聯儲局後續 —點解加息收水，但債息唔升反跌？美股大跌，但契媽隻ARKK大升喎，我個垃圾倉都大升。點解？ 匯控5跑贏台積電一大截！ 標普指數就快突破長期上升軌。不同行業股價同GDP嘅相關性。「新興市場」呢個asset class唔多make sense．邊個話估值好重要？ (Patreon)

快評兩句：聯儲局後續 —點解加息收水，但債息唔升反跌？

快評兩句：美股大跌，但契媽隻ARKK大升喎，我個垃圾倉都大升。點解？

大師冇點你 — 匯控5跑贏台積電一大截！

每日一圖— 標普指數就快突破長期上升軌。不同行業股價同GDP嘅相關性。

Good Read —  「新興市場」呢個asset class唔多make sense．邊個話估值好重要？

FB Post Summary —  Costco 羅氏新高。旺角中心呼喚愛＋死光槍。今年有冇錢賺？狙擊股壇狙擊手。想扮成無事故歲月如常

1. 係咪好似好耐冇文？睇你點睇。因為對上兩篇係星期三晚星期四淩晨出嘅。點解遲咗？最初因為想早早出篇聯儲局點評，唔想搞到星期四晚星期五朝先出。咁另外星期五好多時我都留到週末出。

2. 不過今次亦都係我呢排剛剛做咗激光手術，仲成日見醫生（對，星期一又去）。Facebook Post有講。所以休息咗幾日。

3. 情況嘛，都唔係太好的，眼有事。但一日寫到，都仲係要寫，都仲係會寫。想支持或鼓勵我嘅，好簡單，你可以upgrade（有人畀100美金月費的，你甚至想100年費都得），或者轉年費，或者叫多啲朋友訂

快評兩句：聯儲局後續 —點解加息收水，但債息唔升反跌？

4. 首先，講多少少聯儲局議息嘅後續。最初嘅評論可以睇返舊文。簡單嚟講，聯儲局比上一次會議進取，大幅上調咗通脹預期，

5. 亦都加快咗個加息路徑，下年加三次息，再下年又加三次。留意以上個圖，係睇返對上咁多次嘅「點陣圖」，對2022（同埋2023）嘅息口預期，畀你睇到個指引點進化。

6. 之但係，相當有趣地，似乎市場係唔多信聯儲局可以加到咁多息，或加得咁快。你見而家利率期貨imply出嚟嘅加息路徑，係慢過官方的。

7. 仲有冇證據？你見5年期嘅美債債息，近排都跌得幾勁。

8. 更多人睇嘅，10年美債，你望下，近期反而反覆咁回。明明而家出晒收水縮表訊息（今次聯儲局亦講明縮減買債嘅速度會加倍，但同市場預期一樣），下年又加息，但反而債息唔升的。1.4%咋喎。你諗下今年早前嘅高位見過1.7%樓上，但居然係年頭嘅事。早幾個月通脹威脅論時，都冇再升破1.7%了。

9. 但類似嘅現象，舊文肯定講過，好多人以為收水拉高債息，美麗的誤會，都話永遠炒預期。你亦可以話，真係大家都唔信通脹會係好長期。

10. 以上種種都係重要嘅，因為呢排其中一個值得留意嘅重點，就係病毒變種。你見之前又話驚，又話唔驚—但呢啲都只係股市嘅反應。除咗股市反應，你都要知道真實情況。而你睇到，在歐洲，似乎係傳得好快的。亦可能因為咁，避險意識高，債息跌。但到底係咪病毒變種勁就對股市唔好？就不一定。

快評兩句：美股大跌，但契媽隻ARKK大升喎，我個垃圾倉都大升。點解？

11. 我想你特別留意嘅係近期美股市況，冇錯係殺高估值，納指一路跑輸。但到星期五晚，就反而納指跌得少。更有趣嘅係，冇乜人留意， Cathie Wood隻ARKK大升喎。點解咁奇怪？

12. 仲有，連我個垃圾倉，都係升咗3%，個別股份大反彈添

13. 原因？也是物極必反，可能估值已經太殘。當然唔好忘記，樓上有講，債息冇升反而跌，亦可能係原因。

14. 只係一日嘅貨仔，定已經轉勢？我當然答你唔到。但記住唔好只係睇指數，同埋幾時都係唔好側埋晒某一類股份。你贏嗰時梗係風騷仲去串我保守，但到跌嗰時你叫晒救命，分分鐘低位打晒靶添。

大師冇點你 — 匯控5跑贏台積電一大截！

15. 至於港股方面，唔多想講。但你留意到，發霉嘅匯控5，今年真係升得幾好。升成15%喎！都唔止遠遠跑贏恒指，跑贏台積電添呀！你可以諗下，背後點解？咁當然在匯控自己，一來夠殘，二來英國加息，點都係有利。三來，實情美國啲銀行股仲勁，加息週期嘛，有利息差。我個港股組合都仲有啲，真係唔失禮，好過晒啲科技股。

每日一圖— 標普指數就快突破長期上升軌。不同行業股價同GDP嘅相關性。

16. 標普指數就快突破長期上升軌 — 留意呢個上升軌唔係你畫幾年嘅圖嗰啲。首先人地用咗 log scale．另外，真係近80年都係呢個框入面。原因亦好簡單，因為成份股嘅盈利，就係咁慢慢升上去，而你個市盈率有高有低，但長期都係Mean Reversion迴歸平均。咁你見，而家真係去到頂位了，冇話一定爆煲，但未來幾年，只怕回報不會太好。

17. 不同行業股價同GDP嘅相關性— 留意係講不同行業股票嘅股價，同GDP增長嘅關係，唔係指個盈利。首先，你見到，成個指數嘅相關性，都只不過係36%！真係有啲關，但大多數都唔關經濟事，所以「股市同實體經濟脫節」。另外，見到最相關係能源同銀行，不意外，但消費品股真係冇乜關的，無論係必需（staples）定非必需（discretionary） 。而科技股呢？直頭係負相關的！

Good Read —  「新興市場」呢個asset class唔多make sense．邊個話估值好重要？

18. 「新興市場」呢個asset class唔多make sense． —原文副題When ‘Emerging Markets’ Don’t Actually Emerge。何謂新興市場，可以睇舊文。簡單嚟講，就係睇人均收入，以前係叫「第三世界」。篇文同時話你知，新興市場好多種，有啲係可以追上成熟市場（你睇韓國人均GDP已經高過好多歐洲國家），但有啲搞嚟搞去死路一條。幾十年間，見到「新興市場」嘅ETF之類，全部集中晒東亞，中國台灣韓國，加埋印度（南亞），因為呢啲國家啲公司升得多。拉丁美洲嗰啲搞極都係咁窮。中歐東歐就好少少。講到尾，「新興市場」入面都真係各有不同。甚至亦有人係買 「新興市場走中國」，舊文有寫。

19. 邊個話估值好重要？— 又係the Reformed Broker嘅文。呢篇好，唔會只係得個講字，有埋圖。留意我成日話估值好重要，咁作者就唔係好同意。但我想大家留意係：好多低水平嘅人，就只係片面咁去諗「估值好重要」「估值唔重要」，是但一樣啱。但有冇諗過呢兩句嘢係咩意思？亦因為咁，標題嘅嘢好誤導，你一定要用多啲時間睇文（或者睇片都得）。作者入面嘅嘅例子，我係完全同意的，無非就係話你知，冇話低市盈率嘅股票就一定好。咁鬼唔知咩，FAAMG之類咁多年都冇平過。但我指嘅係，太貴嘅嘢，都係易出事。唔同公司嘅估值當然不能直接比，但同一間公司呢？你在好貴時買，都係易摸頂的。即係我唔係話Facebook 10倍Price to Sales（舉例），就一定抵過Costco嘅1倍—但，如果Costco升到10倍Price to Sales，我就唔會買咯。

FB Post Summary —  Costco 羅氏新高。旺角中心呼喚愛＋死光槍。今年有冇錢賺？狙擊股壇狙擊手。想扮成無事故歲月如常

20. 居然都係寫咗唔少嘢，但都係在手機寫嘅多。點分？冇段落數字嘅，就係手機上寫

21. Costco 羅氏新高。 — 都真係自high下，你見呢排美股升勢只係好少數股份支持，相返好多股票高位都大回，但我最近買嘅呢兩隻嘢，都係買完可以股價創新高，算係咁啦。又，我就真係唔使去過Costco或者做過藥廠的。

22. 旺角中心呼喚愛＋死光槍— 呢篇大約講咗我呢排嘅事情，近期情況較差咁咯。

23. 今年有冇錢賺？ — 貼返星期四嘅情況，你見舊經濟股大升，但到星期五又唔係，實在好難捉。照舊，唔該唔好走去乜都側埋一邊，然後諗住炒舊經濟股時你買舊經濟，到炒第樣時你又轉。做唔到的。

24. 狙擊股壇狙擊手。 — 華置私有化失敗。但又畀你見到，香港地都仲係有啲王法，都唔係有錢人大晒可以亂咁嚟。同場解埋你知，如果私有化失敗，一年內係不能再提的。

25. 想扮成無事故歲月如常 — 除咗講我去睇勞蘇外，亦都講埋美股大跌（道指跌500點喎），我都係冇驚過的。順手話你知，股市又跌債息又跌，估值又拉返低啲。留意埋，入面有講埋英國股 葛蘭素GSK（舊文都提過），同埋利潔時Reckitt （RB ）

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。