［2022 展望］增長ETF vs 價值ETF．IWF，IWD，VONG，VONV (Patreon)

引言：舊年嘅回顧同展望（趕時間可skip）

嚟緊幾篇展望（如有），都會寫ETF

跑贏指數好難，咁但點解仲要買個股？

過去十幾年，有幾個大趨勢。轉勢未？應該差不多？

過去十幾年，話自己係價值投資者，一定畀人恥笑

價值 IWD vs 增長IWF

講咗半日，到底乜嘢係「增長」，乜嘢係「價值」？

我唔直接答你，用例子答你

咁如果唔用例子，講定義呢？就睇返勞蘇1000指數了

點解我唔買VONG 或者VONV？

引言：舊年嘅回顧同展望（趕時間可skip）

1. 首先講返，上年年尾聖誕節後，我由台北返香港，在家隔離14日。而當其時我仲要畀人炒埋，加上舊年實在太經典（疫情爆發，股災，大反彈），所以我舊年係爆seed咁寫咗一連串嘅2020回顧。總共七篇，呢度第一篇，你可以去目錄搵埋其他。

2. 咁展望呢？反而我少做。因為，其實幾浪費時間。下個月信報月刊篇文我會寫點解（記得買，堅好睇，我講我篇文）。

3. 同好多人想像唔同，我認為「回顧」重要過「展望」好多，特別係讀者唔少唔係金融人，又未必係學院派（我兩樣都係），可能真係連股市點運作都唔知。與其信啲星座運程咁嘅「展望」，不如睇咗「回顧」先？

4. 真係展望嘅，2020年尾我寫過2021展望初稿，好似後來都冇再跟進。但反正都係我之後成日講嘅嘢。（但就算唔係亦冇關係，投資好似上山打獵出海打魚，地圖上有嘅路忽然冇咗，明明話冇野獸忽然跳隻熊出嚟，我當然改變計劃，你唔「轉軚」打倒昨日之自己嘅，等畀熊食啦）

5. 你最關心嘅係，我啲展望準唔準？我覺得還好。我話經濟實會好（中），買股票依然係好idea（當然），應該放返多啲重心去美股外（一半，講回報仲係美股好，但我唔會後悔咁叫你做，因為我都咁做），舊經濟股有啲機會（算中大半，標普指數跑贏納指），BigTech冇運行，中美都冇（中國中到應，美國唔中），二線科技股有運行（算中大半，當然睇你邊啲叫二線）

6. 除此以外，第一季我都做過小小回顧展望，仲有第三季都做過下。

嚟緊幾篇展望（如有），都會寫ETF

7. 咁今次呢篇係乜？唔係回顧，但算係展望。回顧當然要全年埋單先寫，但展望可以做定少少先。可能未來幾星期都會做，反正都多人問。

8. 而我呢堆展望，主要係會講：ETF

9. 年尾，大家最好自己睇下，你嘅投資表現。唔使答我，亦唔使抽我水。你睇下你副身家增長，有冇好過大市指數？

10. 正式啲計嘅，你應該美股同美股比，港股同港股比。港股固然好多股票都血流成河，但要跑贏恒指，絶對唔難。我就跑贏相當多下。原因好簡單：我近乎冇買大陸科技股，唯一一隻係騰訊，就係已經冇咁大件事嘅一隻，我仲要月供，拉低成本，而家都仲唔使輸錢。其他東西？我好少大陸股，除咗騰訊，就係平保（呢隻都輸），同埋只係中海外688同華潤置地1109，一隻升18%，一隻升12%．（詳細有乜，月頭週末專題有講，唔好又話冇講了，列晒畀你），都真係證明啲揀股有啲功力。

11. 咁但美股呢？因為我一路有買，好難計到，但都幾肯定，當然係跑輸指數的，但唔算好多。

12. 我想講一樣嘢：你真係有誠實計數嘅，應該發現，跑贏美股指數，真係相當相當難！

13. 下年嘅展望？我唔知會唔會都係好難跑贏指數，甚至難唔難，都好睇一個個人。但我可以好肯定答你，我嘅配置，會更加偏向ETF，少啲個股（但當然唔係唔買）。呢個係我講咗好多次嘅嘢。

跑贏指數好難，咁但點解仲要買個股？

14. 原因？既然跑贏指數咁難，咁不如買指數啦。我記得在本書講過，冇買嘅我話你知：你嘅投資，應該多數係指數ETF，一半，甚至六七成。剩返嘅？畀你自己過下癮。點解唔係全部指數ETF？因為你會好痛苦，同好難做到的，唔好勉強。正如地獄式減肥，你好快放棄，根本不可行，點都要有啲位食下甜品零食。再加上，買個股，你會學到嘢的。

15. 不過，我有口話人，又係咪冇口話自己？好似都係

16. 我粗略計過，你都可以估下，到底我嘅持倉，大約有幾多係指數ETF？（唔計隻Bitcoin ETF）．

17. 答案係：10%左右咋。嘩，你叫人買指數，自己先得咁少。

18. 當然實際上，你見我買親都係大嘢多，FAAMG呀，騰訊港交所友邦，所以雖然話得10%係指數ETF，但實際上唔會同指數爭好遠好遠。但如果你嗰90%係其他發夢股，就爭好遠。

19. 呢個算開場白，嚟緊呢排，週末都應該同大家講下不同嘅ETF。再講一次，有時好難話邊隻ETF最好，只能取捨。但好多人就係見邊隻之前升得多就買邊隻，實情係盲點。

過去十幾年，有幾個大趨勢。轉勢未？應該差不多？

20. 唔止講過一次，好多過去十幾年嘅大trend，我覺得就嚟轉勢。當然我好似舊年都咁講。但係咪會跌入年年講爆煲講到中為止嘅問題？又應該唔係。首先，我從來唔會all in 去買一個趨勢，正如我講咗好多次，好多其他人都唔明。但最重要嘅問題係：「如果我錯呢」？你見好多人真係唔諗呢個問題，以為自己一定啱。但，不妨照下鏡，睇下自己嘅往績，又有幾巴閉？記得謙虛少少。問下，「如果我錯」，會有乜後果。

21. 例如乜嘢大trend？過去十幾年嘅：低息啦，低通脹啦—但呢兩個係宏觀嘢，你好難直接trade．咁講股票呢？美股跑贏全球啦，大企跑贏細企啦，仲有增長跑贏價值。

22. 人係相當短視嘅，特別啲小朋友，炒股票嗰一兩年，頂多三五七年，咁當然以為近七年發生嘅嘢就係永恒。但再遠啲呢？美股之前跑輸十年，又冇人講？

過去十幾年，話自己係價值投資者，一定畀人恥笑

23. 我今篇文想講嘅，係「增長跑贏價值」，過去N年嘅真理。但會唔會逆轉？有機會的。你見之前感恩節美股已經走咗一次火警，今年好多發夢股都死晒。當然，發夢股唔係等於增長股，你可以當係極端槪增長股，普通增長股暫時都似乎仲係跑贏價值股。

24. 我會講價值ETF同埋增長ETF，會以IWD（價值）同 IWF（增長）為例。咁當然唔止呢兩隻，但唔好不停問我點解講呢隻唔講第隻，否則我講到2047都未講完。

價值 IWD vs 增長IWF

25. 好啦，先講下今年，你見到，增長IWF（黃色）升28%，當然跑贏價值IWD嘅22%，但唔算好多，而價值（藍色），冇你想像中咁失禮。

26. 但即使係過去一個月，所謂「殺估值」，見到隻增長IWF，都仲係跑贏價值IWD嘅。正如我上面講，「發夢股」並不是等同於「增長」。

27. 無論如何，近期我都開始月供價值IWD。原因好簡單，平衡。至於你話「增長」又點？實情唔使。一來我本身已經渣住好多增長股，二來，根本你買SPY亦係增長股為主，QQQ更加唔使講

講咗半日，到底乜嘢係「增長」，乜嘢係「價值」？

28. 不過講咗半日，到底，乜嘢係「增長」，乜嘢係「價值」？呢個最簡單嘅問題，偏偏好多人唔理。

29. 唔好同我講咩「今年佢100倍Price to Sales 但只要之後收入升1000倍咁都好有價值」，我不否認用呢啲公司，亦都唔係唔買得（如果真係交到增長）。但搞清楚，即使係咁，你都不能叫呢啲係「價值股」

30. 語言係用嚟溝通嘅，唔好「你覺得」，否則你同我同埋其他人，根本唔係講緊同一樣嘢，點溝通？正如你不能同我講，「我覺得Tesla仲有一千倍增長空間，所以仲係small cap」，我唔挑戰你嘅預期，實情我根本不用挑戰—因為即使真係佢仲有一千倍增長空間，佢都唔係small cap嘛大佬！人地有定義架嘛。未必有時好清楚定義，唔同媒體或機構嘅定義亦有不同（可以參考何謂「新興市場」舊文），但總有個譜。你不能話「我覺得」美國係新興市場。

31. 我亦想講下，好多外行人，係望文生義嘅。有一段好長嘅時間，好似「增長」就係好，突破，偉大發明，改變世界，有型。「價值」就係守舊，廢老，食老本，阻住地球轉。 正如個個講「新經濟」就係好，「舊經濟」就係差。殊不知，呢啲詞根本係中性的。

32. 呢十年，你話自己係價值投資者，真係畀人恥笑。（不過話說回頭，ARKK輸到仆街，回報差過買恒指，而巴郡就跑贏標普指數，實情邊個話「增長」「新經濟」就巴閉啲）。但後生嘅又唔知，之前十幾年，又一樣好大段時間，個個都自己係價值投資者啫。

我唔直接答你，用例子答你

33. 講到尾，乜嘢係價值？乜嘢係增長？固然有定義，但我地不如唔睇定義，睇例子。正如我同你解，乜嘢叫「快餐店」，未必要定義，我畀幾個名你咪知。

34. 又係我地嘅老朋友，ETF.com。你可以睇下，增長IWF，同價值IWD嘅profile．

35. 留意兩隻都係BlackRock嘅（記得買BRK），出生日期都一樣，fee亦都係0.19%，極低。AUM呢？估都估到係增長IWF大啲，一來跟紅頂白吸金能力高，二來亦因為啲嘢升得多嘛。但兩者AUM冇你想像中爭咁遠，成交亦差不多

36. 但你應該最關心嘅，係佢地十大持股。一睇就明。

37. 增長IWF渣嘅嘢？Oh My God，知唔知有乜特別？五隻Big Tech（Google佢仲要有齊兩個Class），Tesla，Nvidia，VISA — 頂，九隻埃汾個US4都有呀，死未。「就係爭在Home Depot」．然後佢呢十隻嘢，仲要佔咗差不多一半。

38. 咁你明白個情況了：根本我本身咪就係增長啲增長股咯！咁我點會仲買增長股ETF？我亦都打賭，你地個個都係成手增長股，應該仲多過我，因為你地仲有發夢股。仲有，亦都解釋到，點解所謂「殺估值」，隻IWF都仲咁強 — 因為佢好多係Big Tech呀，唔係你嗰啲發夢股

39. 咁再睇，去到價值IWD．見唔見好大分別？首先你要留意嘅，佢十大持股夾埋都只係17%，同增長IWF好唔同，因為後者啲Big Tech係巨獸。

40. 另外，呢十大持股，你地有幾多人有？

41. 我有嘅，都只係兩隻，就係JP Morgan（今年幾好），同埋迪士尼（今年好差）。有諗過有提過嘅係Johnson and Johnson同P&G，Pfizer係咁意提過下。而我估你地冇人會買巴郡（我有一期想買的）

42. 睇完好明顯，買價值IWD，會分散到我現有嘅嘢。況且價值IWD入面，亦都夠晒散，唔似增長IWF咁，「其實咪同QQQ或者FANG+差不多」

咁如果唔用例子，講定義呢？就睇返勞蘇1000指數了

43. 最後，如果唔用例子，真係講定義，你都會睇到咩係價值，咩係增長。

44. 你睇兩個ETF嘅profile就睇到。增長IWF就係大企（但唔係必然，只係咁啱呢N年巨企都係增長股），高PE，高Price to book，低股息率，仲有留意渣嘅公司少好多。價值IWD呢？當然相反，不過原來23倍PE 2.7倍book 1.6%股息都已經係「價值」，睇到美股有幾咁貴。

45. 詳細嘅，你可以自己睇。可以話你知，增長IWF 追嘅，係羅素1000增長指數。價值IWD追嘅，係羅素1000價值指數。指數點選股？有一大堆定義。你想睇嘅，慢慢，又冇你想像中咁難明嘅。第25頁，Determining Style

46. 我唯獨想你留意嘅係：兩個指數，實情都係mid and big cap，所以你見出嚟都係啲熟口熟面嘅名。如果你想買small cap ，就要另外搵嘢，亦好可能係下星期我講嘅嘢。

47. 仲有，就我粗淺嘅理解，Value佢就睇Price to Book，而Growth就睇歷史同預測嘅收入增長。亦即係話，理論上，一間公司可以入晒兩個指數的！根本唔係黑白二分。

點解我唔買VONG 或者VONV？

48. 最最最後，實情，Vanguard 亦都有兩隻ETF，追踨呢兩個指數。VONG就增長，VONV就係價值（個人覺得個名好記過IWF IWD）。如果我冇睇錯，Vanguard係遲推出嘅，當然係以平取勝，其他嘢差多一樣。但你又留意下，似乎又唔係搶到好多AUM。

49. 當然你睇回報，Vanguard 嗰兩隻嘢，略勝少少。但見到成交係比較少。當然對我同你嚟講，應該冇乜分別，所以我唔反對你去買VONG VONV，但對我嚟講，買開IWD就繼續吧，分別真係太細，費事個倉越搞越複雜。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。