星期三篇文照舊，但星期四篇文會提早出，要講聯儲局「點陣圖」同埋「經濟預測」．買咗隻歐洲股—Roche．但，三隻Roche，買邊隻？ (Patreon)

星期三篇文照舊，但星期四篇文會提早出，要講聯儲局「點陣圖」同埋「經濟預測」

買咗隻歐洲股—Roche

但，三隻Roche，買邊隻？

1. 今日只講兩樣嘢。第一個係都幾長嘅節目調動兼預告，星期三晚聯儲局議息，萬眾期待。當然唔只係睇縮表，而係睇「點陣圖」同埋「經濟預測」。第二，買咗隻歐洲股。

星期三篇文照舊，但星期四篇文會提早出，要講聯儲局「點陣圖」同埋「經濟預測」

2. 卒之叫做清晒啲嘢，呼。今日（星期三）會得閒返啲，但之後幾日又忙過。所以講定節目安排。星期三晚照舊會有文（有每日一圖嗰篇）。但星期四晚嗰篇，我好可能在星期三晚，或星期四朝早出埋。

3. 原因？首先星期四唔得閒。但仲有個更重要嘅原因：星期三晚聯儲局會完成議息。當然唔會加息（唔會咁刺激啩！！）。但，首先有可能宣佈收水—咁呢個都唔係最震憾。

4. 最特別係，同大家講過，聯儲局一年開8次會，每次隔個半月（當然緊急時隨時可以開）。當中春夏秋冬 3/6/9/12月呢四次，特別重要。固然冇話一定要呢四次先可以加息減息，你見2019年7月同10月都減過。但，3/6/9/12月呢四次，會有聯儲局官方嘅「點陣圖」同埋「經濟預測」

5. 平時未必好重要，今次就值得一睇。點解？因為較早前鮑威爾似乎「投降認錯」，認為通脹唔係暫時。咁好啦，局方嘅「點陣圖」同埋「經濟預測」，當然要改啦。當然係調快個加息路線圖，調高通脹預測。唔知乜嘢係「點陣圖」同埋「經濟預測」嘅，可以溫返上次兩篇文（呢度，呢度）

6. 問題係，有幾激烈？會係唧牙膏咁？Buy some time，睇下點先，睇多兩個月，如果仲係估得太低先再上調。定一次過好大幅咁上調？就十分好玩嘅嘢了。

7. 我個人估，如果只係微調，股市應該會有一定嘅沽壓，覺得佢唔夠果斷。反而如果大幅上調呢？可能係跌一下勁嘅，然後就好快收窄返。睇下我眼光如何？

8. 而我係估聯儲局會比較大幅咁上調的，既然都出嚟認咗衰，唔爭在啦，唔使再就住。

9. 由於係咁有趣嘅情況，所以我會想極速出篇文同大家講，唔等到星期四晚甚至星期五朝。

10. 提多一次，唔知乜嘢係「點陣圖」同埋「經濟預測」嘅，可以溫返上次兩篇文（呢度，呢度）。溫定書。

買咗隻歐洲股—Roche

11. 正如上次講，都係打算買多啲歐洲股票，剛剛買埋。呢隻之前都提過下

12. 好啦，今次買嘅係，歐洲藥股。應該留意到我近乎係冇醫藥股的，原因都真係……冇乜點解。可能因為唔熟個行業。但，唔通我又會好熟光刻機行業？

13. 仲有，應該好多人以為我諗疫苗股。錯，冇乜興趣。前景太不明朗，亦都有啲貴到飛天，太大起大落，既然唔識個行業，好難玩，就搵啲悶啲嘅公司。所以Biontech，Moderna等等，唔買了。

14. 中資嘅，更加全部唔睇。以前都唔睇，而家更加唔會。唔明之餘，仲要政策風險極高，從來都唔玩。台灣？唔熟。日本？照計有啲好公司，但之前都買落唔少日本股，之後先諗

15. 咁剩返邊啲？就係你估到了，最悶嗰啲公司，大藥廠。以下呢幾間。又即係好難去問我點解呢間有份嗰間冇份，唔好咁玩我。但呢幾間，真係藥廠，同Johnson & Johnson有啲唔同。留意個表入面啲數字，係用返公司自己嘅貨幣。有美金有英鎊有瑞士法郎

16. 首先睇最頂嘅兩間，英國嘢。AZN大家知，有做肺炎疫苗，但唔算佔好多，今年股價只係升10%，同富時指數差不多，舊年亦都冇點升過。

17. 反而今年係冇做疫苗（應該冇？）嘅葛蘭素GSK升得多。順帶一提，隻GSK 有成5%股息率的，過去5年都保持住，股價16鎊，一年派0.8鎊息咁。想買英國股嘅…….可能可以諗下？你睇啲估值，亦唔係貴的。

18. 然後下面，美國嗰兩間，真正大藥廠。輝瑞 Pfizer有做疫苗，默克Merck就口服藥—但始終兩間公司都好多其他嘢。輝瑞股價今年就升50%，幾好的，但唔係你想像中嗰啲升十倍廿倍，舊年仲要跌少少。默克仲要係股價連跌兩年的

19. 然後到我地嘅戲肉，歐洲藥廠，當然係瑞士。Novartis諾華細啲，但已經係瑞士第三大公司。Roche羅氏再大啲，瑞士第二大公司。最大邊間？雀巢，今篇唔討論住。而事實上，歐洲（計埋英國）最大嘅公司，係LVMH（已買），第二係雀巢，第三正係羅氏。

20. 諾華同羅氏點比？唔係行內人我都答你唔到。但你只睇股票嘅，見到羅氏估值貴啲啦。但今年嘅股價表現，當然係羅氏好啲，差天共地。五年嘅表現亦係咁。

21. 點解買羅氏，實情冇乜點解，龍頭咪買。悶嘢嚟的。當然夾硬吹水講理由，我可以話你知Softbank 入咗股，都50億美金，唔知佔幾多股權，但應該係2-4%咁上下，足夠做其中一個最大股東，因為啲股權好散的。另外，亦都可以講咩AI 大數據 嗰啲咁嘅嘢，但認真講，公司除咗製藥，在Diagnostics方面都好強

22. 數？都唔使點睇。悶嘢，增長唔大，但穩陣。

23. 估值？當然唔會平，差不多歷史新高。

但，三隻Roche，買邊隻？

24. 不過，仲有一個小問題，就係點買？去邊度買？

25. 羅氏係瑞士公司，瑞士上市。如果你有IB嘅，買到瑞士股的，但你見到都有兩隻羅氏。加上仲要有ADR。咁買邊隻？有乜分別？

26. 你問我，一般我係冇乜所謂的，不過慎防有人問，就解下。容許我再講一次，就唔好買咗呢隻又問做乜唔買嗰隻，實情一般都係各有各好的，市場有效率嘛

27. 好啦，講下你可以買嘅三種股票。就係表入面呢三種。列出嚟就明啦。ADR，咪美股買到（至少富途都得），另外兩隻瑞士上市，就IB之類先有。所以如果你冇IB，根本冇得揀（話時話IB係咪真係買到我都唔肯定，但至少有見到）

28. 而更煩嘅係，瑞士股佢都仲要兩種。ROG冇投票權，RO有投票權。冇錯，即係好似太古A太古B，或者Google Class A同Class C咁。

29. 首先我集中講瑞士嗰兩隻，因為除咗投票外，其他嘢係一樣的，派息一樣。咁你常識話畀你知，當然係冇投票權嘅ROG會平啲，有投票權嘅RO貴啲。（陣間啲圖你就認住個股價啦，記住有投票權嘅RO一定貴啲）

30. 之不過，係咪代表你一定應該買有投票權嘅RO？又好似唔係。個比喻好似，你件波衫有印字就貴過冇印字，但係咪有嗰件一定升得多啲？好似冇關係喎，睇你幾錢買賣啫。

31. 睇圖，今年有投票權嘅RO（股價貴啲嗰隻嘛）升27%，冇投票權嘅ROG只升18%，差距9%。咁但結論係乜？係咪有投票權嘅RO之後都跑贏？又好似唔一定喎。

32. 你睇五年呢？冇錯都係有投票權嘅RO升得多啲，但亦係爭9%左右—亦即係話，之前4年呢，應該係差不多的。二選一？我都答你唔到。

33. 然後加埋隻ADR，更加複雜。首先，係咪有人想問ADR有冇得投票？即係對應有投票權嘅RO定冇投票權嘅ROG？答案係……我都唔知，但我估係冇（原來公司有講，ADR係對應冇投票權嘅ROG的）

34. 咁然後，睇圖啦喎，ADR，今年大幅跑輸隻冇投票權嘅ROG（365瑞郎嗰隻）（然後呢隻又再跑輸有投票權嘅RO）。

35. 之但係，匯率嘛。實情瑞士法郎對美金，今年跌咗3%。計返入去，再計埋時差之類，可能分別就冇乜

36. 睇埋五年？又唔同喎，到ADR跑贏晒兩隻瑞士股！

37. 但當然因為，瑞士法郎過去5年，對美金升咗11%，但加返上去，好似都仲係隻ADR升得多啲？（記住ADR係對應冇投票權嘅ROG，365瑞郎嗰隻）

38. 結論？唔好煩啦。ADR算數。仲有，入場費係低啲的。當然仲有一個原因：我唔想又整多個瑞士倉（你見愛馬士LVMH我都係ADR）

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。