ivanliresearch

港股跌到below book，「唔通大鑊得過亞洲金融風暴同雷曼爆煲？」．In KS we Trust，長實1113日日增持，長和1日日回購．美股只靠幾隻頂住又如何？係咪之後一定唔掂？美股逢低買入七成機會賺錢．你嘅職場用語係咪太保守太被動？點解已婚男人高啲人工？ (Patreon)

Published:

2021-12-15 18:26:01

Imported:

2022-09

Content

快評兩句 — 港股跌到below book，「唔通大鑊得過亞洲金融風暴同雷曼爆煲？」

大師冇點你 —In KS we Trust，長實1113日日增持，長和1日日回購

每日一圖— 美股只靠幾隻頂住又如何？係咪之後一定唔掂？美股逢低買入七成機會賺錢

Good Read — 你嘅職場用語係咪太保守太被動？點解已婚男人高啲人工？

FB Post Summary — 識唔識個「柒」字點寫？

1. 寫嗰時係香港時間半夜，未出聯儲局啲嘢。陣間出埋會整多篇（希望夠時間）。所以唔講美股住（暫時跌少少），講下港股。

快評兩句 — 港股跌到below book，「唔通大鑊得過亞洲金融風暴同雷曼爆煲？」

2. 照計，港股當然繼續差。不過又留意返，港股已經跌到低過1倍book value．留意有時你計歷史定預期帳面值都會唔同，但如果呢個圖嘅，蘋果to 蘋果。你見真係每次去到1倍以下就反彈。唔通而家大鑊得過亞洲金融風暴，同雷曼爆煲？

3. 之但係，你諗深一層，都真係無嘢確定。我唔係陰謀論，亦唔係末日論。但我就當真係跌到0.8倍book，多20%，驚驚，但應該唔會有人話「冇可能」丫，係咪？

4. 你估下，如果跌到0.8倍，你又會點諗？你見我話「唔通而家大鑊得過亞洲金融風暴，同雷曼爆煲？」，但，如何定義大鑊？到時後人一樣可以講，亞洲金融風暴同雷曼爆煲都係多個地方出問題，央行出嚟齊心穩定大市。但今次係中資公司出問題喎，美國樂見其成，「對港股嚟講真係大鑊過亞洲金融風暴，同雷曼爆煲」。一樣講得通，係咪？

5. 唔好咁極端嘅，咁不如睇下2015年嗰次？照計你都唔記得嗰次跌乜。所謂嘅咩「大時代」「熔斷」。喂，2015年點都冇可能叫做「大鑊得過亞洲金融風暴，同雷曼爆煲」，但個估值一樣係跌穿雷曼底 —當然後來有唔錯嘅反彈係後話。

6. 講咗咁多，即係點？見底未？你應該知答案啦：「我答到你就發達」。但簡單啲答：我覺得係大機會見咗底的，我都係傾向相信呢個水平下跌空間好有限。

7. 但，當然冇叫你即時去大手撈底。點解？長期讀者一定知。因為五個字：「如果我錯呢」？

大師冇點你 —In KS we Trust，長實1113日日增持，長和1日日回購

8. 港股真係差，完全唔買嘅當然不用關心，甚至更開心。但我一路都有，甚至一路都有加（小小）。咁都真係見到，仲係可以跑贏大市。（都話睇HK4）

9. 但呢啲自high都唔係最大重點（咪又係輸錢！只係輸少啲之嘛），重點係我買香港股多，咁亦順手想講埋長和1同長實1113

10. 長實1113呢，呢個月李嘉誠又係不停咁增持（或者睇呢個網）。金額當然唔係好多，幾千萬幾千萬咁買，固然對佢嚟講係散紙 — 但話又不能咁講，佢唔係傻的嘛，幾千萬冇錯唔係錢，但你去問佢拎估下佢畀唔畀你？所以，用得落去，都係有啲理由。咩重組呀私有化嗰啲就唔好諗住，但佢都用自己錢，照計你都可以放心買（我都有每個月買少少）。

11. 另外留意埋，就咁增持，唔使出通告的。但你見不停講「回覆傳媒查詢」—你諗都諗到，係佢自己放新聞出嚟話畀人知啦。

12. 長和1呢，有小小分別，呢排係不停回購。3 月以嚟54次，回購咗12億，幾係嘢。咁回購就要出通告的。鍾意慢慢睇，或者睇呢個網。

13. 增持同回購有乜分別？回購就係用公司嘅錢，增持就係用大股東自己嘅錢，就有唔同。所以有啲人會話，增持先係真正信心表現。但，對於呢兩隻嚟講，我估個考慮只係邊間公司多閒錢啲。

14. 同樣地，長和1我都係有個個月買啲的。亦因為咁，我堆嘢係跑羸恒指不少的

每日一圖— 美股只靠幾隻頂住又如何？係咪之後一定唔掂？美股逢低買入七成機會賺錢

15. 美股只靠幾隻頂住又如何？係咪之後一定唔掂？ — 舊文講過美股嘅市寬market breadth 比較差，即係只係得幾隻公司頂住，而好多其他公司冇力，甚至創新低。傳統上好多人都覺得咁即係冇力，好快玩完。但係唔係？又好似唔係喎。你睇返圖入面，藍色係市寬，灰色係標普一個月跌5%嘅日子。咁係咪市寬差後，一定大市都差？又好似唔係喎。

16. 美股逢低買入七成機會賺錢 — 呢個圖好簡單，美股單日跌1%後，第二日嘅表現。咁多年嘅平均我懶計，但目測有近六成？如果只睇今年，19次單日跌1%，13次之後嗰日都升。68%機會，亦係2007年以嚟第三高嘅比例。但，當然只係參考。你應該知問題在邊。首先過去不代表將來。二來，你睇2012年？低過五成。但你又話，唔係喎，其他年份，次次都高過五成，即係贏多過輸喎。係丫。但首先，本身股票就係升嘅日子多過跌。另外，你只睇幾多幾多機會之後嗰日彈，但冇睇彈幾多嘛。即係可能跌完3%，彈0.1%，又跌3%。所以，唔係叫你一跌飛入去，只係畀你睇到呢幾年市況幾咁強。你反而可以留意，最高嗰兩年，係2007同2017—之後2008同2018，美股都要跌。

Good Read — 你嘅職場用語係咪太保守太被動？點解已婚男人高啲人工？

17. 你嘅職場用語係咪太保守太被動？ — 我覺得值得睇下。有禮貌當然係好事，但可能都聽過有時鬼佬覺得我地工作「太有禮貌」，唔夠自信。當然呢個亦係文化差異，自信同乞人憎有時亦係一線之差。文中講嘅嘢，應該大家好多都講過，作者教你唔使咁「客氣」。唔使Can we set up a meeting? Is that ok？直接同人講話想傾，問人幾點幾點得唔得閒

18. 點解已婚男人高啲人工？ — 呢個係好明顯嘅現象，睇圖見到。留意女性係冇呢個現象的。但點解會咁？係咪因為年紀唔同？但呢個圖畀你睇到任何年紀都係咁。係咪結咗婚有利你職場發揮？可能唔係。正路嘅估法，就當然係典型嘅「倒果為因」：唔係啲人結咗婚高人工，係根本高人工嘅人先會結婚。然後最新嘅研究講法係：結咗婚令你會搵到高啲人工嘅工作，唔係職場歧視，而係首先你更有動力搵工，另外亦都講話如果係結咗婚嘅，你就算冇嘢做，都未必會輕易求其搵份低人工嘅工。總之，一個好簡單嘅現象，背後可以有好多嘢。