美股波幅唔算好大，但好難捉摸。 蘋果創歷史新高。恒指真係見底！我啲揀股都略為…..跑贏大市咁咯。 大學生人工加得少過高中學歷員工。得美股先優待啲蝕錢科技股。成功家族有乜秘訣？Buy the Dip 逢低買入嘅文化點形成？ (Patreon)

快評兩句  — 美股波幅唔算好大，但好難捉摸

大師冇點你 — 蘋果創歷史新高。

大師冇點你 —恒指真係見底！我啲揀股都略為…..跑贏大市咁咯

每日一圖— 大學生人工加得少過高中學歷員工。得美股先優待啲蝕錢科技股

Good Read —  成功家族有乜秘訣？Buy the Dip 逢低買入嘅文化點形成？

FB Post Summary — 幾耐冇專心食過一餐飯？信報月刊。蘋果新高

1. 正式嚟到十二月，多謝各位新舊讀者。

快評兩句  — 美股波幅唔算好大，但好難捉摸

2. 除非係做咗槓杆或者滿手契媽股發夢股，否則呢排美股嘅郁動，唔算太大。即使上星期五講緊道指跌1000點，都只係3%不到。

3. 但大市呢排嘅走勢係相當飄忽嘅。只係一個星期多啲，好似經歷咗好多嘢。先係上星期一，聯儲局主席鮑威爾連任，但市場升一下即時急跌。到上星期五，爆出話omicron 變種，道指跌成千點。到今個星期？先係星期一話唔擔心病毒，反彈。星期二又嚟個鮑威爾忽然變鷹

4. 到剛剛呢，星期三晚，原本又話完全唔擔心變種。道指升500點，但到美國出現第一單嘅新聞一出，道指由升500變咗跌200點（好彩我夠夜瞓睇埋，所以有時點解我鍾意好夜先寫，因為等埋收市。但呢排難啲，一來天氣凍，二來冬令，三來都話鑽嘢）

5. 正如我講，真係冇路捉，好飄忽。但你話好差咩？又未算。波幅又唔算好大，但總之就係全無方向，仲有單日轉向。

6. 如果你係day trade嘅，可能幾頭痕（又或者有人當係機會）。如果你做槓杆或者買發夢股嘅，都可能有啲擔心。但如果正正常常買啲大嘢，縱然呢排有機會輸錢，但唔應該係咩令你好擔心嘅嘢。

7. 嚟緊呢幾日如果市況靜啲，我會分享返我十一月買嘅嘢（多數都輸錢），同埋講下十二月買嘅嘢（好可能買完先話你知）。但好簡單講，你真係唔使去理太多呢啲一兩日嘅波幅。當然正路地，今年應該有啲錢賺嘅，咁例如想獎勵下自己呀，鎖定少少利潤都可以。但真係唔好本末倒置。我由搞呢個Patreon至今，都仲係一股都冇沽過（唔計啲擺明短炒嘅嘢啦，例如上年嘅Tesla）。但當然，錢係你的，你唔使一定信晒我。

大師冇點你 — 蘋果創歷史新高

8. 實情在Facebook 已經寫得幾詳細，不過真係冇呃你，一路我都持有蘋果。仲要昨日已經寫過，留意到近期極之強勢。星期三晚就破埋頂，歷史新高，都幾勁。特別留意好多人都仲係話公司見頂，飽和，冇創意。但呢啲只係好表面嘅嘢，企業最緊要係乜？賺錢。仲有一樣嘢，蘋果嘅估值，向來都唔算太過火，在Big Tech中都算係平（鍾意可以睇舊文）。講緊8倍Price to Sales。咁即係高定低？你可以同其他公司比下，例如Nvidia 就超過30倍。當然冇話平嘅實抵買，今年Nvidia 股價都跑贏好多，但，就真係有乜差池就會大插。反而你見蘋果就算業績唔得，頂多咪得5%。

大師冇點你 —恒指真係見底！我啲揀股都略為…..跑贏大市咁咯

9. 講少少港股，都真係之前一講恒指差不多去到見底位，果然星期三恒指就真係有啲反彈。當然之前一路都有呢啲彈一日又跌過，今次都難講真係見晒鐵底。但至少見到都有啲支持。特別唔好忘記星期二晚美股係大跌的。

10. 另外，之前都未特別睇，11月港股大跌之中，表現最好嘅恒指成份股係邊啲？最好嘅五隻，我都有兩隻（中海外688同華潤置地1109），算係咁。而最差嘅五隻，我一隻都冇。所以都真係仲可以跌得少過大市

11. 同樣道理，年初至今升得最多嘅10隻成份股，有兩隻我都有份（長實1113同長江基建1038），當然長實得好少，但長江基建就真係積埋都有一定金額的

每日一圖— 大學生人工加得少過高中學歷員工。得美股先優待啲蝕錢科技股

12. 大學生人工加得少過高中學歷員工—美國嘅情況。首先留意，唔係指兩者嘅人工（照計大學生仲係高過高中學歷員工一截），而係指加薪嘅幅度。過去廿年都見到，一般係大學生加人工多過高中學歷嘅。但近幾年收窄好多，去到最近更加係掉轉。原因？有好多。最新嘅當然係因為疫情下好多飲食業同司機之類嘅工作要 大加人工，而多數唔係大學生做。早少少嘅，太多大學生當然都係問題。當然仲有科技之下，好多中產職位流失晒，反而藍領工作一路都仲要人做。

13. 得美股先優待啲蝕錢科技股 — 之前都有寫，美股跑贏全球，好大程度因為啲科技股比重高。但仲有留意一樣嘢，好多蝕錢嘅公司，在美國股價一樣相當唔錯，但在歐洲同亞洲，投資者就唔BUY。亞洲嘅情況固然你可以話關中國打壓事，但你見其他國家都係咁上下的。當然亦可以話根本啲公司就唔係同一類，美股嘅公司係龍頭，甚至有啲歐洲亞洲公司都去美國上（例如SEA東海或者Coupang之類）

Good Read —  成功家族有乜秘訣？Buy the Dip 逢低買入嘅文化點形成？

14. 成功家族有乜秘訣？ — 唔關金融事，有點長但唔深嘅文。講顯赫嘅家族。唔係李嘉誠或者洛克菲勒甚至甘迺迪之類，而係講科學同文化。例如居禮夫人家族，兩代人五個諾貝爾獎嗰類。係咩原因？遺傳？但照計啲基因隔兩代已經冇晒。因為特權階級世襲？但呢班人亦唔係點特別有錢，亦唔係咩貴族或特別大權力。係咪家教？又好似唔係。定只係因為其他人唔敢試，但佢地細細個就覺得自己有機會做到最好？幾有趣嘅文。

15. Buy the Dip 逢低買入嘅文化點形成？ —Charlie Bilello嘅舊文，依然值得睇。留意係九月嘅文，嗰時仲係相當亢奮，美股啲小朋友覺得股票係只升不跌嘅，凡親跌就買更多啦。呢個文化點形成？實情好簡單，因為呢班人冇真係見過熊市。甚至2020年3月都唔算—計幅度當然係股災，但太快反彈了。美股好多小朋友，係冇見過好似港股呢幾年咁令人沮喪嘅市況的。你睇，好多人都係被自己最新嘅經驗所局限。即使係有幾年經驗嘅美股投資者，都真係未見過2000年之後美股跑輸十年嘅情況

FB Post Summary — 幾耐冇專心食過一餐飯？信報月刊。蘋果新高

16. 幾耐冇專心食過一餐飯？ — 呢篇應該好睇，不過可能講得太多嘢，應該拆咗兩篇？先講後生仔雖然都係「食一餐少一餐」，但佢地冇呢種自覺。然後講「珍惜眼前人」係好多人矯情嘅講法，好多人就算有時間，都唔係拎去陪屋企人的。然後講到「最好食嘅一餐飯」之類，必然係同人，同情有關。最後先到我嘅重點：原來我都唔係好多餐飯，可以好專心咁食。細個就快手食完出去，大個就留意朋友同女仔，而家就掛住睇嘢諗嘢，為咗寫Patreon

17. 信報月刊　—冇乜特別，講返上個月嘅信報月刊，七仔已經冇。上個月嗰期我講樓市，你鍾意可以上網付費睇法，我費事呢度貼。另外，新一期都出咗，我講Metaverse

18. 蘋果新高 —上面「大師冇點你」都講咗部份，FB Post再講埋投資路上，好多其他誘惑，總有好多嘢會 distract你。實情做人都一樣

================================================================

我本書：各大書局均有代售，或者上HomeBlogger網頁買，自己上尖沙嘴拎或者加廿蚊叫順豐畀你。HKTVMall都有但唔包日日有貨

Facebook Page：「君子馬蘭頭」ivanliresearch．唔係自吹自擂，堅好睇。記住幫手like and share．

Instagram：@ivanliresearch．可能得六成金融嘢，其他飲飲食食無聊嘢。但勝在夠快手，有時啲即市嘢我在嗰邊貼。有時Facebook Page嘅文都會貼過去。

Patreon文章目錄：Google Document，由史上第一篇開始，可以跟題目搵，一般我都將啲公司名塞晒落題目名。預每星期六或日會更新。

勞蘇基金：50萬港紙入場，暫定2%管理費 20%表現費，應該隨時可以拎錢走。歡迎PM我報名，現階段冇任何commitment，絶對唔使畀錢住，到時你亦可以反口唔畀。亦都唔使怕答應咗到時反口，絶冇問題，純粹等我知道有幾多人有興趣。我預會有好多人到時因為種種理由唔加入的。

聲音版/錄影版：慎防有人唔知，係有樣咁嘅嘢的。方便唔想睇字/坐車聽/公司聽。一個Post有齊純聲音（mp3）同埋影像版（我朋友碌住電話畫面讀）。 20蚊或40蚊會員限定。Sample呢度，免費試聽。