ivanliresearch

拜登基建方案未必過到，高盛即時大削美國GDP預測．下年加三次息，2023又加三次息？我就唔信，市場都唔多信．聯儲局把口投降，但心底裡都仲係相信「通脹暫時論」。市場都信．Nike業績勝預期（有埋Excel）．疫情開花嘉年華郵輪CCL照升。2021升勢全面過2020。今年IPO搵笨實。今年SPAC搵笨實。點先知自己真係想要乜。2021年學會的52樣嘢。Gift card 二手市場 (Patreon)

Published:

2021-12-20 21:53:06

Edited:

2021-12-23 20:45:38

Imported:

2022-09

Downloads

Download Nike.xlsx

Content

拜登基建方案未必過到，高盛即時大削美國GDP預測

下年加三次息，2023又加三次息？我就唔信，市場都唔多信

聯儲局把口投降，但心底裡都仲係相信「通脹暫時論」。市場都信

Nike業績勝預期（有埋Excel）．疫情開花嘉年華郵輪CCL照升。

每日一圖—2021升勢全面過2020。今年IPO搵笨實。今年SPAC搵笨實。

Good Read — 點先知自己真係想要乜。2021年學會的52樣嘢。Gift card 二手市場

FB Post Summary — 從缺

1. 唔想日日講我嘅情況，但用股票術語講，「叫做穩定咗落嚟」，唔代表會反彈，唔代表唔會再差。但就係……定咗落嚟咯。所以文我都係會繼續出，嚟緊幾日應該冇咁忙了。你地啲PM我都會答返。不過上星期篇週末專題就消失咗。今星期應該會有，下星期都會有。

2. 另外，都好一排冇賣廣告，又再呼籲返，未開Webull嘅記住開，用我個開戶link，同埋要入錢完成交易（買美股），keep 返45日。

3. 有圖為證，我自己都有開，而最重要係，真係拎到股票的。可能之前都有啲人擔心拎唔到，係唔會的，之前開咗戶又完成交易嘅都應該見到。不過留意今個月佢地係送Walmart（WMT）唔係高通（QCOM）

拜登基建方案未必過到，高盛即時大削美國GDP預測

4. 美股，好似好差咁？但實情上星期四標普指數先創新高，之後係連跌兩日，但星期一晚三大指數都不過係跌1.2%。

5. 再講一次，只要你啲嘢夠分散，應該唔會話傷忙好慘重。你見我個倉入面，都係啲舊經濟或歐洲股跑出。

6. 記住唔好只係望住股價，正如睇病不能只睇病徵—當然呢個比喻有啲不當，股市啲邏輯絶對唔係醫學咁—但我都係想講，唔好只係睇股價，討論股價，鬼唔知跌幾多咩，我想講講最新你值得留意嘅嘢

7. 如果唔係住美國嘅，應該都唔知乜水係Joe Manchin。但呢期呢位民主黨參議員好紅，皆因佢做咗「二五仔」，唔會支持拜登嘅基建方案。問題就嚟啦喎，民主黨所謂「控制」參議院，實情只係50人，共和黨一樣係50個，但因為副總統有最後一票咁解。咁但，如果有一條友倒戈，就可能已經過到了。有乜影響？影響都唔細，你見高盛即時大幅下調美國嘅經濟增長預測，怕未？

8. 然後另一樣嘢，你可以留意，上星期我已經有提到，變種病毒在歐美遍地開花（又，說好的與病毒共存呢？），拿度又中招，Warren又中招，Jim Cramer又中招。結果，當然就係封城了。當然個情況唔會好似2020年3月咁誇張嘅

下年加三次息，2023又加三次息？我就唔信，市場都唔多信

9. 好啦，夾埋晒，即係會點？固然分分鐘疫情係會導致通脹（供應鏈嘛），但油價又大跌，而經濟增長又放慢之下（至少美國係），咁，仲係咪有好多空間加息？

10. 呢度可以帶到去另一樣嘢：明顯，市場係認為聯儲局唔會加到咁多次息，亦都唔會加到去咁高嘅位。睇呢兩個圖你都已經見到，近期市場加息預期一路跌。

聯儲局把口投降，但心底裡都仲係相信「通脹暫時論」。市場都信

11. 仲有一個好有趣嘅現象，有人提出，雖然聯儲局主席一早投降，話唔再認為通脹係暫時。但根本聯儲局依然認為係暫時，只係把口唔講。

12. 講乜？當然要有證據。咁你睇返呢個圖，剛剛呢次議息會議的，應該就明。2022年PCE通脹2.1%咋喎，咁仲唔係暫時？亦都留意聯儲局調高嘅，只係2021嘅PCE數字。2022同2023近乎冇變

13. 即係點？即係呢個「加息周期」（如有），好可能都係比而家指引更加慢，更加輕微。2022年加三次，2023年又加三次？未必得。而即係，市場應該都仲係信「通脹暫時論」

Nike業績勝預期（有埋Excel）．疫情開花嘉年華郵輪CCL照升。

14. 個股嘅，冇乜好講。唯獨想講，隻嘉年華郵輪Carnival（CCL），好耐之前推過，而家股價當然低過講嗰時好多，但一早講明只係短炒，亦都升過一輪，照計大家都走咗。亦都有人話低位又買返。有趣係，大市又跌，病毒變種又勁，但反而隻嘢星期一晚有得升！點解？因為開市前出咗業績，你可以睇下。簡單版嘅，冇錯係繼續蝕錢，仲要蝕得多過預期。但預期下年第二季可以正現金流，下半年就賺錢。仲要話出年下半年，同埋2023年啲訂單都相當好。

15. 另外，Nike亦都收市出業績，算係勝過預期，盤後股價有得升。聽日先詳細寫。你鍾意可以拎住我上次個Excel自己玩住先，未入最新嘅數的。

每日一圖—2021升勢全面過2020。今年IPO搵笨實。今年SPAC搵笨實

16. 2021升勢全面過2020—港股就冇乜點好過。但雖然今個月麻麻，其他股市，特別係美股，今年都仲係相當不錯嘅。呢個圖畀你見到，今年美股嘅升勢，實情相當全面（近期可能唔係），大公司細公司都升的，個情況同2020好唔同。再講一次，今年買美股都輸錢嘅，真係檢討下。

17. 今年IPO搵笨實— 例如有咩人輸錢？買新股嘅人咯。我一直唔明做乜咁多人鍾意買新股，你話香港嘅，有一排真係好似實有水位都算。呢個圖係歐洲今年嘅新股，絶大多數都潛水一大截—而個市明明係升。美股呢？個圖冇，但情況都係差不多。原理亦都好簡單：新股估值一定拎得貴，個市場旺時人人想手佁，只會更貴，到大市估值一逆轉，呢啲嘢就死得好慘。你有幾可見我買新股，或者上市冇耐嘅公司？好少的。

18. 今年SPAC搵笨實— 於是又有人話，傳統投行IPO搵笨呀，SPAC踢走中介人直接面對市場，回報好啲。Really？你睇圖就睇到，啲SPAC公司，一樣係大多數係潛水的，只係得一隻侵侵SPAC啲友就講十年

Good Read — 點先知自己真係想要乜。2021年學會的52樣嘢。Gift card 二手市場

19. 點先知自己真係想要乜— 心理文，長但唔難明。由need同desire講起，現代人嘅所謂「需要」，差不多全部係desire．「冇網上唔會死的」。而各種desire，差不多全部係social process：沒有比較沒有傷害，差不多一定係你想有其他人有嘅嘢。然後我最鍾意嘅一部份，教你認下到底乜嘢人係影響咗你：當然最直接一定係父母，但其他呢？佢教你諗下：你想變成邊個人咁嘅生活（雖然佢嘅真實生活同你想像應該幾唔同）？呢個就係你奮鬥對象。有咩人你好唔想好怕見到佢成功？呢啲就係反映你唔想成為嘅人。反思下，你就會知道自己嘅價值係乜。

20. 2021年學會的52樣嘢 — 有機會我第時都想整下呢啲文，類似嘅嘢我過兩日仲會貼。留意唔係咩生命禮會，或者投資貼士職場柲笈咁，而係一啲hard facts，不同類型都有。我最鍾意嘅係8，14同46。過去100年，意大利里拉對美金貶值300倍。過去40年，四成嘅美股，試過跌七成而未返家鄉。想一個月賺1000美金，在Instagram 你要有10萬follower，在substack 有230個就得（在我個Patreon呢？100個啦）。你可以思考下上面嘅現象

21. Gift card 二手市場 — 相當有趣嘅文，有啲長，但唔深。講嘅係美國嘅情況，同香港可能少少唔同，但都值得睇。眾所周知，呢啲Gift Card係有相當大嘅二手市場，但我反而好少幫襯。在香港我接觸最多嘅當然係百佳禮券，近年亦都成日見Apple Gift Card．但大家知道，除咗在商舖（百佳或蘋果店）買外，亦都有二手市場。你可以唔使100蚊就買到100蚊禮券，而佢亦會同你回收—就係靠賺你呢個差價。點解會有呢種市場？好簡單，因為供求。例如我收到張蘋果卡，但我係用Android 嘅，自然我就會想去套現，90蚊賣。咁既然有人可以90蚊買到，佢亦可以95蚊賣返畀肯用98蚊買嘅人。當然你諗到了，個折讓同埋bid ask，就同間嘢有幾多人用好有關。例如百佳，差不多人人有機會用。但你整張百老匯戲院嘅，就真係好多人一年先入戲院睇一次戲咁。留意文中嘅Gift Card超越咗傳統百佳禮券或西餅卡了，而家好多都可以儲值，你有個serial number就睇到入面有幾錢。仲有，其實變相等同於貨幣咁滯。以前美國free banking嘅年代都係咁上下。