恒大違約又如何？中概股算係回穩．蘋果新高。理文化工亦5日新高。新興市場走中國一樣係跑輸。歐洲邊個主要股市升幅比得上美國？未來職場就係「訂我吧」。歷史上嘅投機狂熱。 (Patreon)

快評兩句  — 恒大違約又如何？中概股算係回穩

大師冇點你 —蘋果新高。理文化工亦5日新高。

每日一圖—  新興市場走中國一樣係跑輸。歐洲邊個主要股市升幅比得上美國？

Good Read —  未來職場就係「訂我吧」。歷史上嘅投機狂熱。

FB Post Summary —  蘋果新高迷思。15星連珠。

快評兩句  — 恒大違約又如何？中概股算係回穩

1. 快講下，恒大都係醜婦終需見家翁，過得初一過唔到十五，預咗啦，應該真係會違約。但有冇留意星期二港股係大升嘅，星期三亦係窄幅上落。又再畀你睇到，股市炒預期，到真係發生時，已對市場似乎冇乜影響。

2. 港股嘅，星期二彈完一日就冇貨賣，星期三都係差，亦同我之前預計嘅差不多。寫明話唔堅實，你見阿里巴巴星期二仲要跌5%，而微博一上市亦要潛水。當然你樂觀啲嘅，亦可以話至少冇跌返幾百點，而如果唔計阿里巴巴，實情大市其他公司冇咁差。但亦留意返，成交縮到1200億都冇。

3. 美股方面呢，算比較靜，反覆回穩咗。

4. 我嘅US3倉表現不錯，亦見到部份之前跌得相當多嘅股票有反彈。

5. 另外，中概股叫做個別發展，冇之前咁恐怖了。阿里巴巴個價係仲高過香港收市的。

大師冇點你 —蘋果新高。理文化工亦5日新高。「咁而家仲買唔買得？」

6. 蘋果又新高啦，講真我都估唔到咁強。我強烈建議你睇我Facebook 篇文（蘋果新高迷思），下面都會再講。我知，你最關心嘅問題，一定係而家買唔買得。但不如反省下，點解之前你又唔買？你又拎咗啲錢去買乜？點解永遠係啲嘢郁咗你先想買？又或者係其他嘢輸咗錢先受教訓？仲有幾多錢幾多青春去輸？（又，所以投資真係趁後生好，因為個本細，而時間又多）

7. 另外，講完理文化工後，都叫做連升兩日彈返8%咁。呢隻就真係可以答你：未買嘅唔好買。買咗嘅呢？照計絶大多數情況你都贏錢，我大半年前寫時係3個幾，當時都冇諗到可以升咁多。但使唔使take profit（如果未沽的話）？你知一般我都認為唔使take profit，但呢隻亦好早講明唔係可以長渣嘅嘢，始終週期嘢。但我覺得可以再渣耐少少，等下佢有冇機會出盈喜，甚至出埋業績，即係下年3月或4月，但出埋應該差不多要走，到時再睇。又或者你可以去望住啲三氯甲烷價格（似乎早前係急跌嘅）

每日一圖—  新興市場走中國一樣係跑輸。歐洲邊個主要股市升幅比得上美國？

8. 新興市場走中國一樣係跑輸— 港股就固然差，中國股市亦都麻麻地（但好過香港！）。不過，新興市場走中國又如何？之前舊文介紹過隻EMXC，好多讀者好興奮。但係咪表現好？實情麻麻地，年初至今只係升7%。唔好話跑輸美股，甚至同歐洲比都係麻麻，證明新興市場大跑輸，並唔止係因為中國。仲有記住，唔好只睇指數，漏咗匯率（EMXC嘅回報就計埋匯率）。留意呢個圖正係EMXC個指數，但唔係指數表現（冇跌得咁勁啦！），而係相對全世界嘅表現。咁你見到，今年係持續跑輸嘅

9. 歐洲邊個主要股市升幅比得上美國？— 最多網友熟悉嘅當然係英國，歐洲最大嘅經濟體系就係德國，兩地股市表現今年還不錯，但當然比唔上美國。比較接近嘅？法國（愛馬士 LVMH L’OREAL）．但再強啲嘅？荷蘭。多得邊間公司？當然係ASML，應該係歐洲表現最好嘅藍籌公司，而我之前已經買，你話有冇眼光？又，仲有隻Adyen都勁，應該都有讀者識，做 Payment的。阿姆斯特丹交易所，好大程度就受惠於英國脫歐了。唔止指數升得好，連集資額都大的。

Good Read —  未來職場就係「訂我吧」。歷史上嘅投機狂熱。

10. 未來職場就係「訂我吧」— 唔算好特別嘅文，但寫得淺。講下啲Content Creator生態改變（包括我），相當詳細。最初當然係純為有型過癮拎名氣，但後來就係免費平台（FB Twitter IG）上拎廣告收入，但再之後？就直接付費，即係你而家做緊嘢。但呢個模式有乜問題？人地分你一份就固然，但仲有好多時會限制咗你嘅內容，例如OnlyFans之前彈弓手，原本可以貼鹹嘢，後來又唔得，之後又得。Patreon亦都禁過某啲政治觀點。講到尾，你倚賴平台，當然就有問題，所以好多人想去中央化。又，篇文冇講嘅係，當中仲有一種好關鍵嘅公司，可以操生殺大權：就係信用卡。OnlyFans嘅禁令，最初亦係因為信用卡公司。

11. 歷史上嘅投機狂熱— 又係Charlie Bilello，原文個題係The Other Side of a Mania。乜幣物幣，SPAC，網紅股。留意，講嗰時梗係天下無敵，好有理據的，亦都往往真係「有啲理據」。問題係，好多人就係以為，多人買就會升 — 咁到冇人買呢？同場加映，In the short-run, the market is a voting machine，in the long-run, the market is a weighing machine。咁總有人話，我及時離場咪得。但咁易？你見歷嚟嘅泡沫，都係輸錢嘅人多。

FB Post Summary —  蘋果新高迷思。15星連珠。

12. 蘋果新高迷思 — 呢篇好值得你去睇，我甚至都唔使同你討論蘋果點解升，點解我買，點解會推。問題反而係：點解你唔買？我唔係叫你買晒大公司，我都有時買發夢股買細公司，但我唔會「只係」買發夢股細公司，見到分別冇？而你地好多人係成手都只係貴嘅科技股，明顯係因為見之前升得多，或者多人講。建議你將呢篇睇多幾次，了解下我對投資嘅想法。

13. 15星連珠—  跟進返，15個倉齊升嘅機會，就當然唔係0.5嘅15次方啦。同場加映返我講數學，同埋講我教數學。Probability 係一樣好好玩嘅東西，可以分到小聰明同真學問嘅分別。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。