15星連珠呀喂！我15個倉全部一齊升！1/32768！90年一遇呀！病毒嘅嘢你識條鐵．蘋果新高寫兩句．別人恐懼時我貪婪，VIX 夠高時飛入去就OK．港股反彈似乎唔堅實，阿里巴巴美股仲低香港3%．中概股退市有乜後果？ (Patreon)

15星連珠呀喂！我15個倉全部一齊升！1/32768！90年一遇呀！

病毒嘅嘢你識條鐵

蘋果新高寫兩句

別人恐懼時我貪婪，VIX 夠高時飛入去就OK

港股反彈似乎唔堅實，阿里巴巴美股仲低香港3%

中概股退市有乜後果？

1. 實不相瞞，比較忙。文當然會寫，但我真係未睇晒呢兩日嘅newsletter同新聞之類。不過焉知非福，講少少冇咁貼市嘅嘢，或者心法想法，睇市嘅嘢，可能你又唔鍾意呢。「可能好過我成日貼蘋果股價又新高」（冇錯，又新高了）

2. 趁有新讀者，快手賣少少廣告，今個月都未賣過

3. 仲未開WeBull嘅，請用我專屬連結開，大家有著數。今個月佢地會送一股Walmart．詳情睇Facebook Post

4. 仲有，USMART嘅，月供美股好用。而家做緊個送Conrad酒店（連埋早餐）嘅優惠。詳情睇Facebook Post．一樣，用我嘅連結開。

5. 上面個圖係拎獎品嘅條件，仲有Terms呢度，

6. 留意之前有個咩ABCD餐嘅（舊文有講），唔肯定係咪仲有，幫你問緊，但可以開咗先。

15星連珠呀喂！我15個倉全部一齊升！1/32768！90年一遇呀！

7. 講嘅係乜？講嘅係，我15個倉（HK12345，US1234567，日本，新加坡，

垃圾倉）一齊升！（唔知有乜？睇我嘅週末專題，公開晒）。

8. 當一半機會升一半機會跌，咁15星連珠嘅機會，即係0.5嘅15次方，32768份之一嘅機會。除返365，即係90年先一次呀！

9. 留意，以上嘅計法係錯的，錯在乜？我會在Facebook Page講，數學嘢，費事呢度嘥你時間。

病毒嘅嘢你識條鐵

10. 無聊嘢講完，想講嘅係，以上呢個現象都好解釋到昨日股市嘅情況，咪就係一片歌舞昇平。係咪因為大陸減存款準備金（降準）？我相信都唔係。都話星期一話降準時，夜期反應唔大的。反而似係美股星期一晚強，帶動全球。當然亦可能因為個病毒變種好似冇乜料到，傳染性高但殺傷力低，甚至有專家話係大好消息，因為代表佢已經減弱，會變到好似流感。

11. 你覺得點？我聽落實在有啲「喪事當喜事辦」嘅感覺，但畀多個教訓你：首先，科學家亦係眾說紛紜，唔係專家冇料到，而係大自然就係咁。我冇宗教信仰亦唔好怪力亂神，但人唔了解嘅嘢太多。更何況你去到股市？即使本身件事科學家個個都一樣結論，對股市影響又係另一回事。

12. 我諗呢個係我啲文嘅核心價值：唔好以為你自己好叻。宏觀固然係，件事係點，科學家都唔知，你自己或你啲網友知？然後對股市甚至股價嘅影響，更加係科學家都唔知。

13. 微觀嘅一樣，你好熟間公司又點？我當你自己在間公司入面做，你估你就知道隻股票好唔好？你真係覺得係嘅，我比兩個反例你：第一，馬化騰N咁多次減持騰訊，都係沽早咗。你唔好話我知你畀佢更清楚間公司。第二，知唔知邊個Richard Fuld？我估你唔知，唔查維基都知嘅畀個叻自己，如果唔係做金融都知嘅更加叻上叻。此人就係末代雷曼CEO．原本冇乜特別，亡國嘅大把，但此人勁在乜？勁在佢將自己好大部份財富都放埋落雷曼度！甚至借孖展去買。留意，CEO唔同大股東，打工仔啫，當然CEO出糧會出股票，但真係好少會自己仲瞓身買自己公司。佢就做到咗，結果雷曼爆煲佢都輸好多錢。教訓？你唔好話畀我知你畀佢更清楚自己間公司。（另一教訓：即使將管理層嘅薪水同公司股價綁埋一齊，都唔一定可以停止佢地做啲搞到間公司爆煲嘅嘢）

14. 接受自己嘅無知，先係大智慧。咁你話，乜都唔知點投資？錯，正係你接受不確定，先會有投資回報。以前推介過Charlie Bilello篇文，你可以睇多次。人人都知嘅嘢，今日就升晒啦。

15. 遲下我會再講（應該會在信報寫文），但同樣道理，即係你見KOL呀大行分析員呀（我都做過），寫2022年咩 投資主題 咩風險咁，我去寫咩「美國加息」「台海衝突」「中美關係可能惡化」「病毒再變種」— 你諗真啲，全部對你投資，都係冇任何幫助的。有可能打仗喎（你唔會話冇可能丫？我都唔會話冇可能），咁點？聽日沽晒啲股票佢？

蘋果新高寫兩句

16. 就真係兩句，之前都寫過呢排點解勁。好可能係真Metaverse股，另外，品牌勁根基好現金流強，咁當然呢啲N咁多年都知，但到市場唔炒啲發夢股，往往就返去呢啲巨企。

17. 我亦想告誡多一次大家，我好多時推啲巨企，都好多人耍手擰頭。原因？我都唔知。但你話升得少？蘋果今年升33%，你跑得贏？我就唔得。更唔好講微軟 Google。升得慢？可能，但跌得都慢。但係咪真係發夢公司跌得快升得快？咁你望下，發夢股都反彈咗，但我堆US4567都仲潛水10%中，但蘋果已經新高喎。一來一回，好明顯啦？

18. 仲有個講法，話「已經升咗好多」。呢個係心理障礙，實則未必有咩關係。都話Steve Jobs死時蘋果已經係超級巨企，升咗N倍—但打後再升多10倍。

19. 仲有啲人話，「貴」，而我唔知係乜意思。美股可以一股股買，一股蘋果 一股微股使幾錢？定真係以為300蚊就貴，3蚊就唔貴？唔好咁膚淺喎。定你以為300蚊嘅股票升得慢，3蚊嘅快？咁你可以睇多次上面兩段。

20. 拿，微軟又加價啦。你話通脹，佢驚唔驚？會唔會佢加價你唔用？

21. 你見啲人成日批評我唔識乜乜乜，自己又識乜乜，講真，你買啲發夢股，你真識佢地做乜？定只係上網Google下或者聽日講 – 拿，蘋果微軟你就真係知佢做乜，點解成功啦。咁你話係咪應該買自己熟悉嘅公司？

別人恐懼時我貪婪，VIX 夠高時飛入去就OK

22. 除咗呢個「病毒嘅嘢你識條鐵」外，另一個歌舞昇平嘅原因，當然係「之前跌得多」「風險胃納重臨」。但就咁講，有啲虛。畀啲實數你

23. 首先，之前貼過呢個圖。11月26嘅星期五，美股大跌，VIX（恐慌指數）一晚跳咗50%．史上第四勁。但歷史見到，呢啲情況下買入去，多數坐得一排都有錢贏，贏面幾高，真係別人恐懼時我貪婪的。今次呢？一個星期多啲，美股已經高過11月26嘅位了

24. 另外，呢個好似冇貼過，VIX超過30時買入去，以後86%機會，100日後都贏錢—86%喎！好高。當然再高層次啲嘅，你可以諗下，「佢冇講嗰14%情況下你輸幾多」。仲有，我唔肯定圖入面嘅數字代表乜，我估係VIX去到30時，飛入去買，持有唔同時間嘅平均回報（又，見唔見到點解要長渣？）

25. 咁你話今次又如何？12月1日係VIX第一次去到30，12月3日（上星期五）再一次去到（而當日我不知幾老定咁同埃汾太慶祝生日）。

26. 咁你睇返，又真係買落去，有得贏錢—當然唔知聽日會唔會跌返20%啦。但下次你又可以參考下。

港股反彈似乎唔堅實，阿里巴巴美股仲低香港3%

27. 港股嘅，雖然星期二成交有1500億，又有68%股票升，但我覺得個反彈唔係好堅實的。我知，阿里巴巴勁升12%，上市以嚟最大單日升幅添。但，去到昨晚美股呢，升得嗰少少，折合股價仲要低過香港星期二3%。另一方面，見到微博9898嘅暗盤股價，亦係要跌的。

28. 係咪咁快就中資科技股反彈？我就有啲保留。雖然，其他昨晚都升得幾好

中概股退市有乜後果？

29. 有機會我想細講中概股，但真係搞清兩樣嘢嘅分別。中國打壓科企就肯定係事實，堆嘢又真係會退市，但對股價影響，完全係兩樣嘢。

30. 如果唔係收購唔係私有化，股票退市或除牌會點？簡單答你：係唔影響公司營運的。絶對唔代表公司清盤或爆煲，你見滴滴一樣日日打緊車，啲App上返晒架添。當然你話難集資呀就另一回事，但N咁多公司都係退咗市但依然運作緊，包括我舊公司康宏（死前編號1019）都係

31. 咁你拎住啲股票，佢退咗市除咗牌，咁點算？你咪會拎住間公司「冇上市嘅股份」，咁一般，係好難交易，有人買都只會好殘。

32. 但中概股嘅情況，有啲唔同，之前中海油之類咪試過除牌咯，最後係點？咪換返一股香港嘅中海油883畀你，幾好的。問題係，唔係保證一定係咁。特別係如果在第度上唔到市

33. 滴滴嘅情況，都話會打算去第度上市（99%係香港啦），亦似乎係上香港上咗市先在美國退市，咁原本拎美股嗰啲，就變咗拎港股。

34. 但，以上嘅嘢，你係基金就比較易搞。你係普通人，拎住幾股美股，我都唔係好肯定會點搞，好煩的。我就建議你唔好試。

35. 結論？千萬唔好買美國上市嘅中概股，退咗市好煩。如果隻嘢第二度冇上市返仲煩。第度上得返嘅，你係基金都好啲，你係普通散戶，轉第二度上市嘅股票畀你，都似乎幾煩。

36. 但，如果買香港嗰啲呢？即係例如京東網易之類呢？我就覺得好啲的。唔代表極之值搏，因為你仲要面對港股成個市唔掂嘅壓力，同埋監管打壓。但至少，美國投資者可能要沽呢個因素，只會短期影響股價，分分鐘而家係OK殘的。

37. 不過，講咁多嘢，我都應該係唔會買的。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。