ivanliresearch

我又再買股，Stay 100% invested．但我唔係歐洲日本香港。繼續美股，仲要唔係特別平嘅價值股．我使唔使去過好市多先可以買Costco？1倍price to sales！「咁咪好抵」！廣告—請用我嘅referral code開富途： 9M85BY4D (Patreon)

Published:

2021-12-09 22:50:30

Edited:

2021-12-09 23:24:26

Imported:

2022-09

Content

我又再買股，Stay 100% invested

但我唔係歐洲日本香港。繼續美股，仲要唔係特別平嘅價值股

我使唔使去過好市多先可以買Costco？

1倍price to sales！「咁咪好抵」！

廣告—請用我嘅referral code開富途： 9M85BY4D

1. 早兩日寫過以上嘅嘢（費事貼字呃字數），呢兩日情況都差不多，但好咗少少，叫做差不多清理晒呢幾日嘅email同newsletter，不過可能都係寫冇咁貼市嘅嘢，反正市場波幅唔大，大家又可以轉下口味。同埋，一波未平一波又起，又有其他嘢忙

2. 同埋，「蘋果又新高了」

3. 今次成篇文只係寫一隻股，幾乎想放週末專題

我又再買股，Stay 100% invested

4. 可能會有人覺得矛盾，一方面我覺得股票貴，特別係美股。歐洲股呢？好少少，但比較鍾意嘅公司都幾貴。港股就固然廢，咁日本就好過港股些少咁大把。大約係咁。

5. 但，結果我都係繼續買股票，最新買嘅都係美股，仲要係比較貴嘅美股。（雖然平同貴有時唔係咁易定義）。

6. 解釋下先，點解繼續買股票，就不難解釋，都話100% invested，呢個月有剩錢，當然就再買股票。照計嚟緊仲會買多隻。

7. As long as我唔係借錢，有錢拎去買股票，我覺得非常安全嘅。反正持有現金最搵笨。買債都反而仲好少少，舊文每日一圖寫過，表現冇你想像中咁悶

8. 況且十個有十個咩「等機會」買嘅，最後都係等等等，錯失晒啲機會。跌嗰時又係唔敢買（撫心自問：早排嘅小調整，指數都跌超過5%，好多股票跌10-20%，你又有冇飛入去？），升又唔敢買，最後拖拖拖，end up就係拎住一舊大錢，錯失晒升浪，然後啲嘢升到好多時卒之忍無可忍 — 一嘢瞓入去摸項

9. 我懷疑呢個就係唔少人嘅寫照 —正如我每次都好奇怪，點解唔少讀者會話我知，手頭上拎住幾百萬現金，而家買唔買股票/買乜好 — 點解你會拎住幾百萬現金？如果係賣咗樓呀，touch wood繼承咗遺產呀，或者中咗六合彩就話啫。如果係之前一路都唔投資嘅，要反省下，想法係出咗啲問題。

但我唔係歐洲日本香港。繼續美股，仲要唔係特別平嘅價值股

10. 我買股票好合理，咁但，點解要買美股，仲要係呢隻唔多平嘅美股？就有啲獨特啲嘅原因了。正路我應該係買歐洲股，或者啲冇咁貴嘅美股（雖然都冇乜邊間真係平），例如咩Johnson and Johnson．P&G（之前都新高）或輝瑞（Pfizer）呢類舊經濟股價值股。但總之，end up我買咗隻唔係特別平嘅美股。「下次先買歐洲股或平股」

11. 點解？因為……兩個原因。首先，隻嘢今日會出業績。冇錯，出業績前半個鐘我先飛入去。知唔知呢啲叫乜？叫做驚執輸，FOMO，Fear of Missing out．我見隻嘢未算極好貴，但若果業績後大升，可能我就唔敢追。係喎，我都係人，都會有呢啲心理障礙。「咁如果你買完後，業績差，大跌呢？」。冇架，坐咯，長線投資嘛，咁加上我對公司有信心，唔只係炒一次業績。（結果似乎業績唔錯嘅，但冇大升）

12. 但仲有第二個原因：因為，我要寫文。呢個真係不方便嘅真相，但因為呢隻嘢幾有趣，我反正想買，呢排又冇乜好題材，咪買完，就可以寫！

13. 你諗落都幾化學，我因為寫文而買隻股票。咁但首先都要我鍾意先嘅。但，可以在呢度寫，都係一個因素。

14. 最後我想你留意嘅就係：上面我寫晒我心路歷程。下面都會再寫。記唔記得我提過大家，要做trade log？我本書都有講。或者更廣泛地，你嘅人生（唔止係投資），應該做多啲Journaling　—唔一定好似我咁打成千字，唔一定係寫日記咁formal，你鍾意嘅錄音拍片都得。但記得自己嘅想法，以後再拎出嚟睇。咁你諗下，最後你成功或失敗，係因為咩原因？係咪最多想法錯咗？定冇錯只係執行差？定運氣唔好？定你想法變咗？

我使唔使去過好市多先可以買Costco？

15. Anyway，寫完一大輪，開估。我買嘅係，Costco．

16. 如果北美讀者唔會陌生，公司其實有唔少海外分店，但香港冇（台灣有唔少，大陸開咗兩間）。某程度上，正係因為剛剛蘇州開店，三點排隊救護車待命。然後之前有人去上海店假裝在LA。咁我對背後咩媚唔媚外之類冇乜興趣討論，亦唔係因為咁就代表公司生意好好（但有一定軟實力！），只係呢兩單新聞令我再想起一路想買呢間公司。

17. 寫到呢度，剛出埋業績，似乎不錯，但股價反應唔算太大。

18. Costco係一間幾奇怪嘅公司，唔熟嘅，咪會覺得，扯，超級市場咯。但佢最特別嘅係「會員制」。咁你心諗，斬多筆啫。

19. 然後你可以睇下數字（唔係剛剛出嗰份，係上一季嘅數字，亦即係全年業績，8月年結）：會員費，只係佔佢地收入2%不夠—但，貢獻晒所有盈利咁滯。換句話講，根本佢嘅「賣嘢」「本業」，近乎係蝕錢嘅

20. 講白啲，就係靠呢啲會費去補貼，然後令到啲嘢平到一個對手冇可能做得到嘅價。況且，會費應該係預繳，早早硬堀你，亦唔會有數期。錢就拎咗你先。

21. 正路地，啲會員嘅忠誠度相當高，一般嚟講係啲有時間又唔係太有錢嘅人。未係最窮嘅，但肯定唔係最高收入嘅人，我估係低端中產，仲要大家庭。咁通脹下，會費當然都會升，但照計啲客更加斤斤計較，更加覺得Costco抵玩，至少畀完一筆就唔使再怕加價（一年內）

22. 又，發唔發現有啲熟口面？冇錯，Amazon某程度上都係咁玩法。一樣係拎Prime membership fee，同埋壓到個售價低無可低，蝕住做，你點同佢競爭？（但Amazon仲有AWS養住）。

23. 我第一次聽到呢個business model，係幾震撼的。心諗咁都得？但真係咁都得。好好嘅例子：創意可以好簡單。

24. 但又不過，創意唔係一條絶世好橋就搞掂，創意亦係overrated，至少在商業上一定係。Costco仲有好多古靈精怪嘢的（例如熱狗），早就係商業教材，唔係話你抄到條橋就得，仲有好多細節嘢，執行上嘅嘢。

1倍price to sales！「咁咪好抵」！

25. 好啦，仲有一樣嘢，就係估值。睇返上面個圖，公司一年1959億生意，市值呢？2317億。喂，1倍price to sales？「咁咪好抵」！咁但，就梗係冇咁簡單啦。

26. 因為你大約都feel到，公司啲「收入」，好多係貢獻唔到盈利，甚至係蝕錢嘅。賺到錢嘅係嗰1%嘅會費收入，其他賣嘢近乎係白做。咁你嗰啲數真係要幾大有幾大的，蝕住賣咁滯喎。

27. 咁所以，市場自然會幫你「discount」．亦因為咁，你不可能將唔同行業嘅公司拎嚟比Price to Sales的。最顯淺嘅講法，大家profit margin唔同

28. 舊文都寫過（拿，環環相扣呀！！！！），見唔見同樣係Big Tech，Amazon嘅Price to Sales特別平一大截？亦係同樣原因。你見佢生意大，但利錢細。同樣原因亦解釋到微軟Price to Sales特別貴。

29. 咁所以，講到尾，應該睇Price to Earnings ？其實係的。冇盈利嘅收入，就冇乜用嘅。當然好多嘢蝕錢都炒到飛起，只係啲友幻想有一日會相當賺錢。咁真係嘅咪好（例如NetFlix同Tesla），唔係嘅咪恭喜你。

30. 但又，正如FB篇蘋果文講（拿，環環相扣呀！！！！），投資金句：Successful investing is having everyone agree with you………..later。重點係later．咁永遠係多數人唔信，覺得會死嘅嘢，如果唔死，就會贏到笑。你買NetFlix同Tesla就係。相反，例如Facebook，一上市大家都知係好勁好勁，咁當然後來都係勁到超出你預期，但唔係嗰種一度以為要爆煲嘅公司，咁就唔會話係升幾百倍咯。

31. 但當然要扑中呢啲嘢，你要好有眼光，仲要好大膽色。肯定唔係啲20%止蝕30%止賺嘅人買得到。