收水！下年加3次息！股災未？聯儲局最新「點陣圖」同埋「經濟預測」 (Patreon)

出聲明之前，通脹咩環境？

出聲明之前，市場預緊乜？

最新「點陣圖」同埋「經濟預測」

1. 呢篇原本星期四晚嘅，但提早而家出埋。原因舊文有講，一來事忙，二來星期三晚就有聯儲局議息結果，仲有「點陣圖」同「經濟預測」，而今次係相當重要嘅，所以盡快寫畀你，費事你星期五朝先收到。而亦即係，星期四晚好可能冇文。

2. 點解咁重要？都講過，除咗因為今次會講多啲關於縮表收水嘅嘢外，更重要係個「點陣圖」同「經濟預測」。既然聯儲局主席疑似轉軚同投降，唔再認為係暫時。咁局方上一次（9月尾）嘅「點陣圖」同「經濟預測」，當然要大幅調整。

3. 唔知咩係「點陣圖」同「經濟預測」，舊文有提（呢度，同呢度）。但留意返兩篇文係6月的，唔係9月，9月我有寫，但只係略寫

4. 「點陣圖」，就係一堆豆豉，每粒豆豉係一個官員，佢地自己認為聯邦基金利率，在唔同時間，會去到咩水平。上面呢個係SAMPLE

5. 「經濟預測」，就係局方睇經濟增長（GDP），失業率同埋通脹。仲會畀埋上一次嘅數你睇，等你知道改咗乜。留意個表同時會有埋息口水平嘅預測。上面呢個係SAMPLE

出聲明之前，通脹咩環境？

6. 好啦，首先我地要睇下，呢堆嘢出之前嘅情況。上星期五先講，美國11月嘅通脹，按年係6.8%，40年新高（呢度講CPI，留意聯儲局多數講PCE，兩者有唔同，唔使太執著個分別，但唔好搞亂）。但你見美股一樣照升，似乎唔太擔心，至少啲指數大股唔係。啲發夢股死晒就另一回事

7. 正路地，經濟師（呢兩檔似乎比較可靠）都預報出嚟嘅CPI，應該見咗頂，唔會去到7%。之後會回落，但唔會好快，可能下年年中你都仲見到係4%咁。仲有，報出嚟嘅大數CPI見咗頂，但反而核心嘅core CPI，仲會有得升，遲少少先見頂，會去到差不多4%，到時仲有得驚。

出聲明之前，市場預緊乜？

8. 仲有，呢部份同你講下，未開呢次聯儲局會前，出面期望聯儲局會做咩行動。如果睇CNBC嘅調查，就係以下嘅嘢。記得抄低佢，陣間同聯儲局真實做嘅嘢對比下

9. 減慢買債：首先，預期局方會宣佈，每個月減少買300億債（係之前速度double），到3月就會停止再買債，亦即係停止再擴張個資產負債表

10. 加息：預局方下年6月開始第一次加息，2022年加3次（好可能就係6/9/12），2023年再加3次。2024年應該再3次。然後收工。（埃汾按：咁即係9次，都不過係加到2.25%）

11. 通脹：預期下年2月見頂（同頭先經濟師估嘅差不多），下年大約4%，2023年3%（呢部份似乎經濟師估嘅回落速度快啲）

12. 上面呢個，係Bloomberg做嘅調整，反正都係嗰啲嘢，又係問差不多嘅一班人，照計同CNBC都差不多。不過特別留意兩樣嘢。第一，Bloomberg係直接對返晒聯儲局份嘢，例如個通脹就係PCE，CNBC堆友好可能係講緊CPI。第二，CNBC個調查，似乎係問啲經濟師覺得啲數字會點，而唔係問佢地「你覺得聯儲局會估幾多」。兩樣嘢幾唔同。Bloomberg呢個就明顯直頭係「你覺得聯儲局會估幾多」。所以我會拎嚟同真實嘅數字比。抄低佢

最新「點陣圖」同埋「經濟預測」

13. 嚟啦喎，出晒聲明了。首先，你可以睇下兩份議息聲明有乜唔同。有人幫你整埋。驚喜應該係冇乜嘅。當然係放棄咗「通脹只係暫時」嘅講法，講返經濟增長勁，物價升。

14. 至於收水方面，每個月減少買200億美債，減少買100億MBS（按揭抵押債券），總共每個月減少買300億，亦係在預期之內。

15. 另外，睇下最新嘅「點陣圖」同埋「經濟預測」，份嘢呢度。

16. 「經濟預測」方面，時間關係只睇median（都好夠），記住有埋9月嘅估計。紅色，GDP增長方面，同9月比，今年略為調低冇特別，下年係略為調高咗添，即係你可以話局方樂觀咗的，但2023年又調低返去到2.2%，似乎只係時間前後數字遊戲。橙色失業率方面，同9月比，調低咗今年同下年，都係樂觀。

17. 戲肉，萬眾期待嘅通脹。當然係大幅調高今年嘅數，但下年呢？只係略為調高少少。雖然局方放棄咗話「暫時」，但下年嘅PCE，都預只係去到2.6%。你見啲數，同樓上Bloomberg嘅差不多。

18. 最後，加息路徑啦喎。亦都唔算太意外，就係預返2022年3次，2023年又3次咁。不過2024年就只係2次。似乎係比街估嘅略為保守少少。

19. 「點陣圖」我反而放到尾，因為比較難睇。以上係今次嘅。當然我可以copy埋上次嗰個（呢度有），但會睇到你眼花。會有人整啲靚啲嘅圖，所以我就唔整了。如果想睇9月同12月嘅改變，實情你睇樓上嘅「經濟預測」都有睇到

20. 我唯一想講嘅，而又好少人會講嘅係，不同豆鼓間嘅分歧。2022年你見堆豆鼓佔咗4格，係咪？上次係3格的。但係咪分歧大咗？我會覺得唔係。因為，今次2023年佔咗5格，上次6格。2024年今次6格，上次係9格。

21. 結果？你話聯儲局一早引導市場又好，佢地跟返市場嘅預期又好，啲嘢都係同市場預期差不多，特別係收水速度。no news is good news，美股即時反彈返。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。