人行降準，美股大升，阿里巴巴彈10%．東岳189 出盈喜！「咁理文化工呢？」．標普指數連續五日1%上落又如何？大戶睇淡後市又如何？通脹升拉高企業成本又如何？ A2A威脅Visa Master？唔好加入馬戲團。 最新Dating App賣點：人手配對 (Patreon)

快評兩句：人行降準，美股大升，阿里巴巴彈10%

大師冇點你：東岳189 出盈喜！「咁理文化工呢？」

每日一圖— 標普指數連續五日1%上落又如何？大戶睇淡後市又如何？通脹升拉高企業成本又如何？

Good Read —  A2A威脅Visa Master？唔好加入馬戲團。 最新Dating App賣點：人手配對

FB Post Summary —  FactSet入標普500指數。Jack in the Box 收購

1. 週末出咗篇專題，嘔心瀝血，寫完元氣大傷。記得去睇下。就係我嘅所有持倉。做乜會有呢篇文？因為好多讀者見我貼大師冇點你嗰啲core list，都想知道全部。

快評兩句：人行降準，美股大升，阿里巴巴彈10%

2. 今日都唔少嘢講，快講。相信冇人關心我啲港股係跑贏大市一大截（都話睇HK4）。留意AASTOCK個圖，主要想畀你睇指數。入面啲股票，我觀察，但唔一定係嘅，雖然唔少都有。週末篇文咪寫咗我港股有乜！唔使再問啦。

3. 首先，中國降準，減存款準備金。實際幫助未必有，但記唔記得一路都講，真正嘅中國定律：「一死就放，一放就亂，一亂就收，一收就死」（呢句真係咁多年都適用！），早早都估佢幾時寬鬆，而家似乎係。雖然官方強調，唔係轉向。但大家明啦。

4. 然後又咁啱，見啲中概股翻生。未必關降準事（美股未開市前夜期都冇力），似乎係美股帶動，風險胃納返嚟，又睇下今次點。

5. 仲有，完稿時（4點半！），美股大反彈，AirBnb，Twitter，Snap之類都反彈。但係咪又再繼續打牌？真係唔知。你睇個升勢又唔算好全面，甚麼Nvidia 愛馬士ASML嗰啲反而要跌（估值問題吧）

6. 但你見，呢排咁日上日落，你啲咩止蝕止賺真係多餘，點應對？今日沽走聽日又升，今日追聽日又跌。我嘅方法都係不變應萬變，慢慢調節啲新錢，而一開始個組合應該就平衡。

大師冇點你：東岳189 出盈喜！「咁理文化工呢？」

7. 再冇時間，都要講呢單嘢：東岳189出咗盈喜。留意佢係講頭11個月嘅嘢，盈利升190%，但冇話全年都會係。你心諗最後一個月唔會走樣好多？又真係唔一定，公司有心玩你嘅大把方法，大家都知好多數係年尾先入嘅，整多單乜乜減值就夠好玩。但姑且當住全年都係190%，咁都真係好勁。

8. 咁但，我冇買東岳啦，但大家仲記得之前成日推理文化工。而家都仲在我最初講嘅目標價6蚊樓上，照計多數人都仲賺緊錢。

9. 兩間都化工，但唔係完全一樣嘅公司。但理文會唔會出盈喜？照計都會。亦根本唔使理咩東唔東岳（但可能兩隻股價聽日就炒起）。因為理文上半年純利，都多過舊年全年啦，咁只要下半年唔大走樣，全年當然會畀舊年多一個開起碼。

10. 不過，公司唔係事必一定要出盈喜。睇返理文，好少可全年業績出盈喜盈警，多數係半年。近年唯一一次全年出？係1月尾出的，大家可以吼住。

11. 而話說回頭，根本冇人話盈喜就股價會升，照計一早預咗。但又掉轉頭，呢啲咁少成交嘅公司，求其有兩條友覺得盈喜好呀 追入去，都會夾高了。

每日一圖— 標普指數連續五日1%上落又如何？大戶睇淡後市又如何？通脹升拉高企業成本又如何？

12. 標普指數連續五日1%上落又如何？— 上星期五之前，標普指數連續5日收市超過1%上落，疫情後嘅第一次。但同之前比，冇乜咁特別，只怪再早少少美股有段時間係好低波幅的。另外，睇埋第二個圖，見到年初至今有1%上落嘅日子，同歷史相比，都仲係低嘅。

13. 大戶睇淡後市又如何？—呢個係對機構投資者嘅調查，近期多咗人睇淡，但未係好極端。但我想你留意返，都算係個燈燈地嘅反向指標。你睇最樂觀嘅時間，2018年頭，同2020年頭 — 之後都係大跌的。另外，有冇諗過呢啲調查有乜意思？機構投資者，係咪真係會真心答？點解要畀人知？

14. 通脹升拉高企業成本又如何？—白色呢條線真係本世紀最靚嘅線，標普指數成份股嘅每股盈利，你見真係長期上升，算幾穩定的（另外留意係log scale），所以點解指數都係咁升。但有冇發現，無論通脹高同低，實情對條線都冇乜影響？原因好多，首先都話企業可以轉嫁成本壓力。另外，冇加價能力嘅公司，咪會慢慢在指數中佔得少，甚至踢走。所以指數就係汰弱留強。

Good Read —  A2A威脅Visa Master？唔好加入馬戲團。 最新Dating App賣點：人手配對

15. A2A威脅Visa Master？ — 有人認為A2A會威脅Visa Master，作者就反駁。咩係A2A？我都唔係完全肯定，但可以當類似Payme或轉數快咁嘅嘢。篇文唔長，有唔少資料可以畀你再了解個行業。作者講咗幾樣嘢：首先，消費者冇誘因即時找數。第二，Visa Master成個網絡，舖咁多年，有晒信譽，唔係你普通人可以話挑戰就挑戰。第三，Visa Master亦都收得唔貴，其他人好難爭。第四，商戶其實關心上多啲客，多過Visa Master嘅手續費— 不過留意篇文冇講Buy now pay later，但至少作者都認為威脅大過A2A

16. 唔好加入馬戲團—呢個作者我都成日貼。佢寫時就係道指跌成千點嗰日，咁佢首先講返而家一千點真係冇乜特別。另外，馬戲團，就係嗰啲咩發夢股，加密貨幣，sell期權，槓杆ETF之類嘅嘢。作者提到一句名言：你朋友忽然發達，一定大大打擊你嘅判斷力。最後，講嘅都係老生常談，亦係我講嘅嘢。未來會點，根本大家唔知，你要嘅係一個可以應付不同情況嘅組合。

17. 最新Dating App賣點：人手配對—唔知大家有冇用過Tinder之類，我估都有，冇用嘅都知係乜。亦都應該知道個問題在邊，掃嚟掃去，根本好多人就係不停Match，然後講兩句又消失咗。而家點解決？就係反樸歸真，引入返人手！都唔係今日先有，但作者認為真係開始轉勢了。

FB Post Summary —  FactSet入標普500指數。Jack in the Box 收購

18. 實在相當忙，你見呢兩篇都係星期一晚寫，第二篇原本係諗住排星期二朝先出

19. FactSet入標普500指數 — FactSet，你當係窮人版Bloomberg啦，會入標普500指數。你最關心有冇得炒？舊年Tesla入時炒到癲，我在呢度都有寫，都有唔少讀者一齊玩。但真係只此一次。首先市場氣氛唔同，更重要係Tesla係已經好大市值先入指數（因為之前蝕錢），所以指數基金追到氣咳。正常普通公司呢，係唔會咁嘅。留意呢隻FactSet今年升四成，又未算貴到痴線，10倍Price to Sales，但出咗入指數嘅消息反而要跌（而大市升）。同時入指數嘅仲有Signature Bank同埋Solar Edge，但我就不了

20. Jack in the Box 收購— 收購嘅係Del Taco，完全冇聽過，我冇去過美國加拿大，亦冇食過Taco。隻嘢未升之前3億美金市值唔夠。Jack in the Box就大啲，但都只係17億市值。同場加映講下我嘅童年回憶。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。