美股未驚過，港股冇好過。騰訊派息搞邊科？SPGI 同 蘋果創新高．第一次加息後，乜嘢公司跑出？美股跑贏，係咪因為企業盈利勁？2022分析員嘅標普指數目標價，十年嚟最大分歧，有乜啟示？芒格教你四個思考原則。沽空之王舊訪問。就係波動先要買股市 (Patreon)

快評兩句  — 美股未驚過，港股冇好過。騰訊派息搞邊科？

大師冇點你 —SPGI 同 蘋果創新高

每日一圖—  第一次加息後，乜嘢公司跑出？美股跑贏，係咪因為企業盈利勁？2022分析員嘅標普指數目標價，十年嚟最大分歧，有乜啟示？

Good Read —  芒格教你四個思考原則。沽空之王舊訪問。就係波動先要買股市

FB Post Summary — SPGI 一週年。 Nasdaq 100 檢討結果。

1. 容許我傷春悲秋一下，What can I say？呢個Patreon已經一年幾。記得舊年呢個時間，我在台北隔離中（因為搞居留證），過兩日就係我被炒一周年。如果唔係有呢個 Patreon，過去一年我應該好頭痕。多謝大家。

2. 我預感我2022年，將會更頭痕（私事，唔係投資失利），請大家繼續支持。

3. Anyway，週末出咗篇專題，講ETF，價值同增長ETF。一路我都話想指數ETF佔投資組合多啲，可惜好似自己都做唔到。但，即係尤伯連納都叫你戒煙啦。唔好學我咁得10% 指數ETF（但正如篇文有講，我買巨企多，又實情唔會同指數爭好遠的）。至於點解我會每個月買價值ETF？亦都係因為平衡返。況且仲有一個原因，每日一圖會講。

4. 我買個股，仲有一個好重要嘅原因：因為寫文。呢度又好，Facebook又好，乜都好。正如我好可能嚟緊星期二或星期四又會買隻股票，咁又順手寫篇文。我覺得係好事，上星期Costco都係咁玩（當然買完升就錦上添花）

5. 實情應該都係雙贏，首先有時買咗隻嘢，大家都會想聽多啲我點解買，或者了解下間公司。第二當然係呢排一路都忙到透唔到氣（至少去到2022），買完隻股票寫，對我係比較慳時間精力嘅

快評兩句  — 美股未驚過，港股冇好過。騰訊派息搞邊科？

6. 寫文時美股又回返啲，但上星期五先新高，你回返幾百點我真係完全唔會理。當然又話咩Omicron變種呀，又話議息呀，講真，全部都唔使點理。市場永遠好多雜音。

7. 至於港股嘅，不用多講。差？唔差的，平收之嘛。但夠晒令人反胃，已經唔記得第幾次係升轉跌，高位差不多蒸發400點。你可以想像你只買港股嘅，幾咁大件事。

8. 但你可以再諗多一層：唔通買港股嗰啲，就一早知會咁？當然唔係。你可以諗下，會唔會到有一日，美股會大跑輸？唔會？你點肯定？2000年後美股咪跑輸十年咯（當然冇港股咁衰嘅）。你要接受嘅係，好多嘢只係事後解，未來不可知，你只可以預備個組合，令佢在任何情況下，都唔好太過難睇

9. 最後，騰訊似乎忽然想派中期息。搞乜？真係唔知。奇怪之極。唔做啲無謂嘅陰謀論猜測，但叫我估，可能係有股東或管理層（記住係兩樣唔同嘅嘢，雖然好多管理層係小股東）等錢用，但又唔想沽股票。點解唔沽？可能係有合約限制不能沽，可能係因為股價殘得滯。

大師冇點你 —SPGI 同 蘋果創新高

10. 其他嘢寫得長，呢度只能快講。蘋果直頭講過，不重覆，不過留意好似就快3萬億市值了，邊個話巨企升得慢？

11. SPGI嘅，真係得意之作，剛好一年前買，升咗50%，我亦都一年前週未專題寫過。呢隻嘢完美示範我唔少信念：首先，我買嗰時都係歷史新高，但又如何？當時嘅新高，而家根本覺得係抵買。另外，我一買完，就跌10%，仲要個市升嘅。但我有冇自己嚇自己？有冇走去止蝕？冇。仲有，之後一路升，我都從來冇走去「食糊」。最後，呢隻嘢你見香港網友極少講，根本唔使跟潮流。

每日一圖—  第一次加息後，乜嘢公司跑出？美股跑贏，係咪因為企業盈利勁？2022分析員嘅標普指數目標價，十年嚟最大分歧，有乜啟示？

12. 第一次加息後，乜嘢公司跑出？—十分簡單，呢個圖整理返，咁多次加息周期，第一次加息前後，不同類別股票嘅表現。見到啦，加息之前，價值股一路跑輸。加息後都係，但到第一次加息後半年就會開始嚟料。所以我而家都買定啲價值股，咁當然，你可以話，「咁我等加息之後四個月先買咪仲好？」。祝你好運。

13. 美股跑贏，係咪因為企業盈利勁？—美股長升長有，當然係因為啲企業盈利都好勁，中國打擊科企後，最賺錢嘅公司更加差不多清一色係美國公司。但，都有個譜。你見之前咁多年，美股嘅盈利跑贏其他地方幾多，股價就跑贏幾多，相當公平。但而家呢？似乎脫咗節。冇錯盈利仲係跑贏，但股價跑出嘅幅度仲多。似乎美股真係偏貴的。

14. 2022分析員嘅標普指數目標價，十年嚟最大分歧，有乜啟示？—短答案，冇乜。留意個圖，係指嗰一年嘅分析員，對下一年標普指數嘅目標價，最高同最低爭幾遠。例如2022年（最右邊），分析員最高同最低嘅目標，爭20%，近十年第二高。有乜啟示？答案係：應該冇乜。如果齋理論嘅，個個嘅睇法差不多，先容易出事。但你見2016年嘅分歧最少，而2017年係升到七彩嘅。你鍾意可以做下相關系數，但你問我呢，根本佢每年嗰堆大行都未必一樣，好難有乜特別意義。

Good Read —  芒格教你四個思考原則。沽空之王舊訪問。就係波動先要買股市

15. 芒格教你四個思考原則— 芒格乜水？畢菲特嘅好拍檔。呢篇好似唔係講投資，但思考方法亦即係投資。我唔會一一細講，但我想特別講第二同第四。第二點教你：記得自己諗嘅嘢，然後到觀察到係錯，亦都記低佢。咁你先會知自己錯乜。否則人只會自欺欺人，「我一早都知點點點啦」。第四點，叫你凡事問點解。「你啲網友個個料事如神，點解未發達？」

16. 沽空之王舊訪問—雖然係舊文，但都值得睇。Jim Chanos 係奇人，因為佢真係沽空之王—冇錯，甚至唔係 The Big Short嗰幾件。而Jim隻基金，好似係只係做沽空的！好少見，但當然，唔代表佢係咩「淡友」，人地唔係長期沽空指數，係只係沽空啲貴得痴線，或者佢覺得係騙局嘅公司。佢成名作正係一早沽空Enron，仲有瑞幸咖啡同Wire Card．至於睇淡中國，就好似早咗幾年，唔知咩情況。呀仲有，篇文時，佢沽空Tesla—留意係2018年，相信之後佢輸得幾慘 —但，人地係會限制注碼的，唔會走去all in。記唔記得我講乜？「如果你錯呢？」。仲有，佢會做止蝕。「唔係喎Ivan話唔好」。唔同，因為佢係沽空，一隻股票可以升100倍，你沽空唔止蝕可以死得好慘。但你長倉嘅，你只能輸100%。所以唔該學嘢唔好學一半唔學一半，更加唔好聽一半就以為自己好叻。

17. 就係波動先要買股市 — 同另一篇文講嘅Price of Admission 好相似。世人對風險或波動嘅睇法好奇怪，升嗰時佢地就敢冒險，買發夢股，貪波幅大。但跌到九彩時，唔敢買了，「渣現金好啲」。殊不知邊有咁著數嘅嘢？你唔願意接受輸錢嘅風險，點解個市場要畀回報你？因為你好叻？有幾叻？呢篇文教你，唔好見到人地啲嘢跌就去抽人水，同樣地唔好因為自己啲嘢跌而灰心或者陣腳大亂，因為呢啲同贏錢係一個銀仔嘅兩面。You cannot win if you are unwilling to lose.

FB Post Summary — SPGI 一週年。 Nasdaq 100 檢討結果。

18. 當然出Facebook Post嘅時間都冇乜，呢兩個都係短Post

19. SPGI 一週年 — 費事重覆上面講過嘅嘢，但大家留意一樣嘢：我貼隻一日升7%嘅 Costco，妤多人like，仲好似有啲新讀者。呢隻一年賺50%嘅SPGI，冇乜人理。點解？實情你求其業績前飛入去，扑中一隻業績後升7%嘅股票，唔係太難—因為你扑唔中或者佢大跌，你可以唔貼出嚟（呢啲就係survivorship bias）。況且升完7%，唔等於日日都會咁升嘛！明明就係扑中一隻一年升50%嘅股票更難得更有用。教訓係乜？人都係短視。當然亦可能係因為Costco本身呢間公司多人識。

20. Nasdaq 100 檢討結果— 納指100執位，下星期一生效，詳情你可以去FB post睇返。新加嘅我有一隻，Airbnb．踢走嘅我冇一隻有，但隻Fox以前寫過係收購對象，今年表現一樣強。又，呢啲入指數有冇得炒？短答你：冇。但舊年明明Tesla入嗰時炒到飛起，點解我都買埋一份，都叫你買埋一份？因為Tesla嗰次真係好獨特嘅情況。舊文有講

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。