通脹40年新高 標普指數照樣歷史新高。蘋果 Costco歷史新高！王維基1137 最新數字（有Excel）。奧地利百年債券搵笨唔搵笨？通脹係咪買資源股？Twitter 換CEO不如換埋賺錢模式啦。點解電影對白越嚟越難聽？ (Patreon)

快評兩句  — 通脹40年新高 標普指數照樣歷史新高。

大師冇點你 —蘋果 Costco歷史新高！

大師冇點你 —王維基1137 最新數字（有Excel）

每日一圖—  奧地利百年債券搵笨唔搵笨？通脹係咪買資源股？

Good Read —  Twitter 換CEO不如換埋賺錢模式啦。點解電影對白越嚟越難聽？

FB Post Summary — 美國通脹40年新高。Costco新高啟示。Peloton公關災難

1. 我想講都係比較忙，近排甚至壓到透不過氣。文當然寫到，但只係有時要遠離個市場，所以我休息咗一日（！），唔睇股票嘢。今日先出返呢篇

快評兩句  — 通脹40年新高 標普指數照樣歷史新高。

2. Facebook都講咗些小，留意美國11月CPI按年升6.8%，呢個升幅係1982年最高，仲要高過預期。但之前拜登已經放晒風，期望管理，美股星期四已經消化咗，反而星期五照升，標普指數仲要創歷史新高，吹咩？再講一次，唔該你了解下個世界點運作。唔係好明都唔怕，但至少你要知道：好多人係唔識，但又要扮識。

3. 事實上，感恩節太平賣後，話咁快美股又新高。上星期仲要係2月以嚟最強嘅一個星期，指數升4%。今年美股個個月都創新高！全年67次。今年你都話輸錢或者冇乜錢賺嘅，真係檢討下，因為到個市再難玩時，你會更慘 —而肯定股市唔會每一年都咁好。

4. 今年都唔掂，以後點算？唔係怪罪你，而係睇下自己點解跑輸好多，對症下藥。如果發現自己揀股都係揀親都出事嘅，咁咪唔好成日自作聰明，買大股甚至買指數算。如果發現自己啲時機好差嘅，咁一樣，你咪個個月買算。跑輸指數唔可恥，我都跑輸（但唔係太多），最緊要認清自己。

5. 又係最悶但最work嘅嘢：Stay invested，分散，唔好亂咁又止蝕又止賺，唔好成手都係發夢股，唔好同個指數偏離太遠。但我發現真係好多人都唔會聽。

大師冇點你 —蘋果 Costco歷史新高！

6. 真係冇點你啦啩。日日貼蘋果新高又有人不滿，又話升得慢，又話唔好只係貼啲舊嘅嘢。咁你想我點？每日買一隻新股票？實情我已經買咗好多唔同股票！都有啲係因為要寫文。包括 Costco

7. 講返Costco，星期四成篇文都係講佢。第二日就升7%創埋歷史新高。拿，唔好又話只係寫舊嘢啦，新嘢啦！一買完就升7%仲新高，你仲想點？

8. 但我知你心中諗乜：邊跟得切。冇錯係跟唔切的。嗰日我半夜四點半先買，買完出埋文，到星期五晚一開已經升啦。

9. 不過我想你認真諗一樣嘢：我係咪啲升完7%就沽咗佢嘅人？梗係唔係啦。一向我都差不多只買不沽。就算沽，我都話至少睇升1倍。再再起碼都睇四五成啦。升咗7%仲追？咁到底100%回報，同93%回報係咪有分別？（OK，實情107蚊買200蚊沽係87%唔係93%）

10. 仲有一樣嘢，我想你諗下：買完出業績，就升7%喎，仲要新高。我當然在Facebook 也文也武。 因為我知道吸到新讀者。但我想你諗下：點解個個都會為買完即升7%興奮？我貼隻 升幾倍嘅，反而冇乜人有反應？睇唔睇到乜？人都係冇耐性的。但都話買得股票睇佢升一兩個開啦，7% 真係nothing，雖然，跟我買咗嗰個讀者，一日嘅升幅夠佢交兩年 Patreon了（佢在加拿大，所以跟得切我個trade）

大師冇點你 —王維基1137 最新數字（有Excel）

11. 仲有，王維基1137，又再出咗最新嘅數。我已經幫你入埋，Excel在Attachment有。之前出盈警，我都有提過佢地啲數一路麻麻地，但當然估唔到咁差。咁盈警入面提到話大增推廣費用嘛，但最新嘅數字又得唔得？都係麻麻地。教埋大家，如果你只睇一個數字，當然唔係睇訂單數字（丁屎咁細張單有乜用），又唔係睇訂單嘥屎（得兩張有鬼用）。應該睇GMV，而且睇Daily Average，因為唔同月份嘅日數唔同。仲有，一般睇按月，之後先睇按年，咁見到按月都係跌嘅。唯一少少欣慰係：而家做咗公司全年GMV目標嘅90.3%，仲有一個月，但12月當然係GMV高嘅月份，睇下有冇機會全年達到標

每日一圖—  奧地利百年債券搵笨唔搵笨？通脹係咪買資源股？

12. 奧地利百年債券搵笨唔搵笨？ —四年前，奧地利發咗隻國債，100年後先到期，2117年，夠晒痴線。首先，視乎你點定義「奧地利」，但至少佢「獨立」，唔係奧匈或德匈，都只係大約100年，共和國更加係60年咁上下，居然發100年嘅債。另外，得嗰2% 息！呢個充份見到嗰時嘅低息環境。咁見到呢排債息升返啦，但，隻嘢，過去四年，都仲係升咗50%！你仲要收咗8%嘅息（每年2%）。你以為買債好悶冇回報嘅，think again．

13. 通脹係咪買資源股？— 個圖話畀你知，肯定唔係。勉強2020年資源股嘅價格都跟得上商品價，但今年好多都香晒。原因？好多。首先又係估值，二來對家都會壓你價，三來價貴咗人地可能用少咗。四來：如果你真係好睇好資源價，理應直接買商品。正如睇好樓市當然買樓，睇好比特幣就直接買，而唔係買啲相關股。

Good Read —  Twitter 換CEO不如換埋賺錢模式啦。點解電影對白越嚟越難聽？

14. Twitter 換CEO不如換埋賺錢模式啦— 呢個作者都出名，但我未睇佢篇文前，已經有一樣嘅想法兼寫低咗！英雄所見樂瞳呀下。Twitter係一間好奇怪嘅公司，你可以話係一間令人失望嘅公司。因為上手CEO Jack Dorsey任內，雖然月戶都有唔錯增長，但佢嘅收入同盈利都係低得可憐。呢間公司嘅社會影響力，接觸嘅人，比得上Facebook，但你睇下收入盈利爭幾遠？咁當然係CEO嘅責任。但，既然賣廣告唔得，不如試下……收錢？我知，Network Effect，收錢嘅Social Media一定好趕客，甚至好多係分身或者Bot。但，用戶實在太多，你走三份一甚至一半人，都仲有唔少人。況且公司嘅收入實在太低，而家一個月ARPU兩蚊美金—即係我一個月收返你一兩蚊美金，對公司收入已經大大幫助。

15. 點解電影對白越嚟越難聽？ — 留意作者係native speaker 角度，都話成日要睇返字幕先知對白講乜。唔係啲對白入面用嘅字深咗，而係直頭技術性地，native speaker都聽唔到啲人講乜。即係你見幾廿年前啲戲，唔使睇字幕都聽到對白的。原因？好多。但首先有時係故意嘅，有啲導演特登整到咁。亦都有技術上嘅原因。亦都因為而家啲人好似冇乜所謂。但仲有亦同演員有關，以前好多係正統舞台劇出身，對咬字準確要求好高，而家嘅訓練唔到。我估以上嘅現象，你睇港產片或聽廣東歌都會係咁

FB Post Summary — 美國通脹40年新高。Costco新高啟示。Peloton公關災難

16. 美國通脹40年新高 — 應該重覆咗N次，但唔該，戒掉你嘅直線思維。股市同個市界唔係咁運作。唔係 通脹 — 要加息 —影響企業盈利/discount rate 升 —股市仆直咁直線的。記住，就係炒預期，而今次數字超預期，都係一早預期（反正拜登早一日已出嚟通水）。同場加映，好多公司大把加價空間，NetFlix下個月加價十蚊你係咪唔睇？係咪入返戲院？

17. Costco新高啟示— 一樣，我要不停重覆嗰句：我係咪要XXX先可以買XXX？Facebook上有人以為呢啲叫小器，絶對唔係，冇畀錢嘅讀者我真係理都廢事。我不停重覆呢個句式 — 因為真係好多好多人嘅盲點。佢地以為自己「認識」間公司，而我「唔識」。但，Costco班收銀發達未？咁了解間公司，點解唔一早買股票？麥當勞呢？Walmart呢？你畀收銀嗰啲更了解間公司？又，乜嘢叫「了解」？

18. Peloton公關災難 — 絶對係是日推介。Peloton在Sex and The City做植入廣告，但好似話冇畀錢（冇畀錢都有得植入？）。結果，擺明係 SATC玩佢，部健身單車變咗殺人兇器，Mr Big踩完就死埋。而Peloton當然創52星期新低。同場有講埋呢隻股票，有幾巴閉？估值呀。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。