美股波幅大，跌幅唔大，但好多公司已經52星期新低。11月 各種資產類別嘅表現：美股 外國股 債券 商品 REIT．GRAB 上市大插．侵侵SPAC嘅嘢．SnowFlake同 OKTA 業績後大升．波音大升，我隻期權都大升，多謝喎 (Patreon)

美股波幅大，跌幅唔大，但好多公司已經52星期新低

11月 各種資產類別嘅表現：美股 外國股 債券 商品 REIT

GRAB 上市大插

侵侵SPAC嘅嘢

SnowFlake同 OKTA 業績後大升

波音大升，我隻期權都大升，多謝喎

1. 歡迎新舊讀者。我想講嘅係，呢一刻嘅Patreon讀者人數，同上個月係一樣嘅。即係點？即係上個月冇增長過。原因好多，可能我寫得差，又或者市況差。但相信仲有啲讀者係舊年年費，而張信用卡到咗期，所以今個月扣唔到數，都相當多的

2. 好啦，邏輯問題嚟啦喎：「扣唔到數嘅，又點會睇到呢篇文呢段嘢？」。咁首先，我會在Facebook講下。另外，如果係你朋友嘅，可以話佢知。仲有，你自己都可以留意下，如果忽然間新一個月收唔到文，好可能係信用卡到咗期。

美股波幅大，跌幅唔大，但好多公司已經52星期新低

3. 正如星期三講，美股市況近兩星期的確十分波動。話差呢？唔係太差，視乎你睇邊個指數，同埋計收市定intra day，但三大指數應該講緊回調大約5%左右，可以講係好普通嘅調整，但氣氛當然差。同埋日升日跌咁，都幾難捉。

4. 另外仲有，早排都有講過，美股近期嘅市寬比較差（咩叫市寬？睇舊文），即係雖然指數好似唔係好差，但好多股票都大跌（你應該感同身受）。呢個圖都貼過，雖然指數仲在高位，但見到羅素3000指數，差不多300隻股票係52星期新低—而個圖係11月24日的，之後更慘烈

5. 呢個係另一個睇法，睇52星期新高 vs 新低嘅股票數目，兩者相減。見到呢期多咗好多公司跌破52星期新低

6. 更不用講，美股近期好多時都係升少少跌返多多，仲有唔少日子係單日轉向，甚至臨收市先大跌。例如星期三晚，我寫話道指由升500變做跌200，點知到收市係跌近500的

7. 急跌嘅唔少都係啲高估值嘅股票，亦係好多人早排鍾意買嘅嘢。我估非Patreon嘅街外人好多都輸得幾勁，呢度嘅讀者應該冇咁側埋一邊，但都難免會輸錢。正常的。

8. 對我嚟講影響不大，唯一想提大家嘅係，你要留意返冬令時間，又凍，加上我而家早咗瞓，所以好多時我寫文時都未收市。況且你見篇文可能五點出，但我可能寫咗幾個鐘。如果見到收市情況同我寫嘅唔同，就明白點解啦。反而以前我係好多時差不多收市先開始寫，寫完成早餐，然後先瞓。但當然咁唔多健康，就另一個問題。

11月 各種資產類別嘅表現：美股 外國股 債券 商品 REIT

9. 遲下可能每個月都講下呢個圖，就係睇下每個月嘅各種資產走勢。當然呢度差不多所有時間都講股票，債極少，樓都好少。仲要近期多數只講美股。但，即使你冇買，都可以了解下個世界發生乜事。

10. 仲有，佢括號入面嘅，就係嗰啲資產類別嘅ETF。當然唔止得一隻，但可以係個起點畀你去睇。例如想買垃圾債券嘅，應該買乜ETF

11. 留意十一月，真係差不多買乜都輸，爭在多定少。斷估你唔去買TIPS（抗通脹債券，你當美國iBond啦）。特別留意嘅係，美股已經企得幾硬，納指好似有得升少少，標指都只係跌1%。但你睇，新興市場都輸3%，成熟市場（我都有買隻VEA）仲差，輸4.6%。新興市場唔計中國呢？隻EMXC都差不多輸3%（表冇，但我以前寫過）。當然去到港股咁輸7.5%就十分極品。

12. 仲有留意，商品先係重災區，但當然亦多得油價大跌16%，而差不多所有商品指數或ETF都係石油佔極重。唔好以為通脹升溫就走去買商品ETF—雖然年初至今幾好

13. 不過今次順手講埋，如果你睇年初至今呢，就另一回事。大多數你會買嘅嘢都唔會點要輸錢。

14. 仲有可以留意埋，3年或5年嘅回報。留意佢係年度化咗的，即係標普指數5年唔止升咗17.8%，而係升咗127%。

15. 你可以睇到好多嘢，例如強如美股，都不過係一年兩成幾，但已經係史上最勁嘅幾年。你啲友成日想去幾個月升一倍甚至幾倍嘅，可以諗下你冒咗幾大風險同有乜後果

16. 仲有，如果買環球股票呢？都一年一成幾左右，實情係唔錯的。

17. 仲可以留意嘅係，你買美國REIT嘅ETF（VNQ），都係相當不錯，呢幾年樓價同租升嘛，加上低息環境。

18. 最意外嘅係，買TIPS，一年都有5-10%回報，好過你放銀行好多。但當然多得通脹升溫

GRAB 上市大插

19. 最後我想講幾隻個股，早排都講過東南亞，夠窮又多人，人口年青，加上點都會在中美之間左右逢源，仲要未有乜嘢科技大企業。以前講過隻SEA冬海，一路嫌貴唔敢買，早排跌左唔少，可能呢個月買？但實在亦冇乜錢（因為……呢篇文開頭講嘅原因）

20. 之前仲有間公司，我一路留意，而家卒之上市。可惜係用我最憎嘅SPAC去上，仲係史上最大嘅SPAC

21. 邊間？之唔係GRAB．近年有去過東南亞應該知道呢間公司，最初你可以當係東南亞UBER，但佢仲要踢走埋UBER，亦都做埋送餐，甚至做埋Payment．個故事完美架啦。

22. 但結果點？好彩我忍住，冇去叫你地追。公司用SPAC上市，星期四晚叫做正式登場。個股價？就係上面個圖。留意應該改咗編號做GRAB了，唔再係AGC，個市值亦都唔啱，唔好以為得幾億美金市值好抵買（而家市值大約320億。點計？因為佢合併作價400億，高位插咗兩成）

23. 仲有，昨日係收11蚊左右（見唔見條虛線？），今日一開13蚊，升18%。即係，你一開市去追，唔止輸兩成，係輸33%．

24. 當然，你可以話不能完全怪SPAC，就算用傳統IPO都可能有呢個情況。而講到尾都係睇間公司，所以我只係會建議你唔好完全合併前飛入去。呢隻你任何位買都輸錢。

25. 而家呢？都仲可以之後詳細計下數，但似乎係值得留意的。當然不能直接比，但隻SEA都1500億市值，咁一隻GRAB去到幾百億，唔算過份。雖然公司當然係冇錢賺。記唔記得星期三晚先講過，唯獨係美股先比較優待呢啲冇錢賺嘅公司？又睇下呢間點。

侵侵SPAC嘅嘢

26. 之前一路都冇講隻 侵侵SPAC DWAC。早排都成為網上熱話。首先講講最新情況，間Trump Media配股集資。隻DWAC就盤前抽咗上去，升差不多30%。但你開市追嘅，就已經輸超過10%

27. 當然你可以話，如果你早早買嘅，而家仲升緊幾倍。但你係咪早早買嗰啲？你見絶大多數時間買，都係輸錢嘅。

28. 特別係炒到最勁嗰日，你望下右下角，見過175蚊，而家得返四份一。實不相瞞，嗰日我都有試過去追，但直頭中間暫停交易。結果都買唔到，逃過一劫

29. 當然的確有人賺咗錢，但又係嗰個問題，你買得幾多？輸錢嗰啲又會唔會出聲講？況且你習慣咗咁玩，之後對你都唔會係好事。

SnowFlake同 OKTA 業績後大升

30. 另外想講隻SnowFlake，冇叫你買，我冇買過，冇推過，亦完全唔打算買。純個案討論。呢隻嘢都算係往年嘅神奇股，2020年9月上市，一上就一個開。估值當然超貴。

31. 但去到今年呢？年初至今都只係升27%，並唔係特別好。仲要有13%係星期四晚升嘅。發生乜事？就係出咗業績，而交到貨，達到分析員嘅預期

32. 啟示係：至少呢啲公司，如果交到貨嘅，都仲有得升，仲支持到個估值。證明個市況都唔係十分差。

33. 同樣情況嘅，仲有隻OKTA，亦係貴嘢（但好似冇SnowFlake咁誇張），亦係剛出咗業績，亦係大升。呢隻之前有略講過下，計埋星期四呢下，年初至今都仲要跌超過10%。一路有諗過買，仲係有打算的，但暫時都未係好高priority，都話冇錢。（因為……呢篇文開頭講嘅原因）

波音大升，我隻期權都大升，多謝喎

34. 最後係……波音。升7%喎，除咗係跟個市升，亦因為之前因為病毒變種急插，而家反彈。而仲有最新消息係中國出返個適航許可，但當然仲未知道幾時會復飛。不過都夠股價彈上

35. 我買嘅係，波音期權（故事在呢度，呢度，同呢度）。咁當然啦，波音升7%喎，我隻期權就大升56%．

36. 問題係，隻嘢我5.5買嘅，而家輸咗八成。亦因為當時到而家，隻波音都跌咗10%。特別係早排病毒變種。

37. 最初買，係因為估中國會大手買波音飛機。結果仲未發生，而我隻嘢下年1月底就到期。我仍然相信會發生，但係咪1月底之前？就唔知。就算真係1月底前成事，我隻嘢輸錢嘅機會都仲係極大。

38. 教訓？你估中一樣嘢，同真係可以賺到錢，真係兩回事。特別係如果你仲要唔買正股的話，變數更多。

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。