美股一浪低於一浪，但跌乜先？好多人都唔知。 我星期五只係輸0.5%。我就好滿意。 人民幣上次咁強嗰時，之後乜事？高通脹時美股表現如何？點樣避免又一個迷失十年？媒體講美國經濟全部都錯晒。 (Patreon)

快評兩句：美股一浪低於一浪，但跌乜先？好多人都唔知

大師冇點你 — 我星期五只係輸0.5%。我就好滿意

每日一圖— 人民幣上次咁強嗰時，之後乜事？高通脹時美股表現如何？

Good Read —  點樣避免又一個迷失十年？媒體講美國經濟全部都錯晒

FB Post Summary — SPY+QQQ收你1%。古靈精怪東南亞。勞蘇KOL。DocuSign

提返大家，舊年呢個時間我開始推年費，咁陸續開始到期了，記得去更新返你嘅 信用卡資料。搞唔掂嘅可以PM我，雖然應唔會太複雜。或者我過兩日教埋你

美股一浪低於一浪，但跌乜先？好多人都唔知

1. 依然仲有太多嘢想寫，但相信大家都有啲擔心，甚至唔少股票輸咗錢。你問我當然係一如以往，定過抬炸彈，stay invested，跌嗰時你更應該買。

2. 咁有冇第句？都有嘅，未睇將來，不如睇咗現在同歷史先？好多人連發生乜事都唔知。

3. 上星期寫過唔止一次，美股跌幅唔算好誇張，但日升日跌，仲要唔係好知升乜跌乜。更不幸地係，你見到係升得少，跌得多，而仲有唔少日子係升轉跌嘅。所以拉勻都係跌。

4. 標普指數嘅，高位差不多跌5%，其實濕濕碎。納指就差不多8%，會有點痛。而如果你買啲喪炒股嘅，跌三四成閒事添 —所以，好悶都要講多幾十次：冇！人！叫！你！成！倉！都！係！嗰！啲！嘢！我冇叫過，我自己亦唔會咁做。唔想落井下石，但見有啲讀者PM嚟問，成手都係嗰啲嘢，咁真係只能怪自己犯錯。錯冇問題，人總有錯，但要接受自己犯咗錯，下次小心啲。

5. 港股呢排好似仲要跑贏美股（哈哈哈），雖然啲中概股好難睇，但呢堆嘢我全部都冇（但我有騰訊，都被拖累，但還好）。咁你見我港股倉仲要有得升的（但星期一應該幾難睇）。至於啲中概股點收科，有機會先再講，但除牌實情唔影響公司業務，當然唔好而家飛入去撈底。

6. 但你睇返美股，實情跌乜？你搵新聞就講就業報告。但，明明就業報告唔算差，頂多話有好有壞，唔似會觸發急跌。咁係咪因為數字好驚加息收水？又應該唔係，因為你見到債息仲要跌喎

7. 係咪因為驚病毒變種？又好似唔完全係。因為你見啲科技股都唔升，仲要係債息跌科技股都唔升，當然你可以話驚病毒變種，但唔會封城，所以啲科技股冇力

8. 但計我話呢，實情好簡單，就係殺估值。你睇以上幾個圖，應該明白晒。高估值，而冇盈利嘅嘢，可以有幾危險。

9. 你唔使作乜嘢好特別嘅故事，應該講過無數次，估值好重要。而我好難答到你邊個位會瀉落嚟，但過去幾個月我都有提，當然你啲嘢升緊一定好陶醉，咁我都會，但我總留有一手。

10. 我建議如果你未睇，可以睇返我兩篇Facebook 文（勞蘇KOL，DocuSign）。表面講其他嘢，最後都係講返估值嘅嘢。

大師冇點你 — 我星期五只係輸0.5%。我就好滿意

11. 點算好？冇乜點。繼續搵你嘅錢（返工或其他方法），繼續有錢放落股市，但留意返你嘅配置。唔好而家又走去轉晒啲嘢去另一邊，你只會左一巴右一巴。當然我都唔係完美，我都係太側重美股，仲要係增長股，但至少冇好多人咁離譜。

12. 係睇得到成效的，你見星期五講到風聲鶴淚，對不？但我美股倉（都話睇US3）唔係太差啫。港股倉（都話睇HK4）甚至仲有得升。拉埋晒（加埋其他所有嘢），你見星期五，我只係輸0.5%。

13. 我唔知你點諗，我就相當滿意，星期五講到咁大件事，我先輸0.5%。如果咁你都仲唔信應該分散啲，都好難說服到你。

每日一圖— 人民幣上次咁強嗰時，之後乜事？高通脹時美股表現如何？

14. 人民幣上次咁強嗰時，之後乜事？— 打從大家冇得返大陸，可能讀者都冇留意，人民幣好強。表面上好似好奇怪，你見好多新興市場貨幣都勁跌，而明明中國經濟又差。但熟悉啲市場嘅，應該知道人民幣好長時間都係盯住美金，原因……就有點複雜。咁美金今年咁強，人民幣大約跟住。但當然中國唔係行聯繫匯率，要升值要貶值隨時可以。上次咁強嗰時，就有一輪嘅貶值。但係咪今次又一樣？作者就覺得唔係的。因為最表面睇，就係強人民幣對中國不利，因為中國出口受影響。但你可以諗深一層，首先，邊個話而家強人民幣對出口一定好大影響？第二，你估而家中國係咪好介意出口受影響？ 有機會細講呢個問題。總之，唔好咁表面

15. 高通脹時美股表現如何？— 應該看圖識字好簡單睇到啦，高通脹嘅時期，股市係咪一定唔好？似乎唔係。上次專題都講過呢個問題，好多公司都可以轉嫁到成本。問題係高通脹有機會拉低估值，咁就睇下你嘅盈利係咪升得勁過估值跌了。

Good Read —  點樣避免又一個迷失十年？媒體講美國經濟全部都錯晒

16. 點樣避免又一個迷失十年？ — Charlie Bilello嘅好文。留意上星期佢已經寫，入面嘅嘢佢之前亦講過。佢先講美股估值，如果睇CAPE（舊文寫過），上一次咁貴，係2000年。之後點？之後美股迷失十年，標普指數十年都未返到高位，納指更加跌咗一半。當然歷史未必簡單咁重覆，但，可以點避免？當然係照舊嗰句，分散。多數啲錢總會去某啲地方，上次十年，美股價值股，美股細公司，歐洲，新興市場，房地產，甚至債券都做得幾好。所以你見我呢幾個月都開始買多咗其他嘢，當然都唔夠快，理應一早唔好太集中，但至少我有試過，同埋都好早聞到到。呢個亦係我五月篇舊文寫嘅嘢

17. 媒體講美國經濟全部都錯晒—  幾有趣嘅現象，唔止係呢篇文講。美國出現一個好有趣嘅情況：啲民調見到大家覺得經濟好差（特別係共和黨人，但民主黨都係，程度分別）。但明明你睇啲數字全部好靚，失業率低，人工加，零售數字好，公司盈利又勁，股市又好（至少直到上個月都仲係）。但點解大家都覺得經濟唔好？主要係驚通脹。作者就認為媒體嘅報導只集中於通脹。咁呢啲嘢關你乜事？關事，因為，拜登民望不停低，民主黨好大機會2022年甚至2024年都重挫。咁就令佢有機會做啲嘢了。會做乜？除咗之前講過嘅重手打擊通脹外，亦可以留意會拎中國開刀 — 記唔記得侵侵幾時加關稅？正係2018年3月 —上任嘅第二年，中期大選前。

FB Post Summary — SPY+QQQ收你1%。古靈精怪東南亞。勞蘇KOL。DocuSign

18. SPY+QQQ收你1% — 銀聯出咗隻新基金（我估會入強積金吧？），就係買返美股標普指數，同埋納指。但收你1%管理費！ 咁我點解唔自己買SPY同QQQ？

19. 古靈精怪東南亞— 就係講隻GRAB，都算係生不逢時。故事就無敵的，當然估值都係一個問題（但睇你同乜去比）。SPAC上市後第一日就高開然後跌三成（舊文有寫）。但有趣地星期五晚反而回穩。

20. 勞蘇KOL— 講擁抱熊市，實情美股跌10%都未夠，調整都唔算。但當然好多啲熱炒股跌得好勁，你地應該買唔少，我都有啲。你啲股票搞到你瞓唔著咁點好？咁沽到你瞓得著為止。但，我係真係唔使亦唔會止蝕的，因為我買發夢股都買得少，輸晒我都瞓得著。

21. DocuSign— 講一隻冇乜提過嘅公司，DocuSign，照計你地都冇乜人買。咁做乜講？因為佢一晚跌咗四成。但明明仲要係業績好喎，亦唔只因為大市，佢星期四晚收市出完業績盤後已大插，當時美股期貨仲係升。點解？咪又係估值。 高位成40倍 price to sales添，而家跌咗六成，都仲係近12倍。同場加映，叫咗你唔好太急進。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。