ivanliresearch

［週末專題］港股美股持倉全公開！（有買入價，但多數冇講買咗幾錢，唔好話呃你） (Patreon)

Published:

2021-12-05 22:36:00

Edited:

2021-12-23 21:29:24

Imported:

2022-09

Downloads

Content

港股美股日股坡股名單全公開

上個月買嘅當然慘烈，但我好多都唔係上個月買嘛！

熱身：垃圾倉

日本，新加坡

US4567

戲肉：US1，US2，US3

US123埋單計個數

Bonus（如果有人睇）：香港倉

1. 大家最關心我嘅問題：你買咗乜，死得未？

2. 講定你知，我啲美股過去一個月略為跑輸大市，冇得呃你，但我唔算跑輸好多，主要係垃圾倉同啲新開戶拎獎品嘅倉拖低（因為買晒高估值嘅科技股），核心持倉叫做同大市差不多，依然食得開心瞓得安樂。

3. 我大膽估計你都係跑輸指數，好多人都係，唔少人仲要跑輸一大截，因為個個成手發夢股。但我港股仲要跑贏恒指，幫補返少少（雖然只係跌少啲同跌多啲嘅分別）。

4. 好，呢篇真係搞到我天昏地暗。慎防新讀者唔知，一般逢週末我會有篇專題，有時講心法，或者深入啲嘅嘢，有時係101文。容許我重覆講，一般打一篇咁嘅專題，用嘅時間等於我平時打兩篇文。但聽講好多人鍾意呢個環節。

5. 今次呢篇文，你可以當係三個月前呢篇（港股美股持倉全公開）嘅續集．舊讀者睇過嘅唔使睇，新讀者可以快睇，唔睇亦冇大問題，但有啲問題會在嗰篇文有答案。

港股美股日股坡股名單全公開

6. 好簡單，篇文就係我嘅持倉公開。所有嘢，絶對冇任何其他倉，而我銀行亦長年冇錢（不過有600萬台幣在台灣）

7. 提提大家，出面好多人都係選擇性咁貼，最簡單A戶口買升B戶口買跌，然後只貼一個，呢啲係好古老好低級嘅方法，但有效的。但本人從來希望做到100%透明，你就算係我最好朋友，都發現我唔會有買過啲 Patreon冇提嘅嘢。長期讀者亦睇到，你唔會見到有啲股票我明明話有，忽然消失。或者明明都冇提過買，但忽然出現仲話升咗幾倍。

8. 篇文貼晒我嘅所有股票，有買埋入價，不過因為種種原因冇話你知我買咗幾多。但你可以留意，自從搞咗呢個Patreon後，我好似買親啲股票都有貼上嚟，有埋買幾多的。

9. 點解要寫呢篇文？因為好多時我貼啲咩HK4 US3（記住呢兩個係大倉，雖然US1 US2都會開始大，陣間解），好多人都唔知入面有乜。

10. 雖然亦都成日貼個core嘅美股報價，正就係我嘅持倉（上面個圖係例子，又，成日有人問呢個在邊拎，係CNBC嘅app）．但總之好多人就係想睇晒全相啦。OK，就係呢篇文。

11. 咁你話，上次倉位篇文已經差不多睇晒。做乜又整一篇？因為兩個原因。首先，三個月內，我都買多咗啲股票。另外，亦都順手睇埋，我呢堆嘢，近期死得慘唔慘烈

上個月買嘅當然慘烈，但我好多都唔係上個月買嘛！

12. 可以預告定你知，呢兩個月買嘅，梗係幾慘烈。但我咪講咗，一有錢我就買，所以唔會全部係呢一兩個月買。不過有睇開嘅讀者，應該留意我呢一兩個月買咗好多股票。原因？首先，FOMO，Fear of Missing Out，見美股係咁破頂，當然心雄。第二，因為我知道12月頭會有舊錢（正係舊年最最先交年費嘅一班鐵粉，夠期交新一次年費，本人無言感激），所以不幸地，我都先駛未來錢，之前都提過我戶口負數的，孖展咗些少。而家當然變返正數，大家唔好學。

13. 唔係馬後炮，上個月我已經覺得，真係次次我去到咁進取時呢，就好快會出事。果然係咁。但至少，我都只係透支咗12月頭嘅錢（亦唔係全部），都唔係咩成百萬瞓落去。咁而呢兩個月買嘅嘢，當然係死得幾慘 — 有機會寫文講，但真係唔止係「邪」或「燈」，歷年去到我好進取買嘢時，多數之後都大插 —原因正係往往係因為市場氣氛熱烈，亦代表係強弩之末。但當然，當局者迷，你陶醉在當中，係未必覺嘅。

14. 呢篇唔係主要講心法嘅文，因為我買得多股票，內容夠晒長，我盡量簡短。

15. 答埋你，平時我啲HK4 US3之類嘅圖，係Yahoo Finance．至於陣間啲Excel圖，咪就係Excel．堆file我會attach埋畀你，我建議你自己都整個。特別睇下自己啲嘢輸咗幾多。文入面啲圖，睇唔清嘅，download埋個Excel開住睇。

16. 我堆HK4 US3等等，實情係代表我在不同券商嘅戶口。舊文有貼過戶口嘅圖，有講邊個打邊個（HK4同US3兩個主倉都係匯豐，陳年用落），絶無做假，今次時間關係唔貼了。

17. 我想話你知，呢篇文真係極大工程。反應好嘅可能我每個月（！）整一次，或者兩三個月一次。反應差就算，無謂吃力不討好。

熱身：垃圾倉

18. 首先由啲冇咁重要嘅嘢講起。由垃圾倉講起（起源係呢度，同呢度），亦可以熱下身先。

19. 呢個擺明係實驗，我亦都貼晒買咗幾多，因為十隻夾埋先3萬港紙。睇圖。

20. 因為都係啲超級發夢垃圾嘢，爆晒煲都冇乜好討論。陣間計大數都唔會計。但畀你望下我會點計，其他倉都係咁玩。你要睇嘅，中間有我買入嘅成本，同埋每一隻嘅賺蝕，咁然後我會計平均數，同中位數。右邊呢？就係過去一個月嘅升跌，然後我又係會計平均數，中位數。

21. 問題嚟啦喎，應該睇平均定中位數？答案係有啲難講。雖然大家小學都知平均數會受啲極端值影響，但買得耐嘅（垃圾倉唔會，但US3就會），總有啲升咗好多倍，有啲跌咗八九成。一般嚟講，特別係睇買入到而家嘅賺蝕，係睇平均數比較好啲。因為我買入嗰時，往往每隻金額住往都唔差得極遠。我好少一百幾十萬買一隻，又唔會幾千蚊。咁用平均係好嘅。

22. 但到之後嘅回報呢？例如右邊過去一個月嗰啲呢？就要小心啲。因為有時啲股票跌咗好多（甚麼YALA，WISH，波音期權之類），咁得返幾千蚊，根本點升點跌都唔影響個倉了。呢啲情況我會陣間講明

23. 咁但，垃圾倉好簡單，當然慘烈。之前一路跑贏大市，但到急跌時就死晒，一個月跌兩成幾（右邊）。仲有留意，如果計買入到而家，見唔見平均跌11%，中位數跌15%？但垃圾倉我畀晒銀碼你嘛，見到真實輸錢係10% — 見唔見，係比較接近平均數，唔係中位數？

日本，新加坡

24. 然後，我想講日本同新加坡。日本股先，上次倉位篇文時都未存在。故事呢度。最底嗰四隻，就係早期買嘅，你當大約9月頭或9月中。頂嗰三隻，黃色嘅（之後新買嘅嘢都會用黃色），就係11月買的。咁你見當然大大鑊，仲要係零售股航空股，撞正病毒變種日本話封關（之後又唔封），唔死就奇。

25. 又留意，日本股我都貼晒買咗幾多錢。咁所以你見到，真實嘅回報，係貼近計每隻嘅平均數，而唔係中位的。

26. 留意輸咗10%，咁肯定係跑輸大市了，但唔算好多。日經高位到而家跌咗9%左右 —正係我開始買日本股時就係高位！

27. 新加坡？亦係上次倉位篇文未有嘅嘢。真係唔使討論。得一隻，牛奶國際嘛。又係輸咗10%。咁梗係跑輸大市啦。零售股嘛，病毒變種

US4567

28. 好啦，繼續啦喎。US4567。四個倉都係上次倉位文時未有的！癲咗。但有睇文嘅（我費事逐篇搵）知咩事，點解多咗四個倉，因為拎券商開戶嘛，兩個Webull，兩個USMART（遲下再賣廣告），冇呃你的。買呢四隻嘢我都有講，兩隻3萬，兩隻1萬（正係開戶要嘅錢）。咁你見到，四隻都係唔多賺錢嘅科技股，當然係慘死，大幅跑輸。留意四隻跌幅差不多，平均數中位數都差不多，所以真實嘅跌幅都係咁上下，我唔再計出嚟了。仲有，隻MYNA，右邊冇一個月升跌—因為上市都未夠一個月，但我當然係輸錢。

戲肉：US1，US2，US3

29. 好啦，然後到戲肉。美股US123，以前只係話US3最大，但嚟緊US1同2都會開始大（雖然都仲要啲日子）。點解？因為我每個月定期買嘅ETF在US1同2，仲有，US3係最大嘅倉，但係舊嘢，匯豐，而家唔多用的了。US1係富途，US2係IB，之後買個股我都係用呢兩個。

30. 另外，想畀你睇返一樣嘢，最好你抄低。過去一個月美股，道指跌4.8%，標普指數跌3.4%，納指跌5.6%。

31. US1呢個倉，係極麻煩嘅，因為有啲冇成本嘅嘢，富途開戶送，冇得計回報率。另外我有隻波音期權，輸咗八成，問題我只係買咗1萬蚊，所以計數distort 晒，極煩。你見到我計數，都有分計埋波音跌八成定冇計，爭好遠。

32. 入面一堆嘢我都係新買的，除咗波音期權，隻Palantir當然都大跌。但你見兩隻指數ETF，VOO同QQQM咪頂到下（分別係標普500同納指），之前講咗會每個月買了。你睇過去一個月嘅情況，亦都係咁

33. 順帶講埋，啲顏色嘅conditional formatting，係排US123入面嘅嘢，冇計垃圾或US4567，亦冇計波音期權。咁你見，蘋果真係上個月嘅奇葩，幫到下。（點解冇真實？因為冇track）

34. US2，就冇咁多古怪嘢，雖然有隻Bitcoin ETF，而週末大跌嘅。但暫時呢度未見到的。

35. 仲有，見到入面有四隻每個月買嘅指數ETF，上次倉位文未有的，有三隻上個月已經做緊（EMXC，IDEV，VB），今個月剛剛加埋隻IWD（價值股）（上星期專題講）。

36. 咁見到了，又係呢啲指數ETF嘢頂住。仲有隻愛馬士真係奇葩。又提一次，你睇成立至今，計回報平均數正數，中位數負數，但真實數字（信我）係近平均的。咁如果你右邊睇平均數字，都算係唔落後大市（點解冇真實？因為冇track）

37. 到US3，勁咯，最多嘢嘅倉，最大嘅倉。但同上次係完全冇變嘅！都話新嘅每個月ETF唔會在呢度，個股都應唔會，應該一路放住。所以冇新嘢

38. 呢度好多名都成日在我文出現，而上次開倉文都有寫，不再重覆。留意有三隻嘢跌得好勁，但已經得返幾千蚊，唔影響大局。同波音期權一樣，計埋佢嘅數我計一次，唔計嘅都有

39. 咁但係，真實回報都係比較接近平均數嘅。呢堆嘢各自買咗幾多我冇公開，亦冇打算，但匯豐有幫我計埋總回報。我就計到70%，佢就68%，但應該係佣金問題。不過，都收過下息的。

40. 仲有，睇最右邊，我呢個主力倉，抗跌力相當強的。特別留意計數時，WISH同埋SSYS兩隻過去一個月大插—但都話得返幾千蚊，明顯係冇影響的。咁你睇，真係同大市同步的，冇跑輸。因為呢個倉多數都係啲大公司，大多數都只係單位數跌幅。

US123埋單計個數

41. 最後，叫做幫美股埋個單。垃圾股US4567唔計，擺明實驗同開戶拎獎品，況且金額都細，睇123夾埋。你睇上個月嘅，真係只係略為跑輸大市，實情我記得好似係跑贏添（Excel計冇考慮我每隻買幾多啦）。

42. 結論？我嘅US123 冇點跌得多過大市，但當然垃圾倉同US4567勁跌，拖跌咗啲，不過銀碼不大，所以計晒所有嘢，都只係略為跑輸大市啫。

43. 有乜教訓？都係我平時講嘅嘢。首先，指數ETF真係好東西，我知係悶，但盡量買多啲。我冇真係計實數，但至少你見我都買唔少指數ETF，唔會全部掉晒落個股，可惜美股我係呢幾個月先開始買指數ETF。仲有，你見企得硬嘅，都係啲大公司，反而之前啲天花龍鳳嘅發夢股，同埋高估值冇盈利嘅科技股，就散晒。市況旺嗰時當然個個股神，但跌落嚟同人再同你講呢啲夢想，最好有息派，冇息派都最好有盈利，冇盈利咁你至少都有收入增長。收入增長都冇嘅，甚至收入都冇嘅，你話會點？