？又似乎未必，因為見到拉丁美洲同亞太區都要按年跌8%，公司話係同越南之前封咗廠有關（但已開返），亦都因為冇貨賣，同埋中國都耐唔耐封下城咁

11. 個Excel你可以自己慢慢玩，我講幾個重點：第一，呢幾季嘅收入同盈利，早早已經高過疫情之前。實情公司只係最初爆疫嗰兩季受打擊（2019年12月至2020年2月，同埋2020年3-5月），之後嗰季（2020年6-8月）收入同盈利已經過過疫情前，打後都係咁

12. 第二，可以留意下，中國市場嘅EBIT margin，一路都係所有地區中最高的。但而家個EBIT margin跌緊，原因不明，可能因為收入低咗都有關。你睇早兩季（2020年12月至2021年2月），曾經試過中國市場嘅EBIT仲高過美國的。

13. 至於有乜投資教訓之類，你可以睇返Facebook Post．我就只係講返一樣嘢，見唔見個股價圖有個大V？上次業績嗰期，股價高位跌咗兩成的，仲要個市冇跌，咁我使唔使又去「止蝕」？

14. 舊文都有寫過，嗰次業績後股價一樣大跌，一樣係因為供應鏈問題。但我寫乜？你可以睇多次。記住，唔好因為一啲臨時性，而公司又控制唔到嘅因素，就去覺得間公司唔掂。好嘅公司必定係會捱得過的，而股價亦會上返嚟。

三星亞太房託3187：5%股息率，但開支1.5%......

15. 我希望可以另文講，但實情過去十幾年，都不停有人問我同一個問題：點樣有啲冇風險收5厘/7厘/10厘息嘅嘢。

16. 答案？好簡單。冇。原因？亦都好簡單，美債1.5%息，任何高過呢個數字嘅，都當然有風險，爭在你知唔知風險在邊。

17. 高息債嘅，有可能會違約（恒大！）。槓杆嘅，你要畀利息成本，同埋若果真係違約你輸嘅錢更多，亦可能畀人追孖展。當然一般都唔會真係輸錢，但一輸你可以輸得好勁。買個單位放租嘅，可能有租霸，你亦未必個個月租得出，仲有搬出搬入前前後後，租客打爛你啲嘢，維修等等。買高息股呢？佢可能減派息，你亦可能會蝕價。

18. 所以，簡單嚟講，係唔存在「冇風險收5厘/7厘/10厘息」。我發現香港人對呢樣嘢有極之嚴重嘅迷戀。但都係要話你知，係冇咁著數嘅嘢。

19. 你當然可以收到高息，但一定有風險。呢個本身冇問題，投資回報根本就係嚟自你冒險。但至怕你冒咗風險唔知，例如成副身家去買晒啲以為穩陣嘅嘢。記得雷曼債券？嗰啲友好多都只係想收5厘息，佢地以為自己唔貪心。街邊0息，你想收5厘息，你唔貪心？真的？

20. 好啦，呢隻3187，實在有點複雜。背景你可以睇以前嘅新聞，或我舊文。簡單嚟講，亞太嘅REIT。實務上，就係日本，新加坡，澳洲。冇紐西蘭。原本有香港，但最新我見個指數都踢走咗。

21. 我之前買咗啲，後來亦都有每個月買一手咁（四千幾蚊啫），平均成本係22.27。咁你見隻嘢，而家20.88，6個月新低。不過我當然都收過下息，有點難計，但可能累計收咗1.04左右（陣間計）？都係唔夠補個價跌。

22. 實情佢早前宣佈咗派息，剛剛除埋淨，一般一年派四次。我幫你計埋，過去四季派咗0.1335美金，即係1.04港紙。現價呢？20.88。即係5厘息左右，還好。

23. 咁當然，下年派唔派到？100萬嘅問題，但應該就得嘅。都話實有風險，否則何來5厘息？

24. 留意，實際上呢隻嘢，係渣住一大堆其他嘅上市REIT，咁所以首先，如果嗰啲公司減派息，會影響到呢隻，人地冇派畀佢，佢又點派畀你？仲有，嗰啲REIT嘅股價跌嘅話，當然都影響到呢隻。點影響？你呢隻嘢拎住啲REIT嘛，佢地股價跌，你個NAV（Net asset value）咪細咗，而一般呢隻嘢，跟個NAV跟得好足的。

25. 咁但，以上呢啲，都唔係問題。一路令我覺得有啲問題嘅，係個費用。管理費0.65%，一早講咗丫。但個總開支（連埋管理費），去到1.5%。

26. 好多人唔知呢個管理費點收，順便解埋。Bitcoin ETF又好，QQQ又好，盈富基金又好，啲槓杆或反向ETF都好，黃金ETF都好，全部同一個玩法。就係每一日會在個NAV度扣咗少少，1%嘅，咪分開一年250日，每日陰啲。咁所以亦都唔使諗埋啲「收之前沽咗佢」嘅無聊嘢。

27. 咁如果我係槓杆或反向ETF，反正短炒嘅，冇乜所謂丫。QQQ之類收得平嘅，冇所謂。Bitcoin ETF收得貴，但你預升幾倍嘛（否則買嚟做乜？），咁都OK

28. 但，如果我隻嘢，只係想收息呢？我一年收5%息，然後要畀1.5%費用，就好似有啲問題，你可以當個股息差不多變咗3.5%，雖然我都唔肯定係咪咁計。肯定嘅係，你個NAV，係每年1.5%咁縮嘅，咁你亦可以當個股價係每年縮1.5%（因為應該貼近NAV）。咁當然如果個息有得加（亦即係啲背後嘅REIT加租）就冇所謂。但如果年年5%變3.5%，就有點唔多抵。

29. 就我理解呢，呢個1.5%，應該之後會低返的。0.65%管理費就一定跟個AUM（asset under management）收，但其他費用，好可能係唔會跟AUM升，咁理論上個AUM大咗，應該拉返低？而我望過下，個AUM，應該係double咗的。

30. 仲仲仲有，睇返個半年報，管理費17萬美金，最近AUM大約2760萬美金，對到數，咪大約0.65%。但，個establishment cost 19萬美金喎，計埋晒其他嘢，48萬美金，1.7%了？

31. 最重要係，呢個establishment cost，下年仲會唔會出現？我都唔知，理論上好似唔會，但章程寫攤銷5年喎。之但係，個章程又寫大約港紙150萬，咁上面嘅19萬美金，咪已經係150萬港紙。堆字我點都理解係夾埋150萬，唔係每年150萬。

32. 之不過，你見佢另一隻嘢，又係兩年都有收的。

33. 好亂？我都好亂。幸好我可以直接問三星嘅人，遲下畀個答案大家。

34. 不過呢，我傾向都係沽走隻嘢的。有人問我咩情況下先會沽，呢種情況就會，唔係因為個價升跌，而係因為真係同我買嗰時嘅想像有啲唔同。

35. 當然仲有，我會諗，「不如我直接買佢背後啲嘢啦」。買佢，都係為咗分散啫，但有IB戶口嘅，自己可以直接買日本 新加坡 澳洲喎。呢個就係下篇文會講嘅嘢。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。